ប្រទេសចិនដំឡើងសំឡេងដាក់កូរ៉េខាងជើង
ចុះផ្សាយនៅថ្ងៃ៖
ស្តាប់ - ០៤:៥៦
លោកប្រធានាធិបតីចិន ហ៊ូ-ជិនតាវ បានថ្លែងកាលពីថ្ងៃចន្ទម្សិលមិញឲ្យដឹងពីក្តីបារម្ភ និងការពុំពេញចិត្តយ៉ាងខ្លាំងរបស់ទីក្រុងប៉េកាំងពាក់ព័ន្ធនឹងគម្រោងបាញ់បង្ហោះកាំជ្រួចមីស្ស៊ីលរបស់កូរ៉េខាងជើងនៅរវាងពាក់កណ្តាលខែមេសាខាងមុខ។ ទាំងនេះនាឱកាសជំនួបជាមួយលោកប្រធានាធិបតីអាមេរិកបារ៉ាក់អូបាម៉ានៅជំនួបកំពូលនៅទីក្រុងសេអ៊ូល។
ក្រោមសម្ពាធរបស់ទីក្រុងវ៉ាស៊ីនតោន ប្រទេសចិនដំឡើងសំឡេងដាក់របបគ្រប់គ្រងកូរ៉េខាងជើងដែលជាសម្ព័ន្ធមិត្តរបស់ខ្លួន នាឱកាសជំនួបកំពូលនៅទីក្រុងសេអ៊ូល ស្ដីពីបញ្ហាសន្តិសុខនុយក្លេអ៊ែរ។ លោកប្រធានាធិបតីចិន ហ៊ូ-ជិនតាវ បានថ្លែងបរិហារពី គម្រោងបង្ហោះកាំជ្រួចមីស្ស៊ីលដោយកូរ៉េខាងជើងនៅរវាងពាក់កណ្តាលខែមេសាខាងមុខនេះ ហើយបានបង្ហាញឲ្យឃើញនូវការពុំពេញចិត្តយ៉ាងខ្លាំងរបស់ទីក្រុងប៉េកាំងនៅចំពោះមុខរបបគ្រប់គ្រងកូរ៉េខាងជើងក្រោមការដឹកនាំរបស់យុវអគ្គមគ្គុទ្ទេសក៍គីម ជុងអ៊ុន។ លោកប្រធានាធិបតីចិនបារម្ភខ្លាចក្រែង ការបង្ហោះកាំជ្រួចមីស្ស៊ីលដោយកូរ៉េខាងជើង អាចជាកាតាលីករនាំឲ្យតំបន់អាស៊ីប៉ែកឦសានដែលក្នុងនោះមាន ប្រទេសកូរ៉េទាំងពីរ និងប្រទេសជប៉ុន ស្គាល់ការពុះកញ្ជ្រោលនាំគ្នាអភិវឌ្ឍនិងសាកល្បងអាវុធនុយក្លេអ៊ែរ យកតម្រាប់តាមទីក្រុងព្យុងយ៉ាង។ ទីក្រុងប៉េកាំងពុំចង់ឃើញសោះឡើយនូវសេណារីយោបែបនេះកើតមាននៅតំបន់អាស៊ីប៉ែកឦសាន ជាពិសេសភាពវឹកវរ និងអស្ថិរភាពកើតមាននៅក្នុងប្រទេសកូរ៉េដែលជាប់នឹងព្រំដែនប៉ែកឦសាននៃប្រទេសចិន។ ហេតុដូច្នេះហើយបានជាលោកប្រធានាធិបតីចិន ហ៊ូ-ជិនតាវសន្យាជាមួយលោកប្រធានាធិបតីអាមេរិកបារ៉ាក់អូបាម៉ាថា ទីក្រុងប៉េកាំងនឹងខិតខំធ្វើយ៉ាងណាឲ្យកូរ៉េខាងជើងប្តូរប្រែឥរិយាបថរបស់ខ្លួន ពាក់ព័ន្ធនឹងគម្រោងបាញ់កាំជ្រួចមីស្ស៊ីលនេះ។
គួរកត់សម្គាល់ថា សំណុំរឿងនុយក្លេអ៊ែរកូរ៉េខាងជើងនេះ ជាប្រធានបទដ៏សំខាន់នៃកិច្ចជំនួបពិភាក្សារវាងប្រមុខដឹកនាំចិននិងអាមេរិកនាឱកាសជំនួបកំពូលនៅទីក្រុងសេអ៊ូល។ ហើយសហរដ្ឋអាមេរិកបានជំរុញឲ្យប្រទេសចិនប្តូរយុទ្ធសាស្ត្ររបស់ខ្លួនជាមួយទីក្រុងព្យុងយ៉ាង ដែលមកទល់ពេលនេះ យុទ្ធសាស្ត្រចិនក្នុងការជំរុញឲ្យកូរ៉េខាងជើងផ្អាកសកម្មភាពនុយក្លេអ៊ែររបស់ខ្លួនកំពុងជួបនឹងបរាជ័យ។
នៅក្នុងកិច្ចសន្ទនាជាឯកជន លោកប្រធានាធិបតី ហ៊ូ-ជិនតាវ ពុំលាក់បាំងឡើយនូវកំហឹងក្រេវក្រោធយ៉ាងខ្លាំងរបស់ប្រទេសចិន នៅចំពោះមុខការរឹងរូសរបស់អ្នកដឹកនាំកូរ៉េខាងជើងដែលពុំព្រមប្តូរប្រែនយោបាយយុទ្ធសាស្ត្រនិងនយោបាយសេដ្ឋកិច្ច ដោយអនុវត្តនយោបាយបើកចំហសេដ្ឋកិច្ច ជាជាងធ្វើការចំណាយថវិកាដ៏ស្តួចស្តើងរបស់ខ្លួនដល់ទៅ១/៤ទៅលើវិស័យយោធា ដែលជាមូលហេតុធ្វើឲ្យស្ថានភាពសេដ្ឋកិច្ចនៃប្រទេសកូរ៉េខាងជើងធ្លាក់ចុះយ៉ាងសែនដុនដាបក្រៃលែង រហូតដល់ទៅប្រជាជនជួបនឹងគ្រោះទុរភិក្សផងទៀត។
លោកប្រធានាធិបតីចិន ហ៊ូ-ជិនតាវ ពុំសម្តែងឲ្យឃើញនូវកំហឹងក្រេវក្រោធជាសាធារណៈ មកពីប្រទេសចិនពុំចង់ធ្វើឲ្យរបបគ្រប់គ្រងនៃទីក្រុងព្យុងយ៉ាងបាក់មុខមាត់ ហើយម្យ៉ាងទៀតទីក្រុងប៉េកាំងក៏ចង់រក្សាឲ្យមានស្ថិរភាពនៅតំបន់អាស៊ីប៉ែកឦសាន គ្រាន់នឹងប្រទេសចិនមានឱកាសនឹងអភិវឌ្ឍសេដ្ឋកិច្ចនិងអានុភាពរបស់ខ្លួន។
ក៏ប៉ុន្តែទង្វើរករឿងបង្កហេតុដោយសកម្មភាពរបស់កូរ៉េខាងជើងនេះ បានធ្វើឲ្យវិស័យការទូតចិនក្លាយជាអ្នករងគ្រោះ។ រងគ្រោះដោយហេតុថា នយោបាយការទូតចិនបាត់បង់ឥទ្ធិពលរបស់ខ្លួននៅចំពោះមុខទីក្រុងវ៉ាស៊ីនតោន ពាក់ព័ន្ធនឹងសំណុំរឿងដ៏ចម្រូងចម្រាសនៃប្រទេសអ៊ីរ៉ង់និងប្រទេសស៊ីរី។
នៅចំពោះមុខស្ថានការណ៍បែបនេះ តាមរយៈទីភ្នាក់ងារព័ត៌មានផ្លូវការកូរ៉េខាងជើង KCNA ទីក្រុងព្យុងយ៉ាងបានប្រកាសនៅថ្ងៃអង្គារនេះឲ្យដឹងថា “ប្រទេសកូរ៉េខាងជើងនឹងពុំបោះបង់ចោលឡើយ សិទ្ធិ នៃការបាញ់បង្ហោះកាំជ្រួចមីស្ស៊ីលដោយសន្តិភាពរបស់ខ្លួន ពីព្រោះវាជាសិទ្ធិដ៏ស្របច្បាប់សម្រាប់រដ្ឋអធិបតេយ្យ ហើយវាក៏ជាជំហានមួយដ៏សំខាន់សម្រាប់អភិវឌ្ឍសេដ្ឋកិច្ចផងទៀត”។
ម្យ៉ាងទៀត ទាំងនេះក៏ពីព្រោះតែរបបគ្រប់គ្រងកូរ៉េខាងជើងគ្មានជម្រើស។ បើទីក្រុងព្យុងយ៉ាងពុំខិតខំអភិវឌ្ឍវិស័យនុយក្លេអ៊ែររបស់ខ្លួនទេ ធ្វើម្តេចកូរ៉េខាងជើងមានសព្វាវុធគ្រាន់នឹងការពារខ្លួន។ បើពុំដូច្នោះទេ ប្រទេសកូរ៉េខាងជើងច្បាស់ជាត្រូវឋិតនៅក្នុងស្ថានភាពផុយស្រួយ ហើយនិងត្រូវឋិតនៅក្រោមការគំរាមរបស់កងកម្លាំងយោធាកូរ៉េខាងត្បូង ហើយនិងទាហានអាមេរិកដែលមានប្រមាណជិត៣០ ០០០នាក់នៅឧបទ្វីបកូរ៉េ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ