ផលិតផលដុលក្នុងប្រទេសបារាំងបានកើនឡើង០,៦%នៅត្រីមាសទីពីរឆ្នាំ២០១០ ពោលគឺមានបីដងលើសពីត្រីមាសទីមួយ។ ទាំងនេះបានអនុញ្ញាតឲ្យប្រទេសបារាំងបង្កើតបានប្រមាណ៦ម៉ឺនការងារ បើគិតតាំងពីដើមឆ្នាំ២០១០មក។អត្រានៃកំណើនសេដ្ឋកិច្ចបារាំងនៅត្រីមាសទី២ឆ្នាំ២០១០ដែលមាន០,៦% ពិតជាសមស្របតាមយុទ្ធសាស្ត្ររបស់រដ្ឋាភិបាលបារាំង។
កត្តាវិជ្ជមានពីរសំខាន់ដែលបានមកជួយអូសទាញសេដ្ឋកិច្ចបារាំងឲ្យមានសន្ទុះលឿនទៅមុខ៖
-ទីមួយគឺសហគ្រាសបារាំងបានចាប់បោះទុនវិនិយោគឡើងវិញ ដោយបានបញ្ឈប់ទង្វើdéstockageពោលគឺចាប់ទិញដូរនិងបង្កើនផលិតផលសម្រាប់ស្តុកទុកលក់។ លែងអនុវត្តនយោបាយ”គិតតែពីលក់ទំនិញចាស់ដែលមាននៅក្នុងស្តុក ហើយពុំហ៊ានបោះទុនធ្វើវិនិយោគ”។
-ទីពីរគឺដោយសារតែមានសន្ទុះកើនឡើងនៃការទិញគ្រឿងឧបភោគបរិភោគរបស់គ្រួសារបារាំងនៅក្នុងប្រទេស។
សកម្មភាពសេដ្ឋកិច្ចដ៏វិជ្ជមានទាំងពីរខាងលើនេះហើយដែលបានអនុញ្ញាតឲ្យកំណើនសេដ្ឋកិច្ចបារាំងនៅត្រីមាសទី២ឆ្នាំ២០១០ស្ទុះឡើង០,៦% ពោលគឺមានបីដងលើសពីកំណើនសេដ្ឋកិច្ចបារាំងនៅត្រីមាសទី១ដែលមានតែ០,២%។
ផ្ទុយទៅវិញ សកម្មភាពពាណិជ្ជកម្មក្រៅប្រទេសរបស់បារាំងពុំបានមកជួយអូសទាញកំណើនសេដ្ឋកិច្ចបារាំងឡើយ។ ដោយហតុថា ពាណិជ្ជកម្មក្រៅប្រទេសរបស់បារាំងបានស្រុតធ្លាក់ចុះអស់០,៤ពិន្ទុ ក្រោយពីបានកើនឡើង+០,៥ពិន្ទុនៅត្រីមាសទីមួយ។
ក្រោយពីបានឃើញតួលេខដ៏ល្អបង្គួរទាំងនេះ លោកស្រីរដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុបារាំងChristine Lagardeបានថ្លែងប្រកាសថា ប្រទេសបារាំងមានលទ្ធភាពនឹងសម្រេចបាននូវកំណើនសេដ្ឋកិច្ច១,៤%ដូចការគ្រោងចង់បានរបស់ខ្លួនសម្រាប់រយៈកាលឆ្នាំ២០១០។
កំណើនសេដ្ឋកិច្ចបារាំងពិតជាបានស្ទុះកើនឡើងខ្លាំងមែននៅត្រីមាសទីពីរឆ្នាំ២០១០នេះ ដែលបានអនុញ្ញាតឲ្យរដ្ឋាភិបាលបារាំងមានមោទនភាពនិងសង្ឃឹមសម្រេចបានជោគជ័យនូវគោលបំណងរបស់គេ ពោលគឺកំណើន១,៤%សម្រាប់ឆ្នាំ២០១០។ ក៏ប៉ុន្តែអ្នកឯកទេសយល់ថា នៅឆមាសទីពីរឆ្នាំ២០១០សេដ្ឋកិច្ចបារាំងអាចជួបនឹងបញ្ហាមួយចំនួន ដោយហេតុតែការបញ្ជាទិញនៅក្រៅប្រទេសនិងនៅក្នុងប្រទេសអាចស្គាល់ការធ្លាក់ស្រុតចុះ។
លោករដ្ឋមន្ត្រីក្រសួងថវិកាបារាំងFrançois Baroinក្រោយពីបានឃើញតួលេខនៃកំណើនសេដ្ឋកិច្ចបារាំងនៅត្រីមាសទីពីរឆ្នាំ២០១០ បានសម្ដែងឲ្យដឹងពីមោទនភាពរបសើខ្លួនហើយយល់ឃើញថា ទាំងនេះនឹងអនុញ្ញាតឲ្យរដ្ឋាភិបាលបារាំងអាចធ្វើការកាត់បន្ថយឧនភាពថវិកាជាតិដូចពាក្យសន្យាដោយពុំចាំបាច់ធ្វើការដំឡើងពន្ធដារ។
នៅក្នុងសេចក្តីថ្លែងការណ៍មួយ រដ្ឋាភិបាលបារាំងបានធ្វើការកត់សម្គាល់ថា អត្រានៃកំណើនសេដ្ឋកិច្ចបារាំងនៅត្រីមាសទី២ឆ្នាំ២០១០ដែលមាន០,៦%ពិតជាសមស្របតាមយុទ្ធសាស្ត្ររបស់រដ្ឋាភិបាលបារាំងដែលគ្រោងធ្វើការកាត់បន្ថយឧនភាពថវិកាជាតិ ដោយពុំធ្វើឲ្យប៉ះពាល់ឡើយដល់ឧបករណ៍សម្រាប់គាំទ្រនិងជួយជំរុញឲ្យមានសន្ទុះកំណើនសេដ្ឋកិច្ច។
គួរកត់សម្គាល់ថា គោលបំណងរបស់រដ្ឋាភិបាលបារាំងគឺគ្រោងធ្វើការកាត់បន្ថយឧនភាពថវិកាជាតិបារាំងឲ្យធ្លាក់មកនៅត្រឹម៣%នៃផលិតផលដុលក្នុងប្រទេសនៅរវាងឆ្នាំ២០១១ទល់នឹង៨%ដែលមាននៅឆ្នាំ២០១០នេះ។
កំណើនសេដ្ឋកិច្ចខ្លាំងរបស់ប្រទេសអាល្លឺម៉ង់ពិតជាអាចមកជួយអូសទាញសេដ្ឋកិច្ចបារាំង។ ដោយហេតុថាប្រទេសអាល្លឺម៉ង់ជាដៃគូសេដ្ឋកិច្ចទីមួយរបស់ប្រទេសបារាំង។ ដំណើរសេដ្ឋកិច្ចនិងការដោះដូរដ៏សែនសកម្មរវាងសេដ្ឋកិច្ចអាល្លឺម៉ង់និងសេដ្ឋកិច្ចបារាំងពិតជាអាចទាញយកផលចំណេញច្រើនពីសន្ទុះកំណើនសេដ្ឋកិច្ចអាល្លឺម៉ង់ដ៏សែនខ្លាំងក្លាដែលមានដល់ទៅ២,២%នៅត្រីមាសទីពីរឆ្នាំ២០១០នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ