ហេតុអ្វីបានជាអាមេរិក និងកូរ៉េខាងជើងបង្កើនកិច្ចចរចាទ្វេភាគី ?
ចុះផ្សាយនៅថ្ងៃ៖
ស្តាប់ - ០៦:១៣
កាលពីខែកក្កដា ឆ្នំា ២០១១ កូរ៉េខាងជើង និងអាមេរិកបានបើកកិច្ចចរចាទ្វេភាគីលើកទីមួយក្នុងទីក្រុងញូវយ៉ក។ នៅថ្ងៃទី ២៦ តុលាខាងមុខ ភាគីទំាងពីរគ្រោងនឹងជួបគ្នាជាថ្មី នៅទីក្រុងហ្សឺណែវ ប្រទេសស្វីស។ ក៏ដូចជាជំនួបលើកមុនដែរ អាមេរិកព្យាយាមនិយាយបញ្ចុះបញ្ចូលកូរ៉េខាងជើងឲ្យវិលទៅកាន់តុចរចា ៦ភាគីជាថ្មីស្តីពីបញ្ហានុយក្លេអ៊ែរកូរ៉េខាងជើង។ ប៉ុន្តែ នេះក៏ជាសញ្ញាមួយដែលបង្ហាញថា អាមេរិកកំពុងផ្តើមអនុវត្តនយោបាយហុចដៃទៅរកកូរ៉េខាងជើង និងនៅអាស៊ី ប្រឈមនឹងឥទ្ធិពលរបស់ចិន។
អ្វីដែលសំខាន់នៅក្នុងជំនួបទ្វេភាគីរវាងអាមេរិក និងកូរ៉េខាងជើងនាពេលកន្លងមក ក៏ដូចជានៅថ្ងៃខាងមុខ គឺក្នុងគោលដៅផ្តល់សន្ទុះថ្មីឲ្យកិច្ចចរចា ៦ភាគី ( កូរ៉េខាងជើង កូរ៉េខាងត្បូង អាមេរិក ជប៉ុន ចិន និងប្រទេសរុស្ស៊ី )ស្តីពីបញ្ហានុយក្លេអ៊ែររបស់កូរ៉េខាងជើង។ សូមជម្រាបជូនថា កិច្ចចរចា ៦ភាគីស្តីពីការសាយភាយអាវុធនុយក្លេអ៊ែរកូរ៉េខាងជើងបានចាប់ផ្តើមដំបូងក្នុងឆ្នំា ២០០៣ តែត្រូវបានជាប់គំាងតំាងពីខែមេសា ឆ្នំា ២០០៩ ក្រោយពីកូរ៉េខាងជើងបានធ្វើការបាញ់សាកល្បងកំាជ្រួចមីស្ស៊ីល និងអាវុធនុយក្លេអ៊ែរ។ នៅពេលនោះ របបក្រុងព្យុងយ៉ាងបានប្រកាសដើរចេញពីតុចរចា ៦ភាគី។
បន្ទាប់មក ក្នុងឆ្នំា ២០១០ ភាពតានតឹងរវាងបងប្អូនបង្កើតជាគូសត្រូវទំាងពីរបានឡើងដល់កម្រិតខ្លំាងបំផុត រហូតដល់មានការគំរាមកំហែង និងបង្ហាញសាច់ដុំដាក់គ្នា ក្រោយពីកូរ៉េខាងជើងបានបាញ់ពន្លិចនាវាចម្បំាងកូរ៉េខាងត្បូងក្នុងខែមីនាដែលបណ្តាលឲ្យស្លាប់ទាហានកូរ៉េខាងត្បូងចំនួន ៤៦នាក់ និងការដែលទាហានកូរ៉េខាងជើងបានបាញ់ផ្លោងលើកោះ Yeonpyeong របស់កូរ៉េខាងត្បូងក្នុងខែវិច្ឆិកា។
គឺទើបតែនៅថ្ងៃទី៣១ ធ្នូ ចំថ្ងៃចុងក្រោយនៃឆ្នំា ២០១០ ដែលកូរ៉េខាងជើងបានអំពាវនាវឲ្យបង្កើនទំនាក់ទំនងរវាងកូរ៉េទំាងពីរឡើងវិញ។ ជាចម្លើយតបវិញកាលណោះ លោកប្រធានាធិបតីកូរ៉េខាងត្បូង លី ម្យ៉ុងបាក់ដែលគេស្គាល់ថា អនុវត្តនយោបាយតឹងរ៉ឹងចំពោះកូរ៉េខាងជើង បានប្រកាសទទួលស្វាគមន៍ដោយអះអាងថា ទ្វារនៃកិច្ចចរចាជាមួយកូរ៉េខាងជើង នៅតែបើកចំហជានិច្ច។
គ្មានផ្លូវណាផ្សេង ក្រៅពីផ្លូវចរចាទេ
ដំណោះស្រាយបញ្ហានុយក្លេអ៊ែរកូរ៉េខាងជើងត្រូវបានគ្រប់ភាគីពាក់ព័ន្ធមើលឃើញថា មិនអាចធ្វើឡើង ក្រៅពីផ្លូវចរចាទេ។ កន្លងមក ពិសេសតំាងពីកូរ៉េខាងជើងបានដើរចេញពីតុចរចា ៦ភាគីក្នុងខែមេសា ឆ្នំា ២០០៩ មក គ្រប់គ្នា ពិសេសកូរ៉េខាងត្បូង និងអាមេរិកបានព្យាយាមតាមគ្រប់មធ្យោបាយ ដើម្បីបង្ខំឲ្យកូរ៉េខាងជើងបោះបង់ចោលកម្មវិធីនុយក្លេអ៊ែរ។ តែនៅទីបំផុត គេនៅតែមិនអាចបញ្ឈប់មហិច្ឆតានុយក្លេអ៊ែរនៃរបបក្រុងព្យុងយ៉ាងបានឡើយ។ ម្យ៉ាងទៀត នាចុងឆ្នំា ២០១០ កន្លងទៅ មានលេចចេញនូវរបាយការណ៍មួយដែលថា កូរ៉េខាងជើងមានគោលដៅប្រើប្រាស់កម្មវិធីនុយក្លេអ៊ែរ ដើម្បីក្លាយជាប្រទេសមហាអំណាចនៅឆ្នំា ២០១២។ ដូច្នេះឃើញថា ការព្យាយាមដាក់គំនាបលើកូរ៉េខាងជើង វាមិនខុសអ្វី ពីការទុកឱកាសឲ្យកូរ៉េខាងជើងបន្តអនុវត្តកម្មវិធីនុយក្លេអ៊ែរនោះឡើយ។ អ៊ីចឹងហើយបានជាកាលពីថ្ងៃទី ២៩ ធ្នូ ឆ្នំា ២០១០ លោកប្រធានាធិបតីកូរ៉េខាងត្បូង លី ម្យ៉ុងបាក់សម្រេចចិត្តហុចដៃទៅរកកូរ៉េខាងជើងជាថ្មីដោយថ្លែងថា " យើងគ្មានជម្រើសអ្វីផ្សេងទៀត ក្រៅពីការដោះស្រាយបញ្ហានុយក្លេអ៊ែរកូរ៉េខាងជើង តាមរយៈការចរចា ៦ភាគីទេ "។
និយាយពីការខិតចូលជិតគ្នារវាងអាមេរិក និងកូរ៉រខាងជើងវិញ វាហាក់ដូចជាបានបង្កប់នូវអត្ថន័យនយោបាយបន្ធូរបន្ថយរបស់អាមេរិកនៅក្នុងតំបន់អាស៊ី ច្រើនជាងបំណងរបស់អាមេរិកដែលចង់ឃើញកូរ៉េខាងជើងវិលទៅកាន់តុចរចា ៦ភាគីជាថ្មី ស្តីពីបញ្ហានុយក្លេអ៊ែរ។ ក្នុងរយៈពេលចុងក្រោយនេះ ក្រៅពីហុចដៃទៅរកកូរ៉េខាងជើង អាមេរិកក៏បានហុចដៃទៅរកប្រទេសភូមាដែរ។ សូមជម្រាបជូនថា អាមេរិកមិនដែលចង់ចរចាដោយផ្ទាល់ជាមួយកូរ៉េខាងជើង និងភូមាទេ។ ដូច្នេះឃើញថា ទំាងនេះសុទ្ធសឹងជាទង្វើមួយដែលអាមេរិកចង់បង្កើនឥទ្ធិពលរបស់ខ្លួននៅអាស៊ី ប្រឈមមុខនឹងប្រទេសចិន។
ការមិនទុកចិត្តគ្នានៅក្នុងដំណោះស្រាយបញ្ហានុយក្លេអ៊ែរកូរ៉េខាងជើង
ការដែលអាមេរិក និងកូរ៉េខាងជើងបានបន្តជួបគ្នាជាលក្ខណៈទ្វេភាគីនាពេលនេះ អាចជាសញ្ញាវិជ្ជមានមួយដែលនំាទៅរកការផ្តើមជាថ្មីនូវកិច្ចចរចា ៦ភាគី ស្តីពីបញ្ហានុយក្លេអ៊ែរកូរ៉េខាងជើង។ នេះហើយ ជាអ្វីដែលគ្រប់គ្នាចង់បាន និងសង្ឃឹមថា កិច្ចចរចា ៦ភាគីអាចនឹងចាប់ផ្តើមជាថ្មី នៅឆ្នំា ២០១២ ខាងមុខ។ នៅត្រង់ថា តើកូរ៉េខាងជើងយល់ព្រមបញ្ឈប់កម្មវិធីនុយក្លេអ៊ែរ ឬអត់នោះ គេនៅមិនអាចនិយាយបានទេ ព្រោះថា គេពិបាកនឹងទុកចិត្តលើកូរ៉េខាងជើង។ ជាក់ស្តែងកាលពីឆ្នំា ២០០៥ ទីក្រុងព្យុងយ៉ាងបានយល់ព្រមបោះបង់ចោលកម្មវិធីនុយក្លេអ៊ែរ ជាថ្នូរនឹងជំនួយសេដ្ឋកិច្ច។ តែនៅទីបំផុត កូរ៉េខាងជើងបែរជាបានធ្វើការបាញ់សាកល្បងកំាជ្រួចមីស្ស៊ីល និងអាវុធនុយក្លេអ៊ែរ។ នៅលើកនេះ តាមរយៈកិច្ចចរចាដែលគ្រប់គ្នាសង្ឃឹមថា នឹងមានឡើងវិញ នាថ្ងៃខាងមុខ សហគមន៍អន្តរជាតិក៏នឹងព្យាយាមជំនះកូរ៉េខាងជើង ឲ្យបញ្ឈប់មហិច្ឆតានុយក្លេអ៊ែរ ជាថ្នូរនឹងជំនួយសេដ្ឋកិច្ច និងថាមពលដែលរបបក្រុងព្យុងយ៉ាងត្រូវការជាបន្ទាន់។
ជារួមទៅ ឧបសគ្គចម្បងដែលនំាឲ្យដំណើរស្វែងរកដំណោះស្រាយវិបត្តិនុយក្លេអ៊ែរកូរ៉េខាងជើងជាប់គំាងមកទល់ពេលនេះ គឺការមិនទុកចិត្តគ្នា។ សហរដ្ឋអាមេរិក និងសម្ព័ន្ធមិត្តនៅតែមិនអាចដឹងជម្រៅចិត្តរបស់កូរ៉េខាងជើងបានថា តើគេមានឆន្ទៈពិតប្រាកដចង់បោះបង់ចោលកម្មវិធីនុយក្លេអ៊ែរ ឬទេ ?។ កន្លងមក សហគមន៍អន្តរជាតិនៅតែមន្ទិលសង្ស័យថា ការដែលកូរ៉េខាងជើងបន្តប្រើធម៌ក្តៅផង ត្រជាក់ផង នៅក្នុងបញ្ហានេះ គឺគ្រាន់តែចង់អូសបន្លាយពេល និងចង់បានជំនួយសេដ្ឋកិច្ចតែប៉ុណ្ណោះ។ ចូរកុំភ្លេចថា សម្រាប់របបក្រុងព្យុងយ៉ាង នុយក្លេអ៊ែរគឺជាប្រភពដង្ហើមសេដ្ឋកិច្ចចម្បង។ បើអត់ពីនុយក្លេអ៊ែរ កូរ៉េខាងជើងមិនដឹងយកអ្វី ទៅកំញើញពិភពលោកដើម្បីទារជំនួយនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ