ប្រទេសមហាអំណាចជួបប្រជុំនៅញូវយ៉កដើម្បីបញ្ចៀសវិបត្តិសមាជិកភាពប៉ាឡេស្ទីននៅអ.ស.ប.
ចុះផ្សាយនៅថ្ងៃ៖
ស្តាប់ - ០៤:៣៨
នៅសល់តែ២ថ្ងៃទៀត ដល់ពេលបើកមហាសន្និបាតអ.ស.ប. ប្រទេសមហាអំណាចកំពុងតែខ្នះខ្នែងស្វែងរកដំណោះស្រាយបញ្ចៀសវិបត្តិជុំវិញសមាជិកភាពរបស់ប៉ាឡេស្ទីន នៅអ.ស.ប.។ មន្រ្តីការទូតជាន់ខ្ពស់របស់អាមេរិក រុស្ស៊ី សហភាពអឺរ៉ុប និងអ.ស.ប. បានជួបប្រជុំគ្នា នៅញូវយ៉ក កាលពីថ្ងៃអាទិត្យ ម្សិលមិញ ដើម្បីរិះរកវិធីបញ្ចុះបញ្ចូលប៉ាឡេស្ទីនឲ្យបញ្ឈប់ការសុំចូលជាសមាជិកអ.ស.ប.។ ការប្រជុំនេះអាចនឹងបន្តធ្វើជារៀងរាល់ថ្ងៃ នៅក្នុងសប្តាហ៍នេះ។
រដ្ឋាភិបាលអាមេរិក និងអ៊ីស្រាអែលបានលើកឡើងថា ការបោះឆ្នោតលើសមាជិកភាពប៉ាឡេស្ទីន ក្នុងអ.ស.ប. អាចនឹងធ្វើឲ្យបាត់បង់ឱកាស ក្នុងការចរចាសន្តិភាព នៅដើមបូព៌ា ហើយថា មានតែការចរចារវាងប៉ាឡេស្ទីន និងអ៊ីស្រាអែលទេ ដែលជាដំណោះស្រាយ ក្នុងការបង្កើតរដ្ឋប៉ាឡេស្ទីន។
ក៏ប៉ុន្តែ កាលពីថ្ងៃសុក្រ លោកម៉ះមូដ អាបាស់ (Mahmoud Abbas) ប្រធានអាជ្ញាធរប៉ាឡេស្ទីន បានថ្លែងថា ប៉ាឡេស្ទីនបានចរចាជាមួយអ៊ីស្រាអែលអស់រយៈពេលជិត ២០ឆ្នាំមកហើយ ក៏ប៉ុន្តែ មិនបានទទួលលទ្ធផលអ្វីទាំងអស់។ នៅពេលនេះ ការចរចានេះត្រូវជាប់គាំងទាំងស្រុង។ ហេតុដូច្នេះហើយទើបប៉ាឡេស្ទីនសម្រេចដាក់ពាក្យសុំចូលជារដ្ឋសមាជិកពេញសិទ្ធិរបស់អ.ស.ប. ដែលជាសិទ្ធិស្របច្បាប់របស់ប្រជាជនប៉ាឡេស្ទីន។
សហរដ្ឋអាមេរិកបានព្រមានទុកជាមុនរួចហើយថានឹងប្រើសិទ្ធិវ៉េតូទៅលើសមាជិកភាពរបស់ប៉ាឡេស្ទីន។ បើអាមេរិកជំទាស់ ប៉ាឡេស្ទីននឹងមិនមានសង្ឃឹមថានឹងអាចក្លាយជាសមាជិកពេញសិទ្ធិរបស់អ.ស.ប.បានទេ។
តាមការពិត ប៉ាឡេស្ទីនមានជម្រើសមួយទៀត គឺសុំចូលត្រឹមតែជារដ្ឋសង្កេតការណ៍អចិន្ត្រៃយ៍របស់អ.ស.ប.។ តាមរយៈជម្រើសនេះ ប៉ាឡេស្ទីនមិនអាចក្លាយជាសមាជិកពេញសិទ្ធិរបស់អ.ស.ប.មែន ក៏ប៉ុន្តែ អាចមានឋានៈជារដ្ឋ។ ម្យ៉ាងទៀត ការសុំចូលជារដ្ឋសង្កេតការណ៍ មិនចាំបាច់ឆ្លងកាត់ក្រុមប្រឹក្សាសន្តិសុខនោះទេ មានន័យថា សហរដ្ឋអាមេរិកមិនអាចប្រើសិទ្ធិវ៉េតូជំទាស់បានទេ។
ក៏ប៉ុន្តែ លោកអាបាស់បានជ្រើសរើសយកការប្រឈមមុខជាមួយនឹងអ៊ីស្រាអែល និងសហរដ្ឋអាមេរិក ដោយទាមទារសុំជាសមាជិកពេញសិទ្ធិ។ ប៉ាឡេស្ទីនទំនងជាចង់ដាក់សម្ពាធលើអាមេរិកឲ្យទទួលខុសត្រូវចំពោះការប្រើសិទ្ធិវ៉េតូរបស់ខ្លួន។ ប៉ាឡេស្ទីនចង់ឲ្យសាធារណមតិអន្តរជាតិឃើញថា ប្រជាជនប៉ាឡេស្ទីនមិនអាចទទួលបានសិទ្ធិស្របច្បាប់ជារដ្ឋសមាជិកពេញសិទ្ធិរបស់អ.ស.ប. គឺមកពីអាមេរិកជាអ្នកជំទាស់។
ទូរទស្សន៍ប៊ីប៊ីស៊ី (BBC) បានរៀបចំធ្វើការស្ទាបស្ទង់មតិមួយ នៅចន្លោះពីខែកក្កដា ដល់ចុងខែសីហា ២០១១ នៅតាមប្រទេសចំនួន ១៩ ស្តីពីសមាជិកភាពរបស់ប៉ាឡេស្ទីន។ ការស្ទាបស្ទង់មតិនេះបង្ហាញថា ប្រជាជនចំនួន ៤៩% គាំទ្រប៉ាឡេស្ទីន ២១% ប្រឆាំង និង ១១% អនុប្បវាទ។
ការប្រើសិទ្ធិវ៉េតូទៅលើសមាជិកភាពរបស់ប៉ាឡេស្ទីនក៏អាចនឹងធ្វើឲ្យទំនាក់ទំនងអាមេរិក នៅពិភពអារ៉ាប់ត្រូវអាប់អួផងដែរ។ ថ្មីៗនេះមន្រ្តីការទូតជាន់ខ្ពស់របស់អារ៉ាប៊ីសាអ៊ូឌីត ដែលជាសម្ព័ន្ធមិត្តរបស់អាមេរិក និងជាប្រទេសជង្រុកប្រេងកាត នៅដើមបូព៌ា បានពន្លយពាក្យថា ទំនាក់ទំនងរវាងអារ៉ាប៊ីសាអ៊ូឌីត និងសហរដ្ឋអាមេរិកនឹងមិនអាចដូចមុនទៀតទេ ប្រសិនបើអាមេរិកជំទាស់មិនឲ្យប៉ាឡេស្ទីនចូលជាសមាជិករបស់អ.ស.ប.៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ