ក្រុងព្យុងយ៉ាងធ្វើសមយុទ្ធ នៅចំថ្ងៃដែលអាមេរិក និងកូរ៉េខាងត្បូងប្រជុំគ្នា
នៅព្រឹកថ្ងៃពុធនេះ សំលេងគ្រាប់កាំភ្លើងធំ ត្រូវគេលឺបាញ់ក្នុងទឹកដីរបស់កូរ៉េខាងជើង នៅជិតតំបន់ដែនទឹកដែលកំពុងមានជម្លោះរវាងប្រទេសកូរ៉េទាំងពីរ។ នៅក្រុងសេអ៊ូល សេនាធិការទ័ពចម្រុះអាមេរិកបានបង្ហាញនូវសាមគ្គីភាព និងជួយជ្រោមជ្រែងកូរ៉េខាងត្បូង ក្នុងការទប់ទល់នឹងការវាយប្រហារជាថ្មីណាមួយ ពីរបបកុម្មុយនិស្តព្យុងយ៉ាង។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ឈាង បុប្ផា
បើតាមប្រភពចេញពីកងទ័ពកូរ៉េខាងត្បូង កូរ៉េខាងជើងបានបាញ់គ្រាប់កាំភ្លើងធំជាច្រើនរាប់មិនអស់ដែលបានធ្លាក់ក្នុងដែនទឹកកូរ៉េខាងជើង និងដែលស្ថិតនៅមិនឆ្ងាយប៉ុន្មានពីតំបន់ទឹកដែលមានជម្លោះ។ សម្រាប់ភាគីកូរ៉េខាងត្បូង ការបាញ់កំាភ្លើងទំនងធ្វើឡើង ក្នុងសមយុទ្ធដែលកូរ៉េខាងជើងតែងតែធ្វើជាញឹកញយ។ ហើយគឺគ្រាប់កំាភ្លើងធំប្រភេទនេះដែលត្រូវគេបាញ់សំដៅកោះរបស់កូរ៉េខាងត្បូង កាលពីថ្ងៃទី២៣វិច្ឆិកាមុននេះ។
សមយុទ្ធរបស់កូរ៉េខាងជើងបានធ្វើឡើង តែនៅមួយសប្តាហ៍ ក្រោយពីកូរ៉េខាងត្បូង និងអាមេរិកបានបញ្ចប់សមយុទ្ធរួមគ្នានៅក្នុងសមុទ្រលឿង។ ប៉ុន្តែនៅថ្ងៃនេះ សេនាធិការទ័ពចម្រុះរបស់អាមេរិក គឺលោកMichael Mullenដែលកំពុងបំពេញទស្សនកិច្ច នៅកូរ៉េខាងត្បូង តាំងពីថ្ងៃម្សិលមិញ បានប្រកាសថា អាមេរិកនឹងធ្វើសមយុទ្ធថ្មីមួយទៀត ក្នុងពេលឆាប់ៗនេះ ជាមួយកូរ៉េខាងត្បូងដែលជាសម្ព័ន្ធមិត្តរបស់ខ្លួន។ នៅកូរ៉េខាងត្បូង សេនាធិការទ័ពចម្រុះអាមេរិកបានបង្ហាញពីសាមគ្គីភាពរឹងមាំរបស់អាមេរិកជាមួយកូរ៉េខាងត្បូង។ ក្នុងន័យនេះ អាមេរិកនឹងធ្វើការយ៉ាងជិតស្និទ្ធ ជាមួយកូរ៉េខាងត្បូង ដើម្បីរៀបចំយុទ្ធសាស្រ្តទប់ទល់នឹងការវាយប្រហារណាមួយពីកូរ៉េខាងជើង។ ការវាយប្រហារដែលអាមេរិកចាត់ទុកថា ជាការញុះញង់។
ការវាយប្រហាររបស់កូរ៉េខាងជើងមកលើកោះកូរ៉េខាងត្បូង កាលពីខែវិច្ឆិកា បានធ្វើឲ្យវិបត្តិនៅឧបទ្វីបកូរ៉េ កាន់តែតានតឹងទៅៗ និងធ្វើឲ្យបញ្ហាការពិភាក្សាលើអាវុធនុយក្លេអ៊ែររបស់កូរ៉េខាងជើងជាប់គាំងស្ទះ។ នៅក្នុងសំណុំរឿងអាវុធនុយក្លេអ៊ែរនេះ អតីតបេសកជនពិសេសរបស់អាមេរិក ទទួលបន្ទុកកូរ៉េខាងជើង គឺលោក Bill Richardson នឹងធ្វើដំណើរទស្សនកិច្ច ជាលក្ខណៈឯកជនទៅទីក្រុងព្យុងយ៉ាង នៅ សប្តាហ៍ក្រោយនេះ។ បើតាមប្រភពមិនបញ្ចេញឈ្មោះ លោក Richardson មិនត្រូវនិយាយឲ្យដឹងពីដំណើរទស្សនកិច្ចរបស់លោកទេ។ ម្យ៉ាងទៀត គេក៏មិនបានដឹងលំអិតពីគោលដៅនៃទស្សនកិច្ចរបស់លោក Richardson លើកនេះដែរ។ ប៉ុន្តែ បើតាមកាសែតWashington Post លោក Richardsonដែលបច្ចុប្បន្នជាចៅហ្វាយក្រុងNew Mexico ត្រូវបានមន្រ្តីជាន់ខ្ពស់កូរ៉េខាងជើងទទួលបន្ទុកផ្នែកកម្មវិធីនុយក្លេអ៊ែរ អញ្ជើញឲ្យទៅបំពេញទស្សនកិច្ចនៅកូរ៉េខាងជើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ