គណៈកម្មការអឺរ៉ុបថ្មី គណៈកម្មការសង្គ្រោះ ចាប់ចូលបំពេញការងារ
ដល់វេលាដែលត្រូវមូរដៃអាវ លាត់ជើងខោធ្វើការហើយ ! គណៈកម្មការអឺរ៉ុបថ្មី ដឹកនាំដោយលោក Jean-Claude Juncker ត្រូវចូលបំពេញតួនាទីចាប់ពីថ្ងៃសៅរ៍ទី ១ វិច្ឆិកានេះ ជាមួយនឹងអាទិភាព ផ្តល់សន្ទុះកំណើនសេដ្ឋកិច្ចនិងការងារ។ “គណៈកម្មការអឺរ៉ុបថ្មីត្រូវឆក់យកសំណាងចុងក្រោយឱ្យបាន ក្នុងការរុញច្រានអឺរ៉ុបមានខិតចូលគ្នា កាត់បន្ថយភាពអត់ការងារ ឬបើមិនដូច្នោះទេមានន័យថាអឺរ៉ុបបរាជ័យ” ! នេះជាសេចក្តីប្រកាសរបស់ប្រធានគណៈកម្មការអឺរ៉ុបនៅចំពោះមុខសភាសហភាព។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥០
នៅក្នុងសេចក្តីថ្លែងការណ៍ បញ្ជាក់ពីចាប់ផ្តើមអាណត្តិ៥ឆ្នាំជាប្រធានគណៈកម្មការអឺរ៉ុបលោក Jean-Claude Juncker បានសន្យាផ្តល់សន្ទុះចាប់ផ្តើមថ្មី ដោយយល់ថាមានឧបសគ្គជាច្រើនដែលអឺរ៉ុបត្រូវជំនះឱ្យបាន ដោយគ្មានបង្អង់។
ស្ថានភាពសេដ្ឋកិច្ច និងសង្គម នៅក្នុងរង្វង់សហភាពអឺរ៉ុបដុនដាបយ៉ាងខ្លាំង ! គណៈកម្មការថ្មីមានអាទិភាពច្រើនត្រូវដោះស្រាយ ៖លើឆាកអន្តរជាតិ អឺរ៉ុបមានវិញ្ញាសា “វិបត្តិអ៊ុយក្រែន ភាពតានតឹងជាមួយរុស្ស៊ី វិបត្តិនៅដើមបូព៌ា និងនៅអាហ្វ្រិក កំពុងរង់ចាំ ! ខាងផ្នែកសេដ្ឋកិច្ច គណៈកម្មការអឺរ៉ុបចាំបាច់ត្រូវតែបំផ្លែងផែនការសង្គ្រោះអឺរ៉ូទៅជាការស្វែងរកឥទ្ធិពលនយោបាយ។
ផែនការរបស់គណៈកម្មការថ្មីដឹកនាំដោយលោកJunker គឺ សេដ្ឋកិច្ច ៖ ត្រួតពិនិត្យថវិការរដ្ឋជាសមាជិកនៅ និងការវិនិយោគក្នុងទំហំទឹកប្រាក់ ៣០០ពាន់លានអឺរ៉ូសម្រាប់រយៈពេលបីឆ្នាំ។ ប្រមុខដឹកនាំបក្សនយោបាយជាអ្នកសេរីប្រជាធិបតេយ្យរង់ចាំបំផុតផែនការនេះ ដោយបានព្រមានជាមុនថា “មិនមែនគ្រាន់តែបង្កើនទុននៅធនាគារវិនិយោគអឺរ៉ុបទៅ គេអាចដើរចេញពីវិបត្តិទេ ! ត្រូវតែធ្វើអ្វីដែលមានមហិច្ឆតាខ្លាំង ដៅចំលើចំណុចដែលអឺរ៉ុបមិនសូវត្រូវគ្នាដូចជាខាងផ្នែកថាមពល ទូរគមនាគមន៍ អ៊ីនធ័រនែត ទីផ្សារភាគហ៊ុន ។ល។ និង។ល។” ជាទូទៅ ក្រុមអ្នកសេរីនិយម សង្គមនិយម ឬ ស្តាំនិយម បានគាំទ្រផែនការរបស់គណៈកម្មការអឺរ៉ុបថ្មី តែខាងអ្នកបរិស្ថានប្រឆាំង។
តើគម្រោងវិនិយោគដ៏ធំនេះ អាចឆ្លើយតបបានទៅនឹងការរង់ចាំរបស់អឺរ៉ុបឬអត់ ?! គេនឹងបានដឹងចម្លើយក្នុងពេលដ៏ឆាប់ៗ ព្រោះគណៈកម្មការគ្រោងនឹងបង្ហាញផែនការវិនិយោគ៣០០ពាន់លានអឺរ៉ូ ឱ្យមុនពេលបុណ្យណូអែល ឬគ្រិស្មាក់២០១៤នេះ។
គណៈកម្មការនឹងបើកប្រជុំពេញអង្គជាលើកទីមួយ នៅថ្ងៃពុធ។ នៅថ្ងៃអង្គារ គណៈកម្មការទទួលបន្ទុកផ្នែកកំណើនសេដ្ឋកិច្ចនិងការប្រកួតប្រជែង នឹងបង្ហាញអំពីការព្យាករណ៍សេដ្ឋកិច្ចចុងឆ្នាំ របស់អឺរ៉ុប និងជាឱកាសសើរើមើលឱនភាពថវិការបស់ប្រទេសជាសមាជិកផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ