ជំនួបកំពូលសហរដ្ឋអាមេរិក-សហភាពអឺរ៉ុប
ចុះផ្សាយនៅថ្ងៃ៖
ស្តាប់ - ០៤:១៥
លោកប្រធានាធិបតីអាមេរិកបារ៉ាក់អូបាម៉ានិងប្រមុខដឹកនាំនៃ ប្រទេសសមាជិកនៃសហភាពអឺរ៉ុបឆ្លៀតមានជំនួបប្រជុំកំពូលកាលពីថ្ងៃសៅរ៍ ម្សិលមិញ នាឱកាសជំនួបកំពូលអូតង់នៅទីក្រុងលីសបូន។ ជំនួបកំពូលសហរដ្ឋអាមេរិក-សហភាពអឺរ៉ុបនេះមានគោលបំណងចង់រំងាប់ភាព តានតឹងនិងក្តីបារម្ភពាក់ព័ន្ធនឹងវិបត្តិសេដ្ឋកិច្ចនិងវិបត្តិ ហិរញ្ញវត្ថុ។
ជំនួបកំពូលសហរដ្ឋអាមេរិក-សហភាពអឺរ៉ុបកាលពីថ្ងៃសៅរ៍ម្សិលមិញនាឱកាសជំនួបកំពូលអូតង់នៅទីក្រុងលីសបូននេះមានគោលបំណងចង់រំងាប់ភាពតានតឹងនិងក្តីបារម្ភពាក់ព័ន្ធនឹងវិបត្តិសេដ្ឋកិច្ចនិងវិបត្តិហិរញ្ញវត្ថុដែលកើតមាននៅសហរដ្ឋអាមេរិក នៅសហភាពអឺរ៉ុប និងនៅលើពិភពលោកទាំងមូល។
ទាំងនេះក្នុងខណៈពេលដែលអ្នកជំនាញការអឺរ៉ុបនិងមូលនិធិរូបិយវត្ថុអន្តរជាតិFMIកំពុងស្វះស្វែងរិះរកដំណោះស្រាយនៅទីក្រុងឌូប្លាំងនៃប្រទេសអៀរឡង់អស់រយៈជាច្រើនថ្ងៃមកហើយដើម្បីបង្កើតឲ្យមានផែនការមួយសម្រាប់ជួយដល់ធនាគារអៀរឡង់ ហើយដែលអ្នកដឹកនាំអាមេរិកាំងបានទាមទារឲ្យអឺរ៉ុបមានប្រតិកម្មឆាប់រហ័សក្នុងការជួយដោះស្រាយវិបត្តិហិរញ្ញវត្ថុអៀរឡង់។
ប្រធាននៃសហភាពអឺរ៉ុបលោកHerman Van Rompuy បានគូសបញ្ជាក់ប្រាប់សហរដ្ឋអាមេរិកថា បច្ចុប្បន្ននេះ”មូលដ្ឋាននៃសេដ្ឋកិច្ចអឺរ៉ុបមានសភាពរឹងមាំ”ពាក់ព័ន្ធនឹងកំណើនសេដ្ឋកិច្ចក៏ដូចជាបញ្ហាអតិផរណាដែលមានកម្រិតទាប។ ហើយសហភាពអឺរ៉ុបក៏បានចាត់តាំងឲ្យមានរួចទៅហើយនូវឧបករណ៍ចាំបាច់សម្រាប់គាំទ្រវិស័យហិរញ្ញវត្ថុដល់ប្រទេសអឺរ៉ុបដែលជួបនឹងវិបត្តិ។
លោកប្រធានាធិបតីអាមេរិកបារ៉ាក់អូបាម៉ាបានថ្លែងបញ្ជាក់ប្រាប់ថា ក្នុងឋានៈជាប្រទេសមហាអំណាចសេដ្ឋកិច្ចពិភពលោក អ្វីៗដែលកើតមាននៅសហរដ្ឋអាមេរិកអាចជះចេញជាផលវិបាកយ៉ាងធំធេងដល់ប្រទេសនៅអឺរ៉ុប ហើយផ្ទុយទៅវិញក៏ដូចគ្នាអ៊ីចឹងដែរចំពោះវិបត្តិដែលកើតមាននៅអឺរ៉ុបក៏អាចជះផលវិបាកដ៏ធ្ងន់ធ្ងរដល់សហរដ្ឋអាមេរិកផងដែរ។ លោកអូបាម៉ាក៏ពុំភ្លេចរំលឹកពីវិបត្តិហិរញ្ញវត្ថុនិងបរិមាណនៃប្រាក់បំណុលសាធារណៈដ៏សែនច្រើនមហិមានៃប្រទេសក្រិកដែលបានធ្វើឲ្យរញ្ជួយទូទាំងអឺរ៉ុបកាលពីនិទាឃៈរដូវកន្លងទៅនេះ។
លោកអូបាម៉ាបានថ្លែងប្រាប់ទៀតថា “ទង្វើដែលសំខាន់ដែលខ្ញុំអាចធ្វើជូនអឺរ៉ុបក៏ជាទង្វើដូចគ្នាអ៊ីចឹងដែរដែលខ្ញុំអាចធ្វើជូនសហរដ្ឋអាមេរិកគឺជួយជំរុញឲ្យមានសន្ទុះកំណើនសេដ្ឋកិច្ចនិងជួយបង្កើតការងារឲ្យបានច្រើនជូនប្រជាជនដែលគ្មានការងារធ្វើ"។
គួរកត់សម្គាល់ថា នៅក្នុងសេចក្តីថ្លែងការណ៍រួម សហរដ្ឋអាមេរិកនិងសហភាពអឺរ៉ុបបានថ្លែងអំពាវនាវនៅថ្ងៃសៅរ៍ម្សិលមិញ ឲ្យដៃគូនៃក្រុមប្រទេសG20ចៀសវាង”នយោបាយបញ្ចុះតម្លៃរូបិយវត្ថុ”របស់ខ្លួនដើម្បីទាញយកចំណេញក្នុងការប្រកួតប្រជែងនាំទំនិញចេញទៅលក់ក្រៅប្រទេស។
ទាំងនេះ ពួកគេចង់និយាយពី”នយោបាយរូបិយវត្ថុនៃប្រទេសចិន”ដែលគេបានបន្ទោសថា បានរក្សាតម្លៃប្រាក់យ័នចិនឲ្យឋិតនៅក្នុងកម្រិតមួយទាបជ្រុលហួសហេតុ។ ហើយប្រទេសអឺរ៉ុបក៏ទិតៀននយោបាយរបស់ធនាគារកណ្តាលអាមេរិកាំងផងដែរដែលបានចាក់បញ្ចូលសាច់ប្រាក់ប្រមាណ៦០០ពាន់លានដុល្លារទៅក្នុងប្រព័ន្ធហិរញ្ញវត្ថុនិងសេដ្ឋកិច្ចអាមេរិកាំង។ ដោយហេតុថា ការចាក់បញ្ចូលសាច់ប្រាក់ដ៏ច្រើនសន្ធឹកសន្ធាប់ទៅក្នុងប្រព័ន្ធសេដ្ឋកិច្ចអាមេរិកាំងនេះហើយដែលជាមូលហេតុនាំឲ្យប្រាក់ដុល្លារអាមេរិកធ្លាក់ស្រុតចុះថ្លៃ ហើយតាមរយៈកលល្បិចនេះទីក្រុងវ៉ាស៊ីនតោនសង្ឃឹមថា នឹងអាចធ្វើការប្រកួតប្រជែងបានងាយស្រួលក្នុងការនាំទំនិញចេញទៅលក់ក្រៅប្រទេស។
ប៉ុន្តែលោកអូបាម៉ាក៏ពុំភ្លេចថ្លែងគូសបញ្ជាក់ឡើយថា ទំនាក់ទំនងអាមេរិក-អឺរ៉ុបគឺជាទំនាក់ទំនងដ៏សែនសំខាន់ក្នុងការជួយរិះរកដំណោះស្រាយឲ្យវិបត្តិហិរញ្ញវត្ថុនិងវិបត្តិសេដ្ឋកិច្ចពិភពលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ