តើសមាជិករាជវង្សអារ៉ាប៊ីសាអូឌីតពិតជាបានឧបត្ថម្ភក្រុមអាល់កៃដា?
ចុះផ្សាយនៅថ្ងៃ៖
ស្តាប់ - ០៤:០០
ពីមន្ទីរឃុំឃាំងនៅរដ្ឋខូឡូរាដូ (Colorado) អ្នកទោសជនជាតិបារាំងឈ្មោះ Zacarias Moussaoui បាននិយាយសារភាពក្រោមការស្បថស្បែថា មានព្រះអង្គម្ចាស់មួយចំនួនរបស់ប្រទេសអារ៉ាប៊ីសាអូឌីតធ្លាប់បានផ្តល់លុយកាក់ឧបត្ថម្ភក្រុមភេរវករអាល់កៃដា និងបានចូលរួមក្នុងការរៀបចំ វាយប្រហារលើទឹកដីអាមេរិក។ ការសាកសួរអ្នកទោសរូបនេះត្រូវបានប្រព្រឹត្តទៅ ក្នុងក្របខ័ណ្ឌនៃការស៊ើបអង្កេត ក្រោយពីមានការដាក់ពាក្យបណ្តឹងទៅតុលាការក្រុងញ៉ូវយក ពីសំណាក់សាច់ញាតិជនរងគ្រោះព្រឹត្តិការណ៍វាយប្រហារថ្ងៃទី១១ កញ្ញា។ ក្រុមគ្រួសារជនរងគ្រោះបានផ្តឹងប្រឆាំងនឹងប្រទេសអារ៉ាប៊ីសាអូឌីត ដែលត្រូវបានគេសង្ស័យថា ពាក់ព័ន្ធនឹងភេរវកម្មកាលពីជាង ១៣ ឆ្នាំមុននៅសហរដ្ឋអាមេរិក។
នៅក្នុងសំណៅឯកសារចំនួន ១២៧ ទំព័រ ដែលបានកត់ត្រាចម្លងឡើងវិញនៃចំលើយសារភាព អ្នកទោសជនជាតិបារាំង Zacarias Moussaoui បានអះអាងថា មានសមាជិករាជវង្សានុវង្សអារ៉ាប៊ីសាអូឌីតមួយចំនួនធ្លាប់បានបរិចាកថវិការជួយឧបត្ថម្ភក្រុមអង្គការអាល់កៃដារបស់អ៊ូសាម៉ា បិន ឡាដិន ក្នុងអំឡុងទសវត្សន៍ទី៩០។ អ្នកទោសអាយុ ៤៦ ឆ្នាំរូបនេះក៏បានបញ្ជាក់ផងដែរថា លុយកាក់ដែលទទួលបានគឺសំរាប់ទិញអាវុធ ចំណីអាហារ ឬផ្តល់ប្រាក់ខែដល់សមាជិកបណ្តាញភេរវកម្មអាល់កៃដា។
ទិន្នន័យក្នុងកុំព្យូទ័រ
នៅក្នុងចំលើយសារភាពនៅចំពោះមុខក្រុមមេធាវី អ្នកទោស Moussaoui រូបនេះក៏បានបញ្ជាក់ផងដែរថា កាលនោះ ប្រមុខអាល់កៃដាគឺ អ៊ូសាម៉ា បិន ឡាដិន បានផ្តល់ភារកិច្ចអោយខ្លួនធ្វើបញ្ជីទិន្នន័យមួយប្រមូលផ្តុំឈ្មោះអ្នកបរិច្ចាកថវិការអោយអង្គការភេរវកម្មរបស់ខ្លួន។ ការប្រមូលទិន្នន័យនេះត្រូវបានធ្វើឡើងនៅលើរាល់កុំព្យូទ័រទាំងអស់របស់ក្រុមអាល់កៃដា។ បើតាមសំដីរបស់អ្នកទោសរូបនេះ អ៊ូសាម៉ា បិន ឡាដិន ចង់រក្សាទុកសំណៅឯកសារឈ្មោះអ្នកឧបត្ថម្ភលុយកាក់អោយបណ្តាញរបស់ខ្លួន ដើម្បីងាយស្រួលដឹងថា តើខ្លួនត្រូវស្តាប់សំដីនរណាមុនគេ ហើយអ្នកណាខ្លះបានផ្តល់ថវិការធ្វើសង្គ្រាមជីហាដ។
នៅក្នុងបញ្ជីនោះមានឈ្មោះព្រះអង្គម្ចាស់ Turki Al-Faisal អតីតៈប្រធានផែ្នកព័ត៌មានសំងាត់អារ៉ាប៊ីសាអូឌីត និងព្រះអង្គម្ចាស់ Bandar Ben Sultan អតីតៈឯកអគ្គរាជទូតអារ៉ាប៊ីសាអូឌីតប្រចាំសហរដ្ឋអាមេរិក។ បើតាមអ្នកទោសអតីតៈសមាជិកអាល់កៃដារូបនេះបានអោយដឹងថា ព្រះអង្គម្ចាស់ទាំងពីរនេះបានផ្តល់ប្រាក់ម្តងពី ២ ទៅ ៣ លានដុល្លារ។ ម៉្យាងទៀត មន្ត្រីជាន់ខ្ពស់មួយភាគធំជិតស្និតជាមួយនឹង អ៊ូសាម៉ា បិន ឡាដិន សុទ្ធសឹងតែជាមនុស្សមានប្រភពមកពីក្រុមគ្រួសារអ្នកធំខ្ពង់ខ្ពស់នៅប្រទេសអារ៉ាប៊ីសាអូឌីត។
អ្នកទោស Moussaoui ក៏បានរៀបរាប់ដែរថា អ៊ូសាម៉ា បិន ឡាដិន ធ្លាប់បានអោយខ្លួននាំសារសំងាត់ជាច្រើនដងទៅអោយមន្រ្តីជាន់ខ្ពស់អារ៉ាប៊ីសាអូឌីត ដោយក្នុងនោះខ្លួនធ្លាប់បានជួបផ្ទាល់ជាមួយព្រះអង្គសាលម៉ាន។ សូមកុំភេ្លចថា បច្ចុប្បន្ននេះ ព្រះអង្គសាលម៉ានបានក្លាយជាព្រះមហាក្សត្រថ្មីគ្រប់គ្រងប្រទេសអារ៉ាប៊ីសាអូឌីត។ ព្រះចៅថ្មីនេះទើបបានឡើងគ្រោងរាជ្យកាលពីជាងពីរសប្តាហ៍មុននេះ ក្រោយការចូលទីវង្គតរបស់ព្រះចៅអាប់ដាឡា កាលពីថ្ងៃទី២៣ មករា។
វាយប្រហារយន្តហោះ Air Force One
អ្នកទោសរូបនេះក៏បានរៀបរាប់ផងដែរថា នាទីក្រុងកាន់ដាហា ប្រទេសអាហ្គានីស្ថាន ខ្លួនធ្លាប់បានពិភាក្សាជាមួយមន្រ្តីជាន់ខ្ពស់ម្នាក់ បំរើការនៅស្ថានទូតអារ៉ាប៊ីសាអូឌីតប្រចាំរដ្ឋធានីវ៉ាស៊ីនតោន។ នៅក្នុងជំនួបនោះ Moussaoui បាននិយាយពីគំរោងរបស់ខ្លួនចង់ទៅទីក្រុងវ៉ាស៊ីនតោន ដើម្បីស្វែងរកទៅតាំងអំណោយផលក្នុងបាញ់គ្រាប់មីស៊ីល Stinger វាយប្រហារលើយន្តហោះប្រធានាធិបតីធាមេរិក Air Force One។ ប៉ុន្តែ ជាសំណាងអាក្រក់ Moussaoui ត្រូវបានចាប់ខ្លួនមុនធ្វើដំណើរទៅទីក្រុងវ៉ាស៊ីនតោន។
ពាក្យបណ្តឹងទៅតុលាការ
ការអះអាងខាងលើនេះត្រូវបានលាតត្រដាងក្នុងជំនួបមួយរវាងអ្នកទោស Zacarias Moussaoui ជាមួយក្រុមមេធាវីការពារក្តីអោយគ្រួសារជនរងគ្រោះ ក្នុងព្រឹត្តិការណ៍វាយប្រហារថ្ងៃទី១១ ខែកញ្ញា ឆ្នាំ២០០១។ ជំនួបនេះត្រូវបានធ្វើឡើងនៅមន្ទីរឃុំឃាំង Supermax Florence ក្នុងរដ្ឋខូឡូរាដូ កាលពីចុងខែតុលា ឆ្នាំ២០១៤ កន្លងទៅនេះ។ ក្រៅពីគ្រួសារជន រង គ្រោះ ក្រុមមេធាវីទាំងនោះក៏ជាអ្នកតំណាងក្តីអោយក្រុមហ៊ុនធានារ៉ាប់រងមួយចំនួន ដែលបានចេញសំណងបង់ខាតកម្មសិទ្ធិដីធ្លីឯកជន និងសហគ្រាស។
ការដាក់ពាក្យបណ្តឹងនេះគឺ សំដៅស្វែងរកមុខអ្នកគ្រប់គ្រង និងអ្នកផ្តល់ហិរញ្ញប្បទានដល់ក្រុមភេរវកម្មអាល់កៃដា។ នៅក្នុងបណ្តឹងរបស់ខ្លួន ក្រុមមេធាវីកំពុងព្យាយាមលាតត្រដាងអោយឃើញពីតួនាទីរបស់ប្រទេសអារ៉ាប៊ីសាអូឌីតក្នុងព្រឹត្តិការណ៍ភេរវកម្មថ្ងៃទី១១ កញ្ញា។ កាលពីថ្មីៗនេះ ចំលើយសារភាពរបស់អ្នកទោស Zacarias Moussaoui ត្រូវបានតុលាការក្រុងញ៉ូវយកអនុញ្ញាតិអោយផ្សព្វផ្សាយជាសាធារណៈ។
លោក James Kreindler មេធាវីម្នាក់ក្នុងចំណោមក្រុមមេធាវីបានគូសបញ្ជាក់កាលពីសប្តាហ៍មុននេះថា សក្ខីកម្មរបស់អ្នកទោស Moussaoui មានសារៈសំខាន់ខ្លាំងណាស់ ពីព្រោះវាអាចបញ្ជាក់ពីផ្ទៃក្នុងនៃចំណងទាក់ទងគ្នារវាងមន្រ្តីជាន់ខ្ពស់របស់អារ៉ាប៊ីសាអូឌីត និងបណ្តាញអាល់កៃដានៅក្នុងសម័យកាលសំខាន់មួយ។ បើតាមមេធាវីរូបនេះ កាលពីចុងទសវត្សន៍ទី ៩០ គេតែងឃើញមានសមាជិករាជវង្សានុវង្សអារ៉ាប៊ីសាអូឌីតបានបរិចាកថវិការជួយគាំទ្រអង្គការភេរវកម្ម។ ទង្វើបែបនេះត្រូវបានគេយល់ថា ជាវិធីដ៏ប្រសើរបំផុតក្នុងការទទួលបានការគាំទ្រពីក្រុមមន្រ្តីសាសនាអារ៉ាប៊ីសាអូឌីត និងជាពិសេសពួកគេអាចទទួលបានមុខតំណែងសំខាន់ៗក្នុងជួររដ្ឋាភិបាល។
តួលេខសំខាន់ៗក្នុងព្រឹត្តិការណ៍វាយប្រហារថ្ងៃទី១១ កញ្ញា
ចំនួនជនរងគ្រោះ៖ ២ ៩៨១ នាក់
ចំនួនភេរវករចាប់ជំរិតលើយន្តហោះ៖ ១៩ នាក់
ចំនួនជនជាតិអារ៉ាប៊ីសាអូឌីតក្នុងចំណោមភេរវករ៖ ១៥ នាក់
ប្រភព៖ គណកម្មការជាតិសិក្សាពីការវាយប្រហារភេរវកម្មប្រឆាំងនឹងអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ