ជាង ២ឆ្នំា មុនចាកចេញពីសេតវិមាន លោកអូបាម៉ាពិនិត្យមើលឡើងវិញនូវនយោបាយការបរទេស
ចុះផ្សាយនៅថ្ងៃ៖
ស្តាប់ - ០៧:២០
នៅថ្ងៃពុធ ទី២៨ ឧសភានេះ លោកប្រធានាធិបតីអាមេរិកបារ៉ាក់ អូបាម៉ាប្រកាសអំពីនយោបាយការបរទេសរបស់លោកសម្រាប់ថ្ងៃខាងមុខ ពិសេសមុននឹងអាណត្តិរបស់លោកត្រូវចប់ជាស្ថាពរក្នុងរយៈពេលជាង ២ឆ្នំាទៀត។ ការដែលលោកអូបាម៉ាបានពិនិត្យមើលឡើងវិញនូវនយោបាយការបរទេសរបស់ខ្លួនពេលនេះបានធ្វើឡើង ចំពេលដែលអាមេរិកហាក់ដូចជាលែងមានទឹកមាត់ប្រៃក្នុងការជួយដោះស្រាយបញ្ហាពិភពលោកមួយចំនួនដែលបាន និងកំពុងបន្តកើតមានយ៉ាងក្តៅគគុកនាពេលសព្វថ្ងៃ។ ដោយឡែកនៅថ្ងៃអង្គារ ទី២៧ ឧសភាម្សិលមិញ លោកប្រធានាធិបតីអាមេរិកបានប្រកាសពីការដកទ័ពអាមេរិកទំាងអស់ចេញពីប្រទេសអាហ្វហ្កានីស្ថាននៅដំណាច់ឆ្នំា ២០១៦។
គឺនៅសាលានាយទាហានជាន់ខ្ពស់អាមេរិក West Point ដែលលោកប្រធានាធិបតីអាមេរិកបារ៉ាក់ អូបាម៉ាត្រូវធ្វើសេចក្តីថ្លែងការណ៍អំពីនយោបាយការបរទេសរបស់លោក។ យូរៗម្តង លោកអូបាម៉ាតែងតែបានប្រកាសឲ្យដឹងនូវនយោបាយការបរទេសរបស់លោក។ លោកធ្លាប់បានធ្វើជាហូរហែតំាងពីលោកបានចូលកាន់តំណែងប្រធានាធិបតីអាមេរិកដំបូងក្នុងឆ្នំា ២០០៩។ កាលណោះ លោកបានប្រកាសពីការបិទបញ្ចប់ទំព័រសង្រ្គាមដ៏រុំារ៉ៃនៅក្នុងប្រទេសអ៊ីរ៉ាក់ និងនៅក្នុងប្រទេសអាហ្វហ្កានីស្ថាន។ ក៏ប៉ុន្តែ និងអ្វីដែលបានធ្វើឲ្យគ្រប់គ្នាភ្ញាក់ផ្អើលបន្តិចពេលនេះគឺថា សេចក្តីថ្លែងការណ៍អំពីនយោបាយការបរទេសរបស់លោកអូបាម៉ាពេលនេះបានធ្វើឡើង ជាង ២ឆ្នំា មុននឹងអាណត្តិទី២ របស់លោកត្រូវចប់ជាស្ថាពរ និងនៅក្នុងបរិបទពិភពលោកមួយដែលខុសគ្នាស្រឡះ។
គឺជាបរិបទពិភពលោកមួយដែលអាមេរិកហាក់ដូចជាមិនសូវមានឥទ្ធិពល និងមានគេខ្លាចញញើតដូចមុនទៀតទេ។ វិបត្តិនយោបាយនៅក្នុងប្រទេសស៊ីរី នៅអ៊ុយក្រែន វិបត្តិនយោបាយនៅក្នុងប្រទេសអាហ្រ្វិកមួយចំនួន ឥទ្ធិពលរបស់ប្រទេសចិននៅក្នុងជម្លោះដែនដីនៅសមុទ្រចិន វិបត្តិនុយក្លេអ៊ែរអ៊ីរ៉ង់ដ៏ចម្រូងចម្រាស ទំនាក់ទំនងតានតឹងរវាងអាមេរិក ចិន និងរវាងអាមេរិក រុស្ស៊ី និងកិច្ចចរចាសន្តិភាពមិនបានសម្រេចរវាងអ៊ីស្រាអែល និងប៉ាឡេស្ទីន ទំាងនេះសុទ្ធសឹងជាសំណុំរឿងបច្ចុប្បន្នភាពនៅក្នុងពិភពលោកដែលអាមេរិករបស់លោកអូបាម៉ានៅមិនអាចធ្វើអ្វីកើតទំាងអស់។
អាមេរិកសព្វថ្ងៃលែងជាមហាអំណាចផ្តាច់មុខនៅក្នុងពិភពលោក !
តំាងតែពីដើមមក គ្រប់គ្នាតែងតែនិយាយថា អាមេរិកជាអាណាព្យាបាលពិភពលោក ហើយអាមេរិកខ្លួនឯងក៏នៅតែបានតំាងខ្លួនយ៉ាងដូចនេះដែរ។ តែគេក៏មិនត្រូវភ្លេចទេថា ពីជំនាន់ប្រធានាធិបតីអាមេរិកម្នាក់ ទៅជំនាន់ប្រធានាធិបតីអាមេរិកម្នាក់ គឺមិនដូចគ្នាទេ ហើយបរិបទពិភពលោករបស់ប្រធានាធិបតីម្នាក់ៗក៏ខុសគ្នាទៀត។ ក្នុងជំនាន់លោកប្រធានាធិបតីប៊ូស (Bush) គ្រប់គ្នាបានចាត់ទុកលោកជាប្រធានាធិបតីនិយមសង្រ្គាម ព្រោះលោកប៊ូសជាអ្នកបញ្ឆេះសង្រ្គាមនៅក្នុងប្រទេសអាហ្វហ្កានីស្ថាន និងនៅក្នុងប្រទេសអ៊ីរ៉ាក់។ រីឯជំនាន់លោកប្រធានាធិបតីអូបាម៉ាសព្វថ្ងៃត្រូវបានគ្រប់គ្នាចាត់ទុកថា ជាប្រធានាធិបតីដែលនិយមសន្តិភាព។
គេប្រហែលជាមិនអាចនិយាយពីអសមត្ថភាពរបស់លោកអូបាម៉ានៅក្នុងនយោបាយការបរទេសបានឡើយ តែគេអាចលើកឡើងនូវហេតុផលចំនួនពីរ ទី១ គឺសន្តិភាពនិយមរបស់បុគ្គលអូបាម៉ាដែលបានធ្វើឲ្យលោករារែក អល់អែកក្នុងការប្រើកម្លំាងបាយនៅក្នុងវិបត្តិអន្តរជាតិមួយចំនួន ពិសេសអន្តរាគមន៍យោធានៅក្នុងប្រទេសស៊ីរី។ នយោបាយការរទេសស្រទន់របស់លោកអូបាម៉ាបានធ្វើឲ្យប្រទេសរុស្ស៊ីច្បាមយកតំបន់គ្រីមេរបស់ប្រទេសអ៊ុយក្រែនដោយមិនបាច់ចំណាយឈាមមួយដំណាក់ នយោបាយការបរទេសទន់ភ្លន់របស់លោកអូបាម៉ាបានធ្វើឲ្យប្រទេសចិនកាន់តែអាងចាងឡើងៗក្នុងការក្រសោបយកដែនដីនៅក្នុងសមុទ្រចិន និងនយោបាយការបរទេសស្លូតបូតរបស់លោកអូបាម៉ាបានធ្វើឲ្យរដ្ឋបាលអាមេរិកទទួលស្គាល់ពីភាពបរាជ័យរបស់ខ្លួនក្នុងការស្វែងរកសន្តិភាពនៅតំបន់ដើមបូព៌ា ពិសេសសន្តិភាពរវាងអ៊ីស្រាអែល និងប៉ាឡេស្ទីន។
ហេតុផលទី២ គឺការដែលបរិបទពិភពលោកមានការផ្លាស់ប្តូរ។ ពេលវេលាកាន់តែខិតទៅមុខ អាមេរិកហាក់ដូចជាលែងជាប្រទេសមហាអំណាចផ្តាច់មុខនៅក្នុងពិភពលោកទៀតឡើយ។ អំណាចផ្តាច់មុខមួយនេះហាក់ដូចជាបាននឹងកំពុងចែករំលែកទៅឲ្យប្រទេសផ្សេង មានដូចជាចិន និងប្រទេសរុស្ស៊ីជាដើម។ នៅម្ខាង គឺក្រុមប្រទេសដែលគំាទ្រ និងអាងចិន និងរុស្ស៊ីនៅពីក្រោយ។ នៅម្ខាងទៀត គឺក្រុមប្រទេសដែលគំាទ្រ និងពឹងអាមេរិកឲ្យជួយ។ ពិភពលោកសព្វថ្ងៃមិនមែនជាពិភពលោកដែលបែងចែករវាងប្លុកកុម្មុយនិស្ត និងប្លុកសេរីដូចមុនទេ តែជាពិភពលោកមួយដែលអ្នកខ្លំាងមានច្រើន និងកំពុងដណ្តើមគ្នាធ្វើស្តេច។ គឺពិភពលោករបៀបនេះហើយដែលលោកអូបាម៉ាចំាបាច់ត្រូវតែសើរើ ពិនិត្យឡើងវិញនូវនយោបាយការបរទេសរបស់ខ្លួនថ្ងៃនេះ។
លោកអូបាម៉ាប្រកាសបិទបញ្ចប់បេសកកម្មប្រយុទ្ធរបស់ទ័ពអាមេរិកក្នុងប្រទេសអាហ្វហ្កានីស្ថាន
គឺនៅថ្ងៃអង្គារ ទី២៧ ឧសភាដែលលោកអូបាម៉ាបានប្រកាសឲ្យដឹងអំពីផែនការរបស់លោកទាក់ទងនឹងវត្តមានទ័ពអាមេរិកក្នុងទឹកដីអាហ្វហ្កានីស្ថាន។ បើគិតត្រឹមឆ្នំា ២០១១ វត្តមានទ័ពអាមេរិកក្នុងប្រទេសអាហ្វហ្កានីស្ថានមានចំនួន ១០០ ០០០នាក់ តែសព្វថ្ងៃនេះ នៅសល់ប្រមាណតែ ៣៣ ០០០នាក់ប៉ុណ្ណោះ។ គិតតំាងពីអាមេរិកបានបើកធ្វើសង្រ្គាមនៅអាហ្វហ្កានីស្ថានក្នុងឆ្នំា ២០០១ មកដល់សព្វថ្ងៃ មានទាហានអាមេរិកស្លាប់នៅទីនោះជាង ២ ១០០នាក់។
ដូចការគ្រោងទុក លោកអូបាម៉ាបានប្រកាសបិទបញ្ចប់បេសកកម្មប្រយុទ្ធរបស់ទ័ពអាមេរិកក្នុងទឹកដីអាហ្វហ្កានីស្ថាននៅដំណាច់ឆ្នំា ២០១៤ នេះ ដោយរក្សាទុកទ័ពអាមេរិកតែចំនួន ៩ ៨០០នាក់នៅក្នុងឆ្នំា ២០១៥ និងគ្រោងដកចេញទំាងអស់នៅដំណាច់ឆ្នំា ២០១៦។ បន្ទាប់មក អាមេរិកនឹងរក្សាទុកចំនួនទ័ពរបស់ខ្លួនសម្រាប់តែការពារស្ថានទូតដូចករណីនៅក្នុងប្រទេសអ៊ីរ៉ាក់។ ចំនួនទ័ពអាមេរិកទំាង ៩ ៨០០នាក់មានតួនាទីជាអ្នកគំាទ្រយុទ្ធនាការប្រឆំាងនឹងពួកភេរវជនអាល់កៃដាដែលនៅសេសសល់ និងចូលរួមជួយហ្វឹកហ្វឺនកម្លំាងទាហានអាហ្វហ្កានីស្ថាន។
លោកអូបាម៉ាបានយល់ឃើញថា កម្លំាងជាតិអាហ្វហ្កានីស្ថានមានសមត្ថភាពគ្រប់គ្រាន់ក្នុងការធានាសន្តិសុខ និងសុវត្ថិភាពដោយខ្លួនឯង។ តែលោកអូបាម៉ាបានទទួលស្គាល់ថា អាហ្វហ្កានីស្ថាននៅមិនទាន់ជាកន្លែងសុខសាន្ត ១០០% ទេ ហើយមិនមែនអាមេរិកទេ ដែលជាអ្នកស្វែងរកសុខសាន្ត ១០០% ឲ្យប្រទេសអាហ្វហ្កានីស្ថាន។ ជារួម ការប្រកាសរបស់លោកអូបាម៉ានេះបានទទួលការសាទរពីមជ្ឈដ្ឋានអន្តរជាតិ និងមជ្ឈដ្ឋានទូទៅនៅក្នុងប្រទេសអាហ្វហ្កានីស្ថាន។ តើនៅក្រោយការដកទ័ពអាមេរិកទំាងស្រុងចេញពីអាហ្វហ្កានីស្ថាននាដំណាច់ឆ្នំា ២០១៦ ពោលប៉ុន្មានសប្តាហ៍មុននឹងលោកអូបាម៉ាចាកចេញពីសេតវិមានជាស្ថាពរ នឹងទៅជាយ៉ាងណានោះ វាជាវាសនារបស់ប្រជាជនអាហ្វហ្កានីស្ថានខ្លួនឯង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ