តើអូតង់អាចមានកម្លាំងទប់ទល់នឹងរុស្ស៊ីដែរឬទេ?
ចុះផ្សាយនៅថ្ងៃ៖
ស្តាប់ - ០៥:១៥
តើអូតង់នឹងអាចជួយការពារសមាជិកពីការវាយប្រហារពីប្រទេសរុស្ស៊ីបានដែរឬទេ ? គណៈកម្មការសភាអង់គ្លេស កាលពីថ្ងៃពុធកន្លងទៅ បានបង្ហាញដោយគ្មានសង្ស័យថា ក្នុងពេលបច្ចុប្បន្ននេះ អង្គការសម្ព័ន្ធអាត្លង់ទិកខាងជើង ឬអូតង់ នៅមិនទាន់ត្រៀមខ្លួននៅឡើយទេ នៅក្នុងករណីមានការវាយប្រហារណាមួយរបស់រុស្ស៊ីទៅលើប្រទេសសមាជិករបស់អូតង់។
អ្នកដែលទាញសញ្ញាអាសន្ន គឺគណៈកម្មការសភារបស់អង់គ្លេស។ អង់គ្លេសជាសមាជិកសកម្ម ទាំងថវិកា និងកងទ័ពនៅក្នុងអង្គការអូតង់ដែលមានសមាជិកសរុប២៨ប្រទេស។ អង់គ្លេសដែលកាលពីដើមសប្តាហ៍មុនបានប្រកាសបញ្ជូនទាហានរបស់ខ្លួនប្រមាណ ១៣៥០ទៅចូលរួមសមយុទ្ធយោធានៅក្នុងប្រទេសប៉ូឡូញ ក្រោមស្លាកគាំទ្រ សម្ព័ន្ធមិត្តនៅអឺរ៉ុបខាងកើត។
នៅក្នុងរបាយការណ៍របស់ខ្លួន គណៈកម្មការការពារជាតិរបស់សភាអង់គ្លេសបានព្រមានចំៗថា សមត្ថភាពអូតង់បច្ចុប្បន្ននៅខ្វះខាត គឺមិនអាចការពារប្រទេសសមាជិកដែលអាចរងការវាយប្រហារពីរុស្ស៊ី។ ការភ្ជាប់តំបន់គ្រីមេទៅក្នុងទឹកដីរបស់រុស្ស៊ីបានបង្ហាញយ៉ាងច្បាស់ថា កំរិតគំរាមកំហែងទៅលើប្រទេសអឺរ៉ុបដែលជាសមាជិករបស់អូតង់ ពីសំណាក់រុស្ស៊ី ពិតជាមានមែន។ តាមគណៈកម្មការសភាអង់គ្លេស ការវាយប្រហារពី រុស្ស៊ីមិនមែនធ្វើឡើងត្រឹមតែការប្រើទ័ពនៅក្នុងសមរភូមិ ដែលគេថា ការប្រយុទ្ធធ្វើសង្រ្គាមរវាងពីរភាគីទេ ប៉ុន្តែ ការវាយប្រហាររបស់រុស្ស៊ី អាចធ្វើឡើងក្រោមយុទ្ធសាស្រ្តថ្មីប្លែក គឺអាចវាយប្រហារទៅលើប្រព័ន្ធព័ត៌មានវិទ្យារបស់ប្រទេសសមាជិកអង្គការអូតង់ ឬប្រើទាហានស៊ីឈ្នួល ដូចករណីរុស្ស៊ីកំពុងគាំទ្រផ្នែកអាវុធទៅលើក្រុមឧទ្ទាមអ៊ុយក្រែនបច្ចុប្បន្ននេះស្រាប់។
ដោយមើលឃើញជាក់ស្តែងពីទំហំគំរាមកំហែងរបស់រុស្ស៊ីទៅលើសន្តិសុខរបស់ប្រទេសសមាជិកអូតង់ ជាពិសេសប្រទេសនៅអឺរ៉ុបខាងកើតដែលនៅជាប់ព្រំដែនជាមួយរុស្ស៊ី គណៈកម្មការសភាអង់គ្លេសបានអំពាវនាវជាបន្ទាន់ឲ្យគេធ្វើកំណែទម្រង់ស៊ីជម្រៅ ដើម្បីឲ្យអង្គការអូតង់អាចប្រឈមទប់ទល់នឹងរុស្ស៊ី។
តាមគណៈកម្មការសភាអង់គ្លេស អូតង់ត្រូវបង្កើនវត្តមានទ័ពជាប្រចាំនៅក្នុងប្រទេសសមាជិកបី អេស្តូនី លីទុយអានី ឡេតូនី ដែលនៅខ្សត់ខ្សោយខាងផ្នែកការពារ ប៉ុន្តែ កំពុងបារម្ភគ្រប់ពេលវេលាពីសន្តិសុខរបស់ខ្លួនដោយសារតែប្រទេសទាំងនេះមានព្រំដែនជាប់ជាមួយរុស្ស៊ី។ សមាជិកសភាអង់គ្លេសទាមទារផងដែរឲ្យគេបញ្ចូលប្រភេទសង្រ្គាមដែលប្រើទាហានស៊ីឈ្នួល ចូលទៅក្នុងមាត្រាទី៥ របស់អូតង់ ដែលសរសេរពីកម្រិតអន្តរាគមន៍របស់អូតង់ នៅពេលប្រទេសសមាជិករងការវាយប្រហារពីភាគីណាមួយ។ រហូតមក មាត្រាទី៥បានគូសបញ្ជាក់ថា ទ័ពអូតង់អាចចូលអន្តរាគមន៍ នៅពេលដែលសង្រ្គាមផ្ទុះឡើងរវាងប្រទេសពីរ ប៉ុន្តែ មិនអាចអន្តរាគមន៍ក្នុងករណីដែលប្រទេសសមាជិកជួបវិបត្តិទាមទារបំបែកទឹកដីរបស់ពួកឧទ្ទាម ដូចជា នៅក្នុងប្រទេសអ៊ុយក្រែនទេ ដែលតាមពិតទៅ ពួកឧទ្ទាមសុទ្ធតែបានទទួលការគំាទ្រអាវុធពីប្រទេសរុស្ស៊ី។
មន្រ្តីអូតង់វិញបានឆ្លើយតបទៅនឹងការអំពាវនាវរបស់គណៈកម្មការអង់គ្លេសដោយអះអាងថា អូតង់បានបញ្ជូនយន្តហោះ ទៅហោះជាប្រចាំនៅប្រទេសអឺរ៉ុបខាងកើត ជាពិសេសនៅនៅលើប្រទេសប៉ូឡូញ និងរូម៉ានី។ គេគ្រោងផងដែរនឹងបង្កើតមូលដ្ឋានទ័ពជាអចិន្ត្រៃយ៍នៅក្នុងប្រទេសប៉ាល់ទិក ដូចជា អេស្តូនី លីទុយអានី ឡេតូនី។
រុស្ស៊ីបានលូកដៃ អន្តរាគមន៍ទៅក្នុងវិបត្តិរបស់អ៊ុយក្រែន ដែលមិនមែនជាសមាជិករបស់អូតង់ ប៉ុន្តែ អូតង់មិនអាចមើលរំលងពីមហិច្ឆតាទៅថ្ងៃមុខរបស់រុស្ស៊ី ដែលអាចមានទៅលើប្រទេសជិតខាងដទៃទៀត ដែលតាមពិតជាជាសមាជិករបស់អូតង់ទេ។ អង្គការអូតង់ត្រូវបានបង្កើតឡើងនៅឆ្នាំ ១៩៤៩ គឺនៅក្រោយចប់សង្រ្គាមលោកលើកទីពីរ ដើម្បីធានាសន្តិសុខដល់ប្រទេសសមាជិក។ ក្នុងរយៈពេល១៥ឆ្នាំចុងក្រោយនេះ អង្គការអូតង់បានពង្រីកខ្លួន ដោយបានទទួលយកប្រទេសនៅតាមបណ្តាព្រំដែនជាមួយរុស្ស៊ីជាច្រើនចូលជាសមាជិក។ ការចូលជាសមាជិករបស់ អេស្តូនី លីទុយអានី ឡេតូនី ដែលធ្លាប់ជាស្ថិតនៅក្រោមសហភាពសូវៀតបានធ្វើឲ្យរុស្ស៊ីមិនសប្បាយចិត្តយ៉ាងខ្លាំង។ រុស្ស៊ីតែងតែព្រមានកុំឲ្យអូតង់ចេះតែចូលទៅដំឡើងខែលមីស៊ីលនៅក្នុងទឹកដីដែលនៅជាប់រុស្ស៊ី។ រុស្ស៊ីក៏ធ្លាប់ព្រមានញយដងពីវត្តមានទ័ពអូតង់នៅតាមប្រទេសជាប់ព្រំដែនជាមួយរុស្ស៊ី ដែលរុស្ស៊ីចាត់ទុកជាការគំរាមកំហែងដល់សន្តិសុខរបស់ខ្លួន។
អង្គការអូតង់ពេលនេះហាក់បានភ្ញាក់ខ្លួន និងបានឃើញកាន់តែច្បាស់ពីមហិច្ឆតារបស់រុស្ស៊ី បន្ទាប់ពីម៉ូស្គូកាត់យកទឹកដីអ៊ុយក្រែនមួយចំណែកទៅធ្វើជារបស់ខ្លួន។ ប៉ុន្តែ ភ្ញាក់ដឹងខ្លួននៅពេលនេះ ក៏នឹងមិនអាចឲ្យអូតង់ងើបតទល់នឹងរុស្ស៊ីបានដែរ។ បើទោះបីជាអូតង់ធ្លាប់មានកម្លាំងទ័ពដើរតួនាទីសំខាន់នៅក្នុងពិភពលោក ប៉ុន្តែ បច្ចុប្បន្ននេះ អូតង់ចាញ់ប្រៀបរុស្ស៊ីទាំងផ្នែកយោធា និងថវិកា។ ប្រទេសសមាជិករបស់អូតង់ទាំង២៨ ដែលភាគច្រើនជាសមាជិកអឺរ៉ុបបានកាត់បន្ថយចំណាយទៅលើថវិកាយោធា ដោយសារតែវិបត្តិសេដ្ឋកិច្ច គឺផ្ទុយស្រឡះពីរុស្ស៊ីដែលបានបង្កើនថវិកាកងទ័ពមិនឈប់ឈរ។ ដោយសារតែវិបត្តិសេដ្ឋកិច្ច និងគំនិតដែលគិតថា នឹងគ្មានសង្រ្គាមបានធ្វើឲ្យប្រទេសអឺរ៉ុបជាច្រើនកាត់បន្ថយចំនួនកងទ័ព កាត់បន្ថយចំនួនរថក្រោះដែលតាមពិតជាអាវុធដ៏មានប្រសិទ្ធិភាពនៅក្នុងសមរភូមិ។
ម្យ៉ាងទៀត បទពិសោធន៍អន្តរាគមមិនសូវជោគជ័យរបស់ទ័ពអូតង់ នៅក្នុងសង្រ្គាមអ៊ីរ៉ាក់ អាហ្វហ្កានីស្ថាន លីប៊ី និងស៊ីរីរឹតតែបង្ហាញយ៉ាងច្បាស់ថា អូតង់លំបាកនឹងវាយយកឈ្នះលើប្រទេសដែលមានកម្លាំងយោធាមិនសូវសំខាន់។ ចុះទម្រាំជាមួយរុស្ស៊ីដែលមានសព្វាវុធទំនើបមិនចាញ់អាមេរិក (ដោយមិនទាន់គិតអាវុធដែលមានបំពាក់គ្រាប់បែកបរមាណូ) តើអង្គការអូតង់នឹងគ្មានកម្លាំងឯណាមកទប់ទល់នឹងរុស្ស៊ីនោះ។ កម្លាំងយោធានៅពេលនេះកំពុងផ្តោតខ្លាំងនៅអាស៊ី។ អូតង់ដែលមានសមាជិកមកពីទ្វីបចាស់ លែងតំណាងឲ្យមហាអំណាចយោធាដូចមុនទៀតហើយ។ ក្នុងករណីមានជម្លោះជាមួយរុស្ស៊ី អូតង់នឹងត្រូវការជំនួយពីអាមេរិក ដើម្បីអាចជួយប្រទេសសមាជិក ប្រឈមនឹងរុស្ស៊ី។
រូបភាពអូតង់ថ្មី ទំនងជានឹងអាចលេចចេញជារូបរាងនៅខែកញ្ញាខាងមុខ នាឱកាសជំនួបកំពូលប្រចាំឆ្នាំរបស់អង្គការអូតង់នៅក្នុងប្រទេសអង់គ្លេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ