កូរ៉េខាងត្បូងធ្វើសមយុទ្ធយោធា ក្បែរព្រំដែនកូរ៉ខាងជើង
មិនត្រូវធ្វើដោះស្រាយបញ្ហា តាមផ្លូវយោធាទេ ! នេះជាការអំពាវនាវដ៏ទទូចរបស់ចិន ដែលជាថ្មីម្តងទៀត លោកនាយករដ្ឋមន្ត្រីបានសំណូមពរឲ្យបងប្អូនគូសត្រូវកូរ៉េខាងជើង និងខាងត្បូង រក្សាភាពស្ងប់ស្ងាត់។ ប៉ុន្តែនៅក្រុងព្យុងយ៉ាង មនុស្សម្នារាប់ពាន់នាក់បានធ្វើបាតុកម្មបរិហារក្រុងសេអ៊ូល ថាជាអ្នកបង្កើតភាពតានតឹងនៅព្រំដែន ព្រោះថ្ងៃនេះ កូរ៉េខាងត្បូង បានធ្វើសមយុទ្ធយោធាដ៏ធំមួយនៅជាប់ព្រំដែនតែម្តង។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ អៀង សុខម៉ិញ
ដូចជាត្រៀមលក្ខណៈវាយសម្រុក ! ទាហានរាប់ពាន់នាក់ កងរថក្រោះផង កងឧទ្ធម្ភាគចក្រចម្បាំង ជាច្រើនគ្រឿងផង បានធ្វើសមយុទ្ធថ្មីមួយទៀត នៅថ្ងៃនេះ នៅក្នុងខេត្តភាគខាងជើងបំផុតនៃប្រទេសដែលមានព្រំដែនជាប់នឹងកូរ៉េខាងជើង។
នេះជាសមយុទ្ធដ៏ធំបំផុតមួយមិនធ្លាប់មាន ដែលកូរ៉េខាងត្បូង បានរៀបចំធ្វើឡើង គិតចាប់តាំងពីមានហេតុការណ៍លិចនាវាចម្បាំង នៅថ្ងៃទី ២៦មីនាមក។ កាលពីថ្ងៃទី ២៧ ឧសភា កន្លងទៅថ្មីៗនេះ ក្រុងសេអ៊ូល បានធ្វើសមយុទ្ធ កងនាវាមុជទឹកតូចមួយដែរ នៅតាមព្រំដែនទឹក ក្នុងក្របខណ្ឌនៃការប្រយុទ្ធប្រឆាំងនឹងការបាញ់មីស៊ីលក្រោមទឹក។
ការសម្ញែងកម្លាំងទ័ព នៅតាមព្រំដែនក្នុងពេលនេះ ហាក់ដូចជាជំរុញភាពតានតឹង ដែលមានស្រាប់មកហើយ ឲ្យកើនឡើងមួយកំរិតបន្ថែមទៀត។ សម្ពាធតានតឹងរវាងកូរ៉េខាងជើង និងកូរ៉េខាងត្បូង បានផ្ទុះឡើង បន្ទាប់ពីលទ្ធផលនៃការស៊ើបអង្កេតអន្តរជាតិ រកឃើញភស្តុតាងថា កូរ៉េខាងជើងជាអ្នកបាញ់ពន្លិចនាវាចម្បាំងកូរ៉េខាងត្បូង បង្កឲ្យនាវិក៤៦នាក់ស្លាប់។ ក៏ប៉ុន្តែរបបកុម្មុយនិស្តព្យុងយ៉ាងបានបដិសេធ និងប្រកាសធ្វើសង្គ្រាមទូទៅ ប្រសិនបើមានការដាក់ទណ្ឌកម្មប្រឆាំងជាថ្មីនឹងកូរ៉េខាងជើង ពីសំណាក់សហគមន៍អន្តរជាតិ ដូចសំណើរបស់កូរ៉េខាងត្បូង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ