សហគមន៍អន្តរជាតិដាក់ទណ្ឌកម្មទៅលើការវាយបង្ក្រាបយ៉ាងហិង្សាដោយរបបផ្តាច់ការស៊ីរី
នៅខណៈពេលដែលនគរបាលស៊ីរីបានធ្វើការវាយបង្ក្រាបដ៏សែនហិង្សា ទៅលើបាតុករដែលបានបណ្តាលឲ្យមានមនុស្សស្លាប់ជាង៦០នាក់នៅទីក្រុង ដែរ៉ាកាលពីម្សិលមិញ សហគមន៍អន្តរជាតិក៏បានកេណ្ឌប្រមូលគ្នានៅថ្ងៃសុក្រទី២៩មេសា ឆ្នាំ២០១១ ដើម្បីដាក់ទណ្ឌកម្មទៅលើរបបផ្តាច់ការនៃទីក្រុងដាម៉ាស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៥:០១
សមាជិកភាគច្រើនលើសលុបនៃក្រុមប្រឹក្សាសិទ្ធិមនុស្សបានធ្វើការថ្កោលទោសយ៉ាងខ្លាំងក្លាទៅលើរបបផ្តាច់ការបាស្ហារអែល-អាស្សាដដែលបានវាយបង្ក្រាបយ៉ាងហិង្សាក្រៃលែងទៅលើបាតុករស៊ីរីនៅទីក្រុងដែរ៉ាកាលពីថ្ងៃសុក្រម្សិលមិញដែលបានបណ្តាលឲ្យមានមនុស្សស្លាប់ជាង៦០នាក់។ សហគមន៍អន្តរជាតិបានទាមទារឲ្យអាជ្ញាធរស៊ីរីបញ្ឈប់ជាបន្ទាន់នូវទង្វើដ៏ហិង្សាឃោរឃៅបែបនេះទៅលើប្រជាជនស៊ីរីស្លូតត្រង់ដែលនាំគ្នាធ្វើបាតុកម្មដើម្បីទាមទារសិទ្ធិសេរីភាពនយោបាយរបស់ខ្លួនតែប៉ុណ្ណោះ។ គណៈកម្មការអង្កេតអន្តរជាតិមួយក្រុមនឹងត្រូវគេបញ្ជូនទៅកាន់ប្រទេសស៊ីរីដើម្បីធ្វើការអង្កេតទៅលើទង្វើហិង្សារំលោភច្បាប់ហើយនិងឧក្រិដ្ឋកម្មដែលបានប្រព្រឹត្ត ជាពិសេសគណៈកម្មការអង្កេតអន្តរជាតិត្រូវវែកមុខរកឲ្យឃើញអ្នកទទួលខុសត្រូវនៃទង្វើឧក្រិដ្ឋកម្មទាំងនេះ។
សហគមន៍អន្តរជាតិបានធ្វើការទាមទារផងទៀតឲ្យអាជ្ញាធរស៊ីរីដោះលែងជាបន្ទាន់រាល់អ្នកទោសនយោបាយនិងអ្នកដែលជាប់ឃុំឃាំងដោយការចាប់ឃុំខ្លួនទាំងកម្រោល ហើយសហគមន៍អន្តរជាតិបានតម្រូវឲ្យរដ្ឋអំណាចគោរពយ៉ាងពេញលេញនូវការទាមទាររបស់ប្រជាជនឲ្យមានរបបគ្រប់គ្រងមួយនៅប្រទេសស៊ីរីប្រកបដោយលទ្ធិប្រជាធិបតេយ្យ។
គួរកត់សម្កាល់ថា ជំនួបប្រជុំពិសេសនៃក្រុមប្រឹក្សាសិទ្ធិមនុស្សនេះបានប្រព្រឹត្តទៅដោយមានការផ្តួចផ្តើមពីសំណាក់សហរដ្ឋអាមេរិកនិងប្រទេសលោកខាងលិច។ ចំណែកឯប្រទេសចិន ប្រទេសរុស្ស៊ី និងប្រទេសសមាជិកនៃសន្និសីទអ៊ីស្លាមវិញបានប្រឆាំង។
សហរដ្ឋអាមេរិកពុំគំរាមធ្វើអន្តរាគមន៍យោធាទៅលើប្រទេសស៊ីរីដូចនៅប្រទេសលីប៊ី មកពីទីក្រុងវ៉ាស៊ីនតោនគិតថា សហរដ្ឋអាមេរិកនៅមានឥទ្ធិពលអាចនិយាយបញ្ចុះបញ្ចូលបាស្ហារអែលអាស្សាដឲ្យធ្វើកំណែទម្រង់របបគ្រប់គ្រងរបស់ខ្លួន។
ម្យ៉ាងទៀតអន្តរាគមន៍យោធានៃប្រទេសលោកខាងលិចនៅប្រទេសស៊ីរីក៏ពិបាកនឹងប្រព្រឹត្តទៅបាន ដោយហេតុថា ប្រទេសចិននិងប្រទេសរុស្ស៊ីដែលជាមិត្តរបស់ប្រទេសស៊ីរីក៏ជាសមាជិកអចិន្តៃ្រយ៍នៃក្រុមប្រឹក្សាសន្តិសុខនៃអ ស ប ដែលមានសិទ្ធិVeto។ ដូច្នេះប្រទេសសមាជិកអចិន្តៃ្រយ៍ទាំងពីរនេះអាចបញ្ចេញសំឡេងប្រឆាំងនឹងអន្តរាគមន៍យោធារបស់ប្រទេសលោកខាងលិច។
រដ្ឋបាលអាមេរិករបស់លោកបារ៉ាក់អូបាម៉ាក៏បានគិតគូរផងដែរដល់បំណងនៃប្រទេសជាមិត្តរបស់អាមេរិកាំងមួយចំនួនក្នុងតំបន់ដើមបូព៌ាមានដូចជាប្រទេសអ៊ីស្រាអែល ប្រទេសទួរគី និងប្រទេសអារ៉ាប៊ីសាអូឌីតដែលចង់ឲ្យប្រមុខដឹកនាំស៊ីរីបច្ចុប្បន្នបាស្ហារអែល-អាស្សាដនៅកាន់មុខតំណែងជាជាងអ្នកដែលខ្លួនពុំដែលបានស្គាល់។ សំណួរមួយបានលេចឡើងចោទសួរថា តើសហដ្ឋអាមេរិកអាចធ្មេចភ្នែកនៅស្ងៀមបានដែរឬទេនៅចំពោះមុខការវាយប្រហារដ៏សែនឃោរឃៅនៅទីក្រុងដែរ៉ានៃប្រទេសស៊ីរី?
រីឯសហភាពអឺរ៉ុបវិញ តាមរយៈសេចក្តីថ្លែងការណ៍មួយ ប្រទេសសមាជិកទាំង២៧បានសម្ដែងឲ្យឃើញនូវប្រឆាំងដ៏ខ្លាំងក្លារបស់ពួកគេនៅចំពោះមុខការវាយបង្ក្រាបដ៏ហិង្សារបស់នគរបាលស៊ីរីទៅលើក្រុមបាតុករ។ ហើយសហភាពអឺរ៉ុបក៏បានសម្រេចដាក់ទណ្ឌកម្មទៅលើប្រទេសស៊ីរីដោយបានធ្វើការហាមឃាត់ពុំឲ្យមានសព្វាវុធចេញចូលប្រទេសស៊ីរី ក៏ដូចគ្នាអ៊ីចឹងដែរសម្រាប់គ្រឿងសម្ភារៈនិងឧបករណ៍ដែលគេយកទៅប្រើសម្រាប់ធ្វើការវាយបង្ក្រាប។
ទន្ទឹមគ្នានេះ គណៈកម្មាធិការនៃអ្នកជំនាញការអឺរ៉ុបពិនិត្យទៅលើវិធានការមួយចំនួនសម្រាប់ដាក់ទណ្ឌកម្មទៅលើរបបផ្តាច់ការបាស្ហារអែល-អាស្សាដមានដូចជា ធ្វើការហាមឃាត់ពុំឲ្យអ្នកដឹកនាំស៊ីរីសំខាន់ៗអាចមានសេរីភាពនិងលទ្ធភាពក្នុងការធ្វើដំណើរទៅក្រៅប្រទេស។ ធ្វើការឃាត់ផ្អាប់ប្រាក់របស់អ្នកដឹកនាំស៊ីរីទាំងនោះដែលមានទុកប្រាក់នៅអឺរ៉ុប។
បន្ថែមពីលើនេះ សហភាពអឺរ៉ុបគ្រោងបញ្ឈប់ជំនួយហិរញ្ញវត្ថុដែលអឺរ៉ុបត្រូវផ្តល់ឲ្យទៅប្រទេសស៊ីរីប្រមាណ១២៩លានអឺរ៉ូសម្រាប់ឆ្នាំ២០១១-២០១៣។ ចំណែកឯធនាគារអឺរ៉ុបសម្រាប់វិនិយោគវិញ គេគ្រោងបញ្ឈប់ផ្អាកគម្រោងការហិរញ្ញវត្ថុជាច្រើនសម្រាប់ប្រទេសស៊ីរីដែលមានចំនួនទឹកប្រាក់ប្រមាណ១ ៣០០លានអឺរ៉ូ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ