តើអនាគតប្រាក់អឺរ៉ូនឹងទៅជាយ៉ាងណា ?
ចុះផ្សាយនៅថ្ងៃ៖
ស្តាប់ - ០៦:៣៦
តំាងពីសហភាពអឺរ៉ុបបានពើបប្រទះនឹងវិបត្តិសេដ្ឋកិច្ចមក មានប្រទេសអឺរ៉ុបជាច្រើនដែលចាយប្រាក់អឺរ៉ូបានផ្តើមអនុម័តនូវ ផែការ ត្បិតត្បៀត សន្សំសំចៃរបស់ខ្លួនក្នុងគោលដៅព្យាយាមកាត់បន្ថយឱនភាពថវិកា និងបំណុលសាធារណៈដ៏ច្រើនសម្បើម។ តែយ៉ាងណាក៏ដោយ វិធានការទំាងអស់នេះនៅតែមិនបានផ្តល់ជំនឿទុកចិត្តដល់ក្រុម អ្នកវិនិយោគទេ។ បន្ទាប់ពីវិបត្តិនៅក្នុងប្រទេសក្រិក និងអៀរឡង់មក ប្រទេសព័រទុយហ្កាល និងអេស្បាញក៏ប្រហែលជាមិនអាចចៀសរួចដែរ។
តំាងពីវិបត្តិសេដ្ឋកិច្ចបានផ្ទុះឡើងនៅក្នុងប្រទេសក្រិកដែលនំាឲ្យតម្លៃប្រាក់អឺរ៉ូធ្លាក់ចុះនៅចំពោះមុខប្រាក់ដុល្លារអាមេរិកមក សហភាពអឺរ៉ុបបានបង្កើតឲ្យមានអភិបាលកិច្ចសេដ្ឋកិច្ចរួម និងមូលនិធិរួមទុកសម្រាប់ជួយសង្គ្រោះប្រទេសសមាជិកដែលជួបវិបត្តិសេដ្ឋកិច្ច។ ក៏ប៉ុន្តែ វិធានការទំាងនេះហាក់ដូចជាមិនបានរំងាប់ភាពជ្រួលច្របល់នៅលើទីផ្សារហិរញ្ញវត្ថុទេ ពិសេស មិនបានផ្តល់សេចក្តីទុកចិត្តដល់ក្រុមអ្នកវិនិយោគទេ។ ក្រុមអ្នកវិនិយោគដែលហាក់ដូចជាគ្មានជំនឿលើផែនការត្បិតត្បៀត សន្សំសំចៃដែលប្រទេសអឺរ៉ុបមួយចំនួនបានអនុម័តកន្លងមក។
ម្យ៉ាងទៀត ក្រុមអ្នកវិនិយោគកំពុងរង់ចំាមើលអំពីសមត្ថភាពរបស់សហភាពអឺរ៉ុប ក្នុងការដាក់ឲ្យដំណើរការនូវមូលនិធិរួមរបស់ខ្លួនដែលបានអនុម័តកន្លងមក។ មូលនិធិជួយសង្រ្គោះដែលទើបតែផ្តើមអនុវត្តជាលើកដំបូងក្នុងការជួយស្រោចស្រង់ប្រទេសអៀរឡង់នាពេលនេះ។ អៀរឡង់ដែលទើបទទួលបានការជួយជ្រោមជ្រែងពីសហភាពអឺរ៉ុប និងមូលនិធិរូបិយវត្ថុអន្តរជាតិដែលមានទឹកប្រាក់សរុបប្រមាណជា ៨ម៉ឺន ៥ពាន់លានអឺរ៉ូ។
អ្វីទៅ ជាដំណោះស្រាយដើម្បីស្រោចស្រង់ប្រាក់អឺរ៉ូ ?
រហូតមកដល់ពេលនេះ សឹងតែគ្រប់ប្រទេសទំាងអស់ដែលចាយប្រាក់អឺរ៉ូ ឬហៅថាប្រទេសស្ថិតក្នុងតំបន់អឺរ៉ូ បានផ្តើមអនុម័តម្តងមួយៗ នូវផែការត្បិតត្បៀត សន្សំសំចៃរបស់ខ្លួន។ ការធ្វើយ៉ាងនេះដោយពួកគេគិតថា គឺជាវិធានការតែមួយគត់ដើម្បីកាត់បន្ថយឱនភាពថវិកាជាតិ និងបំណុលសាធារណៈដ៏ច្រើនសម្បើម ពិសេស ផ្តល់ជំនឿទុកចិត្តឡើងវិញដល់ក្រុមអ្នកវិនិយោគ។
តែបើនិយាយតាមទ្រឹស្តីសេដ្ឋកិច្ច ប្រទេសមួយមានសុខភាពសេដ្ឋកិច្ចល្អ លុះត្រាណាតែប្រទេសនោះមានកំណើនសេដ្ឋកិច្ច។ ដើម្បីអាចឲ្យមានកំណើនសេដ្ឋកិច្ចបាន លុះត្រាតែមានសកម្មភាពចាយវាយរបស់ពលរដ្ឋ មានន័យថា រដ្ឋត្រូវតែបង្កើនអំណាចទិញរបស់ពលរដ្ឋ។ ដើម្បីអាចបង្កើនការចាយវាយរបស់ពលរដ្ឋបាន លុះត្រាតែគេមានលុយចាយដែរ។
សំណួរដែលចោទនោះគឺថា តើផែនការត្បិតត្បៀត សន្សំសំចៃរបស់រដ្ឋាភិបាលខ្លះនៅពេលនេះ នឹងនំាឲ្យមានកំណើនសេដ្ឋកិច្ច ឬទេ ?
ជារួមទៅ គឺអត់ទេ។ ផ្ទុយទៅវិញ វាថែមទំាងទាញទម្លាក់អំណាចទិញរបស់ប្រជាជនបន្ថែមទៀត ព្រោះថា ផែនការត្បិតត្បៀត សន្សំសំចៃរបស់រដ្ឋ តាមរយៈការដំឡើងពន្ធដារក្តី ការកាត់បន្ថយប្រាក់បៀវត្សរបស់បុគ្គលិក មន្រ្តីរាជការក្តី គឺនំាឲ្យកាត់បន្ថយការចំណាយប្រចំាថ្ងៃរបស់ប្រជាជនទៅវិញ។
យោងតាមក្រុមអ្នកសេដ្ឋកិច្ច ដំណោះស្រាយដែលល្អបំផុតបើអាចធ្វើបាននោះ គឺរដ្ឋាភិបាលនីមួយៗត្រូវតែចេះច្របាច់បញ្ចូលគ្នា រវាងផែនការត្បិតត្បៀត និងផែនការផ្តល់សន្ទុះសេដ្ឋកិច្ចឡើងវិញ។ តែយ៉ាងណាក៏ដោយក្នុងរយៈពេលខ្លី ប្រទេសនីមួយៗដែលកំពុងជួបវិបត្តិហាក់ដូចជាគ្មានជម្រើសអ្វី ក្រៅពីអនុវត្តផែនការត្បិតត្បៀត សន្សំសំចៃរបស់ខ្លួនទេ។
ប្រទេសខ្លះគំរាមចង់ចេញពីតំបន់អឺរ៉ូ ?
មានការលើកឡើងថា បើវិបត្តិនៅតែបន្តកើតមាននៅក្នុងតំបន់អឺរ៉ូយ៉ាងដូច្នេះ អាចនឹងធ្វើឲ្យប្រទេសខ្លះផ្តាច់ខ្លួនចេញពីតំបន់អឺរ៉ូដែលចាយប្រាក់អឺរ៉ូ។
សំណួរដែលចោទគឺថា តើអាចទៅរួច ឬទេ ?
នេះជាសំណួរមួយដែលបានចោទ និងកំពុងបន្តចោទ។ ពិតណាស់ថា វិបត្តិដែលបាននឹងកំពុងបន្តឆ្លងរាលដាលពីប្រទេសមួយទៅប្រទេសមួយនៅក្នុងតំបន់អឺរ៉ូពេលនេះ បាននឹងកំពុងធ្វើឲ្យប្រទេសខ្លះឈឺក្បាលយ៉ាងខ្លំាង ពិសេសប្រទេសដែលគ្មានវិបត្តិ និងដែលអង្គុយចំាតែជួយអ្នកដទៃ។
ម្យ៉ាងទៀត ការត្រលប់ពីចាយប្រាក់អឺរ៉ូ មកចាយប្រាក់ជាតិរបស់ខ្លួនវិញ វាក៏មិនបានផ្តល់ផលចំណេញឲ្យគ្រប់ប្រទេសដែលពាក់ព័ន្ធនោះទេ ពោលគឺវាអាស្រ័យនឹងអត្រាប្តូរប្រាក់ជាតិរបស់ប្រទេសនោះ ធៀបនឹងប្រាក់អឺរ៉ូ។
ជាក់ស្តែង បើប្រទេសអាល្លឺម៉ង់ត្រលប់មកចាយប្រាក់ម៉ាក់របស់ខ្លួនវិញ អត្រាប្តូរប្រាក់ម៉ាក់ធៀបនឹងប្រាក់អឺរ៉ូត្រូវមានតម្លៃថ្លៃជាង។ តម្លៃប្រាក់ម៉ាក់ថ្លៃនឹងនំាឲ្យវិស័យនំាចេញអាល្លឺម៉ង់បាត់បង់ការប្រកួតប្រជែងនៅលើទីផ្សារអឺរ៉ុប។ ចំណែកឯប្រទេសព័រទុយហ្កាល និងក្រិកដែលមិនសូវមានទំនិញនំាចេញនោះ នឹងធ្វើឲ្យតម្លៃទំនិញនំាចូលមានតម្លៃខ្ពស់ បើគិតជាតម្លៃប្រាក់ជាតិរបស់គេ។
ងាកទៅប្រទេសមួយចំនួនដែលកំពុងជួបវិបត្តិនាពេលនេះវិញ ការដែលត្រលប់មកប្រើប្រាក់ជាតិរបស់ខ្លួនវិញ វានឹងអាចធ្វើឲ្យគេផ្តើមរកឃើញឡើងវិញនូវការប្រកួតប្រជែងលើវិស័យនំាចេញ ពិសេស តម្លៃទំនិញដែលគិតជាប្រាក់ជាតិ មានតម្លៃថោកជាងតម្លៃទំនិញដែលគិតជាប្រាក់អឺរ៉ូ។ប៉ុន្តែ ប្រាក់បំណុលជាអឺរ៉ូដែលប្រទេសទំាងនោះជំពាក់សហភាពអឺរ៉ុប នឹងរឹតតែធ្វើឲ្យពួកគេវ័នកបន្ថែមទៀត។
ដូច្នេះឃើញថា មានវត្តមានជាង ១០ឆ្នំាកន្លងទៅនេះ ប្រាក់អឺរ៉ូពិតជាពិបាកនឹងដកខ្លួនចេញវិញណាស់ តែទន្ទឹមគ្នានេះ អនាគតនៃប្រាក់អឺរ៉ូក៏កំពុងបន្តចោទជាបញ្ហាដែរ។
តែយ៉ាងណាក៏ដោយ សហភាពអឺរ៉ុបហាក់ដូចជាគ្មានជម្រើសអ្វី ក្រៅពីបន្តជម្រុញឲ្យសមាជិកម្នាក់ៗរបស់ខ្លួនត្រូវគោរពតាមសន្ធិសញ្ញារួម នោះគឺ មិនត្រូវមានឱនភាពថវិកាជាតិលើសពី ៣% នៃផលិតផលសរុបក្នុងស្រុក និងមិនឲ្យប្រាក់បំណុលលើសពី ៦០% នៃផលិតផលសរុបក្នុងស្រុក។ មួយវិញទៀត នៅចំពោះមុខ សហភាពអឺរ៉ុបក៏ត្រូវបន្តប្រឹងប្រែងជួយស្រោចស្រង់សមាជិករបស់ខ្លួនដោយធ្វើយ៉ាង ផ្តល់ជំនឿទុកចិត្តដល់ក្រុមអ្នកវិនិយោគឡើងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ