នាយករដ្ឋមន្រ្តីអ៊ីតាលីប្រឈមមុខនឹងការបោះឆ្នោតដកសេចក្តីទុកចិត្តពីសភា
ចុះផ្សាយនៅថ្ងៃ៖
ស្តាប់ - ០៤:០៧
នៅថ្ងៃអង្គារ ទី១៤ ធ្នូ ២០១០នេះ លោកស៊ីលវីយ៉ូ ប៊ែរលូស្កូនី (Silvio Berlusconi) នាយករដ្ឋមន្រ្តីអ៊ីតាលី ត្រូវប្រឈមមុខនឹងការបោះឆ្នោតដកសេចក្តីទុកចិត្តពីសភា។ ព្រឹទ្ធសភាទើបនឹងបានបោះឆ្នោតផ្តល់សេចក្តីទុកចិត្តលើ នាយករដ្ឋមន្រ្តី។ ក៏ប៉ុន្តែ នៅសល់រដ្ឋសភាមួយទៀត ដែលមានអំណាចជាងព្រឹទ្ធសភា ហើយដែលការបោះឆ្នោតនឹងភាពប្រកៀកប្រកិតជាង។
ការដែលព្រឹទ្ធសភាអ៊ីតាលីបោះឆ្នោតផ្តល់សេចក្តីទុកចិត្តលើលោកប៊ែរលូស្កូនី គឺមិនមែនជារឿងភ្ញាក់ផ្អើលនោះទេ។ សមាជិកព្រឹទ្ធសភាភាគច្រើន គឺមកពីគណបក្សកាន់អំណាច។ ផ្ទុយទៅវិញ នៅក្នុងរដ្ឋសភា លោកប៊ែរលូស្កូនីមិនប្រាកដថាអាចទទួលបានការគាំទ្រដូចនៅព្រឹទ្ធសភានោះទេ ពីព្រោះ គណបក្សជាដៃគូរបស់គាត់ បានដកខ្លួនចេញពីរដ្ឋាភិបាលចម្រុះ ហើយគ្រោងនឹងបោះឆ្នោតប្រឆាំង។
កាលពីថ្ងៃចន្ទ ម្សិលមិញ លោកប៊ែរលូស្កូនីបានអំពាវនាវឲ្យអ្នកតំណាងរាស្រ្តបោះឆ្នោតគាំទ្រគាត់ ដើម្បីចៀសវាងកុំឲ្យប្រទេសធ្លាក់ក្នុងវិបត្តិនយោបាយ ដោយបានលើកឡើងថា គណបក្សប្រឆាំងមិនមានលទ្ធភាពដឹកនាំរដ្ឋាភិបាលនោះទេ។ ក្នុងពេលជាមួយគ្នា លោកប៊ែរលូស្កូនីបានប្រកាសថា ប្រសិនបើសភាពិតជាបោះឆ្នោតដកសេចក្តីទុកចិត្តពីគាត់មែន គាត់នឹងប្រកាសរៀបចំការបោះឆ្នោតសភាមុនកាលកំណត់។
គួរបញ្ជាក់ថា ប្រជាប្រិយភាពរបស់លោកប៊ែរលូស្កូនីបានធ្លាក់ចុះពីមួយថ្ងៃទៅមួយថ្ងៃ ក្រោយពីមានរឿងរ៉ាវអាស្រូវជាបន្តបន្ទាប់ ទាក់ទងនឹងរឿងស្រីញី។ កាលពីឆ្នាំទៅមិញ ភរិយារបស់គាត់បានប្រកាសសុំលែងលះ ដោយលើកហេតុផលថា គាត់ចូលចិត្តទៅទាក់ទងជាមួយស្រីក្មេងៗ។ ក្រៅពីរឿងស្រីញី លោកប៊ែរលូស្កូនីក៏ទទួលរងនូវការរិះគន់ផងដែរថា គ្មានសមត្ថភាពក្នុងការដឹកនាំប្រទេស។
នៅថ្ងៃនេះ ពេលដែលសភាកំពុងបោះឆ្នោតសម្រេចជោគវាសនារបស់លោកប៊ែរលូស្កូនី បាតុករប្រឆាំងរាប់សិបម៉ឺននាក់បាននាំគ្នាចេញធ្វើបាតុកម្ម នៅទូទាំងប្រទេសអ៊ីតាលី ទាមទារឲ្យសភាទម្លាក់រដ្ឋាភិបាល។ ក៏ប៉ុន្តែ ការស្ទាបស្ទង់មតិថ្មីៗនេះបង្ហាញថា ប្រជាជនអ៊ីតាលីថ្នាក់កណ្តាល នៅតែគាំទ្រលោកប៊ែរលូស្កូនី។
ប្រសិនបើរដ្ឋសភាបោះឆ្នោតដកសេចក្តីទុកចិត្តមែន លោកប៊ែរលូស្កូនីត្រូវតែលាឈប់ពីតំណែង។ ប្រធានាធិបតីអ៊ីតាលីនឹងសម្រេចថា តើត្រូវតែងតាំងឥស្សរជនណាមួយផ្សេងឲ្យធ្វើនាយករដ្ឋមន្រ្តី ឬត្រូវប្រកាសរំលាយសភាចោល ហើយរៀបចំបោះឆ្នោតជាតិឡើងវិញ មុនកាលកំណត់។ ក្នុងករណីមានការបោះឆ្នោតឡើងវិញ លោកប៊ែរលូស្កូនីអាចឈរឈ្មោះជាបេក្ខជននាយករដ្ឋមន្រ្តី ហើយអាចត្រឡប់មកកាន់អំណាចវិញ ប្រសិនបើគណបក្សរបស់គាត់ឈ្នះឆ្នោត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ