ខួបឆ្នាំទី៩នៃថ្ងៃទី១១កញ្ញាឆ្នាំ២០០១នៅសហរដ្ឋអាមេរិក
ចុះផ្សាយនៅថ្ងៃ៖
ស្តាប់ - ០៤:៤៦
នៅថ្ងៃសៅរ៍ទី១១កញ្ញាឆ្នាំ២០១០នេះ សហរដ្ឋអាមេរិកប្រារព្ធខួបឆ្នាំទី៩នៃថ្ងៃទី១១កញ្ញាឆ្នាំ២០០១ នៅក្នុងបរិយាកាសមួយដ៏តឹងតែង ក្រោយពីមានការគំរាមពីសំណាក់គ្រូគង្វាលអាមេរិកម្នាក់ឈ្មោះTerry Jones ថាចង់ដុតគម្ពីរអ៊ីស្លាមហើយនិងទាមទារឲ្យគេប្តូរទីកន្លែងសម្រាប់ សាងសង់វិហារអ៊ីស្លាមដែលគ្រោងធ្វើនៅទីកន្លែងមួយដែលឋិតនៅជិត Ground Zero នៃអតីតអគារWorld Trade Center នៅទីក្រុងញីវយ៉ក។ ក៏ប៉ុន្តែនៅថ្ងៃសៅរ៍នេះ អ្នកជំនិតម្នាក់របស់គ្រូគង្វាលបានថ្លែងឲ្យដឹងថា គេនឹងពុំដុតគម្ពីរអ៊ីស្លាមទាំងនោះវិញឡើយ។
លោកគ្រូគង្វាលអាមេរិកឈ្មោះTerry Jones ពុំដុតគម្ពីរអ៊ីស្លាម នៅថ្ងៃសៅរ៍ទី១១កញ្ញាឆ្នាំ២០១០នេះដូចការគំរាមវិញ គឺបណ្តាលមកពីបញ្ហាកាលៈទេសៈពុំមែនបណ្តាលមកពីបញ្ហាមនសិការឡើយ។ បានសេចក្តីថា លោកគ្រូគង្វាលTerry Jonesបានទទួលរងសម្ពាធយ៉ាងខ្លាំងក្លាពីសំណាក់គ្រិស្តសាសនិកអាមេរិកាំង។ ពីសំណាក់លោកDavid Petraeusដែលជាអគ្គមេបញ្ជាការនៃកងកម្លាំងយោធានៃប្រទេសលោកខាងលិចនៅអាហ្វហ្កានិស្តង់ដែលបារម្ភពីប្រតិកម្មហិង្សានៃប្រជាជនកាន់សាសនាអ៊ីស្លាមនៅក្នុងតំបន់។ ហើយលោកប្រធានាធិបតីអាមេរិកបារ៉ាក់អូបាម៉ាក៏បានដាក់សម្ពាធយ៉ាងចាស់ដៃដែរទៅលើលោកគ្រូគង្វាលTerry Jones ដោយបានថ្លែងបញ្ជាក់ថា “ទាំងនេះខុសផ្ទុយពីសីលធម៌របស់អាមេរិក”។
គួរបញ្ជាក់ថា លោកប្រធានាធិបតីអៀរ៉ង់ ពួកតាលីបង់ ឬពួកប៉ាលេស្ទីនហាម៉ាស់បាននាំគ្នាបញ្ចេញប្រតិកម្មយ៉ាងខ្លាំងក្លា ដោយបានធ្វើការវាយប្រហារឥតសំចៃដៃទៅលើគ្រូគង្វាលអាមេរិកឈ្មោះTerry Jones ។ នៅឯប្រទេសអៀរ៉ាក់ឯណោះ ayatollah Ali Sistani ដែលជាមេដឹកនាំអ្នកកាន់សាសនាអ៊ីស្លាមChiite ដ៏សំខាន់បានធ្វើការព្រមានថា បើគ្រូគង្វាលអាមេរិកឈ្មោះTerry Jones ហ៊ានដុតគម្ពីរមែន នោះសហរដ្ឋអាមេរិកច្បាស់ជានឹងទទួលរងផលវិបាកមួយដ៏សែនធ្ងន់ធ្ងរ។
សម្រាប់គ្រូគង្វាលអាមេរិកឈ្មោះTerry Jones ការឈប់ដុតគម្ពីរអ៊ីស្លាមនៅថ្ងៃសៅរ៍ទី១១កញ្ញាឆ្នាំ២០១០នេះ ពុំមែនបណ្តាលមកពីមានសម្ពាធខ្លាំងមកពីខាងក្រៅឡើយ មូលហេតុពិតសម្រាប់ Terry Jonesគឺគេសម្រេចបានដូចបំណងក្នុងការបញ្ឈប់ឲ្យអ្នកកាន់សាសនាអ៊ីស្លាមសាងសង់វិហារនៅជិត Ground Zero នៃអតីតអគារWorld Trade Center នៅទីក្រុងញីវយ៉ក ធ្វើជាថ្នូរប្តូរនឹងការដុតគម្ពីរអ៊ីស្លាមនៅថ្ងៃខួបឆ្នាំទី៩នៃថ្ងៃទី១១កញ្ញាឆ្នាំ២០០១។
នៅសហរដ្ឋអាមេរិកបច្ចុប្បន្ននេះ មានប្រជាជនកាន់សាសនាអ៊ីស្លាមប្រមាណ២លាន៥សែននាក់ ហើយគេកត់សម្គាល់ឃើញមានវិហារអ៊ីស្លាម១៣១នៅឆ្នាំ២០០៨នៅទីក្រុងញីវយ៉កដែលមានប្រជាជនជាអ្នកកាន់សាសនាអ៊ីស្លាមប្រមាណ១%។
ក្រោយពីថ្ងៃទី១១កញ្ញាឆ្នាំ២០០១ គេកត់សម្គាល់ឃើញសហរដ្ឋអាមេរិកមានទំនុកចិត្តទៅលើខ្លួនឯងកាន់តែតិចទៅៗ។ ហើយអ្វីដែលគួរឲ្យចម្លែកគឺប្រតិកម្មប្រឆាំងនឹងអ៊ីស្លាមនៅពេលនេះមានលក្ខណៈខ្លាំងក្លាណាស់ បើប្រៀបផ្ទឹមទៅនឹងសម័យរយៈកាលភ្លាមៗបន្ទាប់ពីមហាភេរវកម្មពោលគឺថ្ងៃទី១១កញ្ញាឆ្នាំ២០០១។
ក្រោយពីថ្ងៃទី១១កញ្ញាឆ្នាំ២០០១ សហរដ្ឋអាមេរិកហាក់ដូចជាងាកទៅរកស្មារតី”Isolationisme"ឬ”ឯកានិយម”។ ហើយមានអារម្មណ៍ភ័យខ្លាចនឹងធ្វើការប្រឈមមុខទល់នឹងបញ្ហាអន្តោប្រវេសន៍។ ទាំងនេះ ប្រហែលជាបណ្តាលមកពីសហរដ្ឋអាមេរិកបច្ចុប្បន្ននេះមានអានុភាពតិចជាងកាលនៅឆ្នាំ២០០១។
បើយោងតាមការស្ទាបស្ទង់មតិនៅពេលថ្មីៗនេះដោយABC/washington Post មានប្រជាជនអាមេរិកប្រមាណ៤៩%មានទស្សនៈអវិជ្ជមាននៅចំពោះមុខសាសនាអ៊ីស្លាម ដូច្នេះបានសេចក្តីថាមានចំនួន១០ពិន្ទុលើសពីឆ្នាំ២០០២។
ប៉ុន្តែគេក៏ពុំត្រូវទម្លាក់ការទទួលខុសត្រូវនៃថ្ងៃទី១១កញ្ញាឆ្នាំ២០០១នៅសហរដ្ឋអាមេរិក ទៅលើអ្នកកាន់សាសនាអ៊ីស្លាមទាំងដុលរួមគ្នាដូច្នេះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ