អៀរ៉ង់ត្រៀមជាស្រេចនឹងចរចាជាមួយក្រុមប្រទេស៥+១
ចុះផ្សាយនៅថ្ងៃ៖
ស្តាប់ - ០៣:០៥
ប្រទេសអៀរ៉ង់បានប្រកាសឲ្យដឹងកាល ពីថ្ងៃអង្គារម្សិលមិញថាបានត្រៀមជាស្រេចនឹងចាប់ធ្វើការចរចា ឡើងវិញជាមួយក្រុមប្រទេស៥+១នៅខែកញ្ញាខាងមុខនេះស្ដីពីកម្មវិធី នុយក្លេអ៊ែរ។ ក៏ប៉ុន្តែលុះត្រាណាតែកម្មវត្ថុនៃកិច្ចចរចានោះមានលក្ខណៈជាក់ ច្បាស់ជាមុនសិន។
សហរដ្ឋអាមេរិកបានប្រកាសឲ្យដឹងថា គេបានត្រៀមជាស្រេចនឹងធ្វើការចរចាជាមួយប្រទេសអៀរ៉ង់ លុះត្រាណាតែសំណើរបស់អៀរ៉ង់ដែលស្នើចាប់ធ្វើការចរចាឡើងវិញជាមួយក្រុមប្រទេស៥+១នៅខែកញ្ញាខាងមុខនេះស្ដីពីកម្មវិធីនុយក្លេអ៊ែរមានលក្ខណៈហ្មត់ចត់ត្រឹមត្រូវ។ ចំណែកឯលោកប្រធានាធិបតីអាមេរិកបារ៉ាក់អូបាម៉ាដែលមានជំនួបជាមួយលោកនាយករដ្ឋមន្ត្រីអ៊ីស្រាអែលនេតានយ៉ាហូបានថ្លែងឲ្យដឹងថា លោកនៅតែទាមទារឲ្យបន្តដាក់សម្ពាធទៅលើប្រទេសអៀរ៉ង់ពាក់ព័ន្ធនឹងបញ្ហនុយក្លេអ៊ែរនេះ។ ទាំងនេះក្នុងគោលបំណងបង្ខំឲ្យទីក្រុងតេហេរ៉ង់គោរពពាក្យសន្យារបស់ខ្លួនជាមួយសហគមន៍អន្តរជាតិ ហើយនិងឲ្យអៀរ៉ង់បញ្ឈប់ទង្វើគំរាមកំហែងទៅលើប្រទេសជិតខាង។
សហភាពអឺរ៉ុបឯណេះយល់ថា សំណើរបស់ប្រទេសអៀរ៉ង់គឺជាដំណឹងល្អ ក៏ប៉ុន្តែទីក្រុងតេហេរ៉ង់ត្រូវតែចរចាឲ្យបានហ្មត់ចត់ពីបញ្ហានុយក្លេអ៊ែរ ហើយពុំត្រូវនិយាយចរចាពីបញ្ហាដទៃទៀតឡើយ។
ប្រធាននៃក្រុមអ្នកចរចាអៀរ៉ង់លោកSaïd Jalili នៅក្នុងលិខិតមួយផ្ញើទៅលោកស្រីប្រមុខការទូតនៃសហភាពអឺរ៉ុបCatherine Ashton បានបញ្ជាក់ថា “នៅខណៈដែលកម្មវត្ថុនៃកិច្ចចរចាពាក់ព័ន្ធនឹងបញ្ហានុយក្លេអ៊ែរមានលក្ខណៈជាក់ច្បាស់ ប្រទេសអៀរ៉ង់ត្រៀមខ្លួនជាស្រេចនឹងពង្រឹងកិច្ចសហប្រតិបត្តិការជាមួយសហគមន៍អន្តរជាតិ។
គួរកត់សម្គាល់ថា លោកស្រីAshton ប្រមុខការទូតនៃសហភាពអឺរ៉ុបបានសរសេរលិខិតមួយច្បាប់កាលពីពាក់កណ្តាលខែមិថុនាផ្ញើទៅលោកប្រធានដឹកនាំកិច្ចចរចាលោកSaïd Jaliliដើម្បីឲ្យប្រទេសអៀរ៉ង់ចាប់ធ្វើកិច្ចចរចាឡើងវិញជាមួយក្រុមប្រទេស៥+១ដែលក្នុងនោះមាន៖ សហរដ្ឋអាមេរិក ប្រទេសរុស្ស៊ី ប្រទេសចិន ប្រទេសបារាំង ប្រទេសអង់គ្លេស និងប្រទេសអាល្លឺម៉ង់។ ទាំងនេះក្រោយពីមានការអនុម័តទៅលើសេចក្តីសម្រេចចិត្តរបស់ក្រុមប្រឹក្សាសន្តិសុខនៃអង្គការសហប្រជាជាតិកាលពីថ្ងៃទី៩មិថុនាកន្លងទៅ។
ប៉ុន្តែលោកSaïd Jaliliបានបញ្ចេញលក្ខខណ្ឌដែលបានដាក់ដោយលោកប្រធានាធិបតីអៀរ៉ង់Mahmoud Ahmadinejad កាលពីថ្ងៃទី២៨មិថុនាទៅលើប្រទេសមហាអំណាច។ លក្ខខណ្ឌទាំងនោះមាន៖
-កិច្ចចរចាត្រូវមានកម្មវត្ថុច្បាស់លាស់ពោលគឺត្រូវមានសហប្រតិបត្តិការនឹងគ្នា ឬត្រូវបន្តឲ្យមានអរិភាពនឹងគ្នា។
-ឬមួយប្រទេសអៀរ៉ង់ត្រូវបន្តធ្វើការប្រយុទ្ធប្រឆាំងដើម្បីការពារសិទ្ធិសេរីភាពរបស់ខ្លួនក្នុងវិស័យនុយក្លេអ៊ែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ