OPEP ត្រូវសំរេចយ៉ាងណាចំពោះមុខតម្លៃប្រេងដែលចុះថោក?
ចុះផ្សាយនៅថ្ងៃ៖
ស្តាប់ - ០៥:៤៤
នៅ ថ្ងៃព្រហស្បតិ៍ទី២៧ នេះ ប្រទេសសមាជិកទាំង២ របស់អង្គការប្រទេសអ្នកនាំប្រេងចេញ ហៅកាត់ថា OPEP កំពុងតែជួបពិភាក្សាគ្នា នៅក្នុងទីក្រុងវីយែន ប្រទេសអូទ្រីស។ កិច្ចប្រជុំប្រចាំឆមាសនេះ បានធ្វើឡើងក្នុងបរិបទអវិជ្ជមាន ដោយសាតែតម្លៃប្រេង បានធ្លាក់ចុះយ៉ាងខ្លាំង ក្នុងរយៈពេលប៉ុន្មានខែចុងក្រោយនេះ។ ប្រឈមមុខនឹងបញ្ហានេះ អង្គការ OPEP ត្រូវសម្រេចចិត្ត ថាតើគួរកាត់បន្ថយការផលិតប្រេង រឺយ៉ាងណា ដើម្បីអនុញ្ញាតឲ្យតម្លៃប្រេង មានសន្ទុះឡើងវិញ។
កិច្ចប្រជុំរបស់អង្គការ OPEP នៅទីក្រុងវីយែននាពេលនេះ កំពុងផ្តោតសំខាន់ទៅលើតម្លៃប្រេងឆៅ ដែលបានធ្លាក់ចុះយ៉ាងខ្លាំង នៅលើទីផ្សារអន្តជាតិ។ ពោលគឺធ្លាក់ពី ១០០ ដុល្លារ ក្នុងមួយធុងបារីល មកត្រឹមតែ ៧៦ដុល្លារប៉ុណ្ណោះក្នុងមួយធុង។
មូលហេតុដែលនាំឲ្យប្រេងឆៅចុះថោក
មូលហេតុដែលធ្វើឲ្យតម្លៃប្រេងឆៅ នៅលើទីផ្សារអន្តរជាតិបានធ្លាក់ចុះបែបនេះ គឺដោយសាមានមូលហេតុធំៗបី។ មូលហេតុទីមួយដែលសំខាន់ជាងគេតែម្តង គឺដោយសាប្រេងដែលផលិតបាន មានជំនួនច្រើនពេក លើសពីតម្រូវការជាក់ស្តែង។ វាជារឿងងាយយល់ទេ ឲ្យតែកាលណា របស់ដែលដាក់លក់មានច្រើន ហើយអ្នកទិញមានចំនួនតិច នោះតម្លៃគឺវាត្រូវតែចុះទៅតាមនោះហើយ។
មូលហេតុទីពីរ គឺដោយសាវិបត្តិសេដ្ឋកិច្ច ដែលធ្វើឲ្យវិនិយោគទុននៅតាមប្រទេសនីមួយៗជួបភាពរាំងស្ទះ។ ធម្មតាគេប្រើប្រេង ដើម្បីយកទៅដំណើរការគ្រឿងម៉ាស៊ីន តាមបណ្តារោងចក្រសហគ្រាសផ្សេងៗ ចុះបើរោងចក្រអត់ដំណើរការ រឺក៏សកម្មភាពផលិតត្រូវកាត់បន្ថយ ដោយសាតែវិបត្តិសេដ្ឋកិច្ច អញ្ចឹងតម្រូវការប្រេង ក៏វាធ្លាក់ទៅតាមនឹងដែរ។
មូលហេតុទីបី គឺដោយសាមានមធ្យាបាយផ្សេងទៀត ក្នុងប្រើប្រាស់ថាមពល ដោយមិនចាំបាច់ប្រើប្រេង។ ឧទាហរណ៍ ដូចជាការប្រើប្រាស់ឧស្ម័នធម្មជាតិ ការប្រើចរន្តអគ្គិសនីដើរដោយថាមពលព្រះអាទិត្យ រឺការចម្រាញ់ប្រេង ចេញពីគ្រាប់ធនជាតិជាដើម។ ដូច្នេះ យើងឃើញថា តម្រូវការប្រេងមានការថយចុះច្រើន ដែលបញ្ហាទាំងនេះហើយ ដែលធ្វើឲ្យតម្លែ ប្រេង វាធ្លាក់ចុះដែរ។
កាត់បន្ថយការផលិត អាចជួយឲ្យប្រេងឡើងថ្លៃវិញដែរឬទេ?
ការកាត់បន្ថយការផលិតអាចជាវិធីសាស្រ្តមួយដែរ ដែលអាចធ្វើឲ្យតម្លៃប្រេង វាឡើងថ្លៃវិញ។ កន្លងមកអង្គការOPEP ធ្លាប់បានធ្វើបែបនេះ ជាច្រើនលើកច្រើនសាមកហើយ។ ឧទាហរណ៍កាលពីឆ្នាំ ១៩៨៦ តម្លៃប្រេង បានធ្លាក់នៅមិនដល់១០ ដុល្លារផងក្នុងមួយធុងបារីល។
កាលពីឆ្នាំ ៩៨-៩៩ ក្នុងពេលដែលទ្វីបអាស៊ីកាលនោះ បានជួបវិបត្តិសេដ្ឋកិច្ចយ៉ាងធ្ងន់ធ្ងរ តម្លែប្រេងធ្លាក់មកត្រឹមតែ ១២ដុល្លារក្នុងមួយធុងបារីល។ អង្គការOPEP បានតម្រូវឲ្យប្រទេសសមាជិក បន្ថយការផលិតប្រេង ជាង៤លានធុងក្នុងមួយថ្ងៃ ហើយប្រេងក៏បានឡើងថ្លៃមកវិញ។
ដូចគ្នាដែរ កាលពីឆ្នាំ២០០៨ ក្នុងពេលដែលពិភពលោក ចាប់ផ្តើមជួបវិបត្តិសេដ្ឋកិច្ច ដ៏ធ្ងន់ធ្ងរ ប្រេងឆៅដែលកាលនោះ មួយធុងថ្លៃ ១៤៧ដុល្លារ បានធ្លាក់មកត្រឹម ៣៥ដុល្លារប៉ុណ្ណោះ។ ប្រឈមមុខនឹងបញ្ហានេះ អង្គការOPEPបានកាត់បន្ថយការផលិតភ្លាម ទាល់តែតម្លៃប្រេងឡើងរហូតមកដល់ ១០០ដុល្លារវិញ។
សូមបញ្ជាក់ផងដែរថា រាល់ថ្ងៃនេះ អង្គការOPEP បានតម្រូវឲ្យប្រទេសសមាជិកទាំង១២ ផលិតប្រេងឆៅសរុបទាំងអស់ ៣០លានធុងបារីលក្នុងមួយថ្ងៃ។ ប្រទេសសមាជិកអង្គការ OPEP នេះភាគច្រើន គឺប្រទេសនៅតំបន់អារ៉ាប់ ដូចជា អារ៉ាប៊ីសាអ៊ូឌីតគូវែត អ៊ីរ៉ាក់ និងអ៊ីរ៉ង់ជាដើម។ ប៉ុន្តែយើងកុំភ្លេចថា មិនមែនមានតែប្រទេសសមាជិកអង្គការ OPEP ទេ ដែលផលិតប្រេង។
មិនមែនមានតែសមាជិកOPEP ទេដែលអាចផលិតប្រេងលក់៖
រាល់ថ្ងៃនេះ ដៃគូប្រកួតដ៏ធំរបស់សមាជិកអង្គការOPEP គឺរុស្ស៊ី និងសហរដ្ឋអាមេរិក។ រុស្ស៊ីផលិតប្រេងឆៅ ជាង៤លានធុងបារីល ក្នុងមួយថ្ងៃៗ។ សហរដ្ឋអាមេរិកវិញ អាចមានលទ្ធភាពផលិតបានដល់ ៩លានធុងបារីលឯណោះ ក្នុងមួយថ្ងែ។ ចំណែកប្រទេសម៉ិចស៊ីកូ ក៏មានសមត្ថភាពផលិតមិនអន់ដែរ។ ប្រទេសទាំងនេះ មិនមែនជាសមាជិកអង្គការOPEP ទេ។ ដូច្នេះ បើសិនជាអង្គការOPEP សម្រេចថាត្រូវកាត់បន្ថយការផលិត គឺកាត់បន្ថយតែឯងទេ ឯគេដ៏ទៃទៀត គេនៅតែបន្តផលិតច្រើនៗ ហើយគេលក់បានច្រើនជាង។ អញ្ចឹងអ្នកខាតជាអ្នកណា? គឺប្រទេសសមាជិកអង្គការOPEP មិនមែនអាមេរិក រឺរុស្ស៊ីទេ។
គោលជំហរមិនស្មើគ្នា៖
បើសមាជិកអង្គការOPEP កាត់បន្ថយតែឯង វាមិនអាចធ្វើឲ្យប្រេងឡើងថ្លៃបានដូចមុនទៀតទេ។ រុស្ស៊ី អាមេរិក និងម៉ិចស៊ីកូ គេផលិតប្រេង បានច្រើនណាស់ឥឡូវ។ មួយវិញទៀត ប្រទេសសមាជិកអង្គការ OPEP មានសមត្ថភាពផលិត មិនស្មើគ្នាទេ។ ដូចនេះ គោលជំហរ ម្នាក់ៗវាខុសៗគ្នា។ អ្នកខ្លះចង់បន្ថយការផលិត អ្នកខ្លះមិនចង់។ ប្រទេសអារ៉ាប៊ី សាអ៊ូឌីត ដែលជាប្រទេសផលិតប្រេង បានច្រើនជាងគេបង្អស់លើពិភពលោក បាននាំប្រេងចេញ ទៅលក់រាប់សិបឆ្នាំទៅហើយ។ដូច្នេះ លុយគេសល់ទុកច្រើនណាស់។ ទោះបីជាលក់បានត្រឹមតែ៧៦ដុល្លារក្នុងមួយធុងបារីល ដូចរាល់ថ្ងៃនេះ ក៏គេនៅតែមិនខ្វះលុយដែរ។
ផ្ទុយទៅវិញ ប្រទេសតូចតាចដូចជា វ៉េណេហ្ស៊ុយអេឡា លទ្ធភាពផលិតមានមិនសូវច្រើន ហើយចំណូលជាតិ រំពឹងស្ទើរតែទាំងស្រុង ទៅលើការនាំចេញប្រេងឆៅ។ ដូច្នេះបើលក់បានថោក មានន័យថារដ្ឋក៏បានចំណូលតិច ទៅតាមនឹងដែរ។ អញ្ចឹងហើយ បានជាកន្លងមក ប្រទេសសមាជិក OPEP ពីរដែលមានអ៊ីរ៉ង់ និងវ៉េណេហ្ស៊ុយអេឡានេះ បានសំណូមពរ ឲ្យអង្គការOPEP ធ្វើការពិភាក្សា ជាមួយប្រទេសលក់ប្រេងផ្សេងៗទៀត ដែលមិនមែនជាសមាជិកOPEPដូចជារុស្ស៊ី អាមេរិក និងម៉ិចស៊ីកូជាដើម។
អារ៉ាប៊ីសាអ៊ូឌីត រឹងទទឹងមិនព្រមបន្ថយការផលិត៖
ឆ្លងតាមការវិភាគ ប្រទេសអារ៉ាប៊ីសាអ៊ូឌីត ទំនងមិនព្រមកាត់បន្ថយការផលិតទេ។ អារ៉ាប៊ីសាអ៊ូឌីត មានបំណងប្រកួតក្រជែងដោយផ្ទាល់ ជាមួយរុស្ស៊ី និងអាមេរិក តាមរយៈការវាយលុកទៅផ្សារនៅអាស៊ី ដោយលក់ប្រេងក្នុងតម្លៃថោក។ ទោះបីជាយ៉ាងណា ក្នុងកាលៈទេសៈនេះ អង្គការ OPEPត្រូវធ្វើការសម្រេចចិត្តឲ្យសមរម្យបំផុត សម្រាប់ប្រទេសជាសមាជិកទាំងអស់។ បើទោះមិនបន្ថយការផលិត តែក៏ត្រូវរិតបន្តឹងឡើងវិញ ទៅលើការគោរពគ្នាទៅវិញទៅមក ក្នុងការផលិតប្រេង ក៏ដូចជាការបែងចែកទីផ្សារ។ កន្លងមក មានប្រទេសមួយចំនួន បានធ្វើការផលិតលើសពីចំនួនកំណត់របស់OPEP ក្នុងខណៈដែលប្រទេសមួយចំនួនទៀត មានការថយចុះការផលិត ដូចជា អ៊ីរ៉ាក់ និងលីប៊ីជាដើម ដោយសាតែសង្គ្រាម និងវិបត្តិផ្ទៃក្នុង។
ធម្មតាអ្នកលក់ចង់លក់ឲ្យបានថ្លៃ ហើយដាច់បានច្រើន ប៉ុន្តែប្រទេសតូចតាច ដូចជាប្រទេសកម្ពុជាយើងអាចនឹងជួបការលំបាក បើសិនជាប្រេងឡើងថ្លៃហួសហេតុពេក ព្រោះថាយើងនៅមិនទាន់មានការស្រាវជ្រាវ និងបច្ចេកវិទ្យាជឿនលឿន ដើម្បីប្រើប្រាស់មធ្យោបាយណាផ្សេងទេ ពោលគឺយើងនៅតែប្រើប្រាស់ប្រេងសាំង ដោយចៀសមិនរួច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ