ការបោះឆ្នោតជ្រើសតាំងសមាជិកព្រឹទ្ធសភាជប៉ុន
ចុះផ្សាយនៅថ្ងៃ៖
ស្តាប់ - ០៥:០៦
នៅថ្ងៃអាទិត្យនេះ ប្រជាជនជប៉ុនត្រូវចូលរួមធ្វើការបោះឆ្នោតជ្រើសតាំងសមាជិក ព្រឹទ្ធសភាជប៉ុនចំនួនពាក់កណ្តាលពោលគឺ១២១នាក់ក្នុងចំណោមសមាជិក ទាំងអស់២៤២នាក់។ ការបោះឆ្នោតជ្រើសតាំងសមាជិកព្រឹទ្ធសភាជប៉ុនលើកនេះមានលក្ខណៈជា” Test”មួយសម្រាប់លោកនាយករដ្ឋមន្ត្រីជប៉ុនថ្មី Naoto Kan ដែលបានឡើងមកកាន់អំណាចបានប្រមាណមួយខែ។
ការបោះឆ្នោតជ្រើសតាំងសមាជិកព្រឹទ្ធសភាជប៉ុនលើកនេះត្រូវគេចាត់ទុកថាជា”Test”មួយសម្រាប់លោកនាយករដ្ឋមន្ត្រីជប៉ុនថ្មី Naoto Kan បណ្តាលមកពីបក្សប្រជាធិបតេយ្យជប៉ុន( PDJ )ដែលបានឡើងមកកាន់កាប់អំណាចតាំងពីខែកញ្ញាឆ្នាំ២០០៩ ក្រោយពីបានទទួលជោគជ័យយ៉ាងត្រចះត្រចង់នាឱកាសបោះឆ្នោតសភានៅប៉ុន្មានខែមុននេះ សង្ឃឹមថានឹងអាចក្តោបក្តាប់ព្រឹទ្ធសភាជប៉ុនបន្តទៅទៀត ដោយមានជំនួយគាំទ្រពីសំណាក់សមាជិកព្រឹត្ធសភាមកពីគណបក្សដទៃទៀត។
ការិយាល័យបោះឆ្នោតចាប់បើកទ្វារនៅម៉ោង៧ព្រឹកដើម្បីទទួលប្រជាជនជប៉ុនប្រមាណ១០៤លាននាក់ឲ្យមកចូលរួមធ្វើការបោះឆ្នោតជ្រើសតាំងសមាជិកព្រឹទ្ធសភាចំនួនពាក់កណ្តាលពោលគឺ១២១នាក់ក្នុងចំណោមសមាជិកទាំងអស់២៤២នាក់។ ការិយាល័យនឹងត្រូវបិទទ្វារនៅម៉ោង៨យប់ត្រូវជាម៉ោង១១ម៉ោងសាកល។
ដើម្បីរក្សាឲ្យបានមតិភាគច្រើននៅព្រឹទ្ធសភាជប៉ុន ក្រុមបក្សចម្រុះដែលក្នុងនោះមាន បក្សប្រជាធិបតេយ្យជប៉ុន( PDJ ) គណបក្សថ្មីរបស់ប្រជាជន( NPP ) និងគណបក្សអ្នកជាតិនិយមតូចៗឯទៀត ត្រូវទទួលឲ្យបាន៥៦អាសនៈនៅក្នុងចំណោមអាសនៈទាំងអស់១២១ដែលគេដាក់ប្រកួតប្រជែង។
បើយោងតាមការស្ទាបស្ទង់មតិនៅពេលថ្មីៗកន្លងទៅនេះ ប្រជាជនជប៉ុនមានការខកចិត្តយ៉ាងខ្លាំង ដោយហេតុតែ លោកនាយករដ្ឋមន្ត្រីជប៉ុនថ្មីNaoto Kanបានប្រកាសឲ្យដឹងថា អាចមានការដំឡើងពន្ធដារទៅលើការទិញដូរហូបចុក ដែលបច្ចុប្បន្ននេះមានអត្រា៥%។ ដូច្នេះហើយបានជាគេបារម្ភខ្លាចក្រែងសម្លេងឆ្នោតទាំងនោះអាចបាត់បង់រប៉ាត់រប៉ាយរត់ទៅចូលគណបក្សដទៃទៀតដែលមានចំនួនប្រាំបី។
សូមគូសបញ្ជាក់ថា ការបោះឆ្នោតជ្រើសតាំងសមាជិកព្រឹទ្ធសភាជប៉ុនលើកនេះគឺពិតជាជា”Test”មួយសម្រាប់លោកនាយករដ្ឋមន្ត្រីជប៉ុនថ្មីNaoto Kanដែលជាអតីតសកម្មជននៃបក្សឆ្វេងនិយម ហើយឥឡូវនេះបានប្រែមកគាំទ្រនយោបាយថវិកាត្បិតត្បៀតទៅវិញ។ ការបោះឆ្នោតជ្រើសតាំងសមាជិកព្រឹទ្ធសភាជប៉ុនលើកនេះត្រូវគេចាត់ទុកថាជា”Test”មួយសម្រាប់លោកនាយករដ្ឋមន្ត្រីជប៉ុនថ្មីNaoto Kanដែលមានអាយុ៦៣ឆ្នាំ លោកបានឡើងមកទទួលតំណែងតស្នងពីលោកអតីតនាយករដ្ឋមន្ត្រីYukio Hatoyamaដែលបានលាចេញពីមុខតំណែងក្រោយពីបានឡើងមកកាន់អំណាចបានតែ៩ខែ ហើយត្រូវបង្ខំខ្លួនចាកចេញពីមុខតំណែង ដោយហេតុតែអប្រជាប្រិយនិងអសមត្ថភាពក្នុងការគ្រប់គ្រងប្រទេស។
បើប្រសិនជា បក្សប្រជាធិបតេយ្យជប៉ុន( PDJ )បាត់បង់មតិភាគច្រើននៅព្រឹទ្ធសភាមែននោះ បក្សប្រជាធិបតេយ្យជប៉ុនត្រូវតែបង្ខំខ្លួនស្វះស្វែងរកចងសម្ពន្ធភាពជាមួយគណបក្សផ្សេងទៀតដើម្បីអាចបន្តគ្រប់គ្រងប្រទេស។ ដូច្នេះ សេរីភាពនិងការរិះរកអនុវត្តនយោបាយរបស់បក្សប្រជាធិបតេយ្យជប៉ុន( PDJ ) ក៏អាចស្គាល់ការរួញខើតតាមនោះដែរ។ ហេតុដូច្នោះហើយ បានជាបក្សប្រជាធិបតេយ្យជប៉ុនបានធ្វើសេចក្តីប្រកាសនៅថ្ងៃអាទិត្យនេះថា បក្សប្រជាធិបតេយ្យជប៉ុនត្រូវតែបន្តអភិវឌ្ឍប្រទេសដោយឈរលើគោលការណ៍និងមូលដ្ឋាននយោបាយមួយដែលមានស្ថិរភាព ប្រជាជនជប៉ុនគួរតែបន្តផ្តល់សម្លេងឆ្នោតគាំទ្រឲ្យបក្សប្រជាធិបតេយ្យជប៉ុន( PDJ )នៅព្រឹទ្ធសភាជប៉ុន។
បក្សប្រជាធិបតេយ្យជប៉ុន( PDJ )ក៏បានធ្វើការសុំទោសប្រជាជនជប៉ុនផងដែរចំពោះរឿងអាស្រូវដែលបានកើតមានដោយហេតុតែមានបញ្ហាពុករលួយពាក់ព័ន្ធនឹងសំណុំរឿងហិរញ្ញប្បទានដែលបានកើតមានអស់រយៈដប់ខែ ហើយនិងរឿងរញេរញៃជុំវិញបញ្ហាប្តូរទីតាំងមូលដ្ឋានយោធាអាមេរិកនៅកោះអូគីណាវ៉ា។ លោកនាយករដ្ឋមន្ត្រីជប៉ុនថ្មីNaoto Kan ដែលបានឡើងមកកាន់អំណាចបានប្រមាណមួយខែត្រូវការសម្លេងគាំទ្រពីប្រជាជនជប៉ុនដើម្បីបើកទំព័រមួយថ្មីសម្រាប់គ្រប់គ្រងប្រទេសជប៉ុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ