សាកូហ្ស៊ីរុះរើគណៈរដ្ឋមន្រ្តី៖ ឡានថ្មី ប៉ុន្តែម៉ាស៊ីនចាស់
ចុះផ្សាយនៅថ្ងៃ៖
ស្តាប់ - ០៦:៣៣
កាលពីយប់ថ្ងៃអាទិត្យ ទី១៤ វិច្ឆិកា ២០១០នេះ លោកនីកូឡា សាកូហ្ស៊ី (Nicolas Sarkozy) បានធ្វើការរុះរើគណៈរដ្ឋមន្រ្តី ហើយរៀបចំរដ្ឋាភិបាលថ្មី។ អស់រយៈពេល ៦ខែមកហើយ ដែលប្រជាជនបារាំងរង់ចាំមើលរូបរាងរដ្ឋាភិបាលថ្មី ដែលលោកសាកូហ្ស៊ីបានសន្យា។ ក៏ប៉ុន្តែ នៅទីបំផុត រដ្ឋាភិបាលដែលលោកសាកូហ្ស៊ីតែងតាំង កាលពីយប់មិញនេះ ថ្មីតែឈ្មោះប៉ុណ្ណោះ។ ចំណែកសមាសភាពវិញ គឺនៅដដែលស្ទើរតែទាំងអស់។
កាលពីយប់ថ្ងៃសៅរ៍ លោកហ្វ្រង់ស័រ ហ្វ៊ីយ៉ុង (François Fillon) នាយករដ្ឋមន្រ្តី និងសមាជិករដ្ឋាភិបាលបារាំងទាំងមូលបានលាឈប់ពីតំណែង។ មួយថ្ងៃឡើងទៀត លោកនីកូឡា សាកូហ្ស៊ី បានប្រកាសតែងតាំងនាយករដ្ឋមន្រ្តី សម្រាប់រដ្ឋាភិបាលថ្មី។ ក៏ប៉ុន្តែ នាយករដ្ឋមន្រ្តីថ្មីនេះ គឺគ្មានអ្នកណាក្រៅពីលោកហ្វ៊ីយ៉ុងនោះឡើយ។ រដ្ឋមន្រ្តី និងរដ្ឋលេខាធិការផ្សេងទៀតក៏ភាគច្រើនជាមនុស្សដដែលដែរ។
បើយើងមើលទៅលើក្រសួងសំខាន់ៗ ក្នុងរដ្ឋាភិបាលថ្មីនេះ យើងឃើញថា រដ្ឋមន្រ្តីក្រសួងសេដ្ឋកិច្ច និងក្រសួងមហាផ្ទៃ គឺនៅដដែល។ មុខថ្មី គឺលោកអាឡាំង ហ្ស៊ុបប៉េ (Alain Juppé) ដែលឡើងមកធ្វើជារដ្ឋមន្រ្តីក្រសួងការពារជាតិ។ ចំណែកក្រសួងការបរទេសវិញ ត្រូវបានទៅលោកស្រីមីស្ហ៊ែល-អាលីយ៉ូ ម៉ារី (Michèle Alliot-Marie) ដែលប្តូរមកពីក្រសួងយុត្តិធម៌។ ក្រៅពីនេះ ក្រសួងភាគច្រើន ត្រូវកាន់កាប់ដោយរដ្ឋមន្រ្តីដដែល។
អ្វីដែលផ្លាស់ប្តូរ នៅក្នុងរដ្ឋាភិបាលថ្មីនេះ គឺសមាជិកមានចំនួនតិចជាងមុន។ កាលពីរដ្ឋាភិបាលចាស់ ទាំងរដ្ឋមន្រ្តី និងរដ្ឋលេខាធិការ មានសរុបទាំងអស់ ៣៧រូប។ ចំណែករដ្ឋាភិបាលថ្មីវិញ គឺមានសមាជិក តែ ៣០រូបប៉ុណ្ណោះ។ ក្រសួងខ្លះត្រូវគេច្របាច់បញ្ចូលគ្នា ដូចជា ករណីក្រសួងអន្តោប្រវេសន៍ ត្រូវដាក់បញ្ចូលជាមួយក្រសួងមហាផ្ទៃ ហើយក្រសួងសុខាភិបាល ត្រូវដាក់បញ្ចូលជាមួយក្រសួងការងារ។
ម្យ៉ាងទៀត គេសង្កេតឃើញថា នៅក្នុងរដ្ឋាភិបាលថ្មីនេះ លែងមានសមាជិកមកពីគណបក្សផ្សេងៗចម្រុះគ្នាដូចមុនទៀតហើយ។ គួរបញ្ជាក់ថា កាលពីក្នុងរដ្ឋាភិបាលចាស់ សមាសភាពមានចម្រុះបក្ស រហូតដល់មានរដ្ឋមន្រ្តី និងរដ្ឋលេខាធិការខ្លះមកពីគណបក្សប្រឆាំងក៏មាន។ ចំណែករដ្ឋាភិបាលថ្មីវិញ គេមិនឃើញមានសមាជិកពីគណបក្សប្រឆាំងទៀតទេ។ សូម្បីតែអ្នកនយោបាយមកពីគណបក្សកណ្តាលនិយម ដែលជាសម្ព័ន្ធមិត្តរបស់គណបក្ស UMP ក៏ចេញពីរដ្ឋាភិបាលស្ទើរតែអស់ដែរ។
អ្នកវិភាគជាច្រើនយល់ថា ការរៀបចំរដ្ឋាភិបាលបែបនេះ បង្ហាញថា លោកសាកូហ្ស៊ី កំពុងតែរៀបចំយុទ្ធសាស្រ្ត សម្រាប់ការបោះឆ្នោតប្រធានាធិបតីអាណត្តិថ្មី នៅឆ្នាំ២០១២ខាងមុខ។ ប្រជាប្រិយភាពរបស់លោកសាកូហ្ស៊ីនៅពេលនេះ គឺធ្លាក់ដល់កម្រិតមួយទាបបំផុត។ លោកមានពេលតែជាង ១ឆ្នាំប៉ុណ្ណោះ ដើម្បីស្តារប្រជាប្រិយភាពនេះឡើងវិញ។ យប់ថ្ងៃអង្គារស្អែកនេះ លោកសាកូហ្ស៊ីនឹងផ្តល់បទសម្ភាសន៍តាមទូរទស្សន៍ ដើម្បីបង្ហាញអំពីគោលនយោបាយរបស់គាត់ សម្រាប់រយៈពេលជាង ១ឆ្នាំចុងក្រោយនេះ។
លោកហ្វ៊ីយ៉ុង ដែលទើបនឹងបានបន្តតំណែងជានាយករដ្ឋមន្រ្តី ធ្លាប់បានបញ្ជាក់រួចហើយ ក្នុងសេចក្តីប្រកាសព័ត៌មានមួយ កាលពីថ្ងៃអាទិត្យ ថា នយោបាយជាអាទិភាពរបស់លោក គឺមានបីចំណុចសំខាន់៖ កំណើនសេដ្ឋកិច្ច, វិស័យសង្គមកិច្ច និងសន្តិសុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ