លោកម៉ាន់មូហាន់ ស៊ីញ៖« សេដ្ឋកិច្ចឥណ្ឌាមិនអាចធ្លាក់ដូចវិបត្តិក្នុងឆ្នំា ១៩៩១ ទេ »
ចុះផ្សាយនៅថ្ងៃ៖
ស្តាប់ - ០៦:២០
នៅក្នុងប្រទេសឥណ្ឌា ស្ថានភាពសុខភាពសេដ្ឋកិច្ចហាក់ដូចជាមិនល្អប៉ុន្មានទេ។ ប្រាក់រូពីបានបាត់បង់តម្លៃយ៉ាងច្រើន ធៀបនឹងប្រាក់ដុល្លារអាមេរិក ឧុនភាពពាណិជ្ជកម្មក្រៅប្រទេសកាន់តែបន្តធ្លាក់ចុះ ចំណែកតម្លៃភាគហ៊ុននៅទីក្រុងបុមបៃក៏បានដំាក្បាលចុះយ៉ាងគំហុកកាលពីថ្ងៃសុក្រ ទី១៦ សីហាកន្លងទៅដែរ។ តែយ៉ាងណាក៏ដោយ លោកនាយករដ្ឋមន្រ្តីម៉ាន់មូហាន់ ស៊ីញបានបញ្ជាក់ថា សេដ្ឋកិច្ចឥណ្ឌានឹងមិនអាចធ្លាក់ទៅក្នុងវិបត្តិដូចឆ្នំា ១៩៩១ ទេ។
ក្នុងរយៈពេល ៥ឆ្នំាជាប់ៗគ្នានេះ ប្រាក់រូពីរបស់ឥណ្ឌាបានបាត់បង់តម្លៃរបស់វារហូតដល់ទៅ ៥៧% ធៀបនឹងប្រាក់ដុល្លារអាមេរិក បន្ទាប់ពីបានឡើងថ្លៃខ្ពស់កប់ពពកក្នុងឆ្នំា ២០០៨។ ក្នុងខែកុម្ភៈ ឆ្នំា ២០០៨ ១ដុល្លារអាមេរិកដូរបានតែ ៣៩,៤០រូពី តែនៅថ្ងៃសុក្រ ទី១៦ សីហាកន្លងទៅថ្មីៗនេះ ១ដុល្លារដូរបានដល់ទៅ ៦២,០៣រូពី។ ជារួមគេសង្កេតឃើញថា ឥណ្ឌាដែលជាមហាអំណាចសេដ្ឋកិច្ចទី៣នៅអាស៊ី បានស្គាល់តម្លែប្រាក់រូពីរបស់ខ្លួនធ្លាក់ចុះជាលំដាប់ និងយ៉ាងគំហុក។ គិតតំាងពីជាង ២០ឆ្នំាកន្លងទៅ ឥណ្ឌាមិនដែលពើបប្រទះនឹងការបាត់បង់តម្លៃប្រាក់រូពីរបស់ខ្លួនដូចសព្វថ្ងៃទេ។
បូកផ្សំជាមួយនឹងតម្លៃប្រាក់រូពីធ្លាក់ចុះ ឥណ្ឌាក៏កំពុងមានឱនភាពពាណិជ្ជកម្មក្រៅប្រទេសយ៉ាងសំបើម ហើយតម្លៃភាគហ៊ុននៅទីផ្សារភាគហ៊ុនក្នុងទីក្រុងបុមបៃក៏កំពុងដំាក្បាលចុះដែរ។ នៅថ្ងៃសុក្រម្សិលមិញ តម្លៃភាគហ៊ុនបានធ្លាក់រហូតដល់ទៅជិត ៤% ដែលឥណ្ឌាមិនធ្លាប់ប្រទះទេតំាងពី ២ឆ្នំាកន្លងទៅ។
សំណួរដែលកំពុងចោទពេលនេះគឺថា តើសេដ្ឋកិច្ចឥណ្ឌាកំពុងធ្វើដំណើរឆ្ពោះទៅរកវិបត្តិដូចកាលពីឆ្នំា ១៩៩១ ឬយ៉ាងណា ?
មិនអាចទៅរូចទេ នេះជាចម្លើយរបស់លោកនាយករដ្ឋមន្រ្តីឥណ្ឌា ម៉ាន់មូហាន់ ស៊ីញកាលពីថ្ងៃសៅរ៍ម្សិលមិញ។ គួរបញ្ជាក់ជូនថា មុននឹងក្លាយជាប្រមុខរដ្ឋាភិបាលឥណ្ឌា រូបលោកម៉ាន់មូហាន់ ស៊ីញធ្លាប់ធ្វើជារដ្ឋមន្រ្តីក្រសួងហិរញ្ញវត្ថុក្នុងឆ្នំា ១៩៩១ និងដែលកាលណោះ លោកបានជួយស្រោចស្រង់ឥណ្ឌាឲ្យចេញពីវិបត្តិសេដ្ឋកិច្ច។ យោងតាមលោកម៉ាន់មូហាន់ ស៊ីញ កាលពីឆ្នំា ១៩៩១ ឥណ្ឌាហៀបនឹងក្ស័យធនទៅហើយ ពោលគឺរដ្ឋអាចមានលទ្ធភាពសងបំណុលគេតែក្នុងរយៈពេល ២សប្តាហ៍ប៉ុណ្ណោះ តែសព្វថ្ងៃ គឺអាចមានលទ្ធភាពទប់ទល់ពី ៦ ទៅ ៧ខែ។ សម្រាប់លោកម៉ាន់មូហាន់ ស៊ីញ គេពិតជាមិនអាចប្រៀបប្រដូចស្ថានការណ៍បច្ចុប្បន្ន ទៅនឹងឆ្នំា ១៩៩១ បានទេ។
កំណើនសេដ្ឋកិច្ចទ្រឹងមួយកន្លែង ចំណែកវិធានការកំណែទម្រង់កំពុងងាប់ស្តូក
មានកត្តាខាងក្រៅផង និងខាងក្នុងផងដែលបាននិងកំពុងជះឥទ្ធិពលមិនល្អចំពោះសេដ្ឋកិច្ចឥណ្ឌា។ កត្តាខាងក្រៅ គឺបរិបទវិបត្តិសេដ្ឋកិច្ចពិភពលោក។ រីឯកត្តាខាងក្នុង គឺចំណាត់ការរបស់រដ្ឋាភិបាល ដូចយ៉ាងកំចាត់អំពើពុករលួយ និងការកាត់បន្ថយឱនភាពថវិកា តាមរយៈការសន្សំសំចៃ។ កន្លងមកគេសង្កេតឃើញថា រដ្ឋាភិបាលរបស់លោកម៉ាន់មូហាន់ ស៊ីញបានចាត់វិធានការធ្វើកំណែទម្រង់យ៉ាងច្រើន តែមកទល់ពេលនេះ វិធានការទំាងនោះហាក់ដូចជាកំពុងងាប់ស្តូក។ នេះអាចថាជាជម្រើសរបស់រដ្ឋាភិបាល ដោយរង់ចំាក្រោយការបោះឆ្នោតសភាដែលគ្រោងរៀបចំនៅក្នុងខែឧសភា ឆ្នំា ២០១៤។
តែអ្វីដែលជាក្តីបារម្ភនៅចំពោះមុខ និងដែលបានធ្វើឲ្យអ្នកវិនិយោគបរទេស ឬមួយក្នុងស្រុកកំពុងបាត់បង់ជំនឿ ដោយមានអ្នកខ្លះផ្អាកការពង្រីកជំនួញ និងអ្នកខ្លះផ្តើមបង្វែរលុយចេញពីឥណ្ឌាទៅរកស៊ីនៅប្រទេសផ្សេងនោះ គឺការបន្តធ្លាក់តម្លៃលុយរូពី ព្រមទំាងកំណើនសេដ្ឋកិច្ចតិចតួច ពោលគឺប្រមាណតែ ៥% ប៉ុណ្ណោះសម្រាប់ឆ្នំា ២០១២ ២០១៣។ គឺជាកម្រិតទាបក្រៃលែងដែលឥណ្ឌាមិនធ្លាប់ជួបទេតំាងពី ១០ឆ្នំាកន្លងទៅ។
រដ្ឋាភិបាលតម្លើងពន្ធលើការនំាចូលមាស និងកម្រិតការនំាលុយចេញក្រៅរបស់ពលរដ្ឋ
ក្នុងរយៈពេលប៉ុន្មានសប្តាហ៍ចុងក្រោយនេះ រដ្ឋាភិបាល និងធនាគារកណ្តាលបានប្រកាសចេញនូវវិធានការមួយចំនួន ដែលក្នុងនោះ ផ្តោតសំខាន់លើការផ្តោះប្តូរពាណិជ្ជកម្មរវាងឥណ្ឌា និងបរទេស។ វិធានការទំាងរួមមាន ការតម្លើងពន្ធនំាចូល ពិសេសការនំាចូលមាស។ មាសដែលជាផលិតផលនំាចូលទី២របស់ឥណ្ឌា បន្ទាប់ពីប្រេងកាត។ សូមជម្រាបជូនថា មាស គឺជារបស់ពេញនិយមខ្លំាងណាស់របស់ប្រជាជនឥណ្ឌាទូទៅ។ គោលបំណងរបស់រដ្ឋាភិបាលគឺត្រូវកាត់បន្ថយការនំាចូលមាសដែលលោកប្រមុខរដ្ឋាភិបាលយល់ឃើញថា ជាវត្ថុអសកម្មដែលមិនបានជួយផ្តល់ចរន្តសេដ្ឋកិច្ចរបស់ប្រទេសទេ។
វិធានការបន្ទាប់ គឺការកម្រិតតម្លែធ្វើវិនិយោគរបស់ក្រុមអ្នកជំនួញឥណ្ឌាក្នុងស្រុកដែលចង់យកលុយទៅរកស៊ីនៅឯបរទេស។ ចាប់ពីពេលនេះតទៅ អ្នកជំនួញឥណ្ឌាក្នុងស្រុកអាចទៅរកស៊ីតែជាមួយលុយដែលខ្លួនមាន ១០០% ពោលគឺមិនមែន ៤០០% ដោយការខ្ចីលុយបន្ថែមពីធនាគារដូចមុនទេ។ ចំពោះប្រជាជនសាមញ្ញក្នុងស្រុកវិញ ការនំាយកលុយចេញក្រៅនឹងត្រូវកម្រិតត្រឹម ៧៥ ០០០ដុល្លារក្នុងម្នាក់ៗ គឺមិនមែន ២០០ ០០០ដុល្លារដូចមុនទេ។
វិធានការកម្រិតការយកលុយចេញក្រៅរបស់ពលរដ្ឋឥណ្ឌាក្នុងស្រុកនេះបាននិងកំពុងបង្កឲ្យមានប្រតិកម្មជាច្រើន ពិសេសពីក្រុមអ្នកវិនិយោគបរទេសក្នុងប្រទេសឥណ្ឌា ដោយពួកគេបារម្ភខ្លាចតែវិធានការនេះនឹងបន្តអនុវត្តលើពួកគេនាពេលខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ