លោកអូបាម៉ាទៅតំបន់គ្មានកងទ័ពនៅព្រំដែនកូរ៉េ មុននឹងចូលរួមក្នុងជំនួបកំពូលនុយក្លេអ៊ែរ
ចុះផ្សាយនៅថ្ងៃ៖
ស្តាប់ - ០៤:០១
លោកអូបាម៉ាបានទៅដល់ប្រទេសកូរ៉េខាងត្បូង នៅថ្ងៃអាទិត្យនេះ ដើម្បីចូលរួមក្នុងជំនួបកំពូលនុយក្លេអ៊ែរ ដែលនឹងបើកធ្វើនៅថ្ងៃចន្ទ និងថ្ងៃអង្គារ នៅទីក្រុងសេអ៊ូល។ មុននឹងជួបទ្វេភាគីជាមួយប្រធានាធិបតីកូរ៉េខាងត្បូង លោកអូបាម៉ាបានធ្វើដំណើរទៅដល់តំបន់គ្មានកងទ័ពតាមបណ្តោយព្រំដែនកូរ៉េទាំងពីរ។ នេះគឺជាលើកទីមួយហើយ ដែលលោកអូបាម៉ាធ្វើដំណើរទៅទស្សនកិច្ចតំបន់គ្មានកងទ័ព។
លោកអូបាម៉ាបានចំណាយពេលប្រមាណ ១០នាទី នៅលើប៉មយាម ដែលនៅក្បែរខ្សែបន្ទាត់ព្រំដែនជាមួយកូរ៉េខាងជើង។ ឈរនៅពីក្រោយកញ្ចក់ការពារគ្រាប់ ប្រធានាធិបតីអាមេរិកបានប្រើកែវយឹតឆ្លុះមើលទៅខាងទឹកដីកូរ៉េខាងជើង។ ក្នុងអំឡុងពេលនោះ លោកអូបាម៉ាក៏បានជួបសំណេះសំណាលជាមួយទាហានអាមេរិកផងដែរ។ គួរបញ្ជាក់ថា ទាហានអាមេរិកចំនួន ២៨ ៥០០នាក់ កំពុងឈរជើងនៅក្នុងទឹកដីកូរ៉េខាងត្បូង។
កន្លងមក លោកអូបាម៉ាធ្លាប់បានទៅបំពេញទស្សនកិច្ចនៅកូរ៉េខាងត្បូង ចំនួន ២លើករួចមកហើយ ក៏ប៉ុន្តែ ទើបតែលើកនេះទេ ដែលលោកធ្វើដំណើរទៅដល់តំបន់គ្មានព្រំដែន។ ប៉ុន្តែ លោកអូបាម៉ាក៏មិនមែនជាប្រធានាធិបតីអាមេរិកលើកទីមួយដែរ ដែលបានធ្វើដំណើរទៅដល់តំបន់គ្មានកងទ័ព។ លោក Ronald Reagan បានទៅមើលតំបន់គ្មានកងទ័ព នៅឆ្នាំ១៩៨៣ លោក Bill Clinton នៅឆ្នាំ១៩៩៣ និងលោក George W Bush នៅឆ្នាំ២០០២។
ដំណើរទស្សនកិច្ចរបស់ប្រធានាធិបតីអាមេរិក ទៅកាន់តំបន់គ្មានព្រំដែន គឺជានិមិត្តរូបមួយ នៃសម្ព័ន្ធភាពយោធាអាមេរិក-កូរ៉េខាងត្បូង។ វាជាសារមួយទៅកាន់រដ្ឋាភិបាល និងប្រជាជនកូរ៉េខាងត្បូង ដើម្បីបញ្ជាក់អំពីភាពប្តូរផ្តាច់របស់កងទ័ពអាមេរិក ក្នុងការការការពារកូរ៉េខាងត្បូង ពីការវាយប្រហារណាមួយរបស់កូរ៉េខាងជើង។ បើតាមមន្រ្តីរដ្ឋាភិបាលអាមេរិក ដំណើរទស្សនកិច្ចរបស់លោកអូបាម៉ា ទៅកាន់តំបន់គ្មានព្រំដែន នៅថ្ងៃអាទិត្យនេះ ក៏ជាសារមួយដែរ ទៅកាន់មេដឹកនាំកូរ៉េខាងជើង។
បន្ទាប់ពីបំពេញទស្សនកិច្ចនៅតំបន់គ្មានកងទ័ព លោកអូបាម៉ាបានជួបជាមួយលោកលី ម្យ៉ុងបាក់ នៅទីក្រុងសេអ៊ូល។ ក្នុងជំនួបនេះ លោកអូបាម៉ាបានឆ្លៀតព្រមានកូរ៉េខាងជើង អំពីគម្រោងបាញ់សាកល្បងរ៉ុកកែត ដែលក្រុងព្យុងយ៉ាងអះអាងថា ជារ៉ុកកែតផ្ទុកផ្កាយរណប ក៏ប៉ុន្តែ អាមេរិក និងសម្ព័ន្ធមិត្តសង្ស័យថាជាការបាញ់សាកល្បងមីស៊ីលអន្តរទ្វីប។
យោងតាមសេចក្តីរាយការណ៍របស់ទីភ្នាក់ងារព័ត៌មានជប៉ុន និងយោងតាមមន្រ្តីកូរ៉េខាងត្បូង កូរ៉េខាងជើងបានដឹកតួរ៉ុកកែត ទៅដល់កន្លែងបាញ់ហើយនៅថ្ងៃអាទិត្យនេះ។
រ៉ុកកែតបង្ហោះផ្កាយរណប គឺជារ៉ុកកែតដែលប្រើបច្ចេកវិទ្យាដូចគ្នាសុទ្ធសាធទៅនឹងមីស៊ីលអន្តរទ្វីប។ ក្រុមប្រឹក្សាសន្តិសុខអ.ស.ប.ធ្លាប់បានចេញសេចក្តីសម្រេចមួយ កាលពីឆ្នាំ២០០៩ ហាមឃាត់កូរ៉េខាងជើងមិនឲ្យធ្វើការបាញ់សាកល្បងអ្វីក៏ដោយ ដែលប្រើបច្ចេកវិទ្យាមីស៊ីលអន្តរទ្វីប។
នៅថ្ងៃចន្ទស្អែក លោកអូបាម៉ា ព្រមទាំងប្រមុខរដ្ឋ និងប្រមុខរដ្ឋាភិបាលផ្សេងទៀត មកពីប្រទេសជាង ៥០ និងប្រមុខអង្គការធំៗមួយចំនួនទៀត (អ.ស.ប. ទីភ្នាក់ងារថាមពលបរមាណូអន្តរជាតិ សហភាពអឺរ៉ុប និង Interpol) នឹងចូលរួមក្នុងជំនួបកំពូលស្តីពីសន្តិសុខនុយក្លេអ៊ែរ ដែលរៀបចំធ្វើនៅក្នុងទីក្រុងសេអ៊ូល។
មេដឹកនាំប្រទេសដែលមានអាវុធនុយក្លេអ៊ែរ (អាមេរិក រុស្ស៊ី ចិន អង់គ្លេស បារាំង ឥណ្ឌា ប៉ាគីស្ថាន និងអ៊ីស្រាអែល) សុទ្ធតែគ្រោងមកចូលរួមក្នុងជំនួបកំពូលថ្ងៃស្អែកនេះ ដែលជាជំនួបកំពូលសន្តិសុខនុយក្លេអ៊ែរលើកទី២។ ជំនួបកំពូលលើកទី១ ត្រូវបានរៀបចំធ្វើ នៅទីក្រុងវ៉ាស៊ីងតោន កាលពីឆ្នាំ២០១០។
ជំនួបកំពូលស្តីពីសន្តិសុខនុយក្លេអ៊ែរ គឺផ្តោតជាសំខាន់ទៅលើការការពារសារធាតុនុយក្លេអ៊ែរ (អ៊ុយរ៉ាញ៉ូម និងភ្លុយតូញ៉ូម) កុំឲ្យធ្លាក់ក្នុងដៃពួកភេរវជន។ វាជាជំនួបកំពូល ដែលកើតចេញពីគំនិតផ្តួចផ្តើមរបស់លោកអូបាម៉ា ក្រោយពីសុន្ទរកថា នៅសាធារណរដ្ឋឆែក ឆ្នាំ២០០៩ ដែលលោកលើកឡើងអំពីបំណងចង់ឲ្យពិភពលោកឈប់មានអាវុធនុយក្លេអ៊ែរ។
សំណុំរឿងនុយក្លេអ៊ែរកូរ៉េខាងជើងអាចជាប្រធានបទដ៏ក្តៅគគុកមួយ នៅក្នុងជំនួបកំពូលនៅសេអ៊ល បើទោះជាវាមិនស្ថិតក្នុងរបៀបវារៈផ្លូវការក៏ដោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ