ជប៉ុន-កូរ៉េខាងត្បូង៖ ជម្លោះដណ្តើមកោះកំពុងរាលដាលដល់ទំនាក់ទំនងសេដ្ឋកិច្ច?
ចុះផ្សាយនៅថ្ងៃ៖
ស្តាប់ - ០៣:៣៩
ជម្លោះផ្នែកការទូតរវាងជប៉ុន និងកូរ៉េខាងត្បូង ជុំវិញដំណើរទស្សនកិច្ចរបស់លោកលី ម្យ៉ុងបាក់ ទៅកាន់ប្រជុំកោះដុកដូ (ឬតាកេស្ហ៊ីម៉ា) កំពុងតែមានសភាពដុនដាបកាន់តែខ្លាំងឡើង ពីមួយថ្ងៃទៅមួយថ្ងៃ។ ប្រធានាធិបតីកូរ៉េខាងត្បូងបានបដិសេធមិនទទួលលិខិតតវ៉ារបស់នាយករដ្ឋមន្រ្តីជប៉ុន ហើយផ្ញើត្រឡប់មកឲ្យរដ្ឋាភិបាលជប៉ុនវិញ ដែលជាហេតុធ្វើឲ្យជប៉ុនផ្ទុះកំហឹងកាន់តែខ្លាំង។ រដ្ឋមន្រ្តីក្រសួងហិរញ្ញវត្ថុជប៉ុនបានបង្ហើបឲ្យដឹងថា ក្រៅពីការតវ៉ាផ្នែកការទូត នៅពេលនេះ ជប៉ុនកំពុងពិចារណាចាត់វិធានការផ្នែកសេដ្ឋកិច្ច ដើម្បីតបតជាមួយរដ្ឋាភិបាលក្រុងសេអ៊ូល។
ជិតពីរសប្តាហ៍ក្រោយមក ភ្លើងជម្លោះ ជុំវិញដំណើរទស្សនកិច្ចរបស់លោកលី ម្យ៉ុងបាក់ ទៅកាន់ប្រជុំកោះដុកដូ (Dokdo) ឬហៅតាមជប៉ុន តាកេស្ហ៊ីម៉ា (Takeshima) នៅតែមិនទាន់ស្ងប់រលត់ គឺមានតែឆេះកាន់តែខ្លាំងឡើងថែមទៀត។ ការបោះពាក្យសម្តីដាក់គ្នាទៅវិញទៅមក រវាងជប៉ុន និងកូរ៉េខាងត្បូង បានកើតមានឡើងស្ទើរតែរាល់ថ្ងៃ។ មកដល់ថ្ងៃព្រហស្បតិ៍ម្សិលមិញ ភាពចម្រូងចម្រាសថ្មីមួយទៀតបានផ្ទុះឡើង គឺទាក់ទងនឹងលិខិតតវ៉ារបស់នាយករដ្ឋមន្រ្តីជប៉ុន ដែលបានផ្ញើជូនប្រធានាធិបតីកូរ៉េខាងត្បូង កាលពីថ្ងៃសុក្រមុន។
លោកយ៉ូស្ហ៊ីហ៊ីកូ ណូដា (Yoshihiko Noda) ផ្ញើលិខិតនេះ ដើម្បីតវ៉ាចំពោះដំណើរទស្សនកិច្ចរបស់លោកលី ម្យ៉ុងបាក់ ទៅកាន់ប្រជុំកោះដែលជាប់ជម្លោះផង និងតវ៉ាចំពោះពាក្យសម្តីរបស់លោកប្រធានាធិបតីកូរ៉េខាងត្បូងទៅលើអធិរាជជប៉ុនផង។ ក៏ប៉ុន្តែ កូរ៉េខាងត្បូងស្រាប់តែបានសម្រេចបញ្ជូនលិខិតនេះត្រឡប់ទៅឲ្យរដ្ឋាភិបាលជប៉ុនវិញ ដោយមិនខ្ចីហែកអាន។ ប៉ុន្តែ ក្រសួងការបរទេសជប៉ុនបានបដិសេធមិនទទួលយកលិខិតនេះត្រឡប់ទៅវិញទេ។ សូម្បីតែមន្រ្តីទូតកូរ៉េខាងត្បូង ដែលជាអ្នកកាន់លិខិតនេះ ក៏គេមិនអនុញ្ញាតឲ្យចូលក្នុងក្រសួងការបរទេសដែរ កាលពីម្សិលមិញ។
អ្នកនាំពាក្យរដ្ឋាភិបាលជប៉ុនបានប្រាប់អ្នកសារព័ត៌មានថា តាមពិធីការផ្នែកការទូត ប្រមុខដឹកនាំប្រទេសមួយ មិនដែលបញ្ជូនលិខិតរបស់ប្រមុខដឹកនាំប្រទេសមួយទៀត ត្រឡប់មកវិញបែបនេះទេ។ អនុរដ្ឋមន្រ្តីក្រសួងការបរទេសជប៉ុនវិញ បានចាត់ទុកទង្វើរបស់កូរ៉េខាងត្បូងនេះថា មិនស្មើនឹងក្មេងបៀមដៃផង។
ក៏ប៉ុន្តែ កូរ៉េខាងត្បូងបានចោទថា គឺជប៉ុនទៅវិញទេ ដែលបានធ្វើខុសនឹងពិធីការទូត ដោយបានទម្លាយខ្លឹមសារលិខិតរបស់លោកណូដាជាសាធារណៈ នៅមុនពេលបញ្ជូនទៅដល់លោកលី ម្យ៉ុងបាក់។ រដ្ឋាភិបាលក្រុងសេអ៊ូលក៏បានជម្នះបញ្ជូនលិខិតនេះត្រឡប់ទៅវិញ ដោយផ្ញើតាមប្រៃសណីយ៍ ហើយលើកនេះ ក្រសួងការបរទេសជប៉ុនសុខចិត្តទទួលយកលិខិតនេះត្រឡប់ទៅវិញ។ ក៏ប៉ុន្តែ រដ្ឋាភិបាលក្រុងតូក្យូមិនសុខចិត្តបញ្ចប់រឿងនេះត្រឹមនេះទេ! នៅថ្ងៃព្រហស្បតិ៍ដដែលនោះ ថ្លែងមុខតំណាងរាស្រ្តជប៉ុន លោកនាយករដ្ឋមន្រ្តីជប៉ុនបានទាមទារឲ្យលោកលី ម្យ៉ុងបាក់ សូមទោសជាសាធារណៈចំពោះពាក្យសម្តី ដែលលោកបានប្រើមកលើអធិរាជជប៉ុន។
គួររំឭកឡើងវិញថា ក្រោយពីបានទៅបំពេញទស្សនកិច្ចនៅកោះជាប់ជម្លោះ លោកប្រធានាធិបតីកូរ៉េខាងត្បូងបានបញ្ឆេះកំហឹងជប៉ុនមួយកម្រិតទៀត ដោយបានទាមទារថា ព្រះចៅអធិរាជអាគីហ៊ីតូត្រូវតែថ្លែងសុំទោសដោយសុទ្ធចិត្ត ចំពោះទង្វើរបស់ជប៉ុនពីអតីតកាល ប្រសិនបើទ្រង់ចង់ធ្វើដំណើរទៅកាន់ប្រទេសកូរ៉េខាងត្បូង។
កាលពីម្សិលមិញនេះ រដ្ឋសភាជប៉ុនក៏បានអនុម័តសេចក្តីសម្រេចមួយដែរ ដើម្បីថ្កោលទោសដំណើរទស្សនកិច្ចរបស់លោកលី ម្យ៉ុងបាក់ ទៅកាន់ប្រជុំកោះតាកេស្ហ៊ីម៉ា ហើយបានទាមទារឲ្យកូរ៉េខាងត្បូងបញ្ឈប់ការកាន់កាប់ប្រជុំកោះនេះ ដែលសភាជប៉ុនចាត់ទុកថាជាការកាន់កាប់ដោយខុសច្បាប់។
នៅថ្ងៃសុក្រនេះ រដ្ឋមន្រ្តីក្រសួងហិរញ្ញវត្ថុជប៉ុនបានបង្ហើបឲ្យដឹងថា លោកកំពុងពិចារណាថា តើគួរបន្តទិញមូលបត្របំណុលរដ្ឋរបស់កូរ៉េខាងត្បូងតទៅទៀត ឬត្រូវបញ្ឈប់។ នេះគឺជាការព្រមានថ្មីមួយទៀតរបស់រដ្ឋមន្រ្តីក្រសួងហិរញ្ញវត្ថុជប៉ុន បន្ទាប់ពីបានលុបចោលដំណើរទស្សនកិច្ចទៅកាន់ប្រទេសកូរ៉េខាងត្បូង និងប្រកាសថា ចង់សើរើកិច្ចព្រមព្រៀងដោះដូររូបិយវត្ថុជាមួយកូរ៉េខាងត្បូង។
ទាំងនេះបង្កឲ្យមានការព្រួយបារម្ភថា ជម្លោះដែនដីនេះអាចនឹងរាលដាលទៅបង្កផលប៉ះពាល់ដល់ទំនាក់ទំនងសេដ្ឋកិច្ចរវាងប្រទេសទាំងពីរ។ ក៏ប៉ុន្តែ បើផ្អែកលើបទពិសោធន៍ពីអតីតកាល យើងសង្កេតឃើញថា ជប៉ុន និងកូរ៉េខាងត្បូងតែងតែមានជម្លោះការទូតបែបនេះជារឿយៗ ក៏ប៉ុន្តែ ប្រទេសទាំងពីរនៅតែបន្តរក្សាទំនាក់ទំនងសេដ្ឋកិច្ចឲ្យនៅរឹងមាំជាប់ជានិច្ច ជាពិសេស ប្រទេសទាំងពីរទាញយកផលប្រយោជន៍ពីគ្នាទៅវិញទៅមក ទាំងខាងវិស័យពាណិជ្ជកម្ម វិនិយោគ និងទេសចរណ៍។ សម្រាប់ជប៉ុន កូរ៉េខាងត្បូងគឺជាដៃគូពាណិជ្ជកម្មលំដាប់ទី៣ បន្ទាប់ពីអាមេរិក និងចិន។ សម្រាប់កូរ៉េខាងត្បូងវិញ ជប៉ុន គឺជាដៃគូពាណិជ្ជកម្មលំដាប់ទី២ បន្ទាប់ពីចិន។ ដូច្នេះ ទាំងជប៉ុន ទាំងកូរ៉េខាងត្បូង សុទ្ធតែដឹងថា ប្រសិនបើពួកគេបណ្តោយឲ្យជម្លោះដណ្តើមកោះ រាលដាលទៅដល់វិស័យសេដ្ឋកិច្ច ប្រទេសទាំងពីរនឹងត្រូវខាតបង់ទាំងសងខាង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ