ប្រេសិតអ.ស.ប.-សម្ព័ន្ធអារ៉ាប់ចង់ឲ្យចិនមានតួនាទីសកម្មក្នុងការដោះស្រាយវិបត្តិស៊ីរី
លោកឡាក់ដារ ប្រាហ៊ីមី (Lakhdar Brahimi) ប្រេសិតពិសេសរបស់អ.ស.ប. និងសម្ព័ន្ធអារ៉ាប់ បានថ្លែងនៅថ្ងៃពុធនេះថា លោកចង់ឲ្យចិនខិតខំឲ្យបានកាន់តែសកម្ម ក្នុងការជួយបញ្ចប់អំពើហិង្សា នៅស៊ីរី។ លោកប្រាហ៊ីមីបានថ្លែងបែបនេះ នៅពេលលោកជួបជាមួយលោកយ៉ាង ជៀឈី (Yang Jiechi) រដ្ឋមន្រ្តីក្រសួងការបរទេសចិន នៅទីក្រុងប៉េកាំង ក្នុងដំណើរទស្សនកិច្ចរយៈពេល២ថ្ងៃ។
ចុះផ្សាយនៅថ្ងៃ៖
ស្តាប់ - ០២:០៨
លោកប្រាហ៊ីមីបានទៅដល់ប្រទេសចិន កាលពីថ្ងៃអង្គារ ម្សិលមិញ ក្រោយពីបានបញ្ចប់ដំណើរទស្សនកិច្ច នៅរុស្ស៊ី។ ចិន និងរុស្ស៊ី ដែលជាសមាជិកអចិន្រ្តៃយ៍នៃក្រុមប្រឹក្សាសន្តិសុខអ.ស.ប. ធ្លាប់បានប្រើសិទ្ធិវ៉េតូរហូតដល់ទៅ ៣លើក ជំទាស់មិនឲ្យក្រុមប្រឹក្សាសន្តិសុខចេញសេចក្តីសម្រេច ទាក់ទងនឹងសំណុំរឿងស៊ីរី។
ប្រសិតពិសេសរបស់អ.ស.ប. និងសម្ព័ន្ធអារ៉ាប់ បានលើកឡើងថា លោកសង្ឃឹមថាចិននឹងអាចដើរតួនាទីយ៉ាងសកម្ម ក្នុងការជួយដោះស្រាយវិបត្តិស៊ីរី ក៏ប៉ុន្តែ មិនបានបញ្ជាក់លម្អិតច្បាស់លាស់ថា តើលោកចង់ឲ្យចិនធ្វើអ្វីខ្លះនោះទេ?
ទោះជាយ៉ាងណា គេសង្កេតឃើញជាទូទៅថា ចិនតែងតែប្រកាន់យកនូវគោលការណ៍មួយ គឺប្រឆាំងជាប់ជានិច្ចទៅនឹងការលូកដៃពីខាងក្រៅ ចូលទៅជ្រៀតជ្រែកកិច្ចការផ្ទៃក្នុងរបស់ប្រទេសដទៃ។ កាលពីក្នុងអំឡុងមហាសន្និបាតអ.ស.ប. នៅញូវយ៉ក កាលពីខែមុន លោកប្រាហ៊ីមី ក៏ធ្លាប់បានជួបលោកយ៉ាង ជៀឈីម្តងរួចមកហើយដែរ។ នៅពេលនោះ លោករដ្ឋមន្រ្តីការបរទេសចិនបានលើកឡើងបញ្ជាក់ពីជំហររបស់ចិនថា ដំណោះស្រាយវិបត្តិនៅស៊ីរី គឺត្រូវតែដោះស្រាយតាមផ្លូវនយោបាយ តាមរយៈការចរចាគ្នារវាងភាគីជម្លោះ ក្នុងប្រទេសស៊ីរី ដោយគ្មានការជ្រៀតជ្រែកពីខាងក្រៅ។
នៅក្នុងជំនួបសាជាថ្មី នៅថ្ងៃពុធនេះ លោកយ៉ាង ជៀឈី បានប្រាប់អ្នកសារព័ត៌មានថា លោកបានថ្លែងអំណរគុណចំពោះកិច្ចខិតខំប្រឹងប្រែងរបស់លោកប្រាហ៊ីមី ក្នុងសំណុំរឿងស៊ីរី ហើយថា លោកសង្ឃឹមថា ជំនួបនេះនឹងអាចជួយបង្កើនការយោគយល់គ្នា ក្នុងការស្វែងរកមធ្យោបាយសមស្រប ដើម្បីដោះស្រាយវិបត្តិនៅស៊ីរីនេះ។
គួររំឭកឡើងវិញថា កាលពីវិបត្តិនៅលីប៊ី ចិនក៏ធ្លាប់បានប្រឆាំងនឹងការធ្វើអន្តរាគមន៍យោធាបរទេសដែរ ប៉ុន្តែ នៅពេលក្រុមប្រឹក្សាសន្តិសុខអនុម័តសេចក្តីសម្រេច អនុញ្ញាតឲ្យមានប្រតិបត្តិការយោធាតាមផ្លូវអាកាស នៅលីប៊ី ចិនមិនបានប្រើសិទ្ធិវ៉េតូរបស់ខ្លួននោះទេ គឺបានត្រឹមតែបោះឆ្នោតអនុប្បវាទ ដែលជាការបើកផ្លូវឲ្យមានប្រតិបត្តិការយោធានៅលីប៊ី។ ក្រោយមក ចិន រួមជាមួយនឹងរុស្ស៊ី តែងតែបានចោទប្រទេសលោកខាងលិចថាបានធ្វើហួសពីអ្វី ដែលបានចែងក្នុងសេចក្តីសម្រេចរបស់ក្រុមប្រឹក្សាសន្តិសុខនេះ ហើយឈានទៅបើកប្រតិបត្តិការយោធា ដើម្បីផ្តួលរំលំរបបដឹកនាំរបស់លោកកាដាហ្វ៊ី។ ហេតុដូច្នេះហើយបានជាចិន និងរុស្ស៊ី តែងតែលើកឡើងថា ពួកគេជំទាស់មិនឲ្យមានក្រុមប្រឹក្សាសន្តិសុខលូកដៃចូលក្នុងសំណុំរឿងស៊ីរី ព្រោះពួកគេខ្លាចជាន់ដានវិបត្តិលីប៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ