អ៊ីស្រាអែលធ្លាក់ក្នុងវិបត្តិនយោបាយ ដោយសភាកោះឲ្យមានការបោះឆ្នោតមុនអាណត្តិនៅឆ្នំា ២០១៥
ចុះផ្សាយនៅថ្ងៃ៖
ស្តាប់ - ០៤:៤៣
អ៊ីស្រាអែលកំពុងធ្លាក់ក្នុងវិបត្តិនយោបាយមួយដ៏ធ្ងន់ធ្ងរ។ បន្ទាប់ពីលោកនាយករដ្ឋមន្រ្តីបិនយ៉ាមីន នេតាន់យ៉ាហ៊ូបានសម្រេចដកតំណែងរដ្ឋមន្រ្តីចំនួនពីររូបនៅថ្ងៃអង្គារ ទី២ ធ្នូមក នៅថ្ងៃពុធ ទី៣ ធ្នូនេះ រដ្ឋសភាទើបបានសម្រេចឲ្យមានបោះឆ្នោតសភាមុនកាលកំណត់ដែលគ្រោងរៀបចំនៅថ្ងៃទី១៧ មីនា ឆ្នំា ២០១៥។ គួរជម្រាបជូនថា រដ្ឋាភិបាលរបស់លោកបិនយ៉ាមីន នេតាន់យ៉ាហ៊ូសព្វថ្ងៃ ជារដ្ឋាភិបាលចម្រុះដែលចូលរួមដោយគណបក្សនយោបាយចំនួន ៥ទៀត ដោយរាប់ពីគណបក្សកណ្តាលនិយម គណបក្សស្តំានិយមសាសនា រហូតដល់គណបក្សជាតិនិយមជ្រុល។ តែតំាងពីមួយសប្តាហ៍មកហើយដែលរដ្ឋាភិបាលបានទទួលរងការបែកបាក់ផ្ទៃក្នុងយ៉ាងខ្លំាង រហូតដល់លោកនេតាន់យ៉ាហ៊ូបាត់បង់ការគំាទ្រពីគណបក្សដៃគូទំាងនោះ។
អស់រយៈពេលជាច្រើនសប្តាហ៍កន្លងមកហើយដែលរដ្ឋាភិបាលអ៊ីស្រាអែលរបស់លោកនាយករដ្ឋមន្រ្តីបិនយ៉ាមីន នេតាន់យ៉ាហ៊ូបានចាប់ផ្តើមរង្គោះរង្គើរ និងដែលគ្រប់គ្នាបានប្រដូចទៅនឹងសង្រ្គាមនៃការដណ្តើមគ្នាធ្វើមេ។ តែនេះក៏ជាលទ្ធផលដែលទទួលបានពីការរួមសហការរបស់គណបក្សផ្សេងនៅក្នុងរដ្ឋាភិបាលតែមួយ ឬគេអាចហៅដោយសាមញ្ញថា ជារដ្ឋាភិបាលចម្រុះ។ រដ្ឋាភិបាលចម្រុះនៅអ៊ីស្រាអែលរបស់លោកនេតាន់យ៉ាហ៊ូបានចូលរួមតំាងពីគណបក្សកណ្តាលនិយមរហូតដល់គណបក្សជ្រុលនិយម។
ប្រភពនៃវិបត្តិបានផ្ទុះចេញពីភាពមិនចុះសម្រុងគ្នារវាងលោកនេតាន់យ៉ាហ៊ូ និងរដ្ឋមន្រ្តីចំនួនពីរនាក់របស់លោក គឺលោកស្រីរដ្ឋមន្រ្តីក្រសួងយុត្តិធម៌ហ្ស៊ីពី លីន្វី និងលោករដ្ឋមន្រ្តីក្រសួងហិរញ្ញវត្ថុយែរ ឡាពីដ។ ជាមួយលោកឡាពីដ លោកនេតាន់យ៉ាហ៊ូបានស្នើឲ្យដកចេញវិញនូវច្បាប់ដែលមិនឲ្យបង់ពន្ធលើតម្លៃបន្ថែមចំពោះការទិញលំនៅដ្ឋាន បន្ទាប់មក លោកនេតាន់យ៉ាហ៊ូបានសុំឲ្យក្រសួងហិរញ្ញវត្ថុដំឡើងថវិការការពារជាតិជាង ១ ៥០០លានដុល្លារសម្រាប់បំពេញកង្វះខាតនាពេលធ្វើសង្រ្គាមប្រឆំាងប៉ាឡេស្ទីននៅតំបន់ហ្កាហ្សារយៈពេល ៥០ថ្ងៃកន្លងទៅ បន្ទាប់មកទៀត លោកនេតាន់យ៉ាហ៊ូក៏បានអំពាវនាវឲ្យលោកឡាពីដបិទមាត់បញ្ឈប់ការរិះគន់លើរដ្ឋាភិបាលនៅក្នុងរឿងសាងសង់លំនៅដ្ឋានឲ្យប្រជាជនអ៊ីស្រាអែលនៅក្នុងទីក្រុងហ៊្សេរុយសាឡិមខាងកើត។
ចំណែកជាមួយលោកស្រីរដ្ឋមន្រ្តីក្រសួងយុត្តិធម៌ហ្ស៊ីពី លីន្វីវិញ លោកប្រមុខរដ្ឋាភិបាលបានសុំឲ្យលោកស្រីជួយគំាទ្រលើសេចក្តីព្រាងច្បាប់ស្តីពីការប្តូរអ៊ីស្រាអែលពី « រដ្ឋជ្វីហ្វ និងប្រជាធិបតេយ្យ » ទៅជា « រដ្ឋនៃប្រជាជាតិជ្វីហ្វ » វិញ។ តែលោកឡាពីដ ក៏ដូចជាលោកស្រីលីន្វីមិនបានធ្វើតាមសំណើរបស់លោកនេតាន់យ៉ាហ៊ូទេ។ នៅទីបំផុត និងដើម្បីជាការផ្តល់មេរៀនចំពោះរដ្ឋមន្រ្តីផ្សេង លោកនេតាន់យ៉ាហ៊ូក៏បានសម្រេចដកតំណែងរដ្ឋមន្រ្តីទំាងពីររូបនោះតែម្តងទៅ។ តែបញ្ហានៅត្រង់ថា បើគ្មានការគំាទ្រពីគណបក្សរបស់រដ្ឋមន្រ្តីទំាងពីររូបនេះទេ លោកនេតាន់យ៉ាហ៊ូក៏មិនអាចមានសម្លេងភាគច្រើននៅក្នុងរដ្ឋសភាដែរ។
សភាសម្រេចយកថ្ងៃទី១៧ មីនា ឆ្នំា ២០១៥ ជាថ្ងៃបោះឆ្នោតសភាមុនអាណត្តិ
បើគ្មានវិបត្តិនយោបាយនៅពេលនេះទេ ការបោះឆ្នោតសភានៅអ៊ីស្រាអែលនឹងត្រូវរៀបចំនៅឆ្នំា ២០១៧។ តែនៅចំពោះមុខ និងជាង ៣ខែមុនការរៀបចំបោះឆ្នោតមុនអាណត្តិឈានមកដល់ លោកនេតាន់យ៉ាហ៊ូត្រូវបង្ខំចិត្តធ្វើការជាមួយគណបក្សផ្សេង។ អស់រយៈពេលជាច្រើនសប្តាហ៍កន្លងមកហើយដែលលោកនេតាន់យ៉ាហ៊ូបានផ្តើមពិភាក្សាជាមួយគណបក្សសាសនា និងគណបក្សជាតិនិយមដែលមានអសនៈនៅក្នុងរដ្ឋសភា។ តែក្រុមអ្នកវិភាគបានផ្តល់ជាអនុសាសន៍ថា ដើម្បីអាចបញ្ជៀសមេរៀនដ៏ជូរចត់ដូចដែលលោកនេតាន់យ៉ាហ៊ូបានទទួលពីរដ្ឋមន្រ្តីដកតំណែងមកពីគណបក្សកណ្តាលនិយមពេលនេះ លោកនេតាន់យ៉ាហ៊ូក៏គួរពិនិត្យមើលឡើងវិញនូវនយោបាយរបស់ខ្លួនដែរ។
អ្វីដែលច្បាស់នៅពេលនេះ ទោះបីជាមានការបោះឆ្នោតមុនអាណត្តិនៅថ្ងៃនេះ ឬមួយក៏នៅ ៣ខែខាងមុខ ក៏គណបក្សលីគូដរបស់លោកនេតាន់យ៉ាហ៊ូនៅតែទទួលបានជោគជ័យដដែល តែអ្វីដែលមិនច្បាស់នោះគឺថា តើអនាគតរដ្ឋាភិបាលចម្រុះរបស់លោកនេតាន់យ៉ាហ៊ូនឹងរឹងមំាជាងមុន ឬក៏អត់។ គួររម្លឹកជូនថា នយោបាយរបស់លោកនេតាន់យ៉ាហ៊ូដែលបានទទួលរងការរិះគន់ខ្លំាងជាងគេ គឺទាក់ទងនឹងសេចក្តីព្រាងច្បាប់ស្តីពីការប្តូរអ៊ីស្រាអែលពី « រដ្ឋជ្វីហ្វ និងប្រជាធិបតេយ្យ » ទៅជា « រដ្ឋនៃប្រជាជាតិជ្វីហ្វ » វិញ។ សេចក្តីព្រាងច្បាប់មួយនេះបានបង្កឲ្យមានភាពចម្រូងចម្រាស និងការតស៊ូមតិយ៉ាងផុសផុល។ គណបក្សប្រឆំាងបានចាត់ទុកសេចក្តីព្រាងច្បាប់នោះថា មានការរើសអើង ចំណែកនៅផ្ទៃក្នុងគណបក្សលីគូដរបស់លោកនេតាន់យ៉ាហ៊ូក៏គ្មានការឯកភាពគ្នាដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ