ដង្ហើមចុងក្រោយនៃការចរចានុយក្លេអ៊ែរអ៊ីរ៉ង់
ចុះផ្សាយនៅថ្ងៃ៖
ស្តាប់ - ០៦:០៩
នៅសល់តែប៉ុន្មានម៉ោងទៀតប៉ុណ្ណោះ កិច្ចចរចានុយក្លេអ៊ែរអ៊ីរ៉ង់ នៅទីក្រុងវីយ៉ែន ដែលក្រុមប្រទេសមហាអំណាចទាំង៥ +១ (បារាំង អាមេរិក អង់គ្លេស ចិន រុស្ស៊ី និងអាល្លឺម៉ង់) ព្រមទាំងតំណាងអ៊ីរ៉ង់កំពុងជួបប្រជុំគ្នា នឹងត្រូវបិទបញ្ចប់ និងដល់ឱសានវាទ។ ពេលវេលាកាន់តែខោច លទ្ធផលក៏កាន់តែមិនប្រាកដ។ ក្រៅអំពីបញ្ហាប្រយុទ្ធប្រឆាំងនឹងការរីកសាយភាយនុយក្លេអ៊ែរ កិច្ចចរចានៃមានសារៈសំខាន់បំផុត។ ព្រោះបើមហាអំណាចនិងអ៊ីរ៉ង់ អាចរកឃើញកិច្ចព្រមព្រៀងនឹងគ្នាបាននៅថ្ងៃនេះ នោះគឺតំបន់ដើមបូព៌ាទាំងមូលដែលប្តូរផ្លាស់។ អាចមានសេណារីយោបី កើតចេញពីការចរចាផ្តាច់ព័ត្រថ្ងៃទី ២៤វិច្ឆិកា ២០១៤។
សេណារីយោដែលទំនងគួរឱ្យជឿជាក់ជាងគេគឺការពន្យារពេលចរចា។ បើតាមប្រភពព័ត៌មានអាមេរិក ក្រុមប្រទេសមហាអំណាចជាសមាជិកអចិន្ត្រៃយ៍នៃក្រុមប្រឹក្សាសន្តិសុខបូកនិងអាល្លឺម៉ង់ កំពុងតែពិភាក្សាអំពីលទ្ធភាពនៃការពន្យារពេលនេះ។ ប្រសិនបើដូច្នេះមែននោះនឹងអាចមានការព្រមព្រៀងនយោបាយមួយមកជំនួស សេណារីយោទីពីរ ដែលគ្មានអ្វីក្រៅពីការបរាជ័យ។ ពន្យារពេលចរចា គឺមានន័យថាជាបរាជ័យ ដែលគេតែងលម្អ ពាក់មុខ ពង្រាងដោយពាក្យផ្សេង ដើម្បីស្តារមុខមាត់តែប៉ុណ្ណោះ។
ការចរចានុយក្លេអ៊ែរអ៊ីរ៉ង់លើកនេះ ជាខិតខំប្រឹងប្រែងស្ទើរគ្មានលួសថ្ងៃ នៅតែមិនអាចធ្វើឱ្យភាគីមហាអំណាច (បស្ចឹមលោក) និងអ៊ីរ៉ង់ ស្វែងរកជំហររួមគ្នាបាន។ ដូច្នេះបើបន្ថែមពេលពីរបីខែ ទៀត ក៏គេពិបាកជឿថានឹងអាចរកឃើញលទ្ធផលគ្រាន់បើជាងណាស់។
ប្រសិន សេណារីយោនេះនឹងត្រូវបញ្ជាក់នៅ យប់នេះមែន នោះពិតជា ជាការបាក់មុខលោកប្រធានាធិបតីអាមេរិក បារ៉ាក់ អូបាម៉ា និងប្រធានាធិបតីអ៊ីរ៉ង់ ហាសាន រ៉ូហានីខ្លាំងណាស់។ ព្រោះប្រមុខដឹកនាំទាំងពីរបានទទួលរងការរិះគន់ ពីសំណាក់បក្សប្រឆាំង នៅក្នុងប្រទេសរៀងខ្លួន រួចស្រាប់ទៅហើយ ចំពោះកិច្ចព្រមព្រៀងតាំងពីមិនទាន់កើតជារូបរាងម្ល៉េះ។
តែយ៉ាងណាក៏ដោយ ក៏គ្មានហេតុផលអ្វីដែលក្រុមមហាអំណាចនិងអ៊ីរ៉ង់ ត្រូវបន្ទន់ដៃឡើយ ! តាំងពីព្រឹកមក រដ្ឋមន្ត្រីការបរទេសអាមេរិក ចន ឃែរី បានជួបជាថ្មី ជាលើកទី ៧ សមភាគីអ៊ីរ៉ង់ លោក មូហាម៉េត ហ្សាវ៉ា ហ្សារីហ្វ។ ក្រៅពីជំនួបទ្វេភាគី ជំនួបរួមគ្នា រវាងមហាអំណាចទាំងប្រាំមួយ និងអ៊ីរ៉ង់ ត្រូវចូលតុជុំគ្នាជាលើកទីមួយ នៅថ្ងៃនេះ។ ពេលវេលានៅខ្លីមែន ប៉ុន្តែគ្រប់ភាគី សុទ្ធបានសន្យាប្រឹងឱ្យអស់សមត្ថភាព សង្ឃឹមជានិច្ចថានឹងរកដំណោះស្រាយបានតាមផ្លូវនយោបាយ បិទបញ្ចប់វិវាទ ឬទំនាក់ទំនងក្រវិចក្រវៀន១២ឆ្នាំរវាងអ៊ីរ៉ង់និងបស្ចឹមលោក។
ក្នុងកិច្ចពិភាក្សាបែបនេះ គ្មានអ្វីដែលអាចទាយទុកជាមុនបានទេ។ សេណារីយោចុងក្រោយ កិច្ចព្រមព្រៀងទូទៅអាចនឹងកើតជារូបរាងដូចការស្រមៃចង់បានរបស់អ៊ីរ៉ង់ និងមហាអំណាច ក៏ថាបាន។
របត់ថ្មីសម្រាប់តំបន់ដើមបូព៌ា
កិច្ចព្រមព្រៀងនុយក្លេអ៊ែរ មានសារៈសំខាន់ខ្លាំងណាស់សម្រាប់សាធារណរដ្ឋអ៊ីស្លាមអ៊ីរ៉ង់។ មានកិច្ចព្រមព្រៀង អ៊ីរ៉ង់នឹងបិទបញ្ចប់ភាពឯកា និងបានវិលត្រលប់មកលើឆាកអន្តរជាតិក្នុងនាមជាប្រទេសដ៏មានអំណាចបំផុតមួយផង។ នៅក្នុងខួរក្បាលអ្នកការទូតអ៊ីរ៉ង់ដែលកំពុងដឹកនាំចរចានៅក្នុងទីក្រុងវីយ៉ែន កម្មវត្ថុធំគឺនុយក្លេអ៊ែរ តែចាំជាប់ចំណុចសំខាន់ពីរទៀត ៖
ប្រសិនបើរកឃើញកិច្ចព្រមព្រៀង នោះអ៊ីរ៉ង់និងសហរដ្ឋអាមេរិកដែលធ្លាប់ជាសត្រូវជួរជាតិនឹងគ្នា អាចញាត់អាវុធទុកលែងធ្វើសង្គ្រាមនឹងគ្នា និងបិទបញ្ចប់ជម្លោះអូសបន្លាយអស់៣៥ឆ្នាំ។ ខាងអាមេរិក ក៏ចង់ឃើញជោគជ័យនេះដែរ។ សំណុំរឿងនុយក្លេអ៊ែរអ៊ីរ៉ង់ ទទួលខុសត្រូវ លោកចនឃែរី ជាអាទិភាពមួយនៃនយោបាយការបរទេសរបស់រដ្ឋបាលអូបាម៉ា។
ថ្វីដ្បិតតែគ្មានលើកយកមកនិយាយក្នុងកិច្ចចរចានេះមែន ប៉ុន្តែទាំងសហរដ្ឋអាមេរិក ទាំងសហភាពអឺរ៉ុប សុទ្ធតែត្រូវការនាពេលបច្ចុប្បន្ននេះ អ៊ីរ៉ង់ទាំងអស់ក្នុងការប្រយុទ្ធប្រឆាំងនឹងអង្កការរដ្ឋអ៊ីស្លាម នៅ ស៊ីរី និងនៅអ៊ីរ៉ាក់។
បើមានកិច្ចព្រមព្រៀងនុយក្លេអ៊ែរ គឺដូចជាការបើកផ្លូវឱ្យមានកិច្ចសហប្រតិបត្តិការលើសំណុំរឿងផ្សេងៗជាច្រើនទៀត មានជាអាទិ៍ការប្រយុទ្ធនឹងភេរវនិយមនៅដើមបូព៌ា។
យុទ្ធសាស្ត្រដ៏គ្រោះថ្នាក់របស់អ៊ីរ៉ង់
បើគ្មានកិច្ចព្រមព្រៀងនៅយប់នេះ ទេ នោះកិច្ចព្រមព្រៀងបឋម ដែលជាគោលនៃកិច្ចចរចាថ្ងៃនេះ នឹងអស់សុពលភាព ! អ៊ីរ៉ង់នឹងបន្តជាប់ទណ្ឌកម្មសេដ្ឋកិច្ចពីបស្ចឹមប្រទេសទៀត។
អ៊ីរ៉ង់ បានចាប់ផ្តើមសំលឹងរកផ្លូវដោះទ័ល ដោយងាកទៅពឹងពំនាក់លើប៉េកាំង និងម៉ូស្គូ ប្រការក្រែងកិច្ចចរចាត្រូវជួបបរាជ័យ។ ប៉ុន្តែយុទ្ធសាស្ត្រមួយនេះអ៊ីរ៉ង់ទំនងជាមិនអាចរំពឹងដោយជឿជាក់បានឡើយ។
ចិនជាងប្រទេសនាំចូលប្រេងមកពីអ៊ីរ៉ង់ចម្បងជាងគេ និងក្នុងបរិមាណច្រើនក្នុងរយៈពេលបីឆ្នាំចុងក្រោយនេះ ទោះបីជាអ៊ីរ៉ង់ជាប់ទណ្ឌកម្មអន្តរជាតិក្តី។ ប៉ុន្តែជំនួយនេះមានកំរិត ! ចិនទាមទារបញ្ចុះតម្លៃប្រេងឆៅនាំចូល ហើយអាចកាត់បន្ថយការបញ្ជាទិញពីអ៊ីរ៉ង់ផង ព្រោះទីផ្សារពិភពលោកផ្នែកប្រេងនេះបានចុះថ្លៃខ្លាំងនារយៈពេល៥ខែចុងក្រោយនេះ។ ចំពោះរុស្ស៊ីវិញ ដែលជាអ្នកលក់អាវុធឱ្យអ៊ីរ៉ង់ មិនត្រូវការប្រេងទេ ហើយកំពុងជាប់ទណ្ឌកម្មខ្លួនឯងដែរ ក្នុងវិបត្តិអ៊ុយក្រែន។ ដូច្នេះចិននិងរុស្ស៊ីដែលធ្លាប់សម្របគំនិតតាមលោកខាងលិចជាច្រើនដងក្នុងការដាក់អ៊ីរ៉ង់ឱ្យឯកា ទំនងជានឹងមិនជំទាស់សហរដ្ឋអាមេរិកឬ សហភាពអឺរ៉ុប មិនឱ្យចាត់វិធានការដាក់ទណ្ឌកម្មអ៊ីរ៉ង់ទេ ប្រសិនបើការចរចាលើកនេះមិនសម្រេចនោះ។
ម្យ៉ាងទៀត ក្នុងបរិបទដែលតម្លៃប្រេងបន្តធ្លាក់ថ្លៃដូច្នេះ អ៊ីរ៉ង់ពិតជាពិបាក មិនដឹងត្រូវធ្វើដូចម្តេចស្តារសេដ្ឋកិច្ចឱ្យងើបឡើងវិញ ដោយគ្មានការបន្ធូរបន្ថយទណ្ឌកម្មសេដ្ឋកិច្ចបានឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ