ប្រធានាធិបតីប៉ាគីស្តង់បំពេញទស្សនកិច្ចក្នុងប្រទេសបារំាង ដើម្បីពង្រឹងទំនាក់ទំនងទ្វេភាគី
ចុះផ្សាយនៅថ្ងៃ៖
ស្តាប់ - ០៧:៤៦
លោកប្រធានាធិបតីប៉ាគីស្តង់ Asif Ali Zardari ផ្តើមបំពេញទស្សនកិច្ចផ្លូវរដ្ឋចំនួន ៥ថ្ងៃនៅក្នុងប្រទេសបារំាង។ ទស្សនកិច្ចដែលចាប់ផ្តើមពីថ្ងៃអាទិត្យ ទី១ សីហា ដល់ថ្ងៃព្រហស្បតិ៍ ទី៤ សីហា ឆ្នំា ២០១០។ នេះជាដំណើរទស្សនកិច្ចជាផ្លូវការលើកទី២របស់លោក Zardari នៅក្នុងប្រទេសបារំាង តំាងពីលោក Zardari បានឡើងកាន់តំណែងប្រធានាធិបតីប៉ាគីស្តង់ក្នុងឆ្នំា ២០០៨។
គោលដៅសំខាន់ គឺពង្រឹងទំនាក់ទំនងជាឧភតោភាគីនៅក្នុងសហប្រតិបត្តិការរវាងទីក្រុងប៉ារីស និងទីក្រុងអ៊ីស្លាម៉ាបាត។ សហប្រតិបត្តិការនៅក្នុងតំបន់ និងលើពិភពលោក សហប្រតិបត្តិការនៅលើវិស័យពាណិជ្ជកម្ម និងវិនិយោគ និងសហប្រតិបត្តិការនៅលើវិស័យវិទ្យាសាស្រ្ត និងបច្ចេកវិជ្ជា។ល។ និង។ល។ នៅក្នុងដំណើរទស្សនកិច្ចលើកទីមួយរបស់លោក Zardari ក្នុងប្រទេសបារំាងកាលពីខែឧសភា ឆ្នំា ២០០៩ បារំាង និងប៉ាគីស្តង់ធ្លាប់បាននិយាយអំពីសហប្រតិបត្តិការនៅក្នុងវិស័យនុយក្លេអ៊ែរស៊ីវិល ដែលបារំាងជាប្រទេសនំាចេញនូវបច្ចេកវិជ្ជានុយក្លេអ៊ែរស៊ីវិល។ កាលពីឆ្នំា ២០០៩ បារំាងជាអ្នកបំពាក់ឲ្យឥណ្ឌាដែលជាគូសត្រូវរបស់ប៉ាគីស្តង់ នូវម៉ាស៊ីនប្រតិករនុយក្លេអ៊ែរស៊ីវិលពី ២ ទៅ ៤ម៉ាស៊ីន។
និយាយពីទំនាក់ទំនងសេដ្ឋកិច្ចរវាងបារំាង និងប៉ាគីស្តង់ ការផ្តោះប្តូរពាណិជ្ជកម្មរវាងទីក្រុងប៉ារីស និងអ៊ីស្លាម៉ាបាតក្នុងឆ្នំា ២០០៩ មានទឹកប្រាក់រហូតដល់ទៅ ១ ១០០លានដុល្លារសហរដ្ឋអាមេរិក។
យ៉ាងណាក៏ដោយ មានសំណុំរឿងសៅហ្មងចំនួនពីរដែលបាននិងកំពុងបំពុលបរិយាកាសនៃទំនាក់ទំនងរវាងទីក្រុងបារីស និងទីក្រុងអ៊ីស្លាម៉ាបាតនារយៈពេលប៉ុន្មានឆ្នំាចុងក្រោយនេះ។ ទីមួយ៖ គឺការដែលរដ្ឋសភាបារំាងត្រៀមនឹងអនុម័តច្បាប់ហាមមិនឲ្យស្រី្តកាន់សាសនាអ៊ីស្លាមស្លៀកពាក់គ្របដណ្តប់ពីក្បាលដល់ចុងជើងនៅតាមកន្លែងសាធារណៈក្នុងប្រទេសបារំាង។ ច្បាប់ហាមប្រាមនេះត្រូវប្រជាជនប៉ាគីស្តង់ភាគច្រើនយល់ឃើញថា ជាការរំលោភសិទ្ធិសេរីភាពរបស់ប្រជាជនអ្នកកាន់សាសនាអ៊ីស្លាម ឬថាជាការប្រឆំាងនឹងសាសនាអ៊ីស្លាម។ ចំណុចសៅហ្មងទីពីរ គឺទាក់ទងនឹងអំពើភេរវកម្មក្នុងទីក្រុងការ៉ាជី ប្រទេសប៉ាគីស្តង់កាលពីឆ្នំា ២០០២ ដោយបានផ្តាច់ជីវិតពលរដ្ឋបារំាងចំនួន ១១នាក់។ បច្ចុប្បន្ន មានប្រជាជនប៉ាគីស្តង់ជិត ៧ម៉ឺននាក់កំពុងរស់នៅក្នុងប្រទេសបារំាង។
ក្រៅពីសហប្រតិបត្តិការជាឧភតោភាគី ដំណើរទស្សនកិច្ចរបស់លោកប្រធានាធិបតីប៉ាគីស្តង់ក្នុងទីក្រុងប៉ារីសនាពេលនេះ ក៏នឹងអនុញ្ញាតឲ្យភាគីទំាងពីរលើកយកមកនិយាយ នូវសំណុំរឿងមួយចំនួនទៀតដូចយ៉ាង បញ្ហាសន្តិសុខ និងការប្រយុទ្ធប្រឆំាងនឹងភេរវនិយម។
ការលេងល្បែងមុខពីររបស់ប្រទេសប៉ាគីស្តង់
កាលពីចុងខែកក្កដាកន្លងទៅ គេហទំព័រព័ត៌មានមួយឈ្មោះ Wikileaks បានចុះផ្សាយឯកសារសម្ងាត់របស់ទាហានអាមេរិកំាងពាក់ព័ន្ធនឹងសង្រ្គាមនៅក្នុងប្រទេសអាហ្វហ្កានីស្តង់។ ឯកសារសម្ងាត់ដែលមានរហូតដល់ទៅជាង ៩ម៉ឺនឯកសារ។ គឺជាឯកសារសម្ងាត់របស់ទាហានអាមេរិកំាងពាក់ព័ន្ធនឹងសង្រ្គាមនៅក្នុងប្រទេសអាហ្វហ្កានីស្តង់ចន្លោះឆ្នំា ២០០៤ និង ២០០៩។
អ្វីដែលធ្វើឲ្យទំាងអស់គ្នាចាប់អារម្មណ៍ជាងគេនៅក្នុងឯកសារសម្ងាត់នោះ គឺការលេងល្បែងមុខពីររបស់ប្រទេសប៉ាគីស្តង់ ក្នុងនាមជាសម្ព័ន្ធមិត្តចាក់ទឹកមិនលិចរបស់សហរដ្ឋអាមេរិក នៅក្នុងយុទ្ធនាការប្រយុទ្ធប្រឆំាងនឹងភេរវនិយម។ ឯកសារសម្ងាត់នោះបានបញ្ជាក់យ៉ាងច្បាស់ៗ អំពីការរួមសហការរបស់ភ្នាក់ងារស៊ើបការសម្ងាត់ប៉ាគីស្តង់ជាមួយពួកឧទ្ទាមតាលីបង់នៅក្នុងប្រទេសអាហ្វហ្កានីស្តង់។ យោងតាមឯកសារសម្ងាត់ដដែល ទីភ្នាក់ងារស៊ើបការសម្ងាត់ប៉ាគីស្តង់ថែមទំាងបានផ្តល់តំបន់កុលសម្ព័ន្ធរបស់ខ្លួននៅតាមបណ្តោយព្រំដែនជាមួយអាហ្វហ្កានីស្តង់ ឲ្យពួកមេតាលីបង់ធ្វើជាមូលដ្ឋានរបស់គេក្នុងការជ្រើសរើសសមាជិកថ្មីរបស់ខ្លួន។ ធ្ងន់ធ្ងរជាងនេះ ភ្នាក់ងារស៊ើបការសម្ងាត់ប៉ាគីស្តង់ និងមេតាលីបង់បានជួបប្រជុំគ្នាដោយសម្ងាត់ជាអចិន្ត្រៃយ៍ ដើម្បីរៀបចំផែនការ និងយុទ្ធសាស្រ្តក្នុងការវាយប្រហារទាហានអាមេរិកំាងនៅក្នុងប្រទេសអាហ្វហ្កានីស្តង់។ ឯកសារសម្ងាត់ដដែលបានបញ្ជាក់ពីការឃុបឃិតជាមួយពួកតាលីបង់ ក្នុងការប៉ុនប៉ងធ្វើឃាតលោកប្រធានាធិបតីអាហ្វហ្កានីស្តង់ Karzaï កាលពីឆ្នំា ២០០៨។
លោកប្រធានាធិបតីប៉ាគីស្តង់ Asif Ali Zardari ទើសទាល់ចិត្ត
បច្ចុប្បន្ន ប្រទេសបារំាងមានទាហានប្រមាណជា ៤០០០នាក់កំពុងបំពេញបេសកកម្មជាមួយកម្លំាងអន្តរជាតិនៅក្នុងប្រទេសអាហ្វហ្កានីស្តង់។ គោលដៅ គឺកំចាត់ពួកឧទ្ទាមតាលីបង់។ អ៊ីចឹងឃើញថា បើទីភ្នាក់ងារស៊ើបការសម្ងាត់ប៉ាគីស្តង់បានឃុបឃិតជាមួយពួកតាលីបង់ដើម្បីប្រឆំាងនឹងទាហានអាមេរិកំាងនៅក្នុងប្រទេសអាហ្វហ្កានីស្តង់ វាដូចជាការប្រឆំាងនឹងវត្តមានរបស់ទាហានបារំាងនៅទីនោះដែរ។
រហូតមកទល់ពេលនេះ ទីភ្នាក់ងារស៊ើបការសម្ងាត់ប៉ាគីស្តង់បានច្រានចោលព័ត៌មានដែលចុះផ្សាយដោយគេហទំព័រព័ត៌មាន Wikileaks។ តែបានធ្វើសម្រាប់លោកប្រធានាធិបតីប៉ាគីស្តង់ Zardarie ទើសទាល់ចិត្តយ៉ាងខ្លំាង។ មិនមែនមានតែប៉ាគីស្តង់មួយទេ ដែលពិបាកនិយាយដោះស្រាយ សូម្បីតែលោកប្រធានាធិបតីអាមេរិក Obama ក៏ពិបាកនឹងនិយាយដោះសាដែរ។ ជាមួយនឹងការថ្កោលទោសចំពោះអ្នកដែលបានលួចបញ្ជូនឯកសារសម្ងាត់ទៅឲ្យ Web Site Wikileaks លោក Obama បានចាត់ទុកព័ត៌មានទំាងនោះថា គ្មានអ្វីថ្មី និងគួរឲ្យភ្ញាក់ផ្អើលទេ។ មួយវិញទៀត លោក Obama ថែមទំាងបានព្យាយាមពន្យល់ពលរដ្ឋអាមេរិកំាងថា ដើម្បីអាចកំចាត់បណ្តាញភេរវនិយមអាល់កៃដាបាន គេគ្មានជម្រើសអ្វី ក្រៅពីបន្តសង្រ្គាមនៅប្រទេសអាហ្វហ្កានីស្តង់។
យ៉ាងណាក៏ដោយ រឿងអាស្រូវទំាងនេះមិនបានធ្វើឲ្យលោកប្រធានាធិបតីប៉ាគីស្តង់ Zardari ដែលកំពុងបំពេញទស្សនកិច្ចក្នុងប្រទេសបារំាងឈឺក្បាលទេ។ លោក Zardari ដែលបានបញ្ជាក់ថា បន្ទាប់ពីប្រទេសបារំាង លោកនឹងបន្តទស្សនកិច្ចនៅក្នុងប្រទេសអង់គ្លេសទៀត។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ