សភាក្រិកបានអនុម័តផែនការត្បិតត្បៀត ទោះបីជាបាតុករធ្វើការប្រឆាំងយ៉ាងខ្លាំងក្លាក៏ដោយ
ចុះផ្សាយនៅថ្ងៃ៖
ស្តាប់ - ០៤:០១
ផែនការត្បិតត្បៀតដ៏ចាំបាច់សម្រាប់ប្រទេសក្រិកក្នុងការផ្តល់ ទំនុកចិត្តកក់ក្តៅនិងដើម្បីសុំជំនួយហិរញ្ញវត្ថុថ្មីទៀតពីម្ចាស់ បំណុល បានត្រូវអនុម័តដោយសភាក្រិកនៅថ្ងៃទី២៩មិថុនាឆ្នាំ២០១១។ ទោះបីជាមានការប្រឆាំងយ៉ាងខ្លាំងក្លាពីសំណាក់បាតុករក្រិកយ៉ាងណាក៏ ដោយ។
ផែនការត្បិតត្បៀតក្រិកថ្មីនេះបានត្រូវអនុម័តដោយសភាក្រិកកាលពីថ្ងៃពុធទី២៩មិថុនាឆ្នាំ២០១១ម្សិលមិញ ដោយបានទទួលការគាំទ្រពីសំណាក់សមាជិកសភាក្រិក១៥៥សំឡេងលើ៣០០ ទោះបីជាមានប្រជាជនក្រិកមួយចំនួនបានធ្វើការប្រឆាំងយ៉ាងណាក៏ដោយ។ មូលហេតុដែលបណ្តាលឲ្យមានប្រជាជនក្រិកមួយចំនួនពុំគាំទ្រផែនការត្បិតត្បៀតក្រិកថ្មីនេះ គឺមកពីគេយល់ឃើញថាគ្មានយុត្តិធម៌ក្នុងការចែករំលែកទម្ងន់និងចំណែកនៃការរួមធ្វើពលិកម្មដើម្បីជួយដោះស្រាយវិបត្តិសេដ្ឋកិច្ចនិងវិបត្តិហិរញ្ញវត្ថុនៃប្រទេសក្រិក។ ទាំងនេះ បានបង្កឲ្យកើតមានអយុត្តិធម៌សង្គម។ ឧទាហរណ៍ដូចជា៖
- ការកាត់បន្ថយប្រាក់ជំនួយសម្រាប់អ្នកឥតការងារធ្វើ។
- ការកាត់បន្ថយប្រាក់សោធននិវត្តន៍។
- ការដំឡើងអត្រាពន្ធលើតម្លៃបន្ថែមពី១៣%ទៅ២៣%ដែលជាមូលហេតុបង្កឲ្យកើតមានបញ្ហាទំនិញឡើងថ្លៃ ជាពិសេសនៅក្នុងខណៈពេលដែលប្រជាជនក្រិកក្រីក្រកំពុងមានបញ្ហាប្រាក់កាសគ្មានប្រាក់ចំណូលឬបរិមាណនៃប្រាក់ចំណូលបានត្រូវគេកាត់បន្ថយ។
ម្យ៉ាងទៀត ពួកគេយល់ឃើញថា អ្នកដែលបានបង្កបង្កើតឲ្យមានវិបត្តិសេដ្ឋកិច្ចនិងវិបត្តិហិរញ្ញវត្ថុ គឺក្រុមធនាគារ ក្រុមអ្នកកេងទិញលក់យកចំណេញ ក្រុមអ្នកដឹកនាំប្រទេស ដែលបានបណ្តែតបណ្តោយធ្វេសប្រហែស ជាអ្នកទទួលខុសត្រូវក្នុងបញ្ហាវិបត្តិសេដ្ឋកិច្ចនិងវិបត្តិហិរញ្ញវត្ថុនៃប្រទេសក្រិកនេះ ដូច្នេះពុំត្រូវកម្មករក្រិកឬប្រជាជនក្រិកក្រីក្រស្លូតត្រង់ឡើយជាអ្នកត្រូវធ្វើពលិកម្មក្នុងការរិះរកដំណោះស្រាយឲ្យវិបត្តិសេដ្ឋកិច្ចនិងហិរញ្ញវត្ថុជំនួសក្រុមធនាគារ ក្រុមអ្នកកេងទិញលក់យកចំណេញ ឬ ក្រុមអ្នកដឹកនាំប្រទេសក្រិក។
ចំណែកឯលោកស្រីChristine Lagarde អគ្គនាយកថ្មីនៃមូលនិធិរូបិយវត្ថុអន្តរជាតិបានអំពាវនាវឲ្យប្រជាជនក្រិកទាំងអស់រួបរួមសាមគ្គីគ្នាជួយដោះស្រាយអនាគតរបស់ប្រទេសជាតិ។ ការអំពាវនាវរបស់ លោកស្រីអគ្គនាយកថ្មីនៃមូលនិធិរូបិយវត្ថុអន្តរជាតិបានទទួលការគាំទ្រពីសំណាក់សភាក្រិក ក៏ប៉ុន្តែប្រជាជនក្រិកក្រីក្រនិងបាតុករក្រិកពុំទទួលយកការអំពាវនាវរបស់ លោកស្រីChristine Lagarde ឡើយ។ ពួកគេនៅតែបន្តធ្វើការប្រយុទ្ធប្រឆាំងយ៉ាងខ្លាំងក្លាទល់នឹងផែនការត្បិតត្បៀតក្រិកថ្មីនេះ។
ការបារម្ភរបស់ប្រជាជនក្រិក
សូមបញ្ជាក់ថា ផែនការត្បិតត្បៀតក្រិកទី១ ធ្លាប់បានធ្វើឲ្យប្រទេសក្រិកធ្លាក់ទៅក្នុងស្ថានភាពសេដ្ឋកិច្ចដើរថយក្រោយដ៏គួរឲ្យបារម្ភម្តងរួចទៅហើយ។ ហេតុដូច្នេះហើយបានជា ផែនការត្បិតត្បៀតក្រិកថ្មីនេះ ធ្វើឲ្យប្រជាជនក្រិកក្រីក្រនិងបាតុករក្រិករឹងរឹតតែកើតមានក្តីបារម្ភកាន់តែខ្លាំងឡើងបន្ថែមទៀត។
សម្រាប់ប្រទេសដទៃទៀតនៃសហភាពអឺរ៉ុប ការអនុម័តដោយសភាក្រិកទទួលយកផែនការត្បិតត្បៀតក្រិកថ្មីនេះ នឹងអនុញ្ញាតឲ្យប្រទេសក្រិកបន្តទទួលជំនួយហិរញ្ញវត្ថុពីម្ចាស់បំណុលរបស់ខ្លួន ហើយនិងជួយបញ្ចៀសប្រទេសក្រិកឲ្យគេចផុតពីសភាពធនក្ស័យ។ បើប្រទេសក្រិកស្គាល់ធនក្ស័យ នោះប្រទេសដទៃទៀតក្នុងតំបន់អឺរ៉ូ ក៏អាចជួបនឹងគ្រោះថ្នាក់ផងដែរ។
ក្រោយពីបានឃើញសភាក្រិកអនុម័តផែនការត្បិតត្បៀតក្រិកថ្មីនេះ លោកស្រីនាយករដ្ឋមន្ត្រីអាល្លឺម៉ង់ Angela Merkel បានថ្លែងថា «នេះពិតជាដំណឹងមួយដ៏ល្អ”។ នៅក្នុងសេចក្តីថ្លែងការណ៍រួមមួយរបស់លោកប្រធានគណៈកម្មការអឺរ៉ុប José-Manuel Barroso និងលោកប្រធានសហភាពអឺរ៉ុប Hereman van Rompuy បានថ្លែងឲ្យដឹថា “ទាំងនេះជាជំហានមួយដ៏សំខាន់ សម្រាប់ជួយបញ្ចៀសប្រទេសក្រិកឲ្យគេចផុតពីសភាពធនក្ស័យ។ ដូច្នេះ ចាប់ពីពេលនេះតទៅ គេនាំគ្នាចាប់អារម្មណ៍ទៅលើការបោះឆ្នោតវគ្គទីពីរនៅសភាក្រិកនៅថ្ងៃព្រហស្បតិ៍ទី៣០មិថុនាឆ្នាំ២០១១នេះពាក់ព័ន្ធនឹងបែបបទនៃការអនុវត្តន៍ ផែនការត្បិតត្បៀតក្រិកទីពីរ។
ក្រោយពីសភាក្រិកបានអនុម័តផែនការត្បិតត្បៀតក្រិកថ្មី ទីផ្សារភាគហ៊ុននៅអឺរ៉ុបឯណេះ គេកត់សម្គាល់ឃើញ តួលេខCAC 40 នៅទីក្រុងប៉ារីសបានកើនឡើង១,៨៨% ទីផ្សារភាគហ៊ុននៅទីក្រុងFrancfort បានកើនឡើង១,៧០% នៅទីក្រុងឡុងដ្រឹ៍១,៥៤% ហើយនិងនៅទីក្រុងញីវយ៉កបានកើនឡើង០,៦០%៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ