ចិនសន្យាមិនជួយការពារអ្នកបាញ់នាវាកូរ៉េខាងត្បូង
នៅថ្ងៃសុក្រនេះ លោកវេន ជាប៉ាវ (Wen Jiabao) បានសន្យាថា ចិននឹងមិនជួយការពារអ្នកដែលបានបាញ់ពន្លិចនាវាចម្បាំងរបស់កូរ៉េខាងត្បូងនោះទេ។ លោកនាយករដ្ឋមន្រ្តីចិនបានថ្លែងបែបនេះ បន្ទាប់ពីបានជួបជាមួយលោកលី ម្យ៉ុងបាក់ (Lee Myung-bak) ប្រធានាធិបតីកូរ៉េខាងត្បូង នៅទីក្រុងសេអ៊ូល។
ចុះផ្សាយនៅថ្ងៃ៖ កែប្រែថ្ងៃទី៖
បទវិភាគរបស់ សេង ឌីណា
នៅថ្ងៃសុក្រនេះ នៅពេលទៅបំពេញទស្សនកិច្ច នៅកូរ៉េខាងត្បូង លោកនាយករដ្ឋមន្រ្តីចិនទទួលរងនូវសម្ពាធយ៉ាងខ្លាំង ក្នុងសំណុំរឿងលិចនាវាចម្បាំងកូរ៉េខាងត្បូង។ សម្ពាធនេះបានកើនកាន់តែខ្លាំង នៅក្រោយពេលដែលជប៉ុនបានប្រកាសបន្ថែមទណ្ឌកម្មលើកូរ៉េខាងជើងដែរ កាលពីព្រឹកថ្ងៃសុក្រ។
ប្រឈមមុខនឹងសម្ពាធយ៉ាងខ្លាំងបែបនេះ លោកវេន ជាប៉ាវ បានថ្លែងថា ចិននឹងមិនជួយការពារអ្នកដែលបានបាញ់ពន្លិចនាវាចម្បាំងកូរ៉េខាងត្បូងនោះទេ។ មិនត្រឹមតែមិនជួយការពារនោះទេ ចិនក៏សូមថ្កោលទោសចំពោះទង្វើនេះផងដែរ។ លោកនាយករដ្ឋមន្រ្តីចិនបានថ្លែងបែបនេះ ដើម្បីព្យាយាមរំងាប់ចិត្តកូរ៉េខាងត្បូង ជប៉ុន និងអាមេរិក ដែលកំពុងតែទាមទារឲ្យចិនគាំទ្រការដាក់ទណ្ឌកម្មលើកូរ៉េខាងជើង។ ក៏ប៉ុន្តែ ក្នុងពេលជាមួយគ្នានេះ លោកវេន ជាប៉ាវ មិនបាននិយាយចំៗថា កូរ៉េខាងជើងជាអ្នកបានបាញ់ពន្លិចនាវាកូរ៉េខាងត្បូងនោះទេ ដោយលើកឡើងថា រដ្ឋាភិបាលចិនកំពុងតែពិនិត្យមើលភស្តុតាង។ លោកនាយករដ្ឋមន្រ្តីចិនធ្វើបែបនេះ ព្រោះមិនចង់ថ្កោលទោសកូរ៉េខាងជើងចំៗជាសាធារណៈ។
បើពិនិត្យឲ្យបានម៉ត់ចត់ទៅ ក្នុងសំណុំរឿងលិចនាវាកូរ៉េខាងត្បូងនេះ រដ្ឋាភិបាលចិនគឺជាអ្នកដែលត្រូវប្រឈមមុខនឹងជម្រើសពិបាកជាងគេ។
ប្រទេសដែលពាក់ព័ន្ធក្នុងសំណុំរឿងកូរ៉េខាងជើងសុទ្ធសឹងតែជាដៃគូពាណិជ្ជកម្មដ៏ធំបំផុតរបស់ចិន។ គិតតាមបរិមាណនាំចេញ និងនាំចូល អាមេរិក គឺជាដៃគូពាណិជ្ជកម្មធំជាងបង្អស់របស់ចិន។ ជប៉ុនស្ថិតនៅលំដាប់ទី២ ហើយកូរ៉េខាងត្បូងលំដាប់ទី៣។ ប្រទេសទាំងបីនេះហើយ ដែលពាក់ព័ន្ធក្នុងសំណុំរឿងកូរ៉េខាងជើង ហើយដែលកំពុងតែដាក់សម្ពាធឲ្យចិនគាំទ្រការដាក់ទណ្ឌកម្មលើកូរ៉េខាងជើង។ ដូច្នេះ ប្រសិនបើចិនចចេសការពារកូរ៉េខាងជើង វានឹងធ្វើឲ្យប៉ះពាល់ដល់ទំនាក់ទំនងជាមួយប្រទេសទាំងបីនេះ ហើយចិននឹងខាតបង់ប្រយោជន៍ផ្នែកសេដ្ឋកិច្ច។
ផ្ទុយទៅវិញ ប្រសិនបើចិនមិនជួយការពារកូរ៉េខាងជើងទេ ចិននឹងបាត់បង់ឥទ្ធិពលទាំងស្រុងលើរដ្ឋាភិបាលក្រុងព្យុងយ៉ាង។ កាន់តែធ្ងន់ធ្ងរទៅទៀតនោះ គឺចិនខ្លាចការប្រឈមមុខដាក់គ្នារវាងកូរ៉េទាំងពីររាលដាលកាន់តែធ្ងន់ធ្ងរបង្កទៅជាជម្លោះប្រដាប់អាវុធ។ ចិនបារម្ភខ្លាចរដ្ឋាភិបាលកូរ៉េខាងជើងត្រូវដួលរលំ ហើយកូរ៉េទាំងពីរបង្រួបបង្រួមជាប្រទេសតែមួយ ដឹកនាំដោយរដ្ឋាភិបាលរណបសហរដ្ឋអាមេរិក។ ប្រសិនបើករណីនេះកើតឡើងមែន មានន័យថា អាមេរិកអាចនឹងដាក់ទ័ពមកដល់ព្រំដែនរបស់ចិនតែម្តង ដែលធ្វើឲ្យចិនបាត់បង់ផលប្រយោជន៍ផ្នែកយុទ្ធសាស្រ្ត។
ហេតុដូច្នេះហើយបានជាយើងតែងតែសង្កេតឃើញថា បើទោះជាកូរ៉េខាងជើងតែងតែបង្កការលំបាកដល់ចិន រហូតដល់ពេលខ្លះធ្វើផ្គើននឹងចិនទៅទៀតក៏ដោយ ក៏ចិននៅតែត្រូវការកូរ៉េខាងជើង ដើម្បីទុកធ្វើជាទ្រនាប់ទប់អាមេរិកកុំឲ្យចូលមកដល់របងផ្ទះរបស់ចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ