អាស៊ីត្រូវតែបង្កើនយុទ្ធនាការប្រយុទ្ធប្រឆាំងនឹងជំងឺគ្រុនចាញ់
ក្រុមអ្នកជំនាញខាងជំងឺគ្រុនចាញ់បានចេញផ្សាយរបាយការណ៍មួយ នៅថ្ងៃសុក្រនេះ បង្ហាញថា នៅក្នុងតំបន់អាស៊ី មានករណីគ្រុនចាញ់កើតឡើង ប្រមាណជា ៣០លានករណី ក្នុងមួយឆ្នាំៗ ដែលគេចាំបាច់ត្រូវតែចាត់វិធានការជាបន្ទាន់ ដើម្បីទប់ស្កាត់ជំងឺដ៏កាចសាហាវមួយនេះ។ គិតរហូតមកទល់នឹងពេលបច្ចុប្បន្ននេះ យុទ្ធនាការប្រយុទ្ធប្រឆាំងនឹងជំងឺគ្រុនចាញ់បានផ្តោតភាគច្រើនទៅលើតំបន់អាហ្វ្រិក ក្នុងពេលដែលប្រជាជនប្រឈមមុខនឹងជំងឺនេះ ភាគច្រើន រស់នៅក្នុងតំបន់អាស៊ី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣០
នៅក្នុងពេលបច្ចុប្បន្ននេះ បើទោះជាវិស័យវេជ្ជសាស្រ្តមានការរីកចម្រើនខ្លាំងក្តី ក៏ពិភពលោកនៅតែប្រឈមមុខខ្លាំងនឹងជំងឺគ្រុនចាញ់ដដែល។ គិតជាមធ្យម ក្នុងមួយឆ្នាំៗ ករណីជំងឺគ្រុនចាញ់បានកើតមានឡើង ប្រមាណជា ២១៦លានករណី នៅទូទាំងពិភពលោក ហើយបណ្តាលឲ្យមានមនុស្សស្លាប់ប្រមាណជា ៦៥ម៉ឺននាក់។
នៅក្នុងតំបន់អាស៊ី ករណីគ្រុនចាញ់កើតមានឡើងប្រមាណជា ៣០លានករណី ក្នុងមួយឆ្នាំៗ ហើយមានអ្នកស្លាប់ប្រមាណជា ៤ម៉ឺន ២ពាន់នាក់។ នេះបើយោងតាមរបាយការណ៍របស់ក្រុមអ្នកជំនាញខាងជំងឺគ្រុនចាញ់ ដែលកំពុងបើកធ្វើសន្និសីទ នៅក្នុងប្រទេសអូស្រ្តាលី។ នៅអាស៊ី ប្រទេសដែលរងគ្រោះដោយគ្រុនចាញ់ខ្លាំងជាងគេ គឺរួមមាន ឥណ្ឌា ឥណ្ឌូណេស៊ី ប៉ាគីស្ថាន ភូមា និងប៉ាពូអាស៊ី នូវែលហ្គីណេ។
របាយការណ៍នេះ បានស្នើឲ្យថ្នាក់ដឹកនាំនៅក្នុងតំបន់អាស៊ី គិតគូរចាត់វិធានការជាបន្ទាន់ ដើម្បីប្រយុទ្ធប្រឆាំងនឹងជំងឺដ៏កាចសាហាវមួយនេះ។ រដ្ឋមន្រ្តីការបរទេសអូស្រ្តាលី ដែលបានចូលរួមក្នុងសន្និសីទស្តីពីជំងឺគ្រុនចាញ់នេះ បានសន្យាថា អូស្រ្តាលីនឹងផ្តល់ថវិកាចំនួន ១០០លានដុល្លារ សម្រាប់រយៈពេល ៤ឆ្នាំ ដើម្បីប្រយុទ្ធនឹងជំងឺគ្រុនចាញ់ ក្នុងតំបន់អាស៊ី-ប៉ាស៊ីហ្វ៊ិក។
គួរបញ្ជាក់ថា ជាទូទៅ គេសង្កេតឃើញថា គិតរហូតមកទល់ពេលនេះ យុទ្ធនាការប្រយុទ្ធប្រឆាំងនឹងជំងឺគ្រុនចាញ់ ច្រើនតែផ្តោតអាទិភាពទៅលើតំបន់អាហ្វ្រិក ដោយសារតែក្នុងមួយឆ្នាំៗ ចំនួនអ្នកស្លាប់ដោយជំងឺគ្រុនចាញ់ ក្នុងតំបន់នេះ មានចំនួនច្រើនជាងគេ។
ក៏ប៉ុន្តែ ថ្វីដ្បិតតែតំបន់អាស៊ី រងគ្រោះតិចជាងតំបន់អាហ្វ្រិកក៏ពិតមែន បើគិតតាមចំនួនអ្នកស្លាប់ ប៉ុន្តែ បើគិតតាមចំនួនប្រជាជន ដែលរស់នៅប្រឈមមុខនឹងមេរោគគ្រុនចាញ់នេះ តំបន់អាស៊ីមានការប្រឈមខ្លាំងជាងគេ ពោលគឺ ក្នុងចំណោមប្រជាជនសរុប ៣ពាន់ ៣រយលាននាក់ ដែលរស់នៅប្រឈមមុខនឹងមេរោគគ្រុនចាញ់ មានប្រមាណជា ២ពាន់លាននាក់ ស្ថិតក្នុងតំបន់អាស៊ី។
ម្យ៉ាងវិញទៀត មេរោគគ្រុនចាញ់នៅអាស៊ី ត្រូវបានគេស្គាល់ជាទូទៅថា ជាប្រភេទមេរោគ ដែលស៊ាំនឹងថ្នាំពេទ្យ ពិបាកក្នុងការព្យាបាល។ មេរោគគ្រុនចាញ់ ដែលស៊ាំនឹងថ្នាំពេទ្យនេះ ត្រូវបានគេរកឃើញជាដំបូងបង្អស់ កាលពី ៨ឆ្នាំមុន នៅក្នុងប្រទេសកម្ពុជា នៅតាមតំបន់ជាប់នឹងព្រំដែនថៃ។ ក្រោយៗមកទៀត មេរោគប្រភេទនេះក៏ត្រូវបានគេរកឃើញនៅតាមតំបន់ផ្សេងៗទៀត គឺនៅតាមតំបន់ព្រំដែនរវាងថៃ និងភូមា និងនៅផ្នែកខ្លះ ក្នុងប្រទេសវៀតណាម។
គិតមកទល់នឹងពេលនេះ ក្រុមគ្រូពេទ្យជំនាញនៅតែមិនទាន់រកឃើញមូលហេតុច្បាស់លាស់ថា ហេតុអ្វីបានជាករណីមេរោគគ្រុនចាញ់ ដែលស៊ាំនឹងថ្នាំពេទ្យ បានចាប់ផ្តើមផ្ទុះឡើង នៅកម្ពុជា។ ក៏ប៉ុន្តែ មានការសន្និដ្ឋានជាជំហានដំបូងថា ប្រហែលជាមកពីកម្ពុជាបានចាប់ផ្តើមប្រើថ្នាំគ្រុនចាញ់មុនគេ ពោលគឺ តាំងពីប្រមាណជា ៣០ឆ្នាំមុន ហើយថ្នាំដែលប្រើនេះ អាចមានថ្នាំក្លែងក្លាយច្រើន ដែលមិនសូវមានប្រសិទ្ធិភាព ឬមានអ្នកជំងឺខ្លះប្រើថ្នាំពិតប្រាកដដែរ ប៉ុន្តែ ប្រើមិនគ្រប់ទៅតាមវេជ្ជបញ្ជា ទើបធ្វើឲ្យមេរោគគ្រុនចាញ់នេះ ចាប់ផ្តើមស៊ាំនឹងថ្នាំពេទ្យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ