រុស្ស៊ីផ្តើមសមយុទ្ធទល់នឹងលំហាត់សឹកអូតង់ នៅក្បែរព្រំដែនខ្លួន
សមយុទ្ធនេះប្រព្រឹត្តទៅ នៅលើដែនដីខេត្ត Kaliningrad ឯប៉ែកខាងលិចបង្អស់របស់រុស្ស៊ី ជាប់នឹងបណ្តាប្រទេសបាល់ទិក ជាទីដែលតាំងពីម្សិលមិញមក បក្សសម្ព័ន្ធអូតង់បានចាប់ផ្តើមលំហាត់សឹកប្រចាំឆ្នាំ ក្រោមឈ្មោះថា Saber Strike «កាប់ដាវឆ្នាំ២០១៤»។ មុននឹងផ្តើមសមយុទ្ធតបវិញនេះ ម៉ូស្គូចាត់ទុកលំហាត់សឹកដ៏ធំបំផុតលើកនេះរបស់អូតង់ នៅជាប់ព្រំដែនខ្លួន ថាជាការបង្ហាញយ៉ាងសំញែងនៃចេតនាជាសត្រូវទល់នឹងរុស្ស៊ី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០២
តាមដែលក្រសួងការពារជាតិរុស្ស៊ីប្រកាសឲ្យដឹង ចូលរួមក្នុងសមយុទ្ធនៅលើដែនដីនៃខេត្តរុស្ស៊ី Kaliningrad គឺយោធា សព្វាវុធ គ្រឿងបច្ចេកទេសចម្បាំង ក្នុងចំនួនប្រហាក់ប្រហែលនិងយោធា សព្វាវុធ គ្រឿងបច្ចេកទេសចម្បាំងដែលបក្សសម្ព័ន្ធអូតង់ដាក់ឲ្យសកម្ម ក្នុងលំហាត់សឹក នៅតាមបីប្រទេសបាល់ទិក ដែលបានចាប់ផ្តើមថ្ងៃទី៩មិថុនា នៅលើដែនដីឡេតូនី រួចបន្ទាប់មកកាត់តាមអេស្តូនី ហើយនឹងចប់ទៅនៅលីទុយអានី ថ្ងៃទី២០មិថុនា។
ទន្ទឹមនឹងលំហាត់សឹកនៅលើដីគោក ក្រោមឈ្មោះថា Saber Strike អូតង់ក៏ធ្វើប្រតិបត្តិការ នៅលើផ្ទៃទឹកសមុទ្របាល់ទិក តាំងពីថ្ងៃទី៦មិថុនាម៉្លេះ លុះរហូតដល់ថ្ងៃទី២១មិថុនា ក្រោមឈ្មោះថា Baltops-២០១៤។ ចូលរួមក្នុងលំហាត់សឹកអូតង់ មានយោធាដល់ទៅ ៤.៧០០នាក់ និងយានយន្តចម្បាំងចំនួន ៨០០គ្រឿង បញ្ជូនទៅដោយប្រទេសដែលចូលរួម គឺអង់គ្លេស កាណាដា ស.រ.អា. ហ្វាំងឡង់ ប៉ូឡូញ ដាណឺម៉ាក ន័រវ៉ែហ្ស និងប្រាកដណាស់ បីប្រទេសបាល់ទិក គឺឡេតូនី អេស្តូនី លីទុយអានី សរុបទៅ១០ប្រទេស។
មុនដំបូង រុស្ស៊ីត្រូវបានអញ្ជើញឲ្យចូលរួមដែរ ក្នុងលំហាត់សឹកនោះ ប៉ុន្តែអូតង់បានព្យួរទុកទៅវិញ ភាពជាដៃគូយោធាជាមួយម៉ូស្គូ ក្រោយពីរុស្ស៊ីបានភ្ជាប់យកទឹកដីគ្រីមេរបស់អ៊ុយក្រែន កាលពីខែមិនា។
លោករដ្ឋមន្ត្រីការបរទេសរុស្ស៊ី Serguei Lavrov ថ្លែងល្ងាចថ្ងៃចន្ទម្សិលមិញ ចាត់ទុកការវាតទីរបស់អូតង់មកទិសខាងកើត និងការពង្រឹងហេដ្ឋារចនាសម្ព័ន្ធយោធារបស់បក្សសម្ព័ន្ធនេះ នៅជិតព្រំប្រទល់រុស្ស៊ីតែម្តង ថានឹងបាន «ផលបញ្ច្រាស »ទៅវិញ។ តាមលោក Lavrov ការវាតទីនេះ គឺវា “ផ្ទុយនឹង កាតព្វកិច្ចដែលអូតង់ ទទួលយកទៅដាក់លើខ្លួន ក្នុងក្របខ័ណ្ឌនៃ“អង្គការដើម្បីសហប្រតិបត្តិការ និងសន្តិសុខនៅទ្វីបអឺរ៉ុប” ហៅកាត់ថា OSCE និងផ្ទុយនឹង “ឯកសារជាគ្រឹះមូលដ្ឋានចុះរវាងរុស្ស៊ី និងអូតង់ក្នុងឆ្នាំ១៩៩៧”៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ