១៣០០ ពាន់លានដុល្លារ សម្រាប់គម្រោងវិនិយោគ ចំនួន ២ពាន់ នៅអឺរ៉ុប
ចុះផ្សាយនៅថ្ងៃ៖
ស្តាប់ - ០៤:៥៤
នៅពេលចូលកាន់តំណែង កាលពីខែវិច្ឆិកា លោក Jean-Claude Junckerប្រធានគណៈកម្មការអឺរ៉ុបថ្មី បានបង្ហាញផែនការវិនិយោគ ដែលមានតម្លៃ ៣១៥ពាន់លានអឺរ៉ូ។ តាមគម្រោង ទឹកប្រាក់ដ៏សន្ធឹកសន្ធាប់នេះ នឹងត្រូវប្រើសម្រាប់ជំរុញការវិនិយោគ នៅសហភាពអឺរ៉ុប គិតចាប់ពីឆ្នាំ ២០១៥តទៅ។ បច្ចុប្បន្ន ផែនការរបស់លោក Junckerបានកត់ត្រាឃើញគម្រោងវិនិយោគសរុបជាង២ពាន់ ដែលគេត្រូវធ្វើ ដើម្បីជំរុញកំណើនសេដ្ឋកិច្ចនៅទ្វីបអឺរ៉ុបដ៏ចំណាស់មួយនេះ។
ជាមួយនឹងកម្លាំងប្រកបដោយថាមពល និងឆន្ទៈ ចង់ អូសទាញសេដ្ឋកិច្ចអឺរ៉ុបឲ្យងើបដើរឡើងវិញ លោក Jean-Claude Juncker ប្រធានគណៈកម្មការអឺរ៉ុបថ្មី បានដាក់ចេញផែនការច្បាស់ គ្មានស្រពិចស្រពិល។ ផែនការ Junckerត្រូវបានគេមើលឃើញថា ជាផែនការដ៏មានមហិច្ឆតា ព្រោះវាបានត្រូវការទឹកប្រាក់រហូតដល់ទៅ ជាង ៣០០ពាន់លានអឺរ៉ូ ដើម្បីអាចកើតចេញជារូបរាងឡើង។ តាមលោកប្រធានគណៈកម្មការអឺរ៉ុប គេត្រូវប្រមូលថវិកាប្រមាណ៣១៥ពាន់លានអឺរ៉ូ ដើម្បី ជំរុញការវិនិយោគនៅសហភាពអឺរ៉ុប ក្នុងរយៈពេលបីឆ្នាំ ដោយគិតចាប់ពី ឆ្នាំ ក្រោយនេះទៅ។ តាមគម្រោង ផែនការវិនិយោគ Junckerនឹងផ្តោតសំខាន់លើគម្រោងវិនិយោគ លើផ្នែកហេដ្ឋារចនាសម្ព័ន្ធ គមនាគមន៍ ផ្នែកបច្ចេកវិទ្យា និងថាមពល ដែលបច្ចុប្បន្ននេះ កំពុងជាប់គាំង អាក់ខាន ដោយសារវិបត្តិសេដ្ឋកិច្ច នៅអឺរ៉ុប។
តាមលោក Juncker ផែនការជំរុញការវិនិយោគមានទិសដៅចំបង បង្កើតការងារ នៅអឺរ៉ុប ជាទីដែលចំនួនយុវជនគ្មានការងារធ្វើ បានកើនឡើងដល់កម្រិតមួយ គួរឲ្យព្រួយបារម្ភ។ ហើយបើសិនផែនការវិនិយោគ Junckerទទួលជោគជ័យ នោះគេនឹងបន្ត គម្រោងនេះ សម្រាប់រយៈពេល៣ឆ្នាំ តទៅមុខទៀត (ពីឆ្នាំ ២០១៨ ដល់ឆ្នាំ ២០១២)។
តាមគណៈកម្មការអឺរ៉ុប ផែនការវិនិយោគ Junckerបានទាក់ទាញអ្នកវិនិយោគជាច្រើន ដែលបានចុះឈ្មោះ ដាក់បេក្ខភាពរបស់ខ្លួន ទៅគណៈកម្មការអឺរ៉ុប។ កាលពីថ្ងៃ អង្គារកន្លងទៅ គណៈកម្មការអឺរ៉ុបបានបង្ហាញបញ្ជីគម្រោងវិនិយោគប្រមាណ ជាង២ពាន់ ដែលក្រុមអ្នកជំនាញមកពីគណៈកម្មការអឺរ៉ុប និងធនាគារវិនិយោគអឺរ៉ុប បានជ្រើសរើសសម្រាប់ផែនការវិនិយោគរបស់លោក Juncker។ ក្នុងចំណោមគម្រោងទាំងនោះ គេឃើញមាន គម្រោងសាងសង់កំពង់ផែ នៅប្រទេស ម៉ាល់ត៍ ការសាងសង់ភ្ជាប់ខ្សែកាបអុបទិក នៅក្រោមសមុទ្រពីព័រទុយហ្កាល់ ទៅប្រេស៊ីល ឬ គម្រោងសាងសង់អាកាសយានដ្ឋានថ្មី នៅអាល្លឺម៉ង់។ តាមអ្នកទទួលបន្ទុកការជំរុញកំណើនសេដ្ឋកិច្ចរបស់គណៈកម្មការអឺរ៉ុប ការចុះឈ្មោះរបស់គម្រោងវិនិយោគរាប់ពាន់ ឆ្លុះបញ្ចាំងឲ្យឃើញថា មានគំនិតជាច្រើន ដើម្បីធ្វើការវិនិយោគ ដែលជាចរន្តរុញច្រានកំណើនសេដ្ឋកិច្ចអឺរ៉ុប ប៉ុន្តែ អ្វីដែលគេខ្វះនៅពេលនេះ គឺថវិកាសម្រាប់វិនិយោគតែប៉ុណ្ណោះ។
តាមគណៈកម្មការអឺរ៉ុប គេត្រូវការទឹកប្រាក់ប្រមាណ ១៣០០ ពាន់លានអឺរ៉ូ ដើម្បីធ្វើឲ្យការវិនិយោគជាង ២ពាន់ អាចលេចចេញជារូបរាងឡើង។ អឺរ៉ុបដែលកំពុងជួបវិបត្តិសេដ្ឋកិច្ច នឹងបានទឹកប្រាក់ទាំងនោះ មកពីណា ដើម្បីជំរុញការវិនិយោគរាប់ពាន់ ដែលមានតម្លៃ រាប់សែន លានដុល្លារនោះ?
សម្រាប់ប្រធានគណៈកម្មការអឺរ៉ុប Jean-Claude Juncker ទឹកប្រាក់សម្រាប់វិនិយោគនៅអឺរ៉ុប នឹងមិនចេញផ្ទាល់ពីហោប៉ៅរបស់រដ្ឋាភិបាល ដែលជាសមាជិករបស់សហភាពអឺរ៉ុបទេ។ ហេតុផលដ៏សាមញ្ញនោះ គឺរដ្ឋាភិបាលគ្មានលុយគ្រប់គ្រាន់។ ប៉ុន្តែ យ៉ាងណាក៏ដោយ គណៈកម្មការអឺរ៉ុបនៅតែបើកទ្វារសម្រាប់ទទួលវិភាគទាន បើសិនជារដ្ឋាភិបាលណាមួយមានលទ្ធភាព។ ដូច្នេះ ដើម្បីបានទឹកប្រាក់សន្ធឹកសន្ធាប់សម្រាប់គម្រោងវិនិយោគ នៅអឺរ៉ុប គេនឹងងាកបែរទៅរកក្រុមអ្នកវិយោគទុន ដែលដាក់លុយរាប់ពាន់លានអឺរ៉ូ នៅទីផ្សារហិរញ្ញវត្ថុអន្តរជាតិ។ ដោយមើលឃើញទឹកប្រាក់របស់ក្រុមឯកជនមានសម្បូរហូរហៀ នៅក្នុងទីផ្សារ ក្រុមលោកJuncker បានខ្នះខ្នែង សម្រុករកការងារ ដើម្បីទាញយកប្រយោជន៍ពីឱកាសដ៏ពិសេសមួយនេះ។ គេបានសម្រេចបង្កើតមូលនិធិមួយ ដែលមានឈ្មោះថា មូលនិធិអឺរ៉ុបដើម្បីយុទ្ធសាស្រ្តវិនិយោគ។ មូលនិធិនេះនឹងបានប្រាក់មកពីក្រុមអ្នកវិនិយោគផ្ទាល់ និងស្ថិតនៅក្រោមការគ្រប់គ្រងរបស់ធនាគារអឺរ៉ុបដើម្បីការវិនិយោគ (BEI)។ ធនាគារអឺរ៉ុបដើម្បីការវិនិយោគអាចទៅរកខ្ចីសាច់ប្រាក់ពីទីផ្សារហិរញ្ញវត្ថុ រហូតដល់៦០ពាន់លានអឺរ៉ូ ដើម្បីយកមកផ្គត់ផ្គង់បន្ថែម។ បន្ទាប់ពីនោះ គណៈកម្មការអឺរ៉ុបគ្រោងនឹងយកលុយមួយចំនួនពីកញ្ចប់ថវិកាអឺរ៉ុប សម្រាប់ផែនការវិនិយោគJuncker។
ជារួម គណៈកម្មការអឺរ៉ុបនឹងដើរតួជាអាជ្ញាកណ្តាលដើម្បីរកទឹកប្រាក់ឲ្យក្រុមអ្នកដែលមានគម្រោងវិនិយោគ ឬផ្ទុយមកវិញ ក៏ជាអ្នកជួយរកផលចំណេញ បង្កើនសាច់ប្រាក់ឲ្យអ្នកដែលមានប្រាក់ច្រើន ប៉ុន្តែ មិនដឹងយកទៅប្រើទៅលើអ្វី។ ដើម្បីបញ្ចុះបញ្ចូលក្រុមអ្នកមានលុយឲ្យ ដាក់ទុនលើគម្រោងវិនិយោគ គណៈកម្មការបានលើកឡើងពីការកសាងភាពជឿជាក់ និងភាពច្បាស់លាស់របស់គម្រោងវិនិយោគនីមួយៗ ពោលគឺបើទោះបីជាគម្រោងមានភាពប្រថុយប្រថានក៏ពិតមែន ប៉ុន្តែ អ្នកវិនិយោគនឹងត្រូវបានទទួលការធានាមួយថា ពួកគេនឹងខាតបង់ ទេ បើសិនគេដាក់ប្រាក់វិនិយោគ នៅក្នុងផែនការវិនិយោគJuncker។ ដើម្បីបង្កើតភាពជឿជាក់សម្រាប់អ្នកវិនិយោគ គេចាប់ផ្តើមដំបូងតាំងពីលក្ខខណ្ឌជ្រើសរើសគម្រោងវិនិយោគឡើង។ តាមគណៈកម្មការអឺរ៉ុប ដើម្បីជៀសវាងភាពលំអៀង រដ្ឋាភិបាលសមាជិកអឺរ៉ុបគ្មានសិទ្ធិលូកដៃ ចូលក្នុងដំណើរការជ្រើសរើសគម្រោងវិនិយោគទេ។ អ្នកជ្រើសរើសគម្រោង គឺជាក្រុមអ្នកជំនាញឯករាជ្យ និងមិនប្រកាន់បក្សពួក។ លើសពីនោះ គម្រោងដែលត្រូវជ្រើសរើស ទៀតសោត នឹងមានទាំងទាំងនៅក្នុងប្រទេសអ្នកមាន ឬអ្នកមិនសូវមាន នៅអឺរ៉ុប និងត្រូវតែជាគម្រោងអាទិភាព ដែលអាចលេចចេញជារូបរាង និងផ្តល់ផល ក្នុងរយៈពេល ដ៏ឆាប់មួយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ