ធនាគារអឺរ៉ុបចំនួន៧អាចនឹងរលំបើមានវិបត្តិសេដ្ឋកិច្ចផ្ទុះឡើងម្តងទៀត
ចុះផ្សាយនៅថ្ងៃ៖
ស្តាប់ - ០៦:៥៥
គណៈកម្មាធិការត្រួតពិនិត្យធនាគារសហភាពអឺរ៉ុប (Committee of European Banking Supervisors) បានរកឃើញថា ក្នុងចំណោមធនាគារចំនួន ៩១ នៅក្នុងសហភាពអឺរ៉ុប មានធនាគារ ៧ ដែលមានភាពផុយស្រួយផ្នែកហិរញ្ញវត្ថុ អាចនឹងដួលរលំ ប្រសិនបើកើតមានវិបត្តិសេដ្ឋកិច្ចសាជាថ្មីទៀត។ គឺជាលទ្ធផលគួរជាទីពេញចិត្ត សម្រាប់សហភាពអឺរ៉ុប។ ក៏ប៉ុន្តែ មជ្ឈដ្ឋានទីផ្សារភាគហ៊ុនហាក់ដូចជាមិនចាប់អារម្មណ៍នឹងលទ្ធផលនេះ ទេ។
សហភាពអឺរ៉ុបបានរៀបចំធ្វើតេស្តមួយ ហៅតាមភាសាអង់គ្លេសថា Stress Tests ដើម្បីពិនិត្យមើលថា តើធនាគារនៅក្នុងសហភាពអឺរ៉ុបមានស្ថានភាពហិរញ្ញវត្ថុរឹងមាំគ្រប់គ្រាន់ ធន់នឹងវិបត្តិសេដ្ឋកិច្ច ដែលអាចនឹងកើតមាននៅថ្ងៃអនាគត ដែរឬទេ។
ក្នុងចំណោមធនាគារទាំង ៩១ ដែលគេធ្វើតេស្ត មានតែធនាគារ ៧ ប៉ុណ្ណោះ (៥ នៅអេស្ប៉ាញ ១ នៅក្រិក និង១ នៅអាឡឺម៉ង់) ដែលគេរកឃើញថា មានស្ថានភាពហិរញ្ញវត្ថុមិនសូវរឹងមាំ ហើយគួរតែបង្កើនដើមទុន ប្រមាណជា ៣ ០០០ លានអឺរ៉ូ បន្ថែមទៀត។ ធនាគារភាគច្រើនបានឆ្លងផុត Stress Tests ប្រកបដោយជោគជ័យ ដែលបណ្តាប្រទេសនៅសហភាពអឺរ៉ុប យល់ថា គឺជាដំណឹងល្អមួយ។
ក៏ប៉ុន្តែ មានអ្នកវិភាគជាច្រើនយល់ថា ការធ្វើតេស្តនេះ មិនបានធ្វើទៅដោយម៉ត់ចត់នោះទេ។ ខ្លះទៀតយល់ថា ធនាគារកណ្តាលនៃបណ្តារដ្ឋជាសមាជិកសហភាពអឺរ៉ុបត្រូវរ៉ូវគ្នា កំណត់ស្តង់ដាឲ្យបានទាប ព្រោះខ្លាចធ្វើតេស្តទៅ ឃើញមានធនាគារច្រើន ដែលមានបញ្ហា។
គួរបញ្ជាក់ថា សហភាពអឺរ៉ុបរៀបចំធ្វើតេស្តលើធនាគារនេះ នៅពេលដែលអ្នកវិនិយោគអន្តរជាតិ កំពុងតែមានមន្ទិលសង្ស័យលើសមត្ថភាពរបស់ធនាគារអឺរ៉ុប ក្រោយពីផ្ទុះវិបត្តិនៅប្រទេសក្រិក។ ថ្វីដ្បិតតែ សហភាពអឺរ៉ុប និងមូលនិធិរូបិយវត្ថុអន្តរជាតិបានចំណាយលុយរហូតដល់ទៅ ១១០ ០០០ លានអឺរ៉ូ ដើម្បីជួយក្រិកក៏ដោយ ក៏ប៉ុន្តែ គេនៅតែមានការបារម្ភខ្លាចប្រទេសផ្សេងទៀត ដូចជា ព័រទុយហ្កាល់ អៀរឡង់ និងអេស្ប៉ាញ ជាដើម ដែលកំពុងតែជំពាក់បំណុលគេច្រើនដែរនោះ អាចនឹងមានបញ្ហាដូចជាប្រទេសក្រិកដែរ។ អ្នកវិនិយោគអន្តរជាតិកំពុងបារម្ភថា ធនាគារជាច្រើននៅអឺរ៉ុប បានផ្តល់ប្រាក់កម្ចីឲ្យទៅរដ្ឋាភិបាលខាងលើនេះ ហើយធនាគារទាំងនេះ កំពុងតែប្រឈមមុខនឹងការខាតបង់ធ្ងន់ធ្ងរ ប្រសិនបើប្រទេសទាំងនេះមិនអាចសងបំណុលបាន។
ក្នុងបរិបទនេះហើយ ដែលសហភាពអឺរ៉ូបរៀបចំធ្វើតេស្តធនាគារ ដើម្បីស្តារទំនុកចិត្តពីសំណាក់អ្នកវិនិយោគបរទេសលើវិស័យធនាគារអឺរ៉ុបឡើងវិញ។ ក៏ប៉ុន្តែ នៅក្រោយពីការប្រកាសលទ្ធផលនៃការធ្វើតេស្តនេះ ទីផ្សារភាគហ៊ុនហាក់ដូចជាមិនអរសប្បាយនឹងលទ្ធផលនេះប៉ុន្មានទេ។ គេសង្កេតឃើញថា នៅល្ងាចថ្ងៃសុក្រ នៅពេលបិទការលក់ដូរ ទីផ្សារភាគហ៊ុននៅអឺរ៉ុប និងនៅសហរដ្ឋអាមេរិក មានការកើនឡើងបន្តិចបន្តួចក៏ពិតមែន ក៏ប៉ុន្តែ ភាគហ៊ុនរបស់ធនាគារមានការធ្លាក់ចុះ។ ម្យ៉ាងវិញទៀត លុយអឺរ៉ូ ដែលកាលពីព្រឹកមានការកើនឡើង ស្រាប់តែពេលបិទការលក់ដូរ បែរជាធ្លាក់ចុះទៅវិញ។
ទោះជាយ៉ាងណា គេមិនទាន់អាចធ្វើការសន្និដ្ឋានអ្វីឲ្យបានច្បាស់លាស់នៅឡើយទេ នៅពេលនេះ ពីព្រោះថា លទ្ធផលនៃការធ្វើតេស្តធនាគារ ត្រូវបានប្រកាសឲ្យដឹងនៅល្ងាចថ្ងៃសុក្រ ហើយថ្ងៃសៅរ៍ និងថ្ងៃអាទិត្យ ផ្សារភាគហ៊ុននឹងត្រូវបិទទ្វារ។ ដូច្នេះ គេត្រូវចាំដល់សប្តាហ៍ក្រោយ ដើម្បីអាចដឹងកាន់តែច្បាស់ថា តើមជ្ឈដ្ឋានទីផ្សារភាគហ៊ុនមានប្រតិកម្មអ្វីខ្លះ ចំពោះលទ្ធផលនៃការធ្វើតេស្តធនាគារនៅអឺរ៉ុបនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ