សហព័ន្ធអារ៉ាប់យល់ព្រមឲ្យមានកិច្ចចរចាផ្ទាល់រវាងប៉ាឡេស្ទីន និងអ៊ីស្រាអែល
ចុះផ្សាយនៅថ្ងៃ៖
ស្តាប់ - ០៦:០៧
នៅថ្ងៃព្រហស្បតិ៍ ទី២៩ កក្កដា ឆ្នំា ២០១០ ជំនួបកំពូលប្រចាំឆ្នាំរបស់បណ្តាប្រទេសក្នុងសហព័ន្ធអារ៉ាប់បានបិទ បញ្ចប់សម័យប្រជុំនៅក្នុងទីក្រុង Caire ប្រទេសអេហ្ស៊ីព្ទ។ ប្រធានបទចម្បងនៃសម័យប្រជុំគឺស្វែងរកសន្តិភាពរវាងភាគីជម្លោះ អ៊ីស្រាអែល និងប៉ាឡេស្ទីន។ ក្នុងសំណុំរឿងនេះ សហព័ន្ធអារ៉ាប់បានព្រមព្រៀងគ្នាជាគោលការណ៍ ឲ្យមានកិច្ចចរចាដោយផ្ទាល់រវាងអ៊ីស្រាអែល និងប៉ាឡេស្ទីន។
នៅក្នុងសេចក្តីថ្លែងការណ៍រួមចេញផ្សាយកាលពីថ្ងៃទី២៩ កក្កដា បណ្តាប្រទេសក្នុងសហព័ន្ធអារ៉ាប់មិនបានស្តីបន្ទោស ឬមួយក៏ចាប់បង្ខំភាគីអ៊ីស្រាអែល និងប៉ាឡេស្ទីន ឲ្យអនុវត្តតាមវិធានការណាមួយទេ។ អ្វីដែលសហព័ន្ធអារ៉ាប់បានព្រមព្រៀងគ្នាជាគោលការណ៍ គឺឲ្យមានកិច្ចចរចាដោយផ្ទាល់រវាងអ៊ីស្រាអែល និងប៉ាឡេស្ទីននៅក្នុងដំណើរស្វែងរកសន្តិភាពរវាងគ្នា។ តែទន្ទឹមគ្នានេះ សហព័ន្ធអារ៉ាប់បានទុកឲ្យលោកប្រធានរដ្ឋអំណាចប៉ាឡេស្ទីន Mahmoud Abbas ជាអ្នកសម្រេចចិត្កដោយខ្លួនឯង។
ជម្រើសរបស់សហព័ន្ធអារ៉ាប់ឲ្យមានកិច្ចចរចាដោយផ្ទាល់រវាងអ៊ីស្រាអែល និងប៉ាឡេស្ទីននាពេលនេះ ក៏ជាជម្រើសមួយដែលបានស្នើឡើងដោយសហរដ្ឋអាមេរិក សហភាពអឺរ៉ុប និងអង្គការសហប្រជាជាតិដែរ។ មួយវិញទៀត មានប្រទេសមួយចំនួន ដូចយ៉ាងប្រទេសអេហ្ស៊ីព្ទ និងប្រទេស Jordanie ចង់ឲ្យមានកិច្ចចរចាភ្លាមៗ តែមានប្រទេសខ្លះទៀតជំទាស់យ៉ាងប្រទេស Syrie Qatar និងប្រទេស Algérie។
ការដែលសហព័ន្ធអារ៉ាប់បានយល់ព្រមឲ្យមានកិច្ចចរចាដោយផ្ទាល់រវាងអ៊ីស្រាអែល និងប៉ាឡេស្ទីននាពេលនេះបានធ្វើឡើង ក្រោយពីមានចរចាដោយប្រយោលមិនបានជោគជ័យរវាងភាគីជម្លោះទំាងពីរដឹកនំាដោយអាមេរិកតំាងពីខែឧសភាកន្លងមក។
ភាគីប៉ាឡេស្ទីន ជាអ្នកសម្រេចចិត្តចុងក្រោយ
កន្លងមក កិច្ចចរចាដោយផ្ទាល់រវាងភាគីអ៊ីស្រាអែល និងប៉ាឡេស្ទីនធ្លាប់មានជាហូរហែ តែត្រូវបានព្យួរចោលនៅដំណាច់ឆ្នំា ២០០៨ ពោលគឺក្រោយពីការវាយប្រហាររបស់អ៊ីស្រាអែលទៅលើតំបន់ Gaza ក្នុងទឹកដីប៉ាឡេស្ទីន។ ជារួមទៅ អ្វីដែលភាគីប៉ាឡេស្ទីនចង់បានគឺរដ្ឋប៉ាឡេស្ទីនមួយឯករាជ្យ រស់ក្បែររដ្ឋអ៊ីស្រាអែល។ លោកប្រធានរដ្ឋអំណាចប៉ាឡេស្ទីន Mahmoud Abbas មិនជំទាស់នឹងការបើកកិច្ចចរចាជាថ្មីដោយផ្ទាល់ជាមួយអ៊ីស្រាអែលទេ តែលោក Abbas បានទាមទារឲ្យអ៊ីស្រាអែលបិទបញ្ចប់អាណានិគមកិច្ចរបស់ពួក Juif លើដែនដីប៉ាឡេស្ទីន និងការធានាអំពីខ្សែបន្ទាត់ព្រំដែននៃអនាគតរដ្ឋប៉ាឡេស្ទីន។ លោក Abbas បានបញ្ជាក់យ៉ាងច្បាស់ៗថា លោកនឹងមិនអង្គុយចរចាទល់មុខគ្នាជាមួយអ៊ីស្រាអែលជាដាច់ខាត ប្រសិនបើអ៊ីស្រាអែលមិនព្រមបិទបញ្ចប់អាណានិគមកិច្ចរបស់ពួក Juif លើទឹកដីប៉ាឡេស្ទីន និងមិនព្រមកំណត់ខ្សែបន្ទាត់ព្រំដែនឲ្យបានត្រឹមត្រូវសម្រាប់អនាគតរដ្ឋប៉ាឡេស្ទីនទេនោះ។
មិនថាតែភាគីប៉ាឡេស្ទីនម្នាក់ទេ គឺប្រទេសអារ៉ាប់សឹងតែទំាងអស់តែម្តងដែលបានទាមទារឲ្យមានការលើកយកមកជជែកឡើងវិញ អំពីខ្សែបន្ទាត់ព្រំដែនកាលពីឆ្នំា ១៩៦៧។ លោក Amr Moussa, អគ្គលេខាធិការសហព័ន្ធអារ៉ាប់បានបញ្ជាក់ថា មានលក្ខខណ្ឌចំនួន៣ដើម្បីអាចឲ្យកិច្ចចរចាផ្ទាល់រវាងប៉ាឡេស្ទីន និងអ៊ីស្រាអែលអាចចាប់ផ្តើមបាន ទីមួយ៖ ត្រូវមានការធានាជាលាយលក្ខណ៍អក្សរពីភាគីពាក់ព័ន្ធជាមុនសិន ទីពីរ៖ កិច្ចចរចាត្រូវតែមានលក្ខណៈប្រាកដប្រជា និងទីបី៖ កិច្ចចរចាត្រូវតែលើកមកនិយាយអំពីលក្ខន្តិកនៃអនាគតរដ្ឋប៉ាឡេស្ទីន និងផែនការសន្តិភាព។ យ៉ាងណាក៏ដោយ លោកនាយករដ្ឋមន្រ្តីអ៊ីស្រាអែល Benjamin Netanyahu បានបញ្ជាក់ច្បាស់ៗថា លោកមិនអាចទទួលយកលក្ខខ័ណ្ឌទំាងនេះបានទេ។
លោកប្រធានរដ្ឋអំណាចប៉ាឡេស្ទីន Mahmoud Abbas ស្ថិតក្រោមគំនាប
ជាងពេលណាៗទំាងអស់ សហគមន៍អន្តរជាតិក្នុងនោះមានសហរដ្ឋអាមេរិក សហភាពអឺរ៉ុប និងអង្គការសហប្រជាជាតិ កំពុងព្យាយាមនិយាយជំនះភាគីប៉ាឡេស្ទីន និងអ៊ីស្រាអែលឲ្យត្រឡប់មកអង្គុយចរចាទល់មុខគ្នាឡើងវិញ។ លោកប្រធានាធិបតីអាមេរិក Obama ធ្លាប់បាននិយាយកាលពីដើមខែកក្កដានេះថា លោកសង្ឃឹមថាកិច្ចចរចាដោយផ្ទាល់រវាងប៉ាឡេស្ទីន និងអ៊ីស្រាអែលនឹងអាចចាប់ផ្តើមជាថ្មីនៅមុនថ្ងៃទី ២៦ កញ្ញាខាងមុខ។ លោកប្រធានរដ្ឋអំណាចប៉ាឡេស្ទីន Mahmoud Abbas ផ្ទាល់ខ្លួនបានប្រាប់ឲ្យដឹងថា ក្នុងមួយជីវិតរបស់លោក លោកមិនដែលបានទទួលគំនាបពីសហគមន៍អន្តរជាតិខ្លំាងដល់ម្លឹងទេ។ តែលោក Abbas ក៏បានរម្លឹកជាថ្មីទៀតថា អ្វីដែលលោកបានទាមទារនាពេលនេះ គឺមិនមែនដើម្បីប្រយោជន៍ផ្ទាល់ខ្លួនទេ តែដើម្បីអនាគតរដ្ឋប៉ាឡេស្ទីនមួយ រស់ក្បែររដ្ឋអ៊ីស្រាអែលដោយសន្តិភាព។ ជារួមទៅ អ្វីដែលសំខាន់មិនមែនស្ថិតលើគំនាបរបស់អ្នកនេះ ឬអ្នកនោះទេ តែវាអាស្រ័យទំាងស្រុងលើឆន្ទៈរបស់ភាគីដែលពាក់ព័ន្ធ គឺអ៊ីស្រាអែល និងប៉ាឡេស្ទីន។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ