ការចាប់ផ្តើមសមយុទ្ធរួមកូរ៉េខាងត្បូង និងអាមេរិក
កូរ៉េខាងត្បូង និងសហរដ្ឋអាមេរិក នៅថ្ងៃចន្ទ១៦សីហានេះបានចាប់ផ្តើមធ្វើសមយុទ្ធរួមមានឈ្មោះថា “Ulchi Freedom Guardian” ដោយមានការចូលរួមរបស់ទាហានកូរ៉េខាងត្បូង៥ម៉ឺន៦០០០នាក់ និងអាមេរិកាំង៣ម៉ឺននាក់ ទោះបីជាមានការគំរាមសងសឹកតប-តវិញពីខាងកូរ៉េខាងជើងក៏ដោយ -នេះជាការជូនដំណឹងប្រាប់ទីភ្នាក់ងារព័ត៌មានបារាំង AFP ពីខាងក្រសួងការពារជាតិកូរ៉េខាងត្បូង។
ចុះផ្សាយនៅថ្ងៃ៖
សេចក្តីរាយការណ៍របស់វីនស្តុនរតនា
សមយុទ្ធគ្រោងធ្វើសំរាប់រយៈពេល១០ថ្ងៃនេះគឺជាភាគមួយនៃសមយុទ្ធដែលកូរ៉េខាងត្បូងធ្វើតែម្នាក់ឯង ឬក៏ធ្វើរួមជាមួយស.រ.អា. បន្ទាប់ពីមានការបាញ់ពន្លិចនាវាចម្បាំងកូរ៉េខាងត្បូង Cheonan កាលពីថ្ងៃ២៦មីនាមុននេះដែលស្របតាមគណៈកម្មការស៊ើបអង្កេតអន្តរជាតិ បណ្តាលមកពីគ្រាប់បែកបុករបស់កូរ៉េខាងជើង ជាហេតុធ្វើឱ្យស្លាប់នាវិកកូរ៉េខាងត្បូង៤៦នាក់។
កូរ៉េខាងជើង នៅថ្ងៃអាទិត្យ១៥សីហាម្សិលមិញ បានសន្យាថា នឹង “ដាក់ទណ្ឌកម្មយ៉ាងធ្ងន់បំផុត“ ទៅលើកូរ៉េខាងត្បូងស្តីពីសមយុទ្ធធ្វើរួមជាមួយស.រ.អា.នេះ ដោយមានការចូលរួមរបស់ទាហានកូរ៉េខាងត្បូង៥ម៉ឺន៦០០០នាក់ និងអាមេរិកាំង៣ម៉ឺននាក់។
លោកប្រធានាធិបតីកូរ៉េខាងត្បូង Lee Myung- Bak នៅថ្ងៃអាទិត្យម្សិលមិញ បានព្រមានប្រាប់ព្យុងយ៉ាងឱ្យឈប់បង្ករឿងហេតុ នៅក្នុងសុន្ទរកថាថ្លែងនៅឱកាសប្រារព្ធខួប៦៥ឆ្នាំ រំលឹកថ្ងៃដែលកូរ៉េខាងត្បូងបានដោះខ្លួនផុតពីនឹមអាណានិគមនិយមជប៉ុននៅឆ្នាំ១៩៤៥។ “ ដល់ពេលដែលព្យុងយ៉ាងត្រូវសំឡឹងមើលការពិតចំពីមុខនិងធ្វើការផ្លាស់ប្តូរយ៉ាងក្លាហាន“។
នៅក្នុងសុន្ទរកថាដដែលនេះ លោកLee Myung-Bak ក៏បានទាំងស្នើភាពជាដៃគូសេដ្ឋកិច្ចជាមួយកូរ៉េខាងជើង និងរហូតដល់ទៅការបង្រួបបង្រួមគ្នាវិញ សំរាប់រយៈពេលយូរទៀតផង។ជាសំណើសហប្រតិបត្តិការដែលបង្កប់ទៅដោយល័ក្ខខ័ណ្ឌជាច្រើន ជាអាទិ៍ស្តីពីអវត្តមាននៃអាវុធនុយក្លេអ៊ែរ នៅកូរ៉េខាងជើង។ជាសំណើដែលមានភ័ព្វតិចណាស់ក្នុងការធ្វើឱ្យព្យុងយ៉ាងចាប់អារម្មណ៍។
ម្យ៉ាងទៀត លោកLee Myung-Bak នៅតែបន្តទទួលរងការទិតៀនរិះគន់ពីខាងពួកអ្នកចំរើននិយមកូរ៉េខាងត្បូងដែលភាគច្រើន គួរឱ្យឆ្ងល់ មិនជឿថាកូរ៉េខាងជើងជាប់ពិរុទ្ធក្នុងការលិចនាវាចម្បាំង Cheonanនោះទេ។ទាក់ទងនឹងសមយុទ្ធ គេចោទSéoulថាចាក់ប្រេងសាំងបន្ថែមទៅលើភ្លើងកំពុងតែឆេះ។
នៅក្នុងសារមួយចុះផ្សាយលើគេហទំព័រអាំងទែរនេតយោធាអាមេរិកាំង លោកឩត្តមសេនីយ Walter Sharp ជាមេបញ្ជាការនាយកនៃទាហានអាមេរិកាំងចំនួន២ម៉ឺន៨៥០០នាក់ប្រចាំការនៅកូរ៉េខាងត្បូង បានចាត់ទុកសមយុទ្ធធ្វើជាមួយកូរ៉េខាងត្បូងថាជា “ សមយុទ្ធរួមដ៏ធំបំផុតមួយធ្វើនៅលើពិភពលោក “ ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ