ប្រមុខដឹកនាំអាល្លឺម៉ង់ទៅអ៊ុយក្រែន រំអុករកបទឈប់បាញ់ភាគខាងកើត
ចុះផ្សាយនៅថ្ងៃ៖
ស្តាប់ - ០៦:១០
ប្រមុខដឹកនាំអាល្លឺម៉ង់ លោកស្រីអាន់ហ្កឺឡា មែរគែល បានធ្វើដំណើរទៅដល់អ៊ុយក្រែនហើយ ថ្ងៃសៅរ៍នេះ ដើម្បីជួបមេដឹកនាំអ៊ុយក្រែន ជំរុញអោយមានបទឈប់បាញ់នៅភាគខាងកើត ជាមួយក្រុមផ្តាច់ទឹកដីនិយម។ លោកស្រីមែរគែល និងប្រធានាធិបតីអាមេរិក ព្រមទាំងអង្គការអូតង់ ទើបតែបានថ្កោលទោសក្បួនរថយន្តដឹកជំនួយមនុស្សធម៌រុស្ស៊ី ដែលបានចូលទៅដល់ក្រុងលូហ្កង់ ភាគខាងកើតអ៊ុយក្រែន ថ្ងៃសុក្រម្សិលមិញ គ្មានការអនុញ្ញាតពីអាជ្ញាធរអ៊ុយក្រែន។ ប្រទេសលោកខាងលិច អ៊ុយក្រែន និងអាមេរិកចោទរុស្ស៊ីថា រំលោភបូរណភាពអ៊ុយក្រែន។ ម្សិលមិញ ក្រុមប្រឹក្សាសន្តិសុខអង្គការសហប្រជាជាតិបានពិភាក្សាគ្នាបន្ទាន់លើស្ថានការណ៍នេះ។ ថ្ងៃសៅរ៍នេះ ឡានកាំម្ញ៉ុងមនុស្សធម៌រុស្ស៊ី ខ្លះបានចាកចេញពីទឹកដីអ៊ុយក្រែនទៅវិញហើយ។ ថ្ងៃសៅរ៍នេះដែរ ជនស៊ីវិល២នាក់ បានស្លាប់ក្នុងហិង្សា នៅតំបន់ដូណេត ភាគខាងកើត។
អ៊ុយក្រែនបដិសេធជំនួយមនុស្សធម៌រុស្ស៊ី ខណៈក្រុងលូហ្កង់កំពុងរងភាពដុនដាប ខ្វះភ្លើង ខ្វះទឹកប្រើប្រាស់
ជំនួយមនុស្សធម៌រុស្ស៊ី មិនមែនជាអ្វីដែលរដ្ឋាភិបាលអ៊ុយក្រែនត្រូវការទេ។ ស្ថានភាពដុនដាបមនុស្សធម៌នៅភាគខាងកើតអ៊ុយក្រែន កើតឡើងក្នុងទឹកដីអ៊ុយក្រែន ជាបញ្ហាដែលអ៊ុយក្រែនខ្លួនឯងត្រូវដោះស្រាយ។ ម្សិលមិញ ឡានកាំម្ញ៉ុងមនុស្សធម៌រុស្ស៊ីប្រមាណពី៧០ទៅ១៣០គ្រឿង បានបើកសំរុកចូលព្រំដែនអ៊ុយក្រែនតែម្តង។ រុស្ស៊ីប្រាប់ថា រង់ចាំការអនុញ្ញាតពីអ៊ុយក្រែនយូរពេក ទើបមិនអាចពន្យារពេលបាន។ ការសម្រុកចូលទឹកដីអ៊ុយក្រែនគ្មានការអនុញ្ញាតពីអាជ្ញាធរអ៊ុយក្រែន ប្រៀបបាននឹងការឈ្លានពានអ៊ុយក្រែនដូច្នោះដែរ។ អ៊ុយក្រែនបារម្ភថា ក្បួនកាំម្ញ៉ុងមនុស្សធម៌ទាំងនេះ គឺជាប្រតិបត្តិការយោធារុស្ស៊ី ដឹកអាវុធយោធាទៅជួយក្រុមផ្តាច់ទឹកដីនិយមភាគខាងកើតទៅវិញទេ។ ម្យ៉ាងទៀត អ៊ុយក្រែនតែងអះអាងថា រុស្ស៊ីដាក់វត្តមានទ័ពច្រើននៅតាមព្រំដែនជាប់អ៊ុយក្រែន។ ប្រាកដហើយដែលអ៊ុយក្រែនខ្លាចរុស្ស៊ីឈ្លានពានទឹកដីភាគខាងកើតខ្លួននោះ។
អាជ្ញាធរអ៊ុយក្រែនគិតថា រុស្ស៊ីផ្គើនអ៊ុយក្រែនដោយបានបញ្ជាអោយឡានកាំម្ញ៉ុងមនុស្សធម៌បើកចូលទឹកដីអ៊ុយក្រែនគ្មានការអនុញ្ញាត។ រដ្ឋអំណាចក្រុងគៀវខ្លាចថា រុស្ស៊ីផ្គើនដើម្បីរកលេសធ្វើអន្តរាគមន៍យោធា នៅភាគខាងកើតអ៊ុយក្រែន។ គួរបញ្ជាក់ដែរថា ក្នុងចំណោមឡានកាំម្ញ៉ុង៣០០គ្រឿងរបស់រុស្ស៊ី អ្នកត្រួតពិនិត្យប៉ុស្តិ៍ព្រំដែនអ៊ុយក្រែន ពិនិត្យបានតែកាំម្ញ៉ុង៣៤គ្រឿងប៉ុណ្ណោះ។ អ៊ុយក្រែនប្រាប់ថា កាំម្ញ៉ុងទាំងនោះដឹកជំនួយបន្តិចបន្តួចដូចជាតែសម្រាប់ផឹកប៉ុណ្ណោះ ពោលគឺស្ទើរតែគ្មានអ្វីទាំងអស់ក្នុងឡានកាំម្ញ៉ុង ស្ទើរទទេសុទ្ធតែម្តង។ អញ្ចឹងគេពិតជាឆ្ងល់ហើយថា តើកាំម្ញ៉ុងផ្សេងទៀតដែលអាជ្ញាធរមិនបានពិនិត្យនោះ ដឹកអ្វីខ្លះដែរទៅ។
ដោយសារបញ្ហានេះ ប្រមុខដឹកនាំអាល្លឺម៉ង់មែរគែល និងប្រធានាធិបតីអាមេរិកបានបរិហាររុស្ស៊ីថា ធ្វើសកម្មភាពវាយលុកប្រកបដោយគ្រោះថ្នាក់។ លោកស្រីមែរគែលបានទូរសព្ទទៅលោកពូទីន ប្រាប់ពីការបារម្ភរបស់លោកស្រី។ តែលោកពូទីនពន្យល់វិញថា មិនអាចទទួលយកបានទេ បើនៅតែបង្អែរបង្អង់ដឹកជំនួយមនុស្សធម៌ទៅជួយភាគខាងកើតអ៊ុយក្រែន។
សន្តិសុខភាគខាងកើតអ៊ុយក្រែន ជាប្រធានបទចំបងនៃទស្សនកិច្ចប្រមុខដឹកនាំអាល្លឺម៉ង់ នៅក្រុងគៀវ
សហភាពអឺរ៉ុបចោទថា ឡានមនុស្សធម៌រុស្ស៊ីបានចូលទឹកដីអ៊ុយក្រែនដោយគ្មានកាកបាទក្រហមទៅជាមួយ។ ប៉ុន្តែ អង្គការកាកបាទក្រហមមិនអាចនាំផ្លូវរុស្ស៊ីដឹកស្បៀងមនុស្សធម៌ទៅភាគខាងកើតអ៊ុយក្រែនទេ ដើម្បីការពារសុវត្ថិភាពសមាជិកអង្គការ ចៀសពីអំពើហិង្សាប្រយុទ្ធរវាងកងទ័ព និងក្រុមផ្តាច់ទឹកដីនិយម។
បញ្ហាស្ថិរភាពសន្តិសុខនៅភាគខាងកើតអ៊ុយក្រែន ជាប្រធានបទដែលប្រមុខដឹកនាំអាល្លឺម៉ង់ មែរគែល ត្រូវពិភាក្សាជាមួយមេដឹកនាំអ៊ុយក្រែន នៅក្រុងគៀវ ថ្ងៃសៅរ៍នេះ។ លោកស្រីមែរគែល ចង់អោយភាគីរដ្ឋាភិបាលនិងក្រុមផ្តាច់ទឹកដីនិយម សម្រេចបានបទឈប់បាញ់មួយ ដើម្បីបិទបញ្ចប់ហិង្សាសម្លាប់មនុស្ស។ ទោះថាអាល្លឺម៉ង់គាំទ្រអ៊ុយក្រែន គាំទ្រប្រធានាធិបតីប៉ូរ៉ូឆិនកូក៏ដោយ លោកស្រីមែរគែល ចង់សុំអោយលោកប៉ូរ៉ូឆិនកូ ពិចារណាឡើងវិញពីយុទ្ធសាស្ត្រយោធាដែលអ៊ុយក្រែនកំពុងប្រើប្រឆាំងក្រុមបះបោរ នៅភាគខាងកើតពេលនេះ។
លោកស្រីចង់អោយលោកប៉ូរ៉ូឆិនកូ ជ្រាបច្បាស់ថា ការប្រើយោធា ដោះស្រាយបញ្ហានយោបាយមិនមែនជាជម្រើសល្អទេ ក្រៅតែពីធ្វើអោយមានមនុស្សស្លាប់ រាល់ថ្ងៃ។ ពិសេសទៀត ជម្លោះអ៊ុយក្រែនបានរាលដាលរហូតធ្វើអោយពលរដ្ឋប្រទេសផ្សេងទៀត រងគ្រោះផងដែរ។ ជាក់ស្តែង យន្តហោះម៉ាឡេស៊ីបានរងគ្រាប់មីស៊ីល ពេលហោះហើរឆ្លងកាត់ ភាគខាងកើតអ៊ុយក្រែន កាលពីថ្ងៃ១៧កក្កដាកន្លងទៅ។ យន្តហោះបានផ្ទុះឆេះ ធ្វើអោយមនុស្សទាំង២៩៨នាក់ក្នុងយន្តហោះស្លាប់គ្មានសល់។
ថ្មីៗនេះទៀត រដ្ឋាភិបាលប្រទេសលីទុយអានីប្រាប់ថា កុងស៊ុលកិត្តិយសរបស់ខ្លួនម្នាក់ នៅក្រុងលូហ្កង់ ត្រូវបានក្រុមបះបោរចាប់យកទៅ ហើយសម្លាប់ចោលទៀត។ ឆ្លៀតពេលមាន ឡានកាំម្ញ៉ុងរុស្ស៊ីចូលទឹកដីអ៊ុយក្រែនម្សិលមិញ ប្រទេសលីទុយអានីបានសុំអោយក្រុមប្រឹក្សាសន្តិសុខអង្គការសហប្រជាជាតិប្រជុំបន្ទាន់ពីបញ្ហាសន្តិសុខ និងសកម្មភាពរបស់រុស្ស៊ីចំពោះអ៊ុយក្រែន។ យោងតាមអង្គការសិទ្ធិមនុស្ស តាំងពីមានជម្លោះនៅភាគខាងកើត ពាក់កណ្តាលខែមេសាមក ក្រុមបះបោរបានចាប់ខ្លួនមនុស្សរាប់រយនាក់ ក្នុងនោះ មានអ្នកកាសែត និងក្រុមសង្កេតការណ៍អន្តរជាតិច្រើននាក់។
ដរាបណាគ្មានសន្តិសុខ វិបត្តិអ៊ុយក្រែនមិនងាយរកច្រកចេញទេ។ បើរុស្ស៊ីពិតជាមានបំណងអាក្រក់លើអ៊ុយក្រែនមែន រុស្ស៊ីអាចឆ្លៀតពេលចូលឈ្លានពានអ៊ុយក្រែន ដូចជាការបារម្ភរបស់អ៊ុយក្រែនប្រាកដហើយ។ យើងឃើញថា ក្រោយសហគមន៍អន្តរជាតិថ្កោលទោស ឡានកាំម្ញ៉ុងរុស្ស៊ីក៏បានបើកចេញពីអ៊ុយក្រែនវិញ ថ្ងៃសៅរ៍នេះ។ រុស្ស៊ីប្រហែលចង់បង្ហាញទៅវិញថា ខ្លួនមិនចង់ឈ្លានពានអ៊ុយក្រែនដូចការចោទប្រកាន់របស់សហគមន៍អន្តរជាតិទេ។
ជំនួបទ្វេភាគីរវាងប្រធានាធិបតីអ៊ុយក្រែនប៉ូរ៉ូឆិនកូ និងប្រធានាធិបតីរុស្ស៊ី ពូទីន ថ្ងៃអង្គារ២៦សីហា នៅក្រុង Minsk
ថ្ងៃអង្គារសប្តាហ៍ក្រោយ ក្នុងឱកាសជំនួបតំបន់ជាមួយសហភាពអឺរ៉ុប នៅក្រុងមីន Minsk ប្រទេសបេឡារុស ប្រធានាធិបតីប៉ូរ៉ូឆិនកូ ប្រហែលជានឹងលើកឡើងពីបញ្ហាព្រំដែនជាមួយលោកពូទីន។ លោកប៉ូរ៉ូឆិនកូ ចង់អោយមានការត្រួតពិនិត្យព្រំដែនរុស្ស៊ីអោយតឹងរ៉ឹង ព្រោះអ៊ុយក្រែននិងប្រទេសលោកខាងលិចមួយចំនួនគិតថា តាមព្រំដែនរុស្ស៊ីនេះ មានសកម្មភាពដឹកអាវុធឆ្លងកាត់ យកទៅជួយក្រុមផ្តាច់ទឹកដីនិយមនៅអ៊ុយក្រែន។ លោកប៉ូរ៉ូឆិនកូ ក៏ប្រហែលជាអាចសុំអោយលោកពូទីន ដកសកម្មជនប្រយុទ្ធបះបោរ ចេញពីភាគខាងកើតអ៊ុយក្រែនដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ