អ.ស.ប៖« ទង្វើរបស់ក្រុមឧទ្ទាមស៊ីរីដែលសម្លាប់ទាហានរដ្ឋាភិបាល ជាឧក្រិដ្ឋកម្មសង្រ្គាម »
នៅថ្ងៃព្រហស្បតិ៍ ទី១ វិច្ឆិកាម្សិលមិញ ក្រុមអ្នកបះបោរប្រឆំាងរដ្ឋាភិបាលស៊ីរីបានបើកឆាកសម្លាប់ទាហានរដ្ឋាភិបាលដែលខ្លួនចាប់បាន។ ឆាកសម្លាប់ទាហានរដ្ឋាភិបាលស៊ីរីនេះត្រូវបានក្រុមសកម្មជនបង្ហាញឡើងតាមរយៈខ្សែអាត់វីដេអូមួយឈត់។ នៅថ្ងៃសុក្រ ទី២ វិច្ឆិកានេះ ឧត្តមស្នងការដ្ឋានសិទ្ធិមនុស្សនៃអង្គការសហប្រជាជាតិបានចាត់ទុកទង្វើរបស់ក្រុមអ្នកបះបោរថា ជាឧក្រិដ្ឋកម្មសង្រ្គាម។
ចុះផ្សាយនៅថ្ងៃ៖
ស្តាប់ - ០១:១១
នៅក្នុងខ្សែអាត់វីដេអូដែលផ្សព្វផ្សាយដោយក្រុមសកម្មជនអ្នកប្រឆំាង គេឃើញក្រុមឧទ្ទាមកំពុងវាយប្រហារទាហានរដ្ឋាភិបាលរងរបួសប្រមាណជា ១០នាក់ មុននឹងដាក់តម្រៀបទាហានទំាងនោះនឹងដី រួចស្រែកជេរប្រមាជថា ជាឆ្កែរបស់លោកប្រធានាធិបតីស៊ីរី Assad។ នៅមុនសម្លាប់ទាហានម្នាក់ៗ ពួកឧទ្ទាមបានប្រើឃ្លាថា « ឯងមិនដឹងទេឬ ថាយើងជាប្រជាជននៅក្នុងប្រទេសស៊ីរី ? »។ ទាហានរូបនោះបានឆ្លើយតបវិញថា « ខ្ញុំសូមស្បថមុខព្រះ ខ្ញុំមិនមែនជាអ្នកបាញ់សម្លាប់ជនស៊ីវិលទេ »។
អង្គការការពារសិទ្ធិមនុស្ស Amnesty International បានបរិហារលើរូបភាពគួរឲ្យរន្ធត់ និងថា ឧក្រិដ្ឋកម្មសង្រ្គាមបាននិងកំពុងកើតមានឡើងនៅក្នុងប្រទេសស៊ីរី។ ចំណែកឧត្តមស្នងការដ្ឋានសិទ្ធិមនុស្សនៃអង្គការសហប្រជាជាតិក៏បានចាត់ទុកទង្វើរបស់ក្រុមអ្នកបះបោរនេះថា ជាឧក្រិដ្ឋកម្មសង្រ្គាម និងបានអំពាវនាវឲ្យគ្រប់ភាគីពាក់ព័ន្ធគោរពនូវច្បាប់មនុស្សធម៌អន្តរជាតិ។ យ៉ាងណាក៏ដោយ ឧត្តមស្នងការដ្ឋានសិទ្ធិមនុស្សនៃអង្គការសហប្រជាជាតិបានបញ្ជាក់ថា គេពិបាកនឹងធ្វើការផ្ទៀងផ្ទាត់ឲ្យបានត្រឹមត្រូវដើម្បីវែករកមុខជនដៃដល់។
សូមរំលឹកជូនថា តំាងពីថ្ងៃផ្ទុះវិបត្តិក្នុងប្រទេសស៊ីរីនាដើមខែមីនា ឆ្នំា ២០១១ មានមនុស្សស្លាប់ជាង ៣៦ ០០០នាក់ហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ