នេតាយ៉ាហ៊ូគំរាមសងសឹកក្រុមហាម៉ាសប៉ាឡេស្ទីន ចំពោះមរណភាពយុវជនអ៊ីស្រាអែល៣រូប
ចុះផ្សាយនៅថ្ងៃ៖
ស្តាប់ - ០៥:៤០
ចាប់ពីថ្ងៃចន្ទម្សិលមិញមក ភាពតានតឹងបានផ្ទុះឡើងជាថ្មី រវាងអ៊ីស្រាអែលនិងប៉ាឡេស្ទីន ក្រោយពេលកងទ័ពអ៊ីស្រាអែលបានរកឃើញសាកសពយុវជនអ៊ីស្រាអែល៣នាក់ ដែលបានបាត់ខ្លួន កាលពីថ្ងៃ១២មិថុនា នៅតំបន់ស៊ីសហ្ស៊កដានី។ យប់ថ្ងៃចន្ទម្សិលមិញ យន្តហោះអ៊ីស្រាអែលបានទំលាក់គ្រាប់បែក បាញ់ប្រហារទីតាំងក្រុមហាម៉ាសជាច្រើនកន្លែង នៅតំបន់ហ្កាហ្សា។ នាយករដ្ឋមន្ត្រីអ៊ីស្រាអែលបានចោទក្រុមហាម៉ាស ពីដំបូងទីថា បានចាប់ជំរិតយុវជនទាំងនេះ ហើយបានសន្យាចាត់វិធានការសងសឹក មិនអោយក្រុមហាម៉ាស រួចខ្លួនឡើយ។ ក្រុមហាម៉ាសបានគំរាមតបវិញថា រាល់ការវាយលុក រឺសង្គ្រាមពីសំណាក់អ៊ីស្រាអែល នឹងនាំអ៊ីស្រាអែល ទៅកាន់ទ្វារឋាននរក។
សហគមន៍អន្តរជាតិ មានអង់គ្លេស អាមេរិក រួមនឹងសម្តេចសង្ឃកាតូលិក ប៉ាប ហ្វ្រង់ស៊័រ ផងដែរ បានថ្កោលទោសការស្លាប់របស់យុវជនអ៊ីស្រាអែលទាំង៣រូប។ អគ្គលេខាធិការអង្គការសហ ប្រជាជាតិ បាន គីមូន បានអំពាវនាវអោយអ៊ីស្រាអែល និងប៉ាឡេស្ទីនធ្វើការរួមគ្នា ដើម្បីរកមុខជនដៃដល់ ដែលបានសម្លាប់យុវជនទាំងនេះ។ ទន្ទឹមនេះដែរ សហគមន៍អន្តរជាតិបានសុំអោយនាយករដ្ឋមន្ត្រីអ៊ីស្រាអែលអត់ធ្មត់ ចៀសវាងរុញអោយស្ថានភាពធ្លាក់ដុនដាបបន្ថែម។
មរណភាពរបស់យុវជនអ៊ីស្រាអែលទាំង៣រូប ជាលេសអោយអ៊ីស្រាអែល ប្រតិបត្តិការយោធាធ្ងន់ដៃ កំទេចក្រុមហាម៉ាស ដែលទើបបង្កើតរដ្ឋាភិបាលឯកភាពជាតិជាមួយប៉ាឡេស្ទីន
អ៊ីស្រាអែលចាំអោយតែមានការផ្គើនណាមួយចេញពីក្រុមហាម៉ាស ដើម្បីលេងក្រុមហាម៉ាសអោយចាស់ដៃ។ ក្រោយរកឃើញសាកសពយុវជនទាំងនេះភ្លាម យប់ថ្ងៃចន្ទម្សិលមិញ កងទ័ពអ៊ីស្រាអែលបានទំលាក់គ្រាប់បែក និងបាញ់ប្រហារទីតាំងក្រុមហាម៉ាស នៅតំបន់ហ្កាហ្សាដល់ទៅជាង៣០ដង។ តំបន់ហ្កាហ្សានេះ ស្ថិតក្រោមការគ្រប់គ្រងរបស់កងការពារសន្តិសុខក្រុមហាម៉ាស ទោះជាក្រុមហាម៉ាសនិងប៉ាឡេស្ទីនបានបង្កើតរដ្ឋាភិបាលរួបរួមជាតិ មានសមាសភាពសមាជិកជាអ្នកឯករាជ្យក៏ដោយចុះ។ កងទ័ពអ៊ីស្រាអែលក៏បានកំទេចផ្ទះសម្បែងជនសង្ស័យ២រូប ជាប់សង្ស័យថា បានចាប់យុវជនអ៊ីស្រាអែលទាំងនោះដែរ។ បុរសជាប់សង្ស័យទាំង២នាក់នេះ កំពុងរត់គេចខ្លួន។ ផ្នែកសន្តិសុខអ៊ីស្រាអែល ប្រាប់ថា ពួកគេទាំង២រូប ជាប់ពាក់ព័ន្ធនឹងចលនាហាម៉ាសប៉ាឡេស្ទីន។
យើងឃើញថា គ្រាន់តែយុវជនអ៊ីស្រាអែលទាំង៣រូប បានបាត់ខ្លួន នៅថ្ងៃ១២មិថុនាភ្លាម អ៊ីស្រាអែលចោទក្រុមហាម៉ាសភ្លាម ថាបានចាប់ខ្លួនយុវជនទាំងនេះ ហើយរដ្ឋាភិបាលបើកប្រតិបត្តិការទ្រង់ទ្រាយបែបសង្គ្រាមតែម្តង នៅស៊ីសហ្ស៊កដានី កន្លែងដែលយុវជនទាំង៣រូបបាត់ខ្លួន។ គ្រាន់តែចំនួនទាហានតាមរកយុវជនទាំងនេះ គឺមានដល់២ពាន់នាក់ឯណោះ។ ក្នុងប្រតិបត្តិការនេះ កងទ័ពអ៊ីស្រាអែលបានចាប់មនុស្សសង្ស័យជាង២៥០នាក់ ក្នុងនោះមានទាំងអ្នកទោសដែលអ៊ីស្រាអែលធ្លាប់បានដោះលែងកន្លងមកដែរ។ ដោយឡែក ក្រុមហាម៉ាសបានប្រកែកតាំងពីដំបូងមកថា មិនបានចាប់ខ្លួនយុវជនអ៊ីស្រាអែលទាំង៣រូបនេះទេ។
និយាយអោយចំ អ៊ីស្រាអែលមិនសប្បាយចិត្តនឹងក្រុមហាម៉ាស ដែលទើបបានបង្កើតរដ្ឋាភិបាលរួបរួមជាតិ ជាមួយប៉ាឡេស្ទីន កាលពីដើមខែមិថុនាទេ ព្រោះថាក្រុមហាម៉ាសជាសត្រូវរបស់អ៊ីស្រាអែល។ ក្រុមហាម៉ាសមិនដែលទទួលស្គាល់រដ្ឋជនជាតិហ្ស៊ីហ្វអ៊ីស្រាអែលទេ។ ប៉ុន្តែ សហគមន៍អន្តរជាតិបានទទួលស្គាល់រដ្ឋាភិបាលរួបរួមជាតិប៉ាឡេស្ទីន ដែលមានក្រុមហាម៉ាសចូលរួម។ នេះហើយជាឧបសគ្គសម្រាប់អ៊ីស្រាអែល។ ដូច្នេះ យើងអាចនិយាយថា រដ្ឋាភិបាលលោកនេតាយ៉ាហ៊ូ ត្រូវរកគ្រប់មធ្យោបាយ ដើម្បីបំបាក់ក្រុមហាម៉ាសអោយចុះខ្សោយ។ ត្រូវរកលេសបង្ហាញសហគមន៍អន្តរជាតិថា ក្រុមហាម៉ាសជាក្រុមភេរវជន ដែលគ្រប់គ្នា មិនត្រូវទទួលស្គាល់ក្នុងរដ្ឋាភិបាលប៉ាឡេស្ទីនទេ។
គួររំលឹកដែរថា ក្រុមហាម៉ាសនេះ ក៏ជាលេសធ្វើអោយអ៊ីស្រាអែលកាត់ផ្តាច់ការចរចាសន្តិភាពជាមួយប៉ាឡេស្ទីន កាលពីខែមេសាដែរ។ ព្រោះថា កាលណោះ ក្រុមហ្វាតារបស់ប្រធានរដ្ឋអំណាចប៉ាឡេស្ទីន និងក្រុមហាម៉ាស បានចុះកិច្ចព្រមព្រៀងផ្សះផ្សាជាតិជាមួយគ្នា សំដៅបង្កើតរដ្ឋាភិបាលរួបរួមជាតិប៉ាឡេស្ទីន។ អ្វីដែលគួរអោយបារម្ភពេលនេះ គឺរដ្ឋាភិបាលរួបរួមជាតិប៉ាឡេស្ទីន។ បើក្រុមហាម៉ាសធ្លាក់ដុនដាប នោះរដ្ឋាភិបាលរួបរួមជាតិប៉ាឡេស្ទីនក៏អាចបាត់លំនឹងដែរ។
តាំងពីដំបូងទី ចលនាហ្វាតារបស់រដ្ឋអំណាចលោកម៉ាមូត អាបាស និងចលនាហាម៉ាស បែកបាក់គ្នា ដោយសារការបាត់ខ្លួនយុវជនអ៊ីស្រាអែលទាំង៣រូប
អ៊ីស្រាអែលតែងរកមធ្យោបាយជំរុញអោយគ្រប់គ្នាមិនទទួលស្គាល់ក្រុមហាម៉ាស។ ពេលយុវជនអ៊ីស្រាអែលទាំង៣រូបបាត់ខ្លួនភ្លាម នាយករដ្ឋមន្ត្រីអ៊ីស្រាអែល នេតាយ៉ាហ៊ូ បានជំរុញប្រធានរដ្ឋអំណាចប៉ាឡេស្ទីន លោកម៉ាមូឌ អាបាស អោយថ្កោលទោសជនដៃដល់ចាប់ជំរិតយុវជនទាំងនេះ។
ប្រធានរដ្ឋអំណាចប៉ាឡេស្ទីនហាក់បានស្របយោបល់តាមលោកនេតាយ៉ាហ៊ូ ដោយបានប្រកាសថា ជនដែលចាប់យុវជនអ៊ីស្រាអែលទាំងនោះ គឺជាជនដែលមានបំណងបំផ្លាញការបង្រួបបង្រួមជាតិប៉ាឡេស្ទីន។ ដូច្នេះ ដោយប្រយោល លោកអាបាស កំពុងតែចោទក្រុមហាម៉ាសថាបានចាប់ខ្លួនយុវជនអ៊ីស្រាអែលនោះហើយ ទោះជាក្រុមហាម៉ាសបដិសេធក្តី។ លោកអាបាសដឹងច្បាស់ណាស់ថា នាយករដ្ឋមន្ត្រីអ៊ីស្រាអែលចោទក្រុមហាម៉ាសពេញទី ថាបានចាប់យុវជនទាំង៣រូប។ ប្រធានរដ្ឋអំណាចប៉ាឡេស្ទីនបារម្ភថា ការចាប់ខ្លួនយុវជនអ៊ីស្រាអែលទាំងនេះ អាចប៉ះពាល់រដ្ឋាភិបាលរួបរួមជាតិប៉ាឡេស្ទីន ដែលចលនាហ្វាតាទើបបានបង្កើតជាមួយចលនាហាម៉ាស។
ម្យ៉ាងទៀត ដើម្បីអោយសហគមន៍អន្តរជាតិបន្តទទួលស្គាល់រដ្ឋាភិបាលរួបរួមជាតិប៉ាឡេស្ទីន លោកម៉ាមូឌ អាបាស បានប្រកាសថ្មីៗនេះទៀតថា ការសហការសន្តិសុខជាមួយអ៊ីស្រាអែល គឺស្ថិតក្នុងប្រយោជន៍របស់ប៉ាឡេស្ទីន។ ការប្រកាសនេះ ធ្វើអោយក្រុមហាម៉ាសគិតថា ផ្នែកសន្តិសុខនៃក្រុមហ្វាតារបស់លោកអាបាស ចង់សហការមមាញឹកជាមួយផ្នែកចារកិច្ចអ៊ីស្រាអែល ប្រឆាំងក្រុមហាម៉ាសប៉ាឡេស្ទីន។ ដូច្នេះ ក្រុមហាម៉ាសមិនសុខចិត្តទេ។ ក្រុមហាម៉ាសខឹងលោកអាបាសខ្លាំងណាស់។ ក្រុមហាម៉ាសលើកឡើងថា ការប្រកាសរបស់ប្រធានរដ្ឋអំណាចប៉ាឡេស្ទីនបែបនេះ គឺផ្ទុយពីគោលការណ៍នៃការរួបរួមជាតិ និងបានប៉ះទង្គិចជនជាតិប៉ាឡេស្ទីនរាប់ពាន់នាក់ ដែលកំពុងរស់ក្នុងគុកអ៊ីស្រាអែល។
ដូច្នេះ លោកអាបាសត្រូវតែរកដំណោះស្រាយសម្របសម្រួលជាមួយក្រុមហាម៉ាសហើយ ដើម្បីបន្ថយភាពតានតឹងក្នុងរដ្ឋាភិបាលរួបរួមជាតិ ព្រោះរដ្ឋាភិបាលរួបរួមជាតិនេះ អាចជួបបញ្ហាធ្ងន់ ដែលនេះគឺជាផលចំណេញសម្រាប់អ៊ីស្រាអែលទៅវិញទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ