គ.ជ.ប.បង្ហាញគំរូសន្លឹកឆ្នោត និងទឹកខ្មៅលុបលាងមិនជ្រះសម្រាប់ការបោះឆ្នោតឃុំសង្កាត់
នៅព្រឹកថ្ងៃព្រហស្បតិ៍នេះ គ.ជ.ប. បានបង្ហាញគំរូសន្លឹកឆ្នោត និងទឹកខ្មៅលុបលាងមិនជ្រះ សម្រាប់ប្រើប្រាស់ ក្នុងការបោះឆ្នោតឃុំសង្កាត់ នាថ្ងៃអាទិត្យ ទី៣មិថុនាខាងមុខ។ ចំណែកគណបក្សនយោបាយ ចំនួន ១០ ដែលបានចូលរួមប្រកួតប្រជែងការបោះឆ្នោត ក៏បានត្រៀមខ្លួនរួចរាល់ សម្រាប់ការឃោសនាបោះឆ្នោតរយៈពេល ១៥ ថ្ងៃ ចាប់ផ្តើម នៅព្រឹកថ្ងៃទី១៨ ខែឧសភា ឆ្នាំ២០១២។ គណបក្សប្រជាជនកម្ពុជា គណបក្សសមរង្ស៊ី និងគណបក្សសិទ្ធិមនុស្ស នឹងជួបជុំហែក្បួនទ្រង់ទ្រាយធំ នៅថ្ងៃផ្តើមឃោសនាបោះឆ្នោតបោះឆ្នោតឃុំសង្កាត់ នាថ្ងៃសុក្រស្អែក។ រីឯគណបក្សនយោបាយ ៧ ផ្សេងទៀត គ្រាន់តែជួបជុំ ចាក់មេក្រូ និងចែកខិតប័ណ្ណ តាមឃុំសង្កាត់ ដែលគណបក្សទាំងនោះ បានឈរឈ្មោះ។
ចុះផ្សាយនៅថ្ងៃ៖
ស្តាប់ - ០៣:៤២
គ.ជ.ប បានបោះពុម្ពសន្លឹកឆ្នោតចំនួន ១០.៦១៩.៨៥០ សន្លឹក សម្រាប់ប្រើប្រាស់ក្នុងការបោះឆ្នោតជ្រើសរើសក្រុមប្រឹក្សាឃុំសង្កាត់ អាណត្តិទី៣ ឆ្នាំ២០១២ នាថ្ងៃទី៣មិថុនា។ សន្លឹកឆ្នោតទាំងនោះ មានពីរបែប គឺទំហំ A4 សម្រាប់ឃុំ-សង្កាត់ណា ដែលមានគណបក្សនយោបាយឈរឈ្មោះចាប់ពី ១ ដល់ ៦ គណបក្ស និងមួយបែបទៀត ទំហំ S4 សម្រាប់ឃុំ-សង្កាត់ណា ដែលមានគណបក្សនយោបាយឈរឈ្មោះចំនួន ៧ គណបក្ស។
លោកស្រី ស៊ីន ជុំបូ អនុប្រធាន គ.ជ.ប. បានប្រកាសក្នុងកិច្ចប្រជុំនៅព្រឹកមិញថា សន្លឹកឆ្នោតទាំងនោះ មាន ១.៦៣៣ ប្រភេទ គឺខុសគ្នា ពីឃុំសង្កាត់មួយ ទៅឃុំសង្កាត់មួយទៀត នៅទូទាំង ១.៦៣៣ ឃុំ-សង្កាត់ ទូទាំងប្រទេស។
ឃុំសង្កាត់ ដែលមានតែគណបក្សប្រជាជនកម្ពុជា តែមួយឈរឈ្មោះ មានចំនួន ១៥ ឃុំសង្កាត់។ រីឯឃុំសង្កាត់ ដែលមានគណបក្សឈរឈ្មោះច្រើនជាងគេ មានចំនួន ៧ គណបក្ស នៅក្នុង ៣០ ឃុំសង្កាត់ ក្នុងចំណោមឃុំសង្កាត់សរុប ១.៦៣៣ ឃុំសង្កាត់។
គ.ជ.ប. បានចំណាយថវិកា ១,៦ លានដុល្លារអាមេរិក ទៅលើការបោះពុម្ពសន្លឹកឆ្នោត ខណៈដែលការបោះឆ្នោតឃុំសង្កាត់ អាណត្តិទី៣ ត្រូវចំណាយសរុប ១៩,៥ លានដុល្លារ។
ក្នុងកិច្ចប្រជុំនៅព្រឹកមិញ គ.ជ.ប. ក៏បានបង្ហាញទឹកខ្មៅ លុបលាងមិនជ្រះ ចំនួន ៣៦.៩៦០ ដប សម្រាប់ប្រើប្រាស់នៅក្នុងការិយាល័យបោះឆ្នោតចំនួន ១៨.១០៧ ការិយាល័យនៅទូទាំងប្រទេស។ ក្នុងមួយការិយាល័យ ប្រើទឹកខ្មៅ ចំនួន ២ដប។
គ.ជ.ប. បានចំណាយទឹកប្រាក់ចំនួន ៨១ ម៉ឺនដុល្លារ ដើម្បីទិញទឹកខ្មៅទាំងនោះ មកពីប្រទេសឥណ្ឌា។ ភ្នាក់ងារគណបក្សនយោបាយ អ្នកសង្កេតការណ៍បោះឆ្នោត និងអ្នកកាសែត បានសាកល្បង ជ្រលក់ម្រាមដៃ ក្នុងដបទឹកខ្មៅ ដែលសម្រាប់ប្រើប្រាស់ សម្គាល់អ្នកបោះឆ្នោតឃុំសង្កាត់ នៅថ្ងៃទី៣មិថុនាខាងមុខ។
លោកស្រី ស៊ីន ជុំបូ បានគូសបញ្ជាក់ថា “ទឹកខ្មៅ សម្រាប់ប្រើប្រាស់ក្នុងការបោះឆ្នោតឃុំសង្កាត់ អាណត្តិទី៣ ឆ្នាំ២០១២ គឺទិញពីប្រទេសឥណ្ឌា ដែលមានប្រសិទ្ធភាពល្អ ហើយ គ.ជ.បតែងតែបញ្ជាទិញទឹកខ្មៅនោះ យកមកប្រើប្រាស់ ក្នុងការបោះឆ្នោតលើកមុនៗ”។
នៅក្នុងការបោះឆ្នោតឃុំសង្កាត់ នាថ្ងៃទី៣មិថុនា ឆ្នាំ២០១២ មានអ្នកបោះឆ្នោតសរុបចំនួន ៩.២០៣.៤៩៣ នាក់ ដើម្បីបោះឆ្នោតជ្រើសរើសសមាជិកក្រុមប្រឹក្សាឃុំសង្កាត់ សរុបចំនួន ១១.៤៥៩ នាក់ នៅក្នុង ១.៦៣៣ ឃុំសង្កាត់ទូទាំងប្រទេស និងមាន ១០ គណបក្សនយោបាយចូលរួមប្រកួតប្រជែង។
គណបក្សប្រជាជនកម្ពុជា គណបក្សសមរង្ស៊ី និងគណបក្សសិទ្ធិមនុស្ស បានប្រកាសរួចហើយថា នៅព្រឹកថ្ងៃសុក្រ ទី១៨ឧសភា ដែលជាថ្ងៃផ្តើមយុទ្ធនាការឃោសនាបោះឆ្នោត រយៈពេល ១៥ ថ្ងៃ គណបក្សទាំងបី នឹងជួបជុំហែក្បួនទ្រង់ទ្រាយធំ ពិសេសនៅភ្នំពេញ។
គណបក្សប្រជាជនកម្ពុជា ជួបជុំនៅកោះពេជ្រ ដោយមានអ្នកចូលរួមប្រមាណ ១ម៉ឺននាក់។ រីឯគណបក្សសមរង្ស៊ី ជួបជុំមុខវត្តបទុម ដោយមានអ្នកចូលរួមពី ៦.០០០ ទៅ ៧.០០០ នាក់។ ចំណែកគណបក្សសិទ្ធិមនុស្សរបស់លោកកឹមសុខា ជួបជុំលើផ្លូវជិតទីស្នាក់ការធំ នៅជិតផ្សារមាន់អាំង មុននឹងជិះឡាន ហែក្បួនឃោសនា។
ដោយឡែកគណបក្ស ៧ ផ្សេងទៀត រាប់ទាំងគណបក្សហ្វ៊ុនស៊ិនប៉ិច និងគណបក្សនរោត្តម រណឫទ្ធិ ទោះជាមិនហែក្បួនតាមផ្លូវ តែគណបក្សទាំងនេះ ក៏នឹងជួបជុំ ចាក់មេក្រូឃោសនា និងចែកខិតប័ណ្ណដល់អ្នកបោះឆ្នោតនៅឃុំសង្កាត់ផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ