ខួបមួយឆ្នាំនៃការកាត់ទឹកដីគ្រីមេពីអ៊ុយក្រែនទៅភ្ជាប់នឹងប្រទេសរុស្ស៊ី
ថ្ងៃ១៨មីនា គម្រប់១ឆ្នាំគត់ តាំងពីទឹកដីគ្រីមេ ត្រូវបានលោកពូទីនកាត់យកពីអ៊ុយក្រែនមកភ្ជាប់នឹងប្រទេសរុស្ស៊ី។ សន្ធិសញ្ញាស្តីអំពីការភ្ជាប់នេះ ត្រូវបានចុះហត្ថលេខាយ៉ាងឧឡារឹក នៅវិមាន ក្រេមឡាំងថ្ងៃ១៨មីនាឆ្នាំ២០១៤ ដោយលោកប្រធានាធិបតីរុស្ស៊ីពូទីន និងមេដឹកនាំគ្រីមេ យោងទៅលើលទ្ធផលប្រជាមតិនៅទៀបកោះនោះ គឺបន្ទាប់ពីសំណូមពរសុំភ្ជាប់នេះ បានទទួលការអនុម័ត ដោយសភាទាំងពីរថ្នាក់នៃរដ្ឋសភារុស្ស៊ី។ ប៉ុន្តែ បស្ចិមលោក ចោទរុស្ស៊ីថា រំលោភលើបូរណភាពដែនដីអ៊ុយក្រែន និងច្បាប់អន្តរជាតិ ហើយដាក់ទណ្ឌកម្មរុស្ស៊ី រហូតមកទល់សព្វថ្ងៃ។ ក្រុងម៉ូស្គូពីចំណែកខ្លួន ផ្អែកលើធម្មនុញ្ញអ.ស.ប. ស្តីអំពី សិទ្ធិស្វ័យកំណត់ របស់ប្រជាជន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៤
ជាបឋម គួររំលឹកអំពីលទ្ធផលប្រជាមតិនៅទៀបកោះគ្រីមេ ដែលបានប្រព្រឹត្តទៅថ្ងៃ ១៦មីនាឆ្នាំ២០១៤ ៖ បណ្តាជនទៀបកោះនេះ ដល់ទៅ៩៦,៧៧% បានបោះឆ្នោតគាំទ្រដល់ការដកខ្លួនចេញពីរដ្ឋអ៊ុយក្រែន ហើយភ្ជាប់ទឹកដីនេះ មកនឹងរុស្ស៊ីវិញ ក្រោយពីវាត្រូវបានអំណាច សូវៀតផ្តាច់ចេញពីប្រទេសកំណើតរុស្ស៊ី អស់៦០ឆ្នាំ ទៅនៅជាមួយអ៊ុយក្រែន។
លោកប្រធានាធិបតីរុស្ស៊ីពូទីន បានថ្លែងក្នុងពិធីចុះហត្ថលេខាដ៏មហោឡារឹកនោះថា ៖
-ដួងចិត្តប្រជាជនរស់នៅគ្រីមេ គឺតែងដក់ជាប់ជានិច្ចទៅដោយមនោសញ្ចេតនាដែលថាគ្រីមេ ជាភាគមួយមិនអាចផ្តាច់ចេញបានពីប្រទេសរុស្ស៊ី ហើយប្រជាមតិដែលបានប្រព្រឹត្តទៅ ដោយសុចរិត ក្នុងតម្លាភាពពេញទី សឲ្យឃើញថាអ្នកស្រុកគ្រីមេ ចង់រស់នៅក្នុងប្រទេសរុស្ស៊ី។
-ប្រទេសរុស្ស៊ីទាំងមូល កោតស្ញើបនឹងភាពក្លាហាន របស់បណ្តាជនគ្រីមេ អារកាត់វាសនាខ្លួន។
-គោលជំហររឹងមាំនៃនយោបាយក្រៅប្រទេសរុស្ស៊ី គឺផ្អែកលើភាពប្តេជ្ញារបស់មនុស្ស រាប់លាននាក់ នៃទៀបកោះនោះ រួមរស់ក្នុងឯកភាពធ្លុងមួយទូទាំងជាតិរុស្ស៊ី។
-ប្រាកដណាស់ដែលរុស្ស៊ី នឹងប៉ះទង្គិច ជាមួយការប្រឆាំងនៃកម្លាំងនៅក្រៅ ប៉ុន្តែរុស្ស៊ីត្រូវហ៊ានសម្រេច តើខ្លួនត្រៀមឬទេ ការពារយ៉ាងខ្ជាប់ខ្ជួនផលប្រយោន៍ជាតិរបស់ខ្លួន ឬមួយ ត្រូវតែចុះញ៉មរាថយ ទាំងមិនដឹង តើរាថយដល់ទីណាឡើយ - លោកពូទីនគូសបញ្ជាក់។
ថ្ងៃនេះ ពួកអ្នកតំណាងរាស្ត្រនៃសភាឌូម៉ា សម្រេចថាបិទសម័យប្រជុំពេញអង្គ នៅម៉ោង ៤រសៀល ទៅហើយ ដើម្បីប្រញាប់ទៅចូលរួម ក្នុងការសំដែងសិល្បៈ នៅលើទីលានក្រហម មុខវិមានក្រេមឡាំង ក្រោមបាវចនាថា យើងរួមរស់ជាមួយគ្នា ឧទ្ទិសដល់ខួប១ឆ្នាំ នៃការភ្ជាប់ទឹកដីគ្រីមេ មកនឹងរុស្ស៊ីវិញ។
ក្នុងឱកាសខួបនេះ ក្រសួងការបរទេសស.រ.អា. ចេញសេចក្តីថ្លែងការណ៍ថា ទណ្ឌកម្មទល់នឹងរុស្ស៊ីនឹងបន្តគ្មានទីបញ្ចប់ឡើយ ដរាបណាដែលរុស្ស៊ី មិនបង្វែរគ្រីមេ ទៅឲ្យអ៊ុយក្រែនវិញទេ។
វិមានក្រេមឡាំង តាមរយៈអ្នកនាំពាក្យខ្លួន បានប្រតិកម្មថា គ្រីមេជាដែនដីរុស្ស៊ី ហើយមិនបណ្តោយឲ្យនរណាលូកដៃចូលកិច្ចការផ្ទៃក្នុងរបស់រុស្ស៊ីឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ