ចលនាមួម៉ៅក្តៅក្រហាយ “les indignés” ៨២ប្រទេសអំពាវនាវឲ្យធ្វើបាតុកម្មដោយសន្តិវិធីនៅថ្ងៃសៅរ៍ទី១៥តុលា
ចុះផ្សាយនៅថ្ងៃ៖
ស្តាប់ - ០៥:៣៧
ប្រាំខែគត់ក្រោយពីចលនាមួម៉ៅក្តៅក្រហាយ “les indignés” បានចាប់កកើតនៅប្រទេសអេស្ប៉ាញ គេកត់សម្គាល់ឃើញ មានបាតុកម្មជាច្រើនកើតមាននៅពេលស្របគ្នានៅក្នុង៨២ប្រទេសនិងនៅតាម បណ្តាទីក្រុងជិតមួយពាន់នៅលើពិភពលោកនៅថ្ងៃសៅរ៍ទី១៥តុលាឆ្នាំ២០១១នេះ។ បាតុកម្មដ៏ធំធេងនេះមានឈ្មោះជាភាសាអង់គ្លេសថា “United for a Global Change » ឬ “រួបរួមគ្នាដើម្បីការប្តូរប្រែពិភពលោក"។ ទិវានេះនឹងអាចធ្វើឲ្យ យល់ដឹងពីកម្លាំងពិតប្រាកដរបស់ខ្លួន។
ថ្ងៃសៅរ៍ទី១៥តុលាឆ្នាំ២០១១នេះពិតជាជំហានមួយដ៏សំខាន់សម្រាប់ចលនាមួម៉ៅក្តៅក្រហាយ “les indignés” ដែលបានចាប់កកើតនៅប្រទេសអេស្ប៉ាញកាលពីប្រាំខែមុនហើយបានរីករាលដាលនៅទូទាំងពិភពលោក។ ចលនាមួម៉ៅក្តៅក្រហាយ “les indignés”នេះបានចាប់ប្រសូតចេញនៅថ្ងៃទី១៥ឧសភាឆ្នាំ២០១១នៅទីក្រុងម៉ាឌ្រីដនៃប្រទេសអេស្ប៉ាញនាឱកាសបាតុកម្មប្រឆាំងនឹងអំណាចផ្តាច់ការរបស់ទីផ្សារហិរញ្ញវត្ថុនៅ Puerta del sol ។ ពួកបាតុករបានយកគំរូតាម “និទាឃរដូវអារ៉ាប់” ដែលបានចាប់កើតមាននៅប្រទេសទុយនីស៊ីនៅថ្ងៃទី១៧ធ្នូឆ្នាំ២០១០ ហើយនិងមានការជំរុញតាមរយៈសៀវភៅដៀលត្មះមួយដែលមានចំណងជើងថា “Indignez-vous” របស់អ្នកនិពន្ធបារាំងឈ្មោះ Stéphane Hessel ។ ចលនាមួម៉ៅក្តៅក្រហាយ “les indignés”នេះបានក្លាយទៅជាថាមពលដ៏ខ្លាំងនៅក្នុងទិវាពិភពលោកប្រឆាំងនឹងអំណាចផ្តាច់ការរបស់ទីផ្សារហិរញ្ញវត្ថុដែលបានបង្កឲ្យមានវិបត្តិហិរញ្ញវត្ថុនិងវិបត្តិសេដ្ឋកិច្ចនៅទូទាំងពិភពលោក។
ទិវានៃចលនាមួម៉ៅក្តៅក្រហាយ “les indignés” បានត្រូវគេឲ្យឈ្មោះថា “United for a Global Change " ឬ “ទិវារួបរួមគ្នាដើម្បីការប្តូរប្រែពិភពលោក” ដោយមានការជួយជ្រោមជ្រែងពីសំណាក់បាតុករនៃក្រុម“ជំនាន់គ្មានទីពឹង” នៃប្រទេសព័រទុយហ្កាល់ដែលបានផ្សព្វផ្សាយតាមរយៈអ៊ិនធ័រណេត15octobre.net។ ទិវាទី១៥តុលាឆ្នាំ២០១១នេះមានការចូលរួមពីសំណាក់បាតុករ មួម៉ៅក្តៅក្រហាយ “les indignés” ប្រមាណ៨២ប្រទេសនិងនៅតាមទីក្រុងធំៗជិតមួយពាន់ក្នុងលោក។ ហើយវាក៏ស្របនឹងពេលដែលរដ្ឋមន្ត្រីក្រសួងហិរញ្ញវត្ថុនិងប្រធានធនាគារកណ្តាលនៃក្រុមប្រទេសឧស្សាហកម្មសំខាន់ៗG20 ដែលត្រូវជួបប្រជុំគ្នានៅទីក្រុងកាននៃប្រទេសបារាំងនៅថ្ងៃទី៣និងទី៤វិច្ឆិកាឆ្នាំ២០១១ខាងមុខនេះ។
ពួកបាតុករនៃចលនាមួម៉ៅក្តៅក្រហាយ “les indignés”ជ្រើសយកទីកន្លែងជានិមិត្តរូបសម្រាប់ធ្វើបាតុកម្ម មានដូចជាបុរីនៃទីក្រុងឡុងដ្រឹ៍ ធនាគារកណ្តាលអឺរ៉ុបនៅទីក្រុងហ្វ្រង់ហ្វ័រ ឬទីផ្សារហិរញ្ញវត្ថុ Wall Street នៅទីក្រុងញីវយ៉កដែលបានត្រូវបានកាន់កាប់ដោយបាតុករនៃចលនាមួម៉ៅក្តៅក្រហាយ “les indignés អាមេរិកាំងដែលមានឈ្មោះថា “ចលនាOccuypy »។ បាតុករនៃចលនាមួម៉ៅក្តៅក្រហាយ “les indignésនៅទូទាំងពិភពលោកចង់សម្តែងបញ្ជាក់ប្រាប់អ្នកនយោបាយដឹកនាំប្រទេសនិងអ្នកគ្រប់គ្រងវិស័យហិរញ្ញវត្ថុថា “ចាប់ពីពេលនេះតទៅគឺពួកគេជាអ្នកសម្រេចពីជោគវាសនារបស់គេ ហើយប្រព័ន្ធហិរញ្ញវត្ថុនិងធនាគារព្រមទាំងរដ្ឋាភិបាលពុំត្រូវឲ្យប្រជាពលរដ្ឋបន្តធ្វើជាអ្នករងគ្រោះដោយវិបត្តិសេដ្ឋកិច្ចនិងវិបត្តិហិរញ្ញវត្ថុទៀតឡើយ”។ ពីព្រោះវិបត្តិសេដ្ឋកិច្ចនិងវិបត្តិហិរញ្ញវត្ថុពិភពលោកកើតមានឡើងក៏ដោយហេតុតែ “អសមត្ថភាព”និង “ការធ្វេសប្រហែសលោភលន់”របស់អ្នកដឹកនាំ ដូច្នេះពុំត្រូវប្រជាពលរដ្ឋក្រីក្រស្លូតត្រង់ជាអ្នករងទទួលថ្មបាក់ទៀតឡើយ។
ចលនាមួម៉ៅក្តៅក្រហាយ “les indignés” នេះពិតជាបាតុភូតមួយថ្មី ហើយពោរពេញទៅដោយក្តីសង្ឃឹមផងទៀត។ ពីព្រោះចលនានេះធ្វើឲ្យគេជឿថា នឹងមានអន្តរាគមន៍បែបថ្មីរបស់ប្រជាពលរដ្ឋចូលទៅក្នុងជីវិតនយោបាយនិងក្នុងការដឹកនាំប្រទេសជាតិ។ ទាំងនេះក៏ពីព្រោះតែប្រជាពលរដ្ឋពុំចង់ប្រគល់ការសម្រេចជោគវាសនារបស់ខ្លួនឲ្យធ្លាក់ទៅក្នុងកណ្តាប់ដៃរបស់អ្នកដឹកនាំប្រទេស ដូច្នេះវាពិតជាការវិលត្រឡប់ទៅរកប្រភពដើមនៃសិទ្ធិប្រជាធិបតេយ្យ។
គួរកត់សម្គាល់ថា ចលនាមួម៉ៅក្តៅក្រហាយ “les indignés” នេះគ្មានមេដឹកនាំឬអ្នកនាំពាក្យរបស់ខ្លួនឡើយ ចលនានេះពឹងផ្អែកទៅលើប្រសិទ្ធិភាពនៃប្រព័ន្ធអ៊ីធ័រណេតដើម្បីធ្វើការកេណ្ឌប្រមូលគ្នីគ្នា។ បច្ចុប្បន្ននេះ ចលនាមួម៉ៅក្តៅក្រហាយ “les indignés” នេះនៅពុំទាន់ជះចេញជាផលវិបាកអ្វីខ្លាំងក្លាទៅលើសង្គមនៃប្រទេសលោកខាងលិចនៅឡើយ។ ក៏ប៉ុន្តែ អ្នកដឹកនាំបារម្ភខ្លាចចលនាមួម៉ៅក្តៅក្រហាយ “les indignés” នេះរីករាលដាលកាន់តែខ្លាំងឡើងៗ នៅខណៈពេលដែលគេនៅពុំទាន់រកបានដំណោះស្រាយឲ្យវិបត្តិសេដ្ឋកិច្ចនិងវិបត្តិហិរញ្ញវត្ថុពិភពលោក ហើយនិង “ផែនការត្បិតត្បៀត” ចេះតែគុណទ្វេឡើងពុំឈប់ឈរ។
នៅថ្ងៃសៅរ៍ទី១៥តុលាឆ្នាំ២០១១នេះ ម្នាក់ៗសង្ឃឹមជឿជាក់ថា បាតុកម្មនៃចលនាមួម៉ៅក្តៅក្រហាយ “les indignés” ដែលមានធ្វើនៅក្នុង៨២ប្រទេសនិងនៅតាមបណ្តាទីក្រុងជិតមួយពាន់នៅលើពិភពលោកប្រព្រឹត្តទៅដោយសន្តិវិធី ដោយគ្មានការប៉ះទង្គិចជាមួយកងកម្លាំងសន្តិសុខឡើយ។ បើពុំដូច្នោះទេ វាអាចបណ្តាលឲ្យ ចលនាមួម៉ៅក្តៅក្រហាយ “les indignés” ទូទាំងពិភពលោកខឹងក្រេវក្រោធ ឆេះរីករាលដាលកាន់តែខ្លាំងឡើងៗបន្ថែមទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ