ការបាញ់បង្ហោះរ៉ុកកែតផ្ទុកផ្កាយរណបរបស់កូរ៉េខាងជើងបរាជ័យ ធ្លាក់ទឹក
ចុះផ្សាយនៅថ្ងៃ៖
ស្តាប់ - ០៨:៣៧
កូរ៉េខាងជើងបានបាញ់បង្ហោះរ៉ុកកែត នៅព្រឹកព្រលឹមថ្ងៃសុក្រ ទី ១៣ មេសា ប៉ុន្តែ រ៉ុកកែតនេះបានផ្ទុះធ្លាក់ទៅក្នុងទឹកសមុទ្រ នៅក្រោយហោះបានជាងមួយនាទី។ កូរ៉េខាងជើងធ្លាប់បានជូនដំណឹងថា ខ្លួនអាចបាញ់បង្ហោះរ៉ុកកែតនៅចន្លោះ ថ្ងៃទី ព្រហស្បតិ៍១២ មេសា ដល់ថ្ងៃចន្ទទី ១៦ មេសា ដើម្បីរំលឹកខួប ១០០ឆ្នាំនៃកំណើតរបស់លោកគីម អ៊ីលសុង ស្ថាបនិក សាធារណរដ្ឋកូរ៉េខាងជើង។ បរាជ័យរបស់កូរ៉េខាងជើងបានផ្ចាញ់ផ្ទាន់ដោយប្រតិកម្មរបស់សហគមន៍អន្តរជាតិដែលបានថ្កោលទោសទីក្រុងព្យុងយ៉ាង។ ក្រុមប្រឹក្សាសន្តិសុខអង្គការសហប្រជាជាតិត្រូវបើកការប្រជុំបន្ទាន់មួយនៅថ្ងៃសុក្រនេះ នៅទីក្រុងញួវយ៉ក ដើម្បីនិយាយពីបេសកកម្មដែលត្រូវធ្វើបន្ទាប់ ពីហេតុការណ៍នៅថ្ងៃនេះ នៅប្រទេសកូរ៉េខាងជើង។
ជប៉ុន ជាមួយសម្ព័ន្ធមិត្ត កូរ៉េខាងត្បូង និងអាមេរិកដែលបានតាមដានយ៉ាងកៀក លើទីតាំងរ៉ុកកែតកូរ៉េខាងជើងបានជូនដំណឹងនៅថ្ងៃនេះ ថា នៅប្រមាណ ម៉ោង ៧ និង៤០នាទី រ៉ុកកែតរបស់កូរ៉េខាងជើងត្រូវគេបាញ់បង្ហោះ ប៉ុន្តែ វាបានផ្ទុះឆេះធ្លាក់មកវិញ នៅប្រមាណមួយនាទីក្រោយមក។ បើតាមអ្នកនាំពាក្យរបស់ជប៉ុន គេសង្កេតឃើញកំណាត់ទីមួយ របស់រ៉ុកកែតមានបញ្ហា ផ្ទុះឆេះ មុនពេលកំណត់ រហូតធ្វើឲ្យផ្នែកទីពីរ និងទីមួយនៃតួរបស់រ៉ុកកែតបានផ្ទុះធ្លាក់ដែរ គឺធ្លាក់ទៅក្នុងសមុទ្រលឿង ដែលស្ថិតនៅចម្ងាយប្រមាណជាង ១៦០គីឡូម៉ែត្រពីទីក្រុងសេអ៊ូល។ ក្រសួងការពារជាតិជប៉ុនបានបញ្ជាក់ថា កម្ទេចបំណែករបស់រ៉ុកកែតបានធ្លាក់ទៅក្នុងទឹក និងមិនបង្កគ្រោះថ្នាក់ ដល់ជប៉ុន និង កូរ៉េខាងត្បូងទេ។ ទីក្រុងសេអ៊ូលវិញ បានបញ្ជូនទាហានជើងទឹកដើម្បីទៅប្រមូលស្រង់បំណែកទាំងនោះមកសិក្សា។
នៅក្រោយផ្ទុះឆេះធ្លាក់រ៉ុកកែតរបស់ខ្លួន កូរ៉េខាងជើង បានស្ងប់ស្ងាត់អស់១៥នាទី មុននឹងផ្សព្វផ្សាយតាមទូរទស្សន៍ផ្លូវការ ទទួលស្គាល់ថា រ៉ុកកែតផ្ទុកផ្កាយរណបបរាជ័យ មិនអាចហោះទៅកាន់គន្លងវិថីផ្កាយរណប ទៅតាមការព្រាងទុក។ បើតាម ទីភ្នាក់ងារព័ត៌មានផ្លូវរដ្ឋ KCNA អ្នកវិទ្យាសាស្រ្ត អ្នកបច្ចេកទេស និងអ្នកជំនាញកូរ៉េខាងជើងកំពុងសិក្សារកមូលហេតុដែលបណ្តាលឲ្យរ៉ុកកែតផ្ទុះឆេះមុនកំណត់។
នៅក្រោយបរាជ័យមិនអាចបាញ់បង្ហោះផ្កាយរណប កូរ៉េខាងជើង អាមេរិក ជប៉ុន កូរ៉េខាងត្បូង រួមទាំងសហភាពអឺរ៉ុប លើកលែងតែចិន បានថ្កោលទោសកូរ៉េខាងជើងដែលបានរំលោភសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ។ សេចក្តីសម្រេចដែលបានហាមកូរ៉េខាងជើងមិនឲ្យបាញ់សាកល្បងកាំជ្រួចនុយក្លេអ៊ែរ ឬគ្រាប់មីស៊ីលអន្តរជាតិ។ អាមេរិកវិញបានចាត់ទុកការរឹងទទឹងរបស់កូរ៉េខាងជើងថា ជាសកម្មភាពញុះញង់ដែលគំរាមបង្កគ្រោះថ្នាក់ ដល់សន្តិសុខក្នុងតំបន់។ មួយវិញទៀត កូរ៉េខាងជើងកំពុងរំលោភសិទ្ធិអន្តរជាតិ និងធ្វើផ្ទុយពីការសន្យារបស់ខ្លួនជាមួយអង្គការសហប្រជាជាតិ។ តាមអាមេរិក នៅក្នុងការប្រជុំបន្ទាន់ នៅក្រុមប្រឹក្សាសន្តិសុខ នៅថ្ងៃសុក្រនេះ គេគ្រោងនឹងនិយាយផងដែរពីទណ្ឌកម្មថ្មីទៀត លើកូរ៉េខាងជើង។ ប៉ុន្តែរុស្ស៊ីវិញ ដែលបានសោកស្តាយចំពោះឥរិយាបថរបស់កូរ៉េខាងជើង បានប្រកាសរួចហើយ នៅថ្ងៃនេះ រុស្ស៊ី ចិន និងឥណ្ឌាមិនប្រាថ្នាចង់ឲ្យមានទណ្ឌកម្មថ្មីលើទីក្រុងព្យុងយ៉ាងទេ ព្រោះវាអាចធ្វើឲ្យស្ថានភាពកាន់តែធ្ងន់ធ្ងរ។
នេះមិនមែនជាលើកទីមួយ ដែលកូរ៉េខាងជើង បរាជ័យមិនអាចបាញ់បង្ហោះផ្កាយរណបចូលទៅក្នុងគន្លងវិថី។ កាលពីឆ្នាំ ១៩៩៨ និង២០០៩ កូរ៉េខាងជើងបានបរាជ័យដូចគ្នានេះ ក្នុងការបាញ់សាកល្បងរ៉ុកកែត ហើយការបាញ់សាកល្បងម្តងៗ តែងត្រូវអាមេរិក កូរ៉េខាងត្បូងរិះគន់ និងថ្កោលទោស។ អាមេរិក ជប៉ុននិងកូរ៉េខាងត្បូងនិយាយថា កូរ៉េខាងជើងកំពុងក្លែងបន្លំ ធ្វើការបាញ់សាកល្បងគ្រាប់មីស៊ីលអន្តរទ្វីប។ ហើយរាល់ក្រោយការបាញ់សាកល្បងមីស៊ីលម្តងៗ គេតែងសង្កេតឃើញទីក្រុងព្យុងយ៉ាងបាញ់សាកល្បងអាវុធនុយក្លេអ៊ែរ ដូចកាលពីឆ្នាំ ២០០៦ និងឆ្នាំ ២០០៩។
បរាជ័យរបស់កូរ៉េខាងជើងរឹតតែធ្វើឲ្យគេបារម្ភកាន់តែខ្លាំងទៅវិញទេ។ បើមើលទៅក្នុងអតីតកាល នៅរាល់ពេល ថ្នាក់ដឹកនាំកូរ៉េខាងជើង ជួបបរាជ័យផ្នែកយោធា គឺបាក់មុខ នៅចំពោះមុខសហគមន៍អន្តរជាតិ ជាពិសេសនៅចំពោះមុខប្រជាជនរបស់ខ្លួន របបព្យុងយ៉ាងតែងតែបញ្ចេញសកម្មភាពយោធាណាមួយលើកមុខមាត់របស់ខ្លួន ឡើងវិញដើម្បីបង្ហាញដល់ប្រជាជន។
ជាក់ស្តែង នៅក្រោយបរាជ័យ គឺការបាញ់សាកល្បងនុយក្លេអ៊ែរមិនបានសម្រេចនៅឆ្នាំ ២០០៩ កូរ៉េខាងជើងបានបង្កហេតុការណ៍ថ្មី ដោយបានបាញ់ពន្លិចនាវាចម្បាំង កូរ៉េខាងត្បូងនៅឆ្នាំ ២០១០ ដែលបានសម្លាប់ទាហានជើងទឹក កូរ៉េខាងត្បូង ៤៦នាក់។ នៅប៉ុន្មានខែក្រោយ ទីក្រុងព្យុងយ៉ាងបានបាញ់ទៅលើកោះមួយរបស់កូរ៉េខាងត្បូង និងបានសម្លាប់ប្រជាជនស៊ីវិល និងទាហាន៤នាក់។
លើកនេះទៀត កូរ៉េខាងត្បូងកំពុងបារម្ភខ្លាចផ្ទុះកើតមានសង្រ្គាមជាថ្មី ព្រោះបើតាមភ្នាក់ងារស៊ើបការសម្ងាត់ កូរ៉េខាងជើងបានប្រកាសដាក់កងទ័ព ឲ្យស្ថិតនៅក្នុងស្ថានភាពប្រកាសអាសន្ន។ គឺថ្នាក់ដឹកនាំកូរ៉េខាងជើងបានបញ្ជាឲ្យទាហានជាងមួយលាន ២សែននាក់របស់ខ្លួននៅត្រៀមខ្លួនប្រយុទ្ធជានិច្ច។
ទីក្រុងប៉េកាំងបានបង្ហាញពីក្តីបារម្ភរបស់ខ្លួន ជាមួយប្រទេសលោកខាងលិច។ ចិនមិនខ្លាចគ្រាប់មីស៊ីលរបស់កូរ៉េខាងជើង ទេ ប៉ុន្តែ ចិនខ្លាចអាមេរិក ជប៉ុន និងកូរ៉េខាងត្បូងយកលេសនេះពង្រឹង ពង្រាយទ័ព នៅមហាសមុទ្រប៉ាស៊ីហ្វិក ដែលគំរាមផលប្រយោជន៍របស់ចិន នៅក្នុងតំបន់។ នៅពេលស្ថានភាពកាន់តែតឹងតែង គឺទីក្រុងព្យុងយ៉ាងមិនបានយល់ព្រមបញ្ឈប់គម្រោងរបស់ខ្លួនតាមការទាមទាររបស់សហគមន៍អន្តរជាតិ ចិនបានចេញមុខ ជាលើកទីមួយ ចិនបានអំពាវនាវឲ្យកូរ៉េខាងជើងដែលជាសម្ព័ន្ធមិត្តរបស់ខ្លួនបញ្ឈប់គម្រោងរបស់ខ្លួន។ ប៉ុន្តែ ថ្នាក់ដឹកនាំទីក្រុងព្យុងយ៉ាងមិនព្រមធ្វើតាម។
កូរ៉េខាងជើងមិនស្តាប់តាមចិន ព្រោះថា ការបាញ់បង្ហោះរ៉ុកកែតថ្ងៃសុក្រនេះសំខាន់ណាស់សម្រាប់បញ្ជាក់ពីអំណាចរបស់លោកគីម ជុងអ៊ុន មេដឹកនាំថ្មីកូរ៉េខាងជើង ដែលទើបចូលកាន់តំណែង ក្រោយមរណភាពរបស់លោកគីម ជុងអ៊ីល កាលពីខែធ្នូ។ កូរ៉េខាងជើងនៅតែអះអាងថា ការបាញ់បង្ហោះរ៉ុកកែតផ្ទុកផ្កាយរណប ធ្វើឡើងដើម្បីប្រារព្ធខួប១០០ឆ្នាំ នៃកំណើតស្ថាបនិកកូរ៉េខាងជើង លោកគីម អ៊ីលសុង ដែលជាជីតារបស់លោកគីម ជុងអ៊ុន។ ថ្នាក់ដឹកនាំកូរ៉េចង់ឆ្លៀតយកឱកាសនេះ បញ្ជាក់ពីអំណាច និងសមត្ថភាពរបស់លោកគីម ជុងអ៊ុន ក្នុងការបន្តនយោបាយយោធា ធ្វើជាអាទិភាព ទៅតាមលិខិតបណ្តាំរបស់លោកគីម ជុងអ៊ីល ជាឪពុក។ ថ្នាក់ដឹកនាំកូរ៉េខាងជើងចង់បង្ហាញទៅប្រជាជនខ្លួនថា កូរ៉េខាងជើង ក្រោមការដឹកនាំរបស់លោកគីមជុងអ៊ុន នេះមានសមត្ថភាពអភិវឌ្ឍមីស៊ីល ដែលអាចការពារកូរ៉េខាងជើងពីការគំរាមរបស់ប្រទេសដទៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ