នៅពេលសភាចិនបើកសម័យប្រជុំប្រចាំឆ្នាំប៉េកាំងខ្លាចកើតមានបដិវត្តន៍ផ្កាម្លិះដូចនៅប្រទេសអារ៉ាប់
ចុះផ្សាយនៅថ្ងៃ៖
ស្តាប់ - ០៥:៣២
នៅពេលដែលសភាចិនបើកសម័យប្រជុំប្រចាំឆ្នាំរបស់ខ្លួននៅថ្ងៃសៅរ៍ ទី៥មីនាឆ្នាំ២០១១នេះ ទីក្រុងប៉េកាំងមានក្តីបារម្ភយ៉ាងខ្លាំងហើយបានខិតខំខ្ទប់បិទការ អំពាវនាវតាមរយៈអ៊ិនធ័រណេតឲ្យប្រជាពលរដ្ឋចិននាំគ្នាចុះថ្នល់ធ្វើ “បដិវត្តន៍ផ្កាម្លិះ” ដូចនៅប្រទេសអារ៉ាប់។ អ្វីដែលសំខាន់បំផុតនៅក្នុងផែនការ៥ឆ្នាំលើកទី១២(២០១១-២០១៥) របស់ បក្សកុម្មុយនិស្តចិនគឺ ធ្វើយ៉ាងណារក្សាឲ្យបាននូវ “សន្តិភាពសង្គម”ដែលកំពុងស្គាល់ភាពផុយស្រួយ។
កាលនៅចុងទសវត្សរ៍ឆ្នាំ១៩៥០លោកប្រធានម៉ៅ សេទុងបានវាយបង្ក្រាបយ៉ាងហិង្សាបំផុតទៅលើ “ចលនាបុប្ផា១០០ជំពូក”។ “ចលនាបុប្ផា១០០ជំពូក”ដែលលោកម៉ៅ សេទុងខ្លួនឯងជាអ្នកបានផ្តួចផ្តើមឡើង ដើម្បីជាជំនួយជួយបំផុសបំផុលឲ្យមានការផ្តល់យោបល់និងមានការទិតៀនទៅលើគណបក្សកុម្មុយនិស្តចិនក្នុងគោលបំណងជួយរិះរកមាគ៌ាត្រឹមត្រូវសម្រាប់អភិវឌ្ឍប្រទេសចិន។ ក៏ប៉ុន្តែនៅទីបំផុត“ចលនាបុប្ផា១០០ជំពូក”ដែលបំផុសបំផុលឲ្យមានការប្រកួតប្រជែងរវាងទ្រឹស្តី១ ០០០បែប(que les Cent Fleurs s’épanouissent et que les Mille Ecoles se rivalisent) បែរជាត្រូវជាប់អន្ទាក់របស់លោកប្រធានម៉ៅហើយត្រូវលោកម៉ៅចោទថាពួកអ្នកគាំទ្រ“ចលនាបុប្ផា១០០ជំពូក”ជាអ្នកស្តាំនិយមប្រឆាំងនឹងបក្សកុម្មុយនិស្តចិនទៅវិញ។
ឥឡូវនេះ ជាថ្មីម្តងទៀតគឺផ្កាម្លិះឬ “បដិវត្តន៍ផ្កាម្លិះ”ដែលបានធ្វើឲ្យអ្នកដឹកនាំចិនបែកញើសជោកខ្នង។ ទាំងនេះក៏ពីព្រោះតែអ្នកប្រើអ៊ិនធ័រណេតចិនបាននាំគ្នាអំពាវនាវឲ្យប្រជាពលរដ្ឋចិននាំគ្នាចុះថ្នល់ធ្វើបាតុកម្មសម្តែងឲ្យឃើញនូវការពុំពេញចិត្តនិងបញ្ចេញកំហឹងរបស់ពួកគេនៅចំពោះមុខអំពើពុករលួយនិងការរំលោភច្បាប់ដែលបានប្រព្រឹត្តដោយអ្នកដឹកនាំពុំគោរពច្បាប់និងពុំគោរពប្រជាពលរដ្ឋរបស់ខ្លួន។
ហេតុដូច្នេះហើយ បានជាអាជ្ញាធរចិនបានដាក់ពង្រាយនគរបាលនិងភ្នាក់ងាររក្សាសន្តិសុខប្រមាណ៧៣៩ ០០០នាក់ឲ្យដើរយាមល្បាតនៅតាមវិថីសំខាន់ៗនៅទីក្រុងប៉េកាំងនិងនៅទីក្រុងសៀងហៃហើយនិងនៅតាមទីក្រុងចិនធំៗ ជាពិសេសនៅវិថីWangfujing នៅទីក្រុងប៉េកាំងដែលឋិតនៅពុំឆ្ងាយពីទីលានTiananmen។
សភាចិនដែលបើកសម័យប្រជុំប្រចាំឆ្នាំរបស់ខ្លួននៅថ្ងៃសៅរ៍ទី៥មីនាឆ្នាំ២០១១នេះនឹងបន្តដំណើរការរហូតដល់ថ្ងៃទី១៤មីនា។ ក្នុងរយៈពេល១០ថ្ងៃនេះ អ្នកតំណាង៣ ០០០នាក់មកពីគ្រប់ទិសទីនៃប្រទេសចិន មានតាំងពីទីក្រុងហុងកុង ម៉ាកាវ និងតៃវ៉ាន់បានមកប្រជុំបោះឆ្នោតអនុម័តទៅលើ “ថវិកា” “អត្ថបទ”ច្បាប់ពាក់ព័ន្ធនឹងបញ្ហាទិសដៅសេដ្ឋកិច្ច និងសង្គមកិច្ច។
មហាសន្និបាតនេះត្រូវបើកសម័យប្រជុំរបស់ខ្លួន១ឆ្នាំម្តងនៅខែមីនា។ គួរកត់សម្គាល់ថា មានអត្ថបទច្បាប់ជាច្រើនបានត្រូវអនុម័តដោយគណៈកម្មាធិការអចិន្ត្រៃយ៍ដែលមានសមាជិក១៦០នាក់ជួបប្រជុំគ្នាពីរខែម្តង។
សូមបញ្ជាក់ថា អ្នកដឹកនាំចិនធំៗនៅក្នុងការិយាល័យនយោបាយនៃបក្សកុម្មុយនិស្តជាអ្នកធ្វើសេចក្តីសម្រេចចិត្តសំខាន់ៗពាក់ព័ន្ធនឹងបញ្ហានយោបាយនិងបញ្ហាសេដ្ឋកិច្ចនិងសង្គមកិច្ចរួចទៅហើយ។ចំណែកឯអ្នកតំណាងទាំង៣ ០០០នាក់នៅក្នុងសភាគ្រាន់តែធ្វើការបោះឆ្នោតអនុម័តទទួលតែប៉ុណ្ណោះ។
ផែនការ៥ឆ្នាំលើកទី១២ (២០១១-២០១៥) របស់បក្សកុម្មុយនិស្តចិនត្រូវសង្កត់ធ្ងន់ទៅលើ៖
ទី១- តម្រូវការនៃកំណើនសេដ្ឋកិច្ចដែលមានការត្រួតពិនិត្យត្រឹមត្រូវជាងមុន។
ទី២- ធ្វើការកាត់បន្ថយវិសមភាពសង្គម។
ទី៣- គោរពបរិស្ថានឲ្យបានល្អប្រសើរជាងមុន។
រីឯលោកនាយករដ្ឋមន្ត្រីចិនWen jiabaoបានគូសបញ្ជាក់នៅក្នុងសុន្ទរកថានាឱកាសបើកសម័យប្រជុំប្រចាំឆ្នាំថា អាទិភាពចម្បងនៅក្នុងវិស័យសេដ្ឋកិច្ចសម្រាប់រដ្ឋាភិបាលចិននៅឆ្នាំ២០១១គឺ៖
ទី១- ប្រយុទ្ធប្រឆាំងនឹងបញ្ហាទំនិញឡើងថ្លៃ។
ទី២- ប្រយុទ្ធប្រឆាំងនឹងអំពើពុករលួយ និង ការរឹបអូសយកដីធ្លីដោយខុសច្បាប់។
ទី៣- ប្រយុទ្ធប្រឆាំងនឹងកង្វះខាតនៅក្នុងវិស័យអប់រំនិងសុខាភិបាល។
អ្វីដែលសំខាន់បំផុតនៅក្នុងផែនការ៥ឆ្នាំលើកទី១២(២០១១-២០១៥) របស់បក្សកុម្មុយនិស្តចិនគឺ ធ្វើយ៉ាងណារក្សាឲ្យបាននូវ “សន្តិភាពសង្គម”ដែលកំពុងស្គាល់ភាពផុយស្រួយ។
“សន្តិភាពសង្គម”ចិនស្គាល់ភាពផុយស្រួយក៏ពីព្រោះតែប្រាក់ចំណូលរបស់ប្រជាជនចិននៅក្នុងទីក្រុងហើយនិងប្រជាជនចិនដែលរស់នៅតាមជនបទមានគម្លាតឃ្លាតពីគ្នាកាន់តែឆ្ងាយទៅៗ។ គម្លាតនេះអាចមានដល់ទៅមួយជាដប់។ អំពើពុករលួយនិងការរំលោភច្បាប់របស់អ្នកដឹកនាំមួយចំនួនក៏បានធ្វើឲ្យប្រជាជនចិនខឹងក្រេវក្រោធយ៉ាងខ្លាំង។ បញ្ហាទំនិញឡើងថ្លៃបានធ្វើឲ្យប្រជាជនចិនក្រីក្រជួបនឹងការលំបាកយ៉ាងច្រើន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ