សភាអាមេរិករៀបចំច្បាប់ប្រឆាំងចិនដែលមិនព្រមដំឡើងថ្លៃលុយយ័ន
ចុះផ្សាយនៅថ្ងៃ៖
ស្តាប់ - ០៥:០១
កាលពីថ្ងៃចន្ទទី៣តុលាម្សិលមិញ ព្រឹទ្ធសភាអាមេរិកបានបោះឆ្នោតអនុញ្ញាតឲ្យចាប់ផ្តើមជជែកវែកញែកលើ សេចក្តីព្រាងច្បាប់ស្តីពីការដាក់ទណ្ឌកម្មលើចិន ពីព្រោះប្រទេសនេះនៅតែបន្តនយោបាយរក្សាលុយយ័នឲ្យនៅទាបជាងតម្លៃ ពិត នៅលើទីផ្សារ។នៅថ្ងៃអង្គារទី៤តុលានេះ ក្រសួងការបរទេសរបស់ចិនបានបញ្ចេញប្រតិកម្មយ៉ាងខ្លាំងក្លា បានអះអាងថា សេចក្តីព្រាងច្បាប់នេះរំលោភបំពានវិធាននៃអង្គការពាណិជ្ជកម្មពិភពលោក OMC។
ការពិត ទំនាស់រវាងចិននិងអាមេរិកជុំវិញតម្លៃលុយយ័ន មិនមែនជារឿងថ្មីទេ។ ទាំងសហរដ្ឋអាមេរិក ទាំងសហភាពអឺរ៉ុបចោទចិនម្តងហើយម្តងទៀតថាមិនព្រមបណ្តោយឲ្យតម្លៃប្រាក់យ័នអណ្តែតចុះឡើង ទៅតាមហាងឆេងនៃទីផ្សាររូបិយវត្ថុអន្តរជាតិ។ ទីក្រុងវ៉ាស៊ីនតោនថែមទាំងបានរហូតដល់ទៅចោទទីក្រុងប៉េកាំងថាចេះតែទប់លុយយ័នឲ្យនៅទាបថេរជាប់ជានិច្ចជាងលុយដុល្លារ ដើម្បីអាចបន្តលក់ផលិតផលចិនក្នុងតម្លៃថោកជាងផលិតផលរបស់ប្រទេសគូប្រជែងនៅលើទីផ្សារអន្តរជាតិ។ រឿងនេះជារឿងចាស់ មានមកជាច្រើនឆ្នាំកន្លងមកហើយ ជាបញ្ហារវាងរដ្ឋាភិបាលអាមេរិកនិងរដ្ឋាភិបាលចិន។ ប៉ុន្តែអ្វីដែលថ្មីលើកនេះ គឺអន្តរាគមន៍នៃអំណាចនីតិបញ្ញតអាមេរិក បានន័យថា សេចក្តីព្រាងច្បាប់មួយដែលទាក់ទងនឹងលុយយ័នចិន បានទៅដល់ព្រឹទ្ធសភាអាមេរិក។ សេចក្តីព្រាងច្បាប់នេះដែលត្រូវបានផ្តួចផ្តើមឡើង តាំងពីខែមីនាឆ្នាំ២០១០ គ្រោងថានឹងតម្រូវឲ្យរដ្ឋាភិបាលអាមេរិកចាត់វិធានការដាក់ទណ្ឌកម្មទៅលើចិន ប្រសិនបើប្រទេសនេះនៅតែរឹងទទឹងមិនព្រមដំឡើងតម្លៃប្រាក់យ័នទេនោះ។ ក្នុងចំណោមទណ្ឌកម្មដែលសេចក្តីព្រាងច្បាប់បានគ្រោង រួមមានជាអាទិ៍ការបង្កើនអត្រាពន្ធគយលើផលិតផលចិន ដែលនាំចូលមកសហរដ្ឋអាមេរិក។ អ៊ីចឹងហើយបានជាចិនខឹងសម្បា បញ្ចេញប្រតិកម្មខ្លាំងលើសសព្វដង។
ការពិតរដ្ឋាភិបាលលោកអូប៉ាម៉ា ក៏ដូចបណ្តារដ្ឋាភិបាលនៅអឺរ៉ុបដែរ មិនគាំទ្រឲ្យមានច្បាប់ប្រភេទនេះទេ។ ទោះបីជាមិនសប្បាយចិត្តនឹងនយោបាយរូបិយវត្ថុរបស់ចិនក៏ដោយ ក៏រដ្ឋាភិបាលអាមេរិករបស់លោកអូបាម៉ា ចង់ចរចាជាមួយចិន ចង់ដោះស្រាយបញ្ហាជាមួយចិនដោយសន្តិវិធី ជាជាងដាក់សម្ពាធឬទណ្ឌកម្មផ្លូវការ។ ម្យ៉ាងចង់ឬមិនចង់ ចិនជាដៃគូពាណិជ្ជកម្មដ៏ធំរបស់សហរដ្ឋអាមេរិក។ ម្យ៉ាងទៀត ទណ្ឌកម្មនានា ឧទាហរណ៍តាមរយៈការបង្កើនពន្ធគយទៅលើផលិតផលចិនដែលចូលមកក្នុងសហរដ្ឋអាមេរិក គឺជាការផ្តើមឡើងនៃសង្គ្រាមពាណិជ្ជកម្មគឺជាការរំលោភបំពានទៅលើវិធាននៃអង្គការពាណិជ្ជកម្មពិភពលោកOMC។
ចិនមិនចុះញ៉មសម្ពាធអាមេរិកងាយៗនោះទេ
នៅថ្ងៃអង្គារទី៤តុលានេះ ក្រសួងការបរទេសចិន បានអះអាងថា តម្លៃប្រាក់យ័នមិនមែនជាបុព្វហេតុសំខាន់ជាងគេនិងមិនមែនជាបុព្វហេតុតែមួយគត់នៃឧុនភាពពាណិជ្ជកម្មរបស់សហរដ្ឋអាមេរិកទេ។ ការពិតវាអ៊ីចឹងមែន ក៏ប៉ុន្តែទន្ទឹមនេះ វាជាការពិតមួយប្រកែកមិនបានដែរដែលថា ការខ្ទប់លុយយ័នឲ្យនៅថោកប្រៀបនឹងលុយដុល្លារពីសំណាក់រដ្ឋាភិបាលចិន គឺជានយោបាយរូបិយវត្ថុដោយចេតនាមួយ ដើម្បីប្រយោជន៍ពាណិជ្ជកម្ម។ ដោយចេតនា ពីព្រោះតាំងពីពាក់កណ្តាលឆ្នាំ២០០៨មក រដ្ឋាភិបាលចិនបានទិញលុយដុល្លារ គិតជាមធ្យមប្រមាណ១ ០០០លានដុល្លារក្នុងមួយថ្ងៃ ដើម្បីរក្សាលុយយ័នឲ្យនៅទាបជាងលុយដុល្លារជាប់ជានិច្ច។ គឺជានយោបាយរូបិយវត្ថុដើម្បីប្រយោជន៍ពាណិជ្ជកម្ម ពីព្រោះធ្វើបែបនេះ រដ្ឋចិនចំណេញរហូតដ្បិតនៅក្នុងការផ្តោះប្តូរពាណិជ្ជកម្មជាមួយអាមេរិក ចិនមិនធ្លាប់ស្គាល់សោះឡើយនូវអ្វីដែលគេហៅថាឧុនភាពនៃជញ្ជីងពាណិជ្ជកម្ម បានន័យថាផលិតផលចិនដែលថោកនៅតែហូរចូលទៅក្នុងសហរដ្ឋអាមេរិកខ្លាំង ទន្ទឹមនេះ ផលិតផលអាមេរិកដែលថ្លៃនៅតែហូរចូលមក ក្នុងប្រទេសចិនមិនរួច។
សេចក្តីព្រាងច្បាប់នេះ ប្រហែលជានឹងចេញរួចពីព្រឹទ្ធសភាអាមេរិក ពីព្រោះគណបក្សប្រជាធិបតេយ្យរបស់លោកអូបាម៉ាដែលមានសំឡេងច្រើនលើសលុបនៅក្នុងព្រឹទ្ធសភា គាំទ្រច្បាប់នេះ។ ម្យ៉ាងទៀត គួរគូសបញ្ជាក់ថា ក៏មានច្រើនដែរព្រឹទ្ធសមាជិកនិងសមាជិកសភាអ្នកតំណាងនៃបក្សប្រជាធិបតេយ្យរបស់លោកអូបាម៉ា ដែលចង់បង្ខំចិនឲ្យដំឡើងតម្លៃលុយយ័ន។ ក៏ប៉ុន្តែ លោកអូបាម៉ា ដែលមិនគាំទ្រច្បាប់នេះ ក៏នឹងអាចប្រើវេតូ(Véto) ប្រឆាំងដែរ។ យ៉ាងណាក៏ដោយ គេមើលមិនទាន់ធ្លុះទេ ថាតើសេចក្តីព្រាងច្បាប់នេះនឹងចេញឬ មិនចេញជាច្បាប់នៅទីបំផុត?
យ៉ាងណាក៏ដោយ នេះជាលើកទីមួយហើយដែលសភានៃប្រទេសមួយ នៅលោកខាងលិចផ្តួចផ្តើមគំនិតរៀបចំច្បាប់មួយ ដើម្បីតម្រូវឲ្យរដ្ឋាភិបាលដាក់ទណ្ឌកម្មលើចិន បង្ខំចិនឲ្យដំឡើងតម្លៃលុយយ័ន។ គំនិតនេះនឹងអាចរីករាលដាលមកដល់ទ្វីបអឺរ៉ុប។ ក៏ប៉ុន្តែ ចិនដែលមានមោទនភាពលើខ្លួនឯងយ៉ាងខ្លាំងនោះ និងដែលមិនចូលចិត្តធ្វើអ្វីតាមការទាមទាររបស់បរទេសនោះទេ នឹងមិនងាយចុះញ៉មស្រួលៗនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ