ជំនួបកំពូលអាស៊ី-អឺរ៉ុបលើកទី៨ផ្តើមឡើងនៅបែលហ្សិក
ចុះផ្សាយនៅថ្ងៃ៖
ស្តាប់ - ០៦:១៦
ជំនួបកំពូលអាស៊ី-អឺរ៉ុបលើកទី៨ ផ្តើមឡើងនៅទីក្រុងBruxelles ប្រទេសបេលហ្សិក នៅថ្ងៃចន្ទទី៤តុលានេះ នឹងត្រូវបញ្ចប់នៅយប់ថ្ងៃអង្គារស្អែក។ ថ្នាក់ដឹកនាំនៃទ្វីបទាំងពីរ ត្រូវជជែកគ្នាពីកំណែទម្រង់ប្រព័ន្ធហិរញ្ញវត្ថុអន្តរជាតិ ការទប់ស្កាត់កំណើនកំដៅនៃភពផែនដីនិងការរំលែកអំណាចខ្លះនៅក្នុងមូលនិធិរូបិយវត្ថុអន្តរជាតិFMI ពីសំណាក់អឺរ៉ុបទៅឲ្យអាស៊ី។ អឺរ៉ុបនិងអាស៊ី ក៏ប្រហែលជាត្រូវនិយាយគ្នាដែរអំពីបញ្ហាប្រកបទៅដោយសង្គ្រាមប៉ាកកាមួយចំនួន រួមមានតម្លៃថោកជ្រុលនៃប្រាក់យ័នចិន ភាពតានតឹងរវាងជប៉ុននិងចិននិងការរំលោភសិទ្ធិមនុស្សនៅភូមា។
ASEM ឬជាភាសាអង់គ្លេសAsia Europe Meeting ត្រូវបានបង្កើតជាផ្លូវការ នៅឆ្នាំ១៩៩៦នៅប្រទេសថៃ ក្រោមការផ្តួចផ្តើមឡើងរបស់បារាំងនិងសិង្ហបុរី។ មូលហេតុ កាលណោះ គឺមកអំពីប្រទេសបារាំងកត់សម្គាល់ឃើញថាអាស៊ីងាកទៅរកអាមេរិកនិងប៉ាស៊ីហ្វិកខ្លាំងឡើងៗ ជាក់ស្តែងតាមរយៈការបង្កើតអង្គការAPEC ពោលគឺអង្គការសហប្រតិបត្តិការសេដ្ឋកិច្ចអាស៊ី-ប៉ាស៊ីហ្វិក នៅឆ្នាំ១៩៨៩។ ម្ល៉ោះហើយ ចំពោះប្រទេសបារាំង អឺរ៉ុបត្រូវតែប្រញាប់ពង្រឹងទំនាក់ទំនងឲ្យបានមាំល្អជាមួយអាស៊ី។
សព្វថ្ងៃនេះ សមាជិកASEM កើនចំនួនដល់ទៅ៤៦ប្រទេស គឺប្រទេសទាំង២៧របស់សហភាពអឺរ៉ុប ប្រទេសទាំង១០ របស់ASEAN និងចិន ជប៉ុន កូរ៉េខាងត្បូង ឥណ្ឌា ប៉ាគីស្តង់ ម៉ុងហ្គោលី រុស៊្សី នូវែលហ្សេឡង់ និងអូស្រ្តាលី។ សូមជម្រាបថា ប្រទេសបីចុងក្រោយ គឺរុស្ស៊ី នូវែលហ្សេឡង់ និងអូស្រ្តាលី ទើបតែក្លាយជាសមាជិករបស់ASEM នៅឆ្នាំ២០១០នេះ។
ជាគោលការណ៍ សំណុំរឿងដែលជំនួបកំពូលASEM អាចលើកយកមកពិភាក្សាគ្នា គឺមានច្រើនយ៉ាង ពីសំណុំរឿងនយោបាយ រហូតទៅដល់សំណុំរឿងវប្បធម៌ ដោយឆ្លងកាត់តាម សំណុំរឿងសេដ្ឋកិច្ចនិងពាណិជ្ជកម្ម។
ដោយឡែក សូមជម្រាបថាASEM នេះ មិនមែនជាអង្គការមួយនៅឡើយទេ តែជាវេទិកាមួយប៉ុណ្ណោះ ជាទីដែលបណ្តាប្រមុខរដ្ឋឬបណ្តាប្រមុខរដ្ឋាភិបាលរបស់អាស៊ី និងរបស់អឺរ៉ុប
ជួបគ្នាពីរឆ្នាំម្តង បានន័យថាមិនទាន់មានអគ្គលេខាធិការដ្ឋានមួយជាប្រចាំ ដូចករណី ASEAN ឬករណីAPEC ទេ។
ម្ល៉ោះហើយបានជា ពេលណាមានជំនួបកំពូលម្តងៗ គេតម្រូវឲ្យមានអ្នកសម្របសម្រួល តំណាងតំបន់ឬអង្គការនីមួយៗ។ ឧទាហរណ៍ នាឱកាសជំនួបកំពូលលើកទី៨របស់ASEM នៅBruxelles ពីថ្ងៃចន្ទទី៤ដល់ថ្ងៃអង្គារទី៥តុលាស្អែកនេះ កម្ពុជា តាមរយៈ លោកនាយក រដ្ឋមន្ត្រី ហ៊ុន សែន ជាអ្នកសម្របសម្រួលតំណាងASEAN រីឯកូរ៉េខាងត្បូង តាមរយៈលោក ប្រធានាធិបតី លី ម្យ៉ុងបាក់(Lee Myung-Back) ជាអ្នកសម្របសម្រួល តំណាងតំបន់អាស៊ី បូព៌ា។
អាស៊ីនិងអឺរ៉ុបរកជំហររួម មុនជំនួបកំពូលG២០ និងមុនសន្និសីទអាកាសធាតុនៅម៉ិចស៊ិច
ក្នុងចំណោមសំណុំរឿងដែលត្រូវលើកមកពិភាក្សាថ្ងៃនេះ មានប្រធានបទផ្លូវការ និង ប្រធានបទក្រៅផ្លូវការ បានន័យថាមានសំណុំរឿងដែលត្រូវចែង និងមានប្រធានរឿង ដែលមិនត្រូវចែង នៅក្នុងសេចក្តីថ្លែងការណ៍រួមពេលចប់អង្គប្រជុំនៅថ្ងៃស្អែក។
នៅក្នុងចំណោមប្រធានបទផ្លូវការដែលថ្នាក់ដឹកនាំកំពូលអាស៊ី-អឺរ៉ុបនឹងលើកឡើង មាន ជាបឋម កំណែទម្រង់ប្រព័ន្ធហិរញ្ញវត្ថុអន្តរជាតិ។ ប្រទេសបារាំងដែលនឹងក្លាយជាប្រធាន ផ្លាស់វេនរបស់G២០ ចាប់ពីថ្ងៃទី១២វិច្ឆិកាខាងមុខនេះទៅ ចង់ឲ្យបណ្តាប្រទេសអាស៊ីនិង អឺរ៉ុបគាំទ្រខ្លួន ក្នុងការជម្រុញឲ្យមានកំណែទម្រង់ប្រព័ន្ធហិរញ្ញវត្ថុអន្តរជាតិ ដើម្បីចៀសវាង កុំឲ្យវិបត្តិសេដ្ឋកិច្ចសកលដូចវិបត្តិចុងឆ្នាំ២០០៨ កើតឡើងបានទៀត។
បន្ទាប់មកទៀត មានផែនការកំណែទម្រង់មូលនិធិរូបិយវត្ថុអន្តរជាតិFMI។ បណ្តាប្រទេស អាស៊ី នឹងបញ្ចុះបញ្ចូលឲ្យអឺរ៉ុបយល់ព្រមរំលែកឥទ្ធិពលខ្លះរបស់ខ្លួនមកឲ្យពួកគេ នៅក្នុង FMI ដែលមកទល់សព្វថ្ងៃឋិតនៅក្នុងដៃរបស់អឺរ៉ុបនិងសហរដ្ឋអាមេរិក។ គួរនិយាយថា មហាសន្និបាតប្រចាំឆ្នាំរបស់FMI នឹងប្រព្រឹត្តទៅ ពីថ្ងៃទី៨ដល់ទី១០តុលាចុងសប្តាហ៍នេះ។
ក្រៅពីនេះ ក៏មានដែរប្រធានរឿងអាកាសធាតុ។ តាមមើលទៅ អឺរ៉ុបនិងអាស៊ី ត្រូវចេញ សេចក្តីថ្លែងការណ៍រួមគ្នាមួយ ដើម្បីប្តេជ្ញាទប់ទល់នឹងការកើនកំដៅនៃភពផែនដី ពីព្រោះ
ពីថ្ងៃទី២៩វិច្ឆិកាដល់ថ្ងៃទី១០ធ្នូខាងមុខនេះ សន្និសីទអន្តរជាតិស្តីពីការប្រែប្រួល អាកាសធាតុ នឹងត្រូវប្រព្រឹត្តទៅនៅCancun ប្រទេសម៉ិចស៊ិច(Mexique)។
ទន្ទឹមជាមួយគ្នានេះ គេរំពឹងថាថ្នាក់ដឹកនាំអឺរ៉ុបនិងអាស៊ី ក៏នឹងលើកបញ្ហាមួយចំនួនមក
ពិភាក្សាក្រៅផ្លូវការដែរ ក្នុងនោះរួមមានជាអាទិ៍ នយោបាយបញ្ចុះតម្លៃប្រាក់យ័ន (Yuan) នៅប្រទេសចិន និងតម្លៃប្រាក់យេន(Yen) នៅប្រទេសជប៉ុន ដែលជាហេតុធ្វើឲ្យផលិតផល
អឺរ៉ុបមិនអាចប្រកួតប្រជែងនឹងផលិតផលអាស៊ីបាន។ រីឯប្រទេសចិនវិញ បារម្ភខ្លាចតែ ថ្នាក់ដឹកនាំអឺរ៉ុបលើករនាំងខ្ទប់មិនឲ្យផលិតផលចិនហូរចូលមកក្នុងសហភាពអឺរ៉ុបច្រើនពេក។
ដោយឡែក គេរំពឹងថាអាស៊ីនិងអឺរ៉ុប ក៏ត្រូវលើកឡើងពីករណីប្រទេសភូមាដែរ។
បណ្តាឧត្តមមន្ត្រីអឺរ៉ុបនិងអាស៊ី ដែលបានរួមប្រជុំគ្នា កាលពីម្សិលមិញ បានអនុម័តពង្រាង សេចក្តីថ្លែងការណ៍រួមមួយ តម្រូវឲ្យភូមាដែលជាសមាជិករបស់ASEM ចាត់វិធានការ ចាំបាច់ ដើម្បីឲ្យការបោះឆ្នោតនាពេលខាងមុខប្រព្រឹត្តទៅ ដោយសេរីនិងយុត្តិធម៌ និងតម្រូវ ឲ្យរបបសឹកភូមាដោះលែងអ្នកទោសនយោបាយមុនថ្ងៃបោះឆ្នោត។ គួរនិយាយត្រង់នេះថា របបសឹកភូមា បានប្រកាសកាលពីសប្តាហ៍មុនថា នឹងដោះលែងលោកស្រីAung San Su Kyi នៅពេលដែលការបោះឆ្នោតសភាថ្ងៃទី៧វិច្ឆិកាចប់ដាច់ស្រេចហើយ។
យ៉ាងណាមិញ បណ្តាប្រមុខរដ្ឋនិងប្រមុខរដ្ឋាភិបាលអាស៊ីដែលចូលប្រជុំជាមួយថ្នាក់ដឹកនាំ កំពូលៗរបស់អឺរ៉ុប អាចនឹងទាមទារឲ្យកែតម្រូវវិញ ពាក្យសំដីខ្លះៗ នៅក្នុងសេចក្តីថ្លែងការណ៍រួមចុងក្រោយ។
មកទល់ពេលនេះ តែងតែមានការប្រទាញប្រទង់គ្នារវាងថ្នាក់ដឹកនាំអឺរ៉ុបនិងអាស៊ីជុំវិញ ករណីប្រទេសភូមា។ អឺរ៉ុបមិនចង់អង្គុយចរចាជាមួយអ្នកដឹកនាំកំពូលរបស់ភូមា នៅក្នុង ជំនួបកំពូលASEM ម្តងៗ។ កាលពីជំនួបកំពូលASEM ឆ្នាំ២០០៦ នៅប្រទេសវៀតណាម អឺរ៉ុបនិងអាស៊ីបានរកឃើញដំណោះស្រាយមួយ នោះគឺពីអំណើះតទៅ នៅក្នុងគ្រប់ជំនួប កំពូលASEM ភូមាត្រូវអនុញ្ញាតឲ្យតំណាងដោយរដ្ឋមន្ត្រីក្រសួងការបរទេសរបស់ខ្លួន តែ ប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ