រុស្ស៊ីខឹងច្រឡោតរឿងអាមេរិកបញ្ជូនទាហានទៅជួយហ្វឹកហ្វឺនកងទ័ពអ៊ុយក្រែន
ទ័ពឆ័ត្រយោងអាមេរិកាំង ចំនួន៣០០នាក់ ទើបនឹងត្រូវបានបញ្ជូនឲ្យទៅបោះទីតាំងឈរជើង នៅឯ វាលវង់ល្បងពិសោធន៍ លើដែនដីខេត្ត Kvov ប៉ែកខាងលិចប្រទេសអ៊ុយក្រែន ដែនដីល្បីខាង ជាតិនិយម នៅជិតព្រំដែនប៉ូឡូញ ដើម្បីបង្វឹកបង្ហាត់ពួកទាហាននៃកងឆ្មាំជាតិអ៊ុយក្រែន សម្រាប់រយៈពេល៦ខែ។ សកម្មភាពនេះបានញ៉ាំងឲ្យមានប្រតិកម្មយ៉ាងក្តៅក្រហាយពីសំណាក់ថ្នាក់ដឹកនាំរុស្ស៊ី។
ចុះផ្សាយនៅថ្ងៃ៖
ស្តាប់ - ០១:៥៧
ក្រសួងការបរទេសរុស្ស៊ី ក្នុងសេចក្តីថ្លែងការណ៍ ចេញល្ងាចថ្ងៃ១៧មេសា បានសំដែង នូវ “ក្តីកង្វល់រស់រវើក” ចំពោះវត្តមានយោធាអាមេរិកាំង នៅក្នុងទឹកដីអតីតសាធារណរដ្ឋសូវៀត នេះ ដែលកំពុងផុងខ្លួន ក្នុងជម្លោះប្រដាប់អាវុធ ទល់នឹងពួកផ្តាច់ទឹកដីរុស្ស៊ីនិយម នៅ តំបន់ខាងកើតអ៊ុយក្រែន។ ក្នុងជម្លោះនេះ តាមតួលេខចុងក្រោយរបស់អ.ស.ប. នា រយៈពេល១ឆ្នាំកន្លងទៅ មានមនុស្សធ្លាក់ខ្លួនស្លាប់អស់ ៦.២០០នាក់ទៅហើយ។
ក្រសួងការបរទេសរុស្ស៊ីបានលើកឡើងថា អាកប្បកិរិយារបស់ក្រុងវ៉ាស៊ីនតោន ដែលលើកទឹកចិត្តផែនការពួកសងសឹកនិយមនៅក្រុងគៀវ មុខជានឹងបង្ក ឲ្យកើតមានឡើងជា “ថ្លុកឈាមថ្មីពុំខាន” នៅតំបន់ខាងកើតអ៊ុយក្រែន។ តើពួកទាហានអាមេរិក ដែលខំយាត្រា មកពីនាយមហាសមុទ្រនៅឯចំហៀងម្ខាងទៀត នៃផែនដីសោះ គេនឹងបង្រៀនអ្វី ដល់ពួកយោធាអ៊ុយក្រែន? បង្រៀនឲ្យសម្លាប់តទៅទៀតរាល់នរណាដែលនិយាយភាសារុស្ស៊ី ឬក៏យ៉ាងណា? នេះគឺជាការចោទសួរដោយក្តៅក្រហាយ របស់ក្រសួងការបរទេសរុស្ស៊ី ដោយចោទអាមេរិកថា បានបើកកម្មវិធីហ្វឹកហ្វឺននេះ គឺដើម្បីបង្រៀនឲ្យទាហានអ៊ុយក្រែនចេះប្រើអាវុធទំនើបៗរបស់អាមេរិក ដែលជា “ការបង្កលក្ខណៈជំហានទី១ឆ្ពោះទៅបញ្ជូនអាវុធទៅឲ្យកងទ័ពអ៊ុយក្រែន”។
ទាហានទ័ពឆ័ត្រយោងអាមេរិកនឹងចាប់ផ្តើមបើកការហ្វឹកហ្វឺន ពួកទាហាន ៩០០នាក់ នៃកងឆ្មាំជាតិអ៊ុយក្រែន ដែលស្ថិតនៅក្រោមបង្គាប់ក្រសួងមហាផ្ទៃ ហើយដែលផ្សំឡើងជាពិសេស គឺពីពួកយុទ្ធជនស្ម័គ្រចិត្ត ដែលជាចំណែកមួយ នៃនគរបាលស្វ័យការពារទីលាន Maidan ទីលានឯករាជ្យជាបេះដូងក្រុងគៀវ ប្រែទៅជាឈ្មោះ ចលនាតវ៉ាប្រឆាំង ពោរពេញទៅដោយអំពើហិង្សាបង្ហូរឈាម អស់ជាង៣ខែរហូតឈានទៅផ្តួលរំលំរដ្ឋាភិបាលរបស់លោកប្រធានាធិបតីយ៉ានូកូវិច កាលពីថ្ងៃទី២២កុម្ភៈឆ្នាំ២០១៤៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ