ព្រះសង្ឃ ធ្វើធម្មយាត្រា ផ្សព្វផ្សាយពីគ្រោះថ្នាក់ នៃជំងឺគ្រុនចាញ់
ព្រះសង្ឃជាច្រើនអង្គ នឹងធ្វើធម្មយាត្រា រយៈពេលប្រាំថ្ងៃ ចាប់ពីថ្ងៃទី២៧សីហា ដើម្បីអប់រំប្រជាជនចំណាកស្រុក ឲ្យយល់ដឹងពីគ្រោះថ្នាក់នៃជំងឺគ្រុនចាញ់។ ធម្មយាត្រាដ៏ធំជាលើកដំបូង នៅខេត្តប៉ៃលិន ជាប់ព្រំដែនថៃ នឹងធ្វើឡើង ក្នុងគោលបំណង កាត់បន្ថយអត្រាស៊ាំថ្នាំ ព្យាបាលជំងឺគ្រុនចាញ់ និងកិច្ចការពារ ដោយសម្រាកក្នុងមុង ដើម្បីកុំឲ្យមូសខាំ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:០៦
ធម្មយាត្រា ផ្សព្វផ្សាយពីកិច្ចការពារជំងឺគ្រុនចាញ់ នឹងប្រព្រឹត្តធ្វើឡើង នៅថ្ងៃទី២៧ ដល់ថ្ងៃទី៣១ ខែសីហា ឆ្នាំ២០១២ ដោយមានព្រះសង្ឃ ចំនួន ៦០អង្គ យាយជី ១០នាក់ តាអាចារ្យ ១០ នាក់ និងអ្នកស្ម័គ្រចិត្តអប់រំជំងឺគ្រុនចាញ់ តាមភូមិចំនួន ១៣៨ នាក់ ព្រមទាំងមន្ត្រីរដ្ឋាភិបាលជាច្រើនរូបទៀត។
សេចក្តីប្រកាសព័ត៌មាន ចុះថ្ងៃទី២២ ខែសីហា ឆ្នាំ២០១២ បង្ហាញថា ធម្មយាត្រាដ៏ធំនោះ ធ្វើឡើង បន្ទាប់ពីអង្គការសុខភាពពិភពលោក បានព្រមានកាលពីឆ្នាំមុនថា អត្រាស៊ាំថ្នាំព្យាបាលជំងឺគ្រុនចាញ់ នៅតាមព្រំដែនកម្ពុជា-ថៃ នឹងមានការកើនឡើងគួរអោយព្រួយបារម្ភ។ មូលហេតុ ដែលបណ្តាលអោយមានភាពស៊ាំថ្នាំនេះ ជារឿយៗ បណ្តាលមកពីការព្យាបាល មិនបានត្រឹមត្រូវ និងការរីករាលដាលនៃថ្នាំព្យាបាលជំងឺគ្រុនចាញ់ក្លែងក្លាយនៅតំបន់ទាំងនោះ។
សេចក្តីប្រកាសក៏លើកឡើងថា ការធ្វើធម្មយាត្រារបស់ព្រះសង្ឃ យាយជី តាអាចារ្យរាប់សិបនាក់នេះ បានបង្ហាញពីសារៈសំខាន់នៃការចូលរួមចំណែកកាត់បន្ថយភាពគ្រោះថ្នាក់នៃការស៊ាំថ្នាំ ក្នុងសហគមន៍។ ព្រះសង្ឃ ក៏មានបំណងរួមចំណែកលើកកំពស់ការយល់ដឹងពីគ្រោះថ្នាក់ នៃជំងឺគ្រុនចាញ់ ដល់ប្រជាជនចំណាកស្រុក និងជំរុញពួកគេ អោយទៅធ្វើរោគវិនិច្ឆ័យ និងទទួលការព្យាបាលអោយបានទាន់ពេល និងបង្ហាញប្រជាពលរដ្ឋអោយយល់ដឹងពីសារៈសំខាន់ នៃការសម្រាកក្នុងមុង ជ្រលក់ថ្នាំ ដើម្បីកុំឲ្យមូសខាំ។
សេចក្តីប្រកាស បានលើកឡើងថា នៅក្នុងប្រទេសកម្ពុជា មានប្រជាជនជាង ២ លាននាក់ រស់នៅតាមតំបន់ព្រៃភ្នំ ដែលជាតំបន់ប្រឈមមុខខ្ពស់ទៅនឹងការឆ្លងជំងឺគ្រុនចាញ់។
ខេត្តប៉ៃលិន ត្រូវបានគេចាត់ទុកជា ខេត្តដែលមានការប្រឈមខ្ពស់ ទៅនឹងជំងឺគ្រុនចាញ់ ហើយខេត្តនេះ មានប្រជាជនចំណាកស្រុកច្រើន មកស្វែងរកការងារធ្វើនៅតំបន់ព្រំដែនថៃ។
លោក សំ ឧសភា អ្នកសម្របសម្រួលកម្មវិធីគ្រុនចាញ់ ខេត្តប៉ៃលិន នៅអង្គការសុខភាពគ្រួសារអន្តរជាតិ បានឲ្យដឹងថា "ព្រះសង្ឃ នឹងដើរតួជាអ្នកអប់រំពីជំងឺគ្រុនចាញ់ ពីព្រោះព្រះសង្ឃ ត្រូវបានប្រជាជនកម្ពុជាភាគច្រើនជឿជាក់ និងគោរព។ ដូច្នេះសារអប់រំ ដែលត្រូវបានផ្សព្វផ្សាយដោយព្រះសង្ឃ នឹងមានឥទ្ធិពលខ្លាំងមកលើសហគមន៍ ហើយប្រជាជននឹងនាំគ្នាសំរាន្ត ក្នុងមុងជ្រលក់ថ្នាំ ដើម្បីការពារមូសដែកគោលញី ខាំ"។
លោក សំ ឧសភា បានបន្ថែមថា ព្រះសង្ឃនឹងធ្វើធម្មយាត្រាចំនួនប្រាំថ្ងៃ ដោយនិមន្តទៅតាមភូមិ និងចំការ ដែលត្រូវបានជ្រើសរើស ហើយព្រះសង្ឃ នឹងធ្វើការអប់រំជំងឺគ្រុនចាញ់ ដល់ប្រជាជនចំណាកស្រុក អ្នកចំការ និងម្ចាស់ចំការអោយយល់ដឹងពីគ្រោះថ្នាក់ នៃជំងឺគ្រុនចាញ់។ រីឯអ្នកស្ម័គ្រចិត្តភូមិអប់រំជំងឺគ្រុនចាញ់ និងអ្នកស្ម័គ្រចិត្តអប់រំជំងឺគ្រុនចាញ់ចល័ត និងធ្វើរោគវិនិច្ឆ័យ និងព្យាបាលដល់អ្នកដែលសង្ស័យកើតជំងឺគ្រុនចាញ់។
របាយការណ៍របស់មជ្ឈមណ្ឌលជាតិប្រយុទ្ធជំងឺគ្រុនចាញ់ ឆ្នាំ២០១១ បានអោយដឹងថា មានករណីជំងឺគ្រុនចាញ់ ចំនួន ៦២.៦៩០ ករណី និងបានសំលាប់ប្រជាជនកម្ពុជាអស់ ៩៤ នាក់។ តួលេខនេះ នៅខ្ពស់ជាងប្រទេសជិតខាង ដូចជា ប្រទេសឡាវ ថៃ និងវៀតណាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ