អាមេរិក-ជប៉ុនល្អូកល្អឺនគ្នាលើបញ្ហាសន្តិសុខតែបន្តខ្វែងគំនិតគ្នាលើការចរចាបង្កើតតំបន់ពាណិជ្ជកម្មសេរី
ចុះផ្សាយនៅថ្ងៃ៖
ស្តាប់ - ០៦:១២
នៅថ្ងៃព្រហស្បតិ៍នេះ នៅក្នុងដំណើរទស្សនកិច្ចផ្លូវរដ្ឋទៅកាន់ប្រទេសជប៉ុន លោកអូបាម៉ាបានបញ្ជាក់សាជាថ្មីម្តងទៀតថា ប្រជុំកោះសេនកាគូ ដែលជប៉ុនកំពុងជាប់ជម្លោះជាមួយចិន ស្ថិតនៅក្នុងក្របខ័ណ្ឌនៃសន្ធិសញ្ញាសម្ព័ន្ធភាពអាមេរិក-ជប៉ុន ដែលមានចែងពីកាតព្វកិច្ចរបស់អាមេរិកក្នុងការចូលមកជួយការពារជប៉ុន ក្នុងករណីមានការវាយប្រហារពីសំណាក់ប្រទេសទីបី។ ក៏ប៉ុន្តែ ក្នុងពេលជាមួយគ្នា លោកអូបាម៉ាក៏បានជំរុញផងដែរឲ្យជប៉ុន និងចិន ដោះស្រាយជម្លោះដោយសន្តិវិធី។
កន្លងមក មានការចោទជាសំណួរជុំវិញជំហរផ្លូវការរបស់សហរដ្ឋអាមេរិកថា តើក្នុងករណីណាខ្លះ ដែលអាមេរិកចាត់ទុកថាជាការវាយប្រហារទៅលើជប៉ុន ហើយដែលអាមេរិកត្រូវចេញមុខការពារស្របទៅតាមកាតព្វកិច្ចក្នុងសន្ធិសញ្ញាឆ្នាំ១៩៦០? តើការវាយប្រហារទៅលើប្រជុំកោះដែលជប៉ុនកំពុងជាប់ជម្លោះជាមួយចិនសព្វថ្ងៃនេះ ត្រូវចាត់ទុកថាជាការវាយប្រហារទៅលើជប៉ុនដែរឬទេ?
ចម្លើយដែលលោកអូបាម៉ាបានបញ្ជាក់ប្រាប់ទៅសារពត៌មានជប៉ុន កាលពីថ្ងៃពុធម្សិលមិញ និងបានបញ្ជាក់ច្បាស់ៗម្តងទៀត នៅក្នុងសន្និសីទសារព័ត៌មានជាមួយលោកស្ហ៊ីនហ្សូ អាបេ នៅថ្ងៃព្រហស្បតិ៍នេះថា ប្រជុំកោះសេនកាគូនេះស្ថិតនៅក្រោមការកាន់កាប់របស់ជប៉ុន ដូច្នេះ ត្រូវចាត់ទុកថាជាដែនដី ដែលស្ថិតនៅក្នុងក្របខ័ណ្ឌសន្ធិសញ្ញាឆ្នាំ១៩៦០។
ថ្វីដ្បិតតែលោកអូបាម៉ាមិនបានបញ្ជាក់ច្បាស់ៗថា តើក្នុងករណីមានការវាយប្រហាររបស់ចិនទៅលើប្រជុំកោះនេះ អាមេរិកនឹងចាត់វិធានការយ៉ាងណា ក៏ប៉ុន្តែ ការប្រកាសដាក់បញ្ចូលប្រជុំកោះនេះទៅក្នុងក្របខ័ណ្ឌសន្ធិសញ្ញាសន្តិសុខអាមេរិក-ជប៉ុន ឆ្នាំ១៩៦០ គឺមានន័យថា ក្នុងករណីប្រជុំកោះនេះត្រូវទទួលរងការវាយប្រហារពីសំណាក់ប្រទេសចិន អាមេរិកត្រូវជាប់កាតព្វកិច្ចចូលមកជួយការពារជប៉ុន។
ក៏ប៉ុន្តែ លោកអូបាម៉ាក៏បានបញ្ជាក់បន្ថែមផងដែរថា អាមេរិកមិនប្រកាន់ជំហរថា តើប្រជុំកោះសេនកាគូនេះជាកម្មសិទ្ធិរបស់ប្រទេសណាមួយនោះទេ គ្រាន់តែថា ដោយសារតែប្រជុំកោះនេះតាំងពីដើមមកស្ថិតនៅក្រោមការកាន់កាប់ជាក់ស្តែងរបស់ជប៉ុន ដូច្នេះ វាត្រូវស្ថិតក្នុងក្របខ័ណ្ឌសន្ធិសញ្ញាឆ្នាំ១៩៦០ ពីព្រោះសន្ធិសញ្ញានេះមានសុពលភាពគ្របដណ្តប់ទៅលើរាល់ដែនដីទាំងអស់ ដែលស្ថិតក្រោមការកាន់កាប់ជាក់ស្តែងរបស់ជប៉ុន។
គេសង្កេតឃើញថា ជម្លោះរវាងចិន និងជប៉ុន គឺជាបញ្ហាដែលធ្វើឲ្យលោកអូបាម៉ាទើសទាល់ខ្លាំង ដោយម្ខាងមានជប៉ុន ដែលជាសម្ព័ន្ធមិត្ត ហើយដែលអាមេរិកជាប់កាតព្វកិច្ចត្រូវជួយការពារ ហើយម្ខាងទៀត មានចិន ដែលជាមហាអំណាចសេដ្ឋកិច្ចពិភពលោកលំដាប់ទីពីរ ដែលអាមេរិកត្រូវការ ហើយជាមហាអំណាចនុយក្លេអ៊ែរ។
ការរាលដាលនៃជម្លោះដណ្តើមប្រជុំកោះ រវាងចិន និងជប៉ុន ដែលអាចរាលដាលទៅជាជម្លោះប្រដាប់អាវុធ ហើយដែលអាចទាញអាមេរិកឲ្យចូលមកពាក់ព័ន្ធ គឺជាក្តីបារម្ភរបស់រដ្ឋាភិបាលក្រុងវ៉ាស៊ីងតោន។
ហេតុដូច្នេះហើយបានជា នៅក្នុងដំណើរទស្សនកិច្ច នៅក្នុងប្រទេសជប៉ុន នៅពេលនេះ ក្រៅពីបានប្រកាសជួយជប៉ុន លោកអូបាម៉ាក៏បានជំរុញផងដែរឲ្យជប៉ុនដោះស្រាយជម្លោះជាមួយចិន តាមរយៈការចរចាដោយសន្តិវិធី ដើម្បីចៀសវាងការប្រើកម្លាំងទ័ព។
គេរំពឹងថា លោកអូបាម៉ានឹងបន្តប្រកាន់ជំហរប្រយ័ត្នប្រយែងបែបនេះ នៅក្នុងដំណើរទៅកាន់ប្រទេសអាស៊ីផ្សេងទៀត បន្ទាប់ពីជប៉ុន ជាពិសេស ហ្វ៊ីលីពីន និងម៉ាឡេស៊ី ដែលកំពុងជាប់ជម្លោះជាមួយចិនដែរ នៅក្នុងតំបន់សមុទ្រចិនខាងត្បូង។
នៅក្នុងដំណើរទស្សនកិច្ចរបស់លោកអូបាម៉ាក្នុងប្រទេសជប៉ុននេះ ថ្វីដ្បិតតែមេដឹកនាំអាមេរិក និងជប៉ុនសុទ្ធតែបានបង្ហាញជំហររួបរួមគ្នា អំពីបញ្ហាសន្តិសុខ ក៏ប៉ុន្តែ នៅពីក្រោយភាពល្អូកល្អឺននេះ ក៏មានបញ្ហាចម្រូងចម្រាសគ្នាខ្លាំងដែរ គឺទាក់ទងនឹងការចរចាបង្កើតតំបន់ពាណិជ្ជកម្មសេរីអន្តរប៉ាស៊ីហ្វ៊ិក (Trans-Pacific Partnership) ដែលរួមមានអាមេរិក ជប៉ុន និងប្រទេស១០ផ្សេងទៀតត្រូវចូលរួម គឺនៅត្រើយខាងកើតមហាសមុទ្រប៉ាស៊ីហ្វិក មាន កាណាដា ម៉ិចស៊ិក ស្ហ៊ីលី ពេរូ និងនៅត្រើយខាងលិចមាន អូស្រ្តាលី នូវែលសេឡង់ សិង្ហបុរី វៀតណាម ម៉ាឡេស៊ី និងព្រុយណេ។
លោកអូបាម៉ាផ្តល់អាទិភាពខ្ពស់ទៅលើការបង្កើតតំបន់ពាណិជ្ជកម្មសេរីអន្តរប៉ាស៊ីហ្វ៊ិកនេះ ពីព្រោះ ម្យ៉ាងវានឹងជួយបង្កើនវិស័យនាំចេញរបស់អាមេរិកផង និងវាជាផ្នែកមួយនៃការបង្វែរអាទិភាពនៃនយោបាយការបរទេសនិងការពារជាតិរបស់លោកអូបាម៉ាមកអាស៊ីផង។ ក៏ប៉ុន្តែ ជប៉ុន គឺជាឧបសគ្គធំជាងគេ នៅក្នុងការចរចាបង្កើតតំបន់ពាណិជ្ជកម្មសេរីនេះ។
យើងឃើញថា នៅក្នុងចំណោមប្រទេសដែលកំពុងចរចាបង្កើតតំបន់ពាណិជ្ជកម្មសេរីអន្តរប៉ាស៊ីហ្វ៊ិកនេះ មានតែជប៉ុនមួយទេ ដែលមិនទាន់មានកិច្ចព្រមព្រៀងពាណិជ្ជកម្មសេរីទ្វេភាគីជាមួយអាមេរិក។ ជប៉ុន និងអាមេរិក ដែលសុទ្ធជាមហាអំណាចខាងសេដ្ឋកិច្ច ហើយជាសម្ព័ន្ធមិត្តជិតស្និទ្ធនឹងគ្នា ប៉ុន្តែ បែរជាមិនមានកិច្ចព្រមព្រៀងពាណិជ្ជកម្មសេរីជាមួយគ្នា គឺដោយសារតែប្រទេសនីមួយៗសុទ្ធតែមានវិស័យគន្លឹះ ដែលចង់ការពារពីការប្រកួតប្រជែងពីបរទេស។
វិស័យគន្លឹះ ដែលជប៉ុនមិនចង់ដាក់បញ្ចូលទៅក្នុងកិច្ចព្រមព្រៀងពាណិជ្ជកម្មសេរី គឺវិស័យកសិកម្ម ដែលសព្វថ្ងៃនេះជប៉ុនកំណត់អត្រាពន្ធគយខ្ពស់បំផុតទៅលើផលិតផលនាំចូល ដើម្បីការពារទីផ្សារក្នុងស្រុក។ ឧទាហរណ៍ ដូចជា អង្ករ ជាដើម ជប៉ុនយកពន្ធរហូតដល់ទៅ ៧៧៨% លើការនាំចូល។ ចំណែកអាមេរិកវិញក៏មានទីផ្សារគន្លឹះ ដែលចង់ការពារដែរ គឺទីផ្សាររថយន្ត។
ការខ្វែងគំនិតគ្នាលើការលុបរនាំងពន្ធគយលើវិស័យសំខាន់ៗទាំងអស់នេះហើយ ដែលជាបញ្ហាចម្រូងចម្រាស រវាងអាមេរិក និងជប៉ុន ហើយដែលជាឧបសគ្គធំបំផុត នាំឲ្យការចរចាលើការបង្កើតតំបន់ពាណិជ្ជកម្មសេរីអន្តរប៉ាស៊ីហ្វិកត្រូវជាប់គាំង។
នៅក្នុងដំណើរទស្សនកិច្ចនៅជប៉ុននៅពេលនេះ លោកអូបាម៉ាក៏បានឆ្លៀតនិយាយដល់បញ្ហានេះដែរ ដោយបានជំរុញឲ្យមេដឹកនាំជប៉ុនធ្វើសម្បទានឲ្យបានច្រើន ដើម្បីទម្លុះទម្លាយភាពទ័លច្រកក្នុងការចរចាបង្កើតតំបន់ពាណិជ្ជកម្មសេរីនេះ។
តាមពិត កាលពីដំបូង អាមេរិករំពឹងថា អាមេរិក និងជប៉ុន អាចចរចាត្រូវរ៉ូវគ្នា ហើយអាចធ្វើសេចក្តីប្រកាសពីកិច្ចព្រមព្រៀង នៅក្នុងអំឡុងដំណើរទស្សនកិច្ចរបស់លោកអូបាម៉ា។ ក៏ប៉ុន្តែ នៅទីបំផុតទៅ ការចរចាមិនបានចេញជាកិច្ចព្រមព្រៀង ហើយលោកអូបាម៉ា និងលោកស្ហ៊ីនហ្សូ អាបេ បានត្រឹមតែឯកភាពគ្នា ជំរុញឲ្យមន្រ្តីទាំងសងខាងបន្តចរចាគ្នា ដើម្បីរកច្រកចេញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ