ធនាគារឯកជនទំនងជាត្រូវចូលរួមវិភាគទានក្នុងផែនការជួយក្រិកចេញពីវិបត្តិបំណុល
ចុះផ្សាយនៅថ្ងៃ៖
ស្តាប់ - ០៣:៤៨
ប្រមុខដឹកនាំបារាំងនិងអាល្លឺម៉ង់បានព្រមព្រៀងគ្នា កាលពីយប់ថ្ងៃពុធ ២០ កក្កដា ២០១១ លើផែនការជួយសង្រ្គោះប្រទេសក្រិក ក្នុងជំហានទីពីរ។ សំណើរួមបារាំង-អាល្លឺម៉ង់នេះត្រូវដាក់ជូនប្រទេសសមាជិកតំបន់អឺរ៉ូផ្សេងទៀតពិភាក្សាគ្នា ក្នុងជំនួបកំពូល នៅទីក្រុងប៊្រុចស៊ែល នៅរសៀលថ្ងៃព្រហស្បតិ៍នេះ។ ក្នុងសំណើនេះក៏មានចំណុចពាក់ព័ន្ធនឹងតួនាទីរបស់ធនាគារឯកជនផងដែរ។
បារាំងនិងអាល្លឺម៉ង់បានព្រមព្រៀងគ្នាលើជំហររួមមួយជុំវិញវិបត្តិក្រិក ក្រោយពីបានចរចាគ្នាអស់រយៈពេល ៧ម៉ោងរហូតដល់យប់ជ្រៅ កាលពីថ្ងៃពុធ។ នេះបើយោងតាមសេចក្តីថ្លែងការណ៍របស់ប្រធានាធិបតីបារាំង។ ខ្លឹមសារលម្អិតនៃការព្រមព្រៀងគ្នានេះ មិនត្រូវបានគេប្រកាសឲ្យដឹងនោះទេ ក៏ប៉ុន្តែ ក្នុងសេចក្តីថ្លែងការណ៍ បារាំងបានបញ្ជាក់ថា ផែនការនេះ នឹងមានរួមបញ្ចូលផងដែរ អំពីការចូលរួមវិភាគទានរបស់ធនាគារឯកជនអឺរ៉ុប ក្នុងកញ្ចប់ថវិកាជួយប្រទេសក្រិក។
ប្រមុខរដ្ឋ និងប្រមុខរដ្ឋាភិបាលនៃបណ្តាប្រទេសក្នុងតំបន់អឺរ៉ូ (ប្រទេសទាំង ១៧ ដែលចាយលុយអឺរ៉ូ) ត្រូវបើកធ្វើជំនួបកំពូលមួយ នៅរសៀលថ្ងៃព្រហស្បតិ៍នេះ ដើម្បីពិភាក្សាគ្នាអំពីវិបត្តិក្រិក។ លោកបារ៉ូសូ (José Manuel Barroso) ប្រធានគណៈកម្មការអឺរ៉ុប បានមានប្រសាសន៍ថា វិបត្តិក្រិកទាមទារចាំបាច់នូវដំណោះស្រាយដ៏មានប្រសិទ្ធភាពមួយ។ បើមិនដូច្នោះទេ វានឹងជះឥទ្ធិពលអវិជ្ជមាននៅពេញតំបន់អឺរ៉ុបទាំងមូល ហើយអាចរាលដាលទៅកាន់តំបន់ផ្សេងទៀតផង។
គួររំឭកឡើងវិញថា កាលពីខែឧសភា ឆ្នាំ២០១០ អឺរ៉ុបបានជួយក្រិកម្តងរួចមកហើយ ដោយកញ្ចប់ថវិកាចំនួន ១១០ពាន់លានអឺរ៉ូ។ ប៉ុន្តែ ជំនួយនោះមិនគ្រប់គ្រាន់ ដើម្បីជួយក្រិកឲ្យចេញផុតពីវិបត្តិប្រាក់បំណុលបានទេ។ នៅក្នុងការអនុម័តផែនការជួយក្រិក ក្នុងជំហានទីពីរ ប្រទេសក្នុងតំបន់អឺរ៉ូមានការខ្វែងគំនិតគ្នា ជាពិសេស ទៅលើការចូលរួមរបស់វិស័យឯកជន។
អាល្លឺម៉ង់ទាមទារឲ្យអ្នកវិនិយោគឯកជន ជាពិសេស ធនាគារឯកជន ក្នុងតំបន់អឺរ៉ូ ចូលរួមវិភាគទានក្នុងកញ្ចប់ថវិកាថ្មី ដើម្បីជួយក្រិក។ សំណើនេះត្រូវបានប្រទេសបារាំង រួមជាមួយនឹងធនាគារកណ្តាលសហភាពអឺរ៉ុប ធ្វើការជំទាស់។
ក្រោយពីមានកិច្ចព្រមព្រៀងរវាងបារាំង និងអាល្លឺម៉ង់ កាលពីថ្ងៃពុធ គេរំពឹងថា អ្នកវិនិយោគឯកជនទំនងជាចៀសមិនផុតពីការចូលរួមវិភាគទាន ក្នុងកញ្ចប់ថវិកាជួយក្រិកលើកនេះទេ។ សំណួរចោទសួរថា តើពួកគេនឹងត្រូវចូលរួមវិភាគទានក្នុងកម្រិតណា? ក្នុងរូបភាពបែបណា?
កន្លងទៅនេះ ជម្រើសមួយចំនួន តែងតែត្រូវបានគេលើកយកមកជជែកគ្នា ជុំវិញការចូលរួមវិភាគទានរបស់វិស័យឯកជនក្នុងកញ្ចប់ថវិកាជួយក្រិក។
ទីមួយ គេចង់ឲ្យអ្នកវិនិយោគឯកជនដែលកាន់សញ្ញាប័ណ្ណក្រិក (មូលបត្របំណុល) ហើយដែលសញ្ញាប័ណ្ណនេះត្រូវដល់ឥណប្រតិទាន (ដល់កាលកំណត់សង ឬតាមភាសាអង់គ្លេស Maturity) ត្រូវពន្យារពេលសញ្ញាប័ណ្ណនេះបន្តទៀត ដោយរក្សាទុកលក្ខខណ្ឌឲ្យនៅដដែល (អត្រាការប្រាក់ និងឥណប្រតិទាន)។
ទីពីរ អ្នកវិនិយោគឯកជនដែលកាន់សញ្ញាប័ណ្ណក្រិក ហើយដែលសញ្ញាប័ណ្ណនោះមានឥណប្រតិទានរយៈពេលខ្លី ឬរយៈពេលមធ្យម (មុនឆ្នាំ២០១៩) អ្នកវិនិយោគទាំងនោះត្រូវយកសញ្ញាប័ណ្ណចាស់ មកប្តូរនឹងសញ្ញាប័ណ្ណថ្មី (តាមភាសាអង់គ្លេស Bond Swap) ដែលមានឥណប្រតិទានយូរជាងមុន (៣០ឆ្នាំ)។
ទីបី គេចង់បង្កើតពន្ធពិសេសលើធនាគារឯកជន ក្នុងតំបន់អឺរ៉ូ។ គេរំពឹងថា តាមរយៈពន្ធនេះគេនឹងអាចប្រមូលលុយបានប្រមាណ ៥០ពាន់លានអឺរ៉ូ ក្នុងរយៈពេល ៥ឆ្នាំ ហើយលុយនេះ នឹងត្រូវយកទៅដាក់បញ្ចូលក្នុងកញ្ចប់ថវិកា ដើម្បីជួយក្រិក។
វិភាគទានរបស់អ្នកវិនិយោគឯកជនទាំងនេះ នឹងត្រូវយកទៅបូកបន្ថែមនឹងកញ្ចប់ថវិការបស់រដ្ឋក្នុងតំបន់អឺរ៉ូ ដែលគេប៉ាន់ប្រមាណថា នឹងមានចំនួនពី ៧០ពាន់ ទៅ១០០ពាន់លានអឺរ៉ូ ដើម្បីជួយក្រិក ពីពេលនេះ រហូតដល់ឆ្នាំ២០១៤៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ