ការបោះឆ្នោតក្រុមប្រឹក្សាឃុំសង្កាត់ជារបត់នយោបាយថ្មីនៅកម្ពុជា
ចុះផ្សាយនៅថ្ងៃ៖
ស្តាប់ - ០៤:១៥
ការបោះឆ្នោតជ្រើសរើសក្រុមប្រឹក្សាឃុំសង្កាត់អាណត្តិទី៣នឹងមកដល់នៅថ្ងៃអាទិត្យទី៣មិថុនាស្អែកនេះហើយ។ ការិយាល័យបោះឆ្នោតនឹងបើកទ្វារចាប់ពីម៉ោង៧ព្រឹកដល់ម៉ោង៣រសៀលដើម្បីទទួលអ្នកបោះឆ្នោតប្រមាណជាង៩លាននាក់។ គណបក្សនយោបាយចំនួន១០នឹងប្រកួតប្រជែងយកតំណែងក្រុមប្រឹក្សាឃុំសង្កាត់ចំនួន ១ ៦៣៣ នៅទូទាំងប្រទេស។ តើអ្វីទៅជាការបោះឆ្នោតក្រុមប្រឹក្សាឃុំសង្កាត់? ហើយថាតើការបោះឆ្នោតនេះមានសារៈសំខាន់អ្វីខ្លះសម្រាប់ប្រទេសកម្ពុជា?
ថ្ងៃអាទិត្យទី៣មិថុនាស្អែកនេះគឺជាថ្ងៃបោះឆ្នោតជ្រើសរើសក្រុមប្រឹក្សាឃុំសង្កាត់នៅកម្ពុជា។ ប្រជាពលរដ្ឋខ្មែរប្រមាណជាជាង៩លាន២សែននាក់ដែលបានចុះឈ្មោះក្នុងបញ្ជីរួចហើយត្រូវបានគេអញ្ជើញឲ្យទៅបោះឆ្នោតជ្រើសរើសមេដឹកនាំថ្នាក់មូលដ្ឋានរបស់ខ្លួន។ ការិយាល័យបោះឆ្នោតចំនួនជាង ១៨ ១០៧ កន្លែងនឹងចាប់ផ្តើមបើកទ្វារនៅម៉ោង៧ព្រឹកហូតដល់ម៉ោង៣រសៀល។
នេះជាការបោះឆ្នោតក្រុមប្រឹក្សាឃុំសង្កាត់លើកទី៣ហើយសម្រាប់ប្រទេសកម្ពុជា។ ការបោះឆ្នោតក្រុមប្រឹក្សាឃុំសង្កាត់លើកទី១ត្រូវបានធ្វើឡើងកាលពីឆ្នាំ២០០២។ ក្រុមប្រឹក្សាឃុំសង្កាត់មានអាណត្តិ៥ឆ្នាំដូចតំណាងរាស្ត្រដែរ។ ការបោះឆ្នោតលើកនេះមានគណបក្សនយោបាយចំនួន១០បានចូលរួមប្រកួតប្រជែងយកតំណែងក្នុងក្រុមប្រឹក្សាឃុំសង្កាត់ចំនួន ១ ៦៣៣ នៅទូទាំងប្រទេស។ បេក្ខជនជាង១១ម៉ឺននាក់បានឈរឈ្មោះឲ្យប្រជាពលរដ្ឋជ្រើសរើសធ្វើជាតំណាងរបស់ពួកគេ។
កាលពីឆ្នាំ២០០៧ គណបក្សប្រជាជនកម្ពុជាទទួលបានអាសនៈក្រុមប្រឹក្សាឃុំសង្កាត់ចំនួន ៧ ៩៩៣ ក្នុងចំណោមអាសនៈ សរុប ១១ ៣៥៣ នៅទូទាំងប្រទេស។ គណបក្សប្រជាជនកម្ពុជាក៏បានកាន់កាប់តំណែងប្រធានក្រុមប្រឹក្សាឃុំសង្កាត់ចំនួន ១ ៥៩២ ក្នុងចំណោមឃុំសង្កាត់ទាំងអស់ដែលកាលណោះមានចំនួន ១ ៦២១ ទូទាំងប្រទេស។ ចំណែកគណបក្សសម រង្ស៊ីវិញ បានទួលអាសនៈសរុប ចំនួន ២ ៦៦០ និងទទួលបានតំណែងជាប្រធានក្រុមប្រឹក្សាឃុំសង្កាត់ចំនួន ២៨។ ក្រៅពីនោះ គណបក្សហ្វ៊ុនស៊ិនប៉ិចក៏មានសមាជិកក្រុមប្រឹក្សាឃុំសង្កាត់មួយចំនួនតូចដែរ។
ការបោះឆ្នោតក្រុមប្រឹក្សាឃុំសង្កាត់គឺជាការបោះឆ្នោតសំខាន់ទី២បន្ទាប់ពីការបោះឆ្នោតជ្រើសរើសតំណាងរាស្ត្រ។ ក្រុមប្រឹក្សាឃុំសង្កាត់គឺជាអ្នកដឹកនាំថ្នាក់មូលដ្ឋានដែលទទួលអំណាចពីរដ្ឋាភិបាលតាមរយៈការអនុវត្តន៍យោបាយវិមជ្ឈការនៃអំណាចថ្នាក់ជាតិ។
ក្រុមប្រឹក្សាឃុំសង្កាត់នីមួយៗមានសមាជិកពី៥ដល់១១នាក់ដែលសមាមាត្រទៅនឹងចំនួនប្រជាជននៅក្នុងដែនរដ្ឋបាលរបស់ខ្លួន។ ក្រុមប្រឹក្សាឃុំសង្កាត់ដឹកនាំដោយប្រធានមួយរូបដែលត្រូវបានជ្រើសរើសចេញពីគណបក្សដែលទទួលបានសំឡេងគាំទ្រពីប្រជាជនច្រើនជាងគេ។
ការបង្កើតឲ្យមានក្រុមប្រឹក្សាឃុំសង្កាត់តាមរយៈការបោះឆ្នោតជាសាកលគឺជារបត់នយោបាយដ៏សំខាន់មួយនៅកម្ពុជា។ សំខាន់នៅត្រង់ថា អាជ្ញាធរមូលដ្ឋានដែលជាអ្នកដឹកនាំផ្ទាល់នៅកៀកនឹងប្រជាពលរដ្ឋនោះធ្លាប់តែទទួលការតែងតាំងពីថ្នាក់លើ។ ប៉ុន្តែ បច្ចុប្បន្ននេះ គឺប្រជាពលរដ្ឋជាអ្នកបោះឆ្នោតជ្រើសរើសតំណាងរបស់ខ្លួនដោយខ្លួនឯង។ រយៈពេល១០ឆ្នាំកន្លងទៅនេះ នយោបាយវិមជ្ឈការបាននិងកំពុងចាក់ឬសកាន់តែជ្រៅនៅថ្នាក់មូលដ្ឋាន។
តាមរយៈការបោះឆ្នោត មន្ត្រីអាជ្ញាធរមូលដ្ឋានត្រូវតែបង្ហាញការទទួលខុសត្រូវចំពោះមុខប្រជាពលរដ្ឋឲ្យបានច្រើនជាងមុនពីព្រោះ ប្រសិនបើមិនដូច្នោះទេ ពួកគេនឹងត្រូវប្រជាពលរដ្ឋទម្លាក់ចេញពីអំណាចតាមរយៈសន្លឹកឆ្នោតរបស់ខ្លួន។ ខុសពីពេលមុនដែលពួកគេមិនសូវខ្វល់ខ្វាយអំពីបញ្ហារបស់ប្រជាពលរដ្ឋ។
មិនត្រឹមតែថ្នាក់ដឹកនាំមូលដ្ឋានប៉ុណ្ណោះទេ ប៉ុន្តែ ការបម្រើប្រជាពលរដ្ឋបានល្អ ឬមិនបានល្អរបស់ក្រុមប្រឹក្សាឃុំសង្កាត់ក៏មានផលប៉ះពាល់ដល់ប្រជាប្រិយភាពរបស់គណបក្សនយោបាយផងដែរ។ និយាយដោយខ្លី យន្តការដឹកនាំថ្នាក់មូលដ្ឋាននេះហើយដែលជាទីលានប្រកួតប្រជែងបម្រើប្រជាពលរដ្ឋរបស់គណបក្សនីមួយ។
ទោះបីជាកន្លងទៅនេះ នៅមានបញ្ហាជាច្រើនក្នុងរដ្ឋបាលក្រុមប្រឹក្សាឃុំសង្កាត់ក៏ដោយ ក៏ប៉ុន្តែ ការបោះឆ្នោតពីមួយអាណត្តិទៅមួយអាណត្តិជាពិសេសចាប់ពីពេលនេះតទៅ គេជឿជាក់ថា គ្មានគណបក្សនាមួយហ៊ានជិះសេះលែងដៃទៀតបានឡើយ ពីព្រោះចូរកុំភ្លេចថា ខណៈដែលពលរដ្ឋកាន់តែយល់ច្បាស់អំពីសិទ្ធិរបស់ខ្លួន ពួកគេនឹងប្រើប្រាស់សន្លឹកឆ្នោតឲ្យកាន់តែមានប្រសិទ្ធិភាពជាងមុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ