ទំនាក់ទំនងចិននិងអាមេរិកអាចបំពុលដោយសំណុំរឿងមេធាវីពិការភ្នែក
ចុះផ្សាយនៅថ្ងៃ៖
ស្តាប់ - ០៧:០០
នៅក្រោយដំណឹងលេចឮថា មេធាវីពិការភ្នែកChen Guangcheng បានលួចរត់ពីការយាមឃ្លាំមើលរបស់ប៉ូលិសភូមិ និង កំពុងស្ថិតនៅ ក្នុងស្ថានទូតអាមេរិក ក្នុងទីក្រុងប៉េកាំង មិត្តភក្តិ និងសកម្មជនប្រឆាំងមួយចំនួនត្រូវបានអាជ្ញាធរចាប់ឃាត់ខ្លួន សួរចម្លើយ ជាបន្តបន្ទាប់។ នៅថ្ងៃអាទិត្យ ទី ២៩ មេសា តាមភរិយារបស់លោកហ៊ូ ជា ដែលជាសកម្មជនការពារសិទ្ធិមនុស្ស លោកហ៊ូ ជាដែលបានជួបលោក Guangcheng នៅក្នុងសប្តាហ៍នេះ ត្រូវប៉ូលិសចាប់យកសួរចម្លើយ កាលពីថ្ងៃសៅរ៍ទី ២៨ មេសា។ គ្រួសារ និងសមាជិកសកម្មជនប្រឆាំងម្នាក់ដែលបានដឹកលោកChen Guangchengទៅទីក្រុងប៉េកាំងក៏ត្រូវប៉ូលិសភូមិវាយ និងចាប់ទៅប៉ុស្តិ៍ប៉ូលិសកាលពីថ្ងៃសុក្រទី ២៧ មេសា។
ក្រុមសកម្មជនការពារសិទ្ធិមនុស្សចិន មានទីតាំងនៅអាមេរិក បានអះអាងថា លោក Guangchengពេលនេះកំពុងស្ថិតនៅកន្លែងសុវត្ថិភាព គឺនៅស្ថានទូតអាមេរិក ហើយភាគីចិន និងអាមេរិកកំពុងចរចាគ្នាពីករណីលោក Guangcheng ។ ប៉ុន្តែ រហូតមកដល់ពេលនេះ ជាផ្លូវការ ទាំងភាគីអាមេរិក និងចិន បាននៅស្ងៀម មិនបញ្ជាក់ព័ត៌មាននេះ។
ដំណឹងលោកGuangcheng កំពុងស្ថិតនៅក្នុងស្ថានទូតអាមេរិក ផ្ទុះកើតមាន នៅតែប៉ុន្មានថ្ងៃមុនដំណើរទស្សនកិច្ចរបស់ ប្រមុខការបរទេសអាមេរិក លោកស្រី ហ៊ីឡារី គ្លីនតុន អមដំណើរដោយរដ្ឋមន្រ្តីថវិកាអាមេរិក និងអនុរដ្ឋមន្រ្តី ខាងសិទ្ធិមនុស្សអាមេរិកនៅទីក្រុងប៉េកាំង (ពីថ្ងៃទី ៣ និងទី ៤មេសា)។ ទស្សនកិច្ចរបស់រដ្ឋមន្រ្តីសំខាន់ៗអាមេរិកនៅប្រទេសចិន ធ្វើឡើងដើម្បីស្តារឡើងវិញ ទំនាក់ទំនងការទូត និងសេដ្ឋកិច្ចរវាងចិន និងអាមេរិក ដែលមិនសូវជាល្អប៉ុន្មានកន្លងមក។
បើទោះបី ជាអាមេរិកមិនបានប្រកាសទទួលស្គាល់ថា លោក Guangchengកំពុងស្ថិតនៅក្នុងស្ថានទូតអាមេរិក ប៉ុន្តែ លោកស្រីហ៊ីឡារី គ្លីនតុនលើកយកទៅនិយាយ នៅក្នុងជំនួបរបស់លោកស្រីជាមួយលោកនាយករដ្ឋមន្រ្តីចិន វេន ជាប៉ាវ នៅថ្ងៃព្រហស្បតិ៍ខាងមុខនេះពីករណីរបស់លោក Guangcheng និងករណីចាប់លោក ហ៊ូ ជា និងសកម្មជនដទៃទៀត នៅចុងសប្តាហ៍នេះ។ លោកស្រី ហីឡារី គ្លីនតុនផ្ទាល់ធ្លាប់លើកឡើងពីការបារម្ភទាក់ទងនឹងស្ថានភាពរំលោភសិទ្ធិមនុស្សទៅលើមេធាវីពិការភ្នែក Guangcheng។ ម្យ៉ាងទៀត បើតាមសកម្មជនការពារសិទ្ធិមនុស្សចិន ដែលមានទីតាំងនៅអាមេរិក រដ្ឋបាលរបស់លោកអូបាម៉ាត្រូវលើកយកបញ្ហារបស់លោក Guangcheng ទៅនិយាយដាច់ខាតជាមួយរដ្ឋអំណាចប៉េកាំង ព្រោះរឿងនេះ វាទាក់ទងនឹងអាយុជីវិត និងលទ្ធិប្រជាធិបតេយ្យក្នុងប្រទេសចិន។ បើសិនរដ្ឋមន្រ្តីរបស់លោកអូបាម៉ាមិននិយាយរឿងរំលោភសិទ្ធិមនុស្សនៅចិនជាមួយថ្នាក់ដឹកនាំចិនទេ នោះគេជឿថា លោកអូបាម៉ាអាចបាត់បង់ប្រជាប្រិយភាព ដោយសារគណបក្សសាធារណរដ្ឋ ដែលជាគណបក្សប្រជែងលើករិះគន់ ពីបញ្ហានេះ នៅពេលការបោះឆ្នោតប្រធានាធិបតីកាន់តែខិតចូលមកដល់៕
នេះមិនមែនជាលើកទីមួយទេ ដែលមានអ្នកប្រឆាំងចិនរត់ទៅសុំជ្រកកោននៅស្ថានទូតអាមេរិក។ កាលពីខែកុម្ភៈមុននេះ មេប៉ូលិសខេត្តចុងឈីងម្នាក់ ដែលពាក់ព័ន្ធនឹងជម្លោះនយោបាយផ្ទៃក្នុងរបស់បក្សកុម្មុយនិស្តចិន បានរត់ទៅលាក់ខ្លួន នៅស្ថានទូតអាមេរិក។ កាលពីឆ្នាំ ១៩៨៩ សកម្មជនដើម្បីលទ្ធិប្រជាធិបតេយ្យចិនម្នាក់ដែលបានចូលរួមក្នុងចលនាប្រឆាំងរបស់និស្សិតនៅទីលានធានអានមេន ក៏ធ្លាប់ ទៅរត់ជ្រកកោន នៅក្នុងស្ថានទូតអាមេរិក។ កាលណោះ លោកFang Lizhi បានស្ថិតនៅក្រោមការឃុំគ្រងសុវត្ថិភាពពីស្ថានទូតអាមេរិក រយៈពេលមួយឆ្នាំ មុននឹងត្រូវគេបញ្ជូនចេញទៅអាមេរិក។
សំណុំរឿងលោកFangកាលណោះបានធ្វើឲ្យចិន និងអាមេរិកមើលមុខគ្នាមិនចំ។ ទំនាក់ទំនងការទូតរវាងប្រទេសទាំងពីរកាលណោះបានក្លាយជាល្អក់កករ។ រហូតមកដល់ពេលនេះ ទំនាក់ទំនងរវាងមហាអំណាចពិភពលោកទាំងពីរមិនដែលល្អប្រសើរម្តងណាទេ ព្រោះអាមេរិកឧស្សាហ៍រិះគន់ចិនពីរឿងរំលោភសិទ្ធិមនុស្ស។ ករណីលោកChen Guangcheng ត្រូវទទួលឲ្យជ្រកកោននៅក្នុងស្ថានទូត នឹងអាចធ្វើចិន និងអាមេរិកមើលមុខគ្នារឹតតែមិនចំមួយកម្រិតទៀត។
ប៉ុន្តែ បើតាមអ្នកជំនាញតាមដាននយោបាយអាមេរិកវិញ លោកស្រីគ្លីនតុន ប្រហែលជានឹងអាចដើរខ្សែកណ្តាល គឺមិនតឹងតែងពេកជាមួយចិន ជាពិសេសបញ្ហាសិទ្ធិមនុស្សនេះ ព្រោះអាមេរិកក៏ចង់ឲ្យទំនាក់ទំនងអាមេរិកល្អប្រសើរដែរ។ អាមេរិកនៅត្រូវការចិន ព្រោះចិនអាចមានទឹកមាត់ប្រៃ ដើម្បីលួងលោមកូរ៉េខាងជើង និងអ៊ីរ៉ង់ឲ្យបញ្ឈប់កម្មវិធីអាវុធនុយក្លេអ៊ែររបស់ប្រទេសទាំងពីរនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ